ئه‌ڤرۆنيوز:

دبه‌ياننامه‌كا هه‌ڤپشك يا هه‌ردو فراكسيۆنێن پارتى ديموكراتى كوردستان وئيكه‌تى نيشتمانى كوردستان ل په‌رله‌مانێ عيراقێ، ب توندى هێرشا ئيرانى يا ئه‌ڤرۆ ل سه‌ر وه‌لاتيێن كوردێن رۆژهه‌لاتا كوردستانێ ل كويه‌ شه‌رمزار دكه‌ن كو تێدا چه‌ندين وه‌لاتيێن رۆژهه‌لاتا ئيرانێ شه‌هيد وبرينداربووين.

د وێ به‌يانناما هه‌ڤپشك دا داخواز هاته‌ كرن كو ئه‌و جۆره‌ هێرشه‌ بهێنه‌ راگرتن وپرسه‌ وسه‌ره‌خوه‌شيا خوه‌ ژى ل كه‌سوكارێن شه‌هيدان كر وهيڤيا چاكبوونێ بۆ برينداران خواست.

ئه‌ڤرۆنيوز:

فراكسيۆنا پارتى ديموكراتى كوردستان ل په‌رله‌مانێ كوردستانێ هێرشا ئه‌ڤرۆ يا كۆمارا ئيسلامى يا ئيرانى ل سه‌ر باره‌گايێن حزبا ديموكراتا ئيرانێ (حدكا) وحزبا ديموكراتا كوردستانا ئيرانێ (حدك) شه‌رمزار دكه‌ت.

فراكسيۆنا پارتى دبه‌ياننامه‌كێ دا راگه‌هاند” باره‌گايێن هه‌ردو حزبێن ديموكرات (حدكا) و(حدك) ل باژێرێ كويه‌ ژلايێ هێزێن له‌شكرى يێن كۆمارا ئيسلامى يا ئيرانى هاتن توپبارانكرن، فراكسيۆنا پارتى ديموكراتى كوردستان ل په‌رله‌مانێ كوردستانێ وێ هێرشێ شه‌رمزار دكه‌ت كو به‌رۆڤاژى هه‌موو قانوون ورێككه‌فتنێن نێڤده‌وله‌تى يه‌”.

به‌لاڤكر ژى” به‌رى ئه‌ڤرۆ ئێكشه‌مبى 8/9/2018 باره‌گايێن هه‌ردو حزبێن ديموكرات (حدكا) و(حدك) ل باژێرێ كويه‌ ژلايێ هێزێن له‌شكرى يێن كۆمارا ئيسلامى يا ئيرانى هاتن توپبارانكرن كو دئه‌نجامدا چه‌ند كه‌سه‌ك شه‌هيد وبرينداربوون”.

دياركر” ئه‌م ل فراكسيۆنا پارتى ديموكراتى كوردستان ل په‌رله‌مانێ كوردستانێ وێ هێرشێ شه‌رمزار دكه‌ين كو به‌رۆڤاژى هه‌موو قانوون ورێككه‌فتنێن نێڤده‌وله‌تى يه‌ وب ده‌ست درێژيه‌كا راسته‌وخوه‌ بۆ سه‌ر ئاخ وسه‌روه‌ريا وه‌لاتێ خوه‌ دزانين، دهه‌مان ده‌م دا هه‌ڤخه‌مى وسه‌ره‌خوه‌شيا خوه‌ ب سه‌ركردايه‌تيا هه‌ردو حزبێن ديموكرات وكه‌سوكار وهه‌ڤالێن شه‌هيدان دگه‌هينين وهيڤيا زووچاكبوونێ ژى بۆ برينداران دخوازين”.

ئه‌ڤرۆنيوز:

سه‌رۆك مه‌سعود بارزانى ل دۆر هێرشا ئه‌ڤرۆ شه‌مبيێ 8/9/2018 يا كۆمارا ئيسلامى يا ئيرانى ل سه‌ر باره‌گايێ حزبا ديموكرات ل كويه‌، په‌يامه‌ك به‌لاڤكر.

سه‌رۆك بارزانى دپه‌ياما خوه‌ دا دبێژيت” ب هێرشا ب مووشه‌كان وتوپبارانكرنا كۆمارا ئيسلامى يا ئيرانى بۆ سه‌ر باره‌گايێ حزبا ديموكرات ل باژێرێ كويه‌ گه‌له‌ك يێ نيگه‌ران وخه‌مبارم ب تايبه‌ت كو زيانه‌كا مه‌زن يا گيانى ومادى ل دووڤ خوه‌ هێلا، دده‌مه‌كى دا ڤێ هێرشێ شه‌رمزار دكه‌م، سه‌ره‌خوه‌شيا خوه‌ ئاراسته‌ى كه‌سوكارێن شه‌هيدێن وێ هێرشێ دكه‌م وهيڤيا چاكبوونێ بۆ برينداران دخوازم”.

سه‌رۆك بارزانى دپه‌ياما خوه‌ دا گۆت ژى” داخوازێ ژ هه‌موو لايه‌كى دكه‌م كو هه‌رێما كوردستانێ نه‌بيته‌ مه‌يدانا ململانێ، چونكى هه‌رێمێ ب خوه‌ كێشه‌ وته‌حه‌ديات وگه‌فێن مه‌زن ل به‌رده‌م يێ هه‌ين، ب پێدڤى ژى دزانم بۆ هه‌موو لايه‌كى رابگه‌هينم كو كێشا گه‌لێ كورد ب توندوتيژيێ وكوشتنێ وتوپبارانكرنێ چاره‌سه‌ر نابيت ورێ وشێوازێن ئاشتيانه‌ باشترين چاره‌سه‌رى نه‌ بۆ هه‌موو كێشان”.