ئه‌ڤرۆنيوز:
مالپه‌رێ https://www.accuweather.com كو مالپه‌ره‌كێ تايبه‌ته ب ره‌وشا سه‌قاى ڤه ل جيهانێ، به‌لاڤكر كو ل رۆژا 6/11/2018 پێله‌كا بارانێ دێ پارێزگه‌هێن هه‌رێما كوردستانێ ڤه‌گريت.
وى مالپه‌رى دياركر ژى كو ئه‌و پێلا بارانێ دێ بۆ ده‌مێ حه‌فت رۆژان يا به‌رده‌وام بيت.
ئه‌ڤرۆنيوز:
خۆلا چارێ يا په‌رله‌مانێ كوردستانێ ئه‌ڤرۆ چارشه‌مبى 31/10/2018 دووامهى روونشتنا خوه ئه‌نجامدا.
ل دووڤ رۆهنكرنه‌كا ده‌سته‌يا سه‌رۆكاتيا په‌رله‌مانێ كوردستانێ، به‌رنامێ كارێ روونشتنا ئه‌ڤرۆ دو ته‌وه‌ر ب خوه‌ڤه گرتن يێ ئيكێ ب دووماهى ئينانا خۆلا چارێ يا په‌رله‌مانێ كوردستانێ ل دووڤ مادێ 6 ژ په‌يره‌وێ ناڤخوه‌يێ په‌رله‌مانێ كوردستانێ ويێ دويێ په‌يڤا جێگرێ ئێكێ يێ سه‌رۆكێ په‌رله‌مانێ ب هه‌لكه‌فتا ب دووماهى هاتنا خۆلا چارێ يا په‌رله‌مانێ كوردستانێ.
ئه‌ڤرو سپێدێ 31/10/2018 فه‌رهاد ئه‌مین ئه‌تروشی پارێزگه‌رێ دهوكێ پێشوازیا (هاكان كاراجای) كونسلێ گشتی یێ وه‌لاتێ توركیا ل هه‌رێما كوردستانێ و شاندێ دگه‌لدا كر ,
د هه‌ڤدیتنه‌كێ دا به‌راهیێ پارێزگه‌رێ دهوكێ خوشحالیا خو ب سه‌ره‌دانا نافبری و شاندێ دگه‌لدا دیار كر و هیڤی خواست كو سه‌ره‌دانه‌كا مفا دار بیت بو پێشڤه‌برنا هه‌می ره‌نگێن په‌یوه‌ندیان دنافبه‌را وه‌لاتێ توركیا و كوردستانێ و عێراقێ بگشتی و ئه‌ف سه‌ره‌دانا ببیته ئه‌گه‌ر و رێ خوشكه‌ر بو نه‌هێلانا هه‌ر ئاسته‌نگه‌كا هه‌بیت ,
هه‌روه‌سا پارێزگه‌رێ دهوكێ سوپاسیا وه‌لاتێ توركیا كر بو پشته‌ڤانیا وان یا به‌رده‌وام بو ئاواره په‌نابه‌را و لهه‌می ده‌مێن ته‌نگاڤیا كو ده‌ڤه‌ر كه‌تبیته تێدا .
دیسان ده‌ست خوشی ل كونسولیا توركیا كر بو ڤه‌كرنا نڤیسینگه‌ها دانا ڤیزی ل باژێرێ دهوكێ كو بویه بارسڤكیه‌ك بو هاولاتیان و هیڤی خواست به‌رده‌وام بن ل سه‌ر ڤان خزمه‌تا ,
دلایه‌كی دیدا پارێزگه‌رێ دهوكێ به‌حسی چاوانیا خورتكرنا تیكه‌لیێن ئابوری و بازركانی دنافبه‌را وه‌لاتێ توركیا و كوردستانێ ب گشتی و پارێزگه‌هێ ب تایبه‌تی كر و دیار كو وه‌كو كارگێریا پارێزگه‌ها دهوكێ دبزاڤێن به‌رده‌وام دایه‌بو ڤه‌كرنا هه‌می رێكێن سه‌ره‌كی دنافبه‌را دهوك و میسل دا بو هندێ بزاڤا بازرگانێ خورت تر ببیت وگوت : بێگومان ب ڤه‌كرنا ڤان رێكا دێ بزاڤا بازرگانیا توركیا كوردستانێ و ئێراقێ پێتر ب بزاڤ كه‌فیت و زێده‌تر لێهێت ,
ژلایێ خوڤه كونسلێ وه‌لاتێ توركیا دیار كر كو پارێزگه‌ها دهوكێ بو وه‌لاتێ توركیا گه‌له‌ك یا گرنگه و كارگێریا پارێزگه‌هێ و جه‌نابێ پارێزگاری گه‌له‌ك هاریكار و پشته‌ڤان بویه بو خورتكرنا تێكه‌لیان و نه‌هێلانا ئاسته‌نگان ل خالێن سنوری ,,
دیسان كونسلێ وه‌لاتێ توركیا دیار كر كو ژبلی تێكه‌لیێن ئابوری و بازرگانی تێكه‌لیێن خزمانیێ و مروڤانیێ گه‌له‌ك دخورتن دنافبه‌را هه‌ردو وه‌لاتا دا ,
لدیماهیێ هه‌ردو لا داكوكی ل سه‌ر باشتر كرنا بزاڤا بازرگانی و ئابوری و نه‌هێلانا ئاسته‌نگا كر ل خالێن سنوری وتایبه‌ت خالا سنوری یا سه‌رزیری كو حكومه‌تا هه‌رێما كوردستانێ دبزاڤێن كاری بو دانانا دیزاینێ بو فره‌هكرن و خوشكرنا رێكا نافبری بێخه‌مه‌ت خورت بونا بزاڤا بازرگانی ل وێ خالێ ژی ,
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ سێشه‌مبى 31/10/2018 پێشوازى ل وى گه‌نجێ ب ناڤێ خۆشناو ئه‌نوه‌ر كو كادرێ پارتى يه وژلايێ ئاسايشا ئێكه‌تى نيشتمانى كوردستان ڤه هاتبوو ره‌ڤاندن وپاشى هاته ئازادكرن.
رۆژا ئه‌ينيێ 26/10/2018 ل ده‌ڤه‌را سه‌روچاوه ل سنورێ ئيدارا راپه‌رين، خۆشناو ئه‌نوه‌ر ژلايێ هێزه‌كا ئاسايشا ئێكه‌تيێ هاته ره‌ڤاندن.
ئو‌مێد خۆشناو، سه‌رۆكێ فراكسيۆنا پارتى ل په‌رله‌مانێ كوردستان ل رۆژا 28/10/2018 دنڤيسينه‌كێ دا كو ل سه‌ر به‌رپه‌رێ خوه يێ فه‌يسبووكى به‌لاڤكربوو دياركر”ره‌فتارا به‌عسيانه يا ده‌زگه‌هێن ئه‌منى ل سنورێ ئيدارا راپه‌رين، پشكه‌كه ژ وێ تيرۆا هزرى ده‌رحه‌قى كادر وئه‌ندامێن پارتى ل وى سنورى دهيته كرن”.
گۆت ژى” ل وێ رۆژا ئه‌و كادرێ پارتى بريه به‌رامبه‌ر دادگه‌هێ، ب شێوازه‌كى بر وه‌كو كه‌سه‌كێ تيرۆرست ره‌فتار دگه‌لدا كربوو وچاڤێن وى گرتبوون وسه‌رێ وى ژى داپۆشى بوو، دده‌مه‌كى دا كاره‌كێ وه‌سا بۆ به‌عسيان نه‌چوو سه‌رى، له‌وما پێدڤيه ئه‌نجامده‌رێن وى شێوازه كارى پشت راستبن بۆ وان ناچيته سه‌رى”.
ئه‌ڤرۆ نیوز ، زنار تۆڤى:
هونه‌رمه‌ند حاجى زاخۆیى د دیداره‌كێ دا بۆ ئه‌ڤرۆ نیوز دیاركر: كو نوكه ئه‌و مژۆلى چێكرنا دو سترانایه، كو سترانه‌ك ژ وان ل سه‌ر پێشمه‌رگه یه، هه‌روه‌سا سترانا دیتر ل سه‌ر نه‌ورۆزێ یه، كو ژ په‌یڤێن حاجى ئه‌ترۆشى و ژ ئاوازا حاجى زاخۆیى ب خوه‌یه، ل ڤان نێزیكان دێ هه‌ردو سترانان تۆمار كه‌ت، هه‌ر چه‌نده نوكه به‌رهه‌مه‌كێ باش ژى ل به‌ر ده‌ستێ من هه‌یه، لێ ژ ئه‌گه‌رێ ڤان روودانێن ل كوردستانێ چێبووین من ئه‌و به‌رهه‌م تۆمارنه‌كریه، لێ هندى د ژیانێ دا مابم دێ خزمه‌تێ خه‌لكێ كوردستانێ كه‌م.
ناڤهاتى زێده‌تر گۆت: چێكرنا كلیپێ ل كوردستانێ گه‌له‌ك گرنگیا خوه هه‌یه، چونكى سرۆشتێ كوردستانێ ب خوه هه‌موو وه‌كو كلیپه، له‌وما باشتره هونه‌رمه‌ند كلیپێ دناڤا سرۆشتى دا چێكه‌ت، هه‌روه‌سا دخوازیت كو هونه‌رمه‌ندێن كورد نه‌چنه ژ ده‌رڤه كلیپان چێكه‌ن، چونكى كوردستان ژ هه‌موو جهان خۆشتره بۆ چێكرنا كلیپان.
حاجى گۆت ژى: د هه‌موو به‌رهه‌مێن خوه دا من هنده‌ك سترانێن فولكلۆرى یێ باب و باپیران به‌لاڤكرینه، ئه‌ڤه وه‌كو هێڤێ نه‌كێیه و چو جار نه‌شێم بێى سترانا فولكلۆرى بژیم، ب تنێ مه‌ره‌ما ژ سترانگۆتنێ ئه‌وه كو ئه‌ز خزمه‌تا وه‌لاتێ خوه بكه‌م، لێ دیسا ژى هه‌كه هاریكاریا من هاتبا كرن، داشێبن گه‌له‌ك كارێن باشتر پێشكێشى خه‌لكێ خوه و حه‌ز ژێكه‌رێن سترانا كوردى كه‌ین، دیسا په‌یامى وى بۆ سترانبێژێن گه‌نج ئه‌وه كو ئه‌و ژ كورده‌واریێ و ژ سترانێن فولكلۆرى ده‌ست پێ بكه‌ن، بلا چو جاران هێڤێنێ باب و باپیران ژبیر نه‌كه‌ن و به‌رێ خوه نه‌ده‌نه هونه‌رێ بیانى.
ئه‌ڤرۆنيوز:
كورێ شاه فه‌يسه‌ل ئێكه‌مين شاهێ عيراقێ، شازاده محه‌مه‌د ئه‌لهاشمى ل سه‌ر داخوازيا وى ل ئه‌نقه‌ره هاته ڤه‌شارتن.
ب به‌رهه‌ڤبوونا هژماره‌كا به‌رپرسێن توركى وخووشكا وى، شازاده محه‌مه‌د ل گۆرستانا كارشياكا ل ئه‌نقه‌ره هاته ڤه‌شارتن.
شازداه محه‌مه‌د كورێ شاه فه‌يسه‌لى ب وێ چه‌ندێ يێ ناڤدار بوو كو گه‌له‌ك حه‌ز ژ توركيا دكر، ل رۆژا 19/10/2018 دژيێ 88 ساليێ دا ل ئه‌مريكا وه‌غه‌ركر ول سه‌ر داخوازيا وى ل ئه‌نقه‌ره هاته ڤه‌شارتن.
ئه‌ڤرۆنيوز:
جێگرێ سه‌رۆكێ جڤاتا پارێزگه‌ها سلێمانيێ ژ پشكا بزاڤا گۆران ئه‌ڤرۆ چارشه‌مبى 31/10/2018 ده‌ست ژكارى كێشا.
ئه‌نوه‌ر تاهر، جێگرێ سه‌رۆكێ جڤاتا پارێزگه‌ها سلێمانيێ، ل دووڤ مالپه‌رێ كوردستان تى ڤى، ئه‌ڤرۆ ده‌ست ژكاركێشانا خوه پێشكێشى جڤاتا پارێزگه‌هێ كر وداخوازكر وه‌كو ئه‌ندامه‌كێ جڤاتا پارێزگه‌هێ درێژيێ ب كارێ خوه بده‌ت.
ئه‌ڤرو پشتی نیڤرو 30-10-2018 فه‌رهاد ئه‌مین ئه‌تروشی پارێزگه‌رێ دهوكێ پێشوازیا (سه‌یدو چه‌تو) سه‌روكێ جڤاتا پارێزگه‌ها نه‌ینه‌وا كر.
دهه‌ڤدیتنه‌كێدا به‌حسێ ره‌وشا پارێزگه‌ها نه‌ینه‌وا وهه‌ڤكاری وهاریكاریێ دناڤبه‌را پارێزگه‌هێن دهوك ونه‌ینه‌وا كو باشتر خزمه‌تا وه‌لاتیێن هه‌ردوو پارێزگه‌ها بهێته كرن هاته كرن.
هه‌روه‌سا دته‌وه‌ره‌كێ دن دا به‌حسێ بریارێن ڤه‌گه‌راندنا ئیدارا شه‌رعی یا قه‌زا شنگال وناوچه‌داریێن سه‌ر ب شنگال ڤه وڤه‌كرنا رێكا دهوك شنگال كو بریاره ل روژا 31-10-2018ل هه‌مبه‌ر هاولاتیان وهاتن وچونا گشتی بهێته ڤه‌كرن ب گشتی هاته كرن.
پارێزگه‌رێ دهوكێ پیروزباهیا به‌رێز(سه‌یدو چه‌تو) سه‌روكێ جڤاتا پارێزگه‌ها نه‌ینه‌وا كر وهیڤی یا سه‌ركه‌فتنێ بو خواست وبه‌رهه‌ڤیا كارگێریا پارێزگه‌ها دهوكێ نیشان دا بو هه‌ر هه‌ڤكاریه‌كێ دگه‌ل جڤاتا پارێزگه‌ها نه‌ینه‌وا.
ئەڤرۆ نیوز، نەوزاد ھلۆری:
شەڤا بوری فروکێن شەری یێن تورکی نێزیکێ گوندێ بەرچێ یا سەر ب ناحیا دێرەلووکێ بوردومانکر، و رێڤەبەرێ ناحیا دێرەلووکێ و لژنا ناوچا دێرەلووک یا پارتی دیموکراتی کوردستان ل نێزیک سەرەدانا گوندی کر و داخوازا قەرەبویێ بو وەلاتیان دکەت.
دەمەکێ کێم بەری نوکە رێڤەبەرێ ناحیا دێرەلووک ژ نێزیک سەرەدانا وان خێزانان کر یێن کو شەڤا بوری ژ ئەنجامێ بوردومانا فروکێن تورکی زیان گەھشتیە وان و د داخویانەکا رۆژنامەڤانی دا گۆت: (دلگرانین ب بوردومکرنا گوندێ بەرچێ و زیان گەھاندن ب مالان ژلایێ فورکێن تورکی ، و ئەم دێ ھەموو زیانان دوڤچونێ لسەر کەین و گەھینینە پارێزگەھا دھۆک داکو قەرەبوویا وان بھێتەکرن)
دھێتە زانین کو زیان گەھشتیە ھەموو مالێن گوندێ بەرچێ ، بەلێ ب گورەی ئاخفتنێن وەلاتیێن گوندی زێدەتر ھەشت ژ وان مالان زیانێن زور گەھشتینێ ژبەرکو زور نێزیکێ بوردومانێ بوون ، دەرگەە و پەنجەر شکەستینە و دیوارێن خانویان دەرزینە.
ئه‌ڤرۆ نيوز:
بڕياره حه‌فتيا بهێت كۆمبوونا ئێكێ يا خولا پێنجێ يا په‌رله‌مانێ كوردستانێ برێڤه بچت كو مه‌زنترين په‌رله‌مانتار دێ سه‌رۆكاتيێ كه‌ت.
ب گۆره‌يى ئه‌و ژێده‌رێن ب ده‌ست ئه‌ڤرۆ نيوز كه‌فتين، رۆژا سێشه‌مبى ژ حه‌فتيا بهێت دێ ژڤانێ روونشتنا ئێكێ يا خولا پێنجێ يا په‌رله‌مانێ كوردستانێ بيت.
ئه‌وى ژێده‌رى بۆ ئه‌ڤرۆ نيوز، ئاماژه ب وێ چه‌ندێ ژى كريه كو رێڤنگ هرۆرى وه‌كو مه‌زنترين ئه‌ندامێ په‌رله‌مانێ ژ فراكسيۆنا پارتى ديموكراتى كوردستان كو خه‌لكێ دهۆكێ يه دێ سه‌رۆكاتيا روونشتنێ كه‌ت و تێدا په‌رله‌مانتار دێ سووندا قانوونى خوه‌ن.
نيشاندان