ئەڤرۆ نیوز ، تۆڤی:
ب بریارا راکان سەعید پارێزگارێ دەمکی یێ کەرکوکێ زمانێ کوردی ل سەر نڤێسینێن فەرمی هاتە راکرن.
ئازاد جەباری ئەندامێ جڤاتا پارێزگەها کەرکوکێ دایە دیارکرن: کو د چەند رۆژێن بوریدا راکان سەعید پارێزگارێ دەمکی یێ کەرکوکێ زمانی کوردی ل سەر نڤێسینێن فەرمی راکرینە و فەرمانگەهێن کەرکۆکێ ژی ئاگەهدارکرینە کو ل جهێ زمانێ کوردی، ز مانێ ئینگلیزی بکاربینن.
هەروەسا گۆتیە: ئەڤ کارێ راکان سەعید جبوری پێشێلکاریا دەستورییە، چونکی زمانێ کوردی کو زمانێ دویێ یێ فەرمی ل عێراقێ یێ هاتیە فەرامۆش کرن.
ئەڤرۆ نيوز:
سترانبێژا گەنج شوشێ، کو ناڤێ وێ یێ دروست شنیارە، د دیدارەکێ دا بۆ ئەڤرۆ دیارکر، دەمەکە وێ چەندین سترانان بۆ تۆمارکرنێ ئامادەکرینە، لێ ژبەر نەبوونا پشتەڤانیێ نەشێت تۆمارکەت و یا ل سپۆنسەرەکی دگەڕیێت.
شوشێ گۆت: من بزاڤا کری ئەو سترانێن مە ھەلبژارتین ھەموو دباش بن، چونکو مافێ حەز ژێکەرێن دەنگێ منە سترانێن باش و خۆش تۆمار بکەم، لەورا ھەر دەمێ سپۆنسەر پەیدا بوو دێ دەست پێ کەم و ھیڤیا من ئەوە بەرھەمەکێ نموونەی بیت، و پتریا جاران ئەز سترانان بۆ ژنان دبێژم چونکو ل گەل وان یا ئارمم و حەز دکەم دلێ وان خۆش بکەم، و ھەتا نوکە من دو کلیپ ھەنە و کلیپا سیێ ژی دڕێ دایە، ھەروەسا من سترانێن دوقۆلی ژی گۆتینە.
ناڤھاتیێ د ژیێ دەە سالیێ دا دەست ب کارێ ھونەری کریە، و ل دوازدە سالیێ ئامیرێ پیانۆیێ ژەنیە، پاشان کەمان ژەنینە، و ئەڤێ چەندێ دەلیڤە بۆ خۆشکریە ل پشکا مۆزیکێ ل پەیمانگەھا ھونەرێن جوان بھێتە وەرگرتن و پشتی دەرچوونێ دەلیڤە بۆ ھاتیتە پێش ب شێوەکێ ئەکادیمی کاربکەت.
ئەڤرۆ نيوز:
ھەژین رێکانی، کچەکا باژێرێ دھوکێ یە و ئەڤە چەند سالە د وارێ راگەھاندنێ دا کار دکەت و ل چەندین کەنالان کارکریە وەکو نڤیسەرا دەنگ و باسێن سیاسی و ژبەر حەزو ڤیانا وێ بۆ کامیرێ بەر ب کارێ فوتۆگرافیێ دچیت، و د دیدارەکێ دا بۆ ئەڤرۆ دیارکرکو فوتۆگرافەری ئەو تشت و پێکھاتەیێن تۆ دبینی دھێنە تێکەلکرن ل گەل دەستەکا بنەماێن خوە بکەیە ھونەرەکێ دیتی وئەو تشتێ وێنێ وێ دھێتەگرتن یا پێدڤیە ب باشترین رەنگ و شێوازێ وی تشتی ب دەست خوە ڤە بینت.
ناڤھاتیێ گۆت: دجڤاکێ مەدا ب گشتی کچ گەلەک یا کێمە دفوتۆگرافەریێ دا کو کچ بتنێ ھەبوونا وێ دچارچووڤەکێ سنوردار کری دابیت بتنێ ھەبوونا وێ بۆ ھندەک تشتان ھەیەو ھەکە ئازادی ژی بۆ وێ بھێتەدان دبیت ئەو باوەری بۆ وێ چێ نەبیت کو کارەکێ دی بکەت بتنێ کچەکا خودان ئیرادەکا مەزن بیت و بشێت بریارەکا وێرەکانە بدەت و ھەموو ھیڤێن من ئەوە کچ دھەموو واراندا کار بکەت کاری َوێنەگریێ ژی ژوان کارایە کچ گەلەک یاکێمە لەورا حەزدکەم بمە پالدەرەک بۆ گەلەک کچێن دی یێن حەزا وێنەگریێ ھەی و نەشێن کاربکەن ل کەنالەکی، یان ھەرجھەکێ دی.
ل دووماھیێ گۆت: ھەڤرکی یا دسرۆشتێ مرۆڤە دا ھەی و ھەروێنەک چیرۆکێ دەتە دیارکرن و وێنەی ب ھەست و درۆستی دھێتە دەربرین و ھندەک وێنە ھەنە زەحمەت و ئازارێن خەلکە دەنە دیارکرن و ھندەک وێنێن دی ھەنە دنورمالن بەکو ھونەرەکێ درستە ودێ بزاڤێ کەم من ژی رۆلێ خوە ھەبیت دجیھانا وێنەگریێ دا
ئه‌ڤرۆ نيوز:
گەلەک ژن گازندان دکەن کو ھەڤژینێن ون ژ مال درەڤن و ھەموو دەمێن خوە ل سەیرانگەە و د گەل ھەڤالان ل دەرڤەیی مال دبۆرینن، ئەو ژن نزانن ژی دێ چ کەن دا ھەڤژینینَن وان ژ مال دەرنەکەڤن یان زوو ڤەگەرنە مالا خوە، بلا ژن ڤان خالان بجە بینن دا ھەڤژینێن وان قەستا مالا خوە بکەن:
دەمێ ھەڤژینێ تە ژ شەڤبێریەکا ڤەدگەریت وەکو ھەرۆژ پێشوازیێ لێ نەکە ب ناڤچاڤێن گرێ ڤە، ژبەرکو دێ پتر کەربێن وی ژ تە وی مالا وی ڤەبن، دانوستاندنێن ھەرو و ب ھەمان شێوە د گەل وی سەرناگرن، وەکو دبێژن نابیت مرۆڤ ھەرۆژ ھەمان دانوستاندنان بکەت و ل ھیڤیا ئەنجامێن جودا بیت.
پشکداریێ د کارێن وی دا بکە: ھەکە پیشەیەکا تایەت ھەبیت بزاڤان بکە ھندەک پێزانینان ل سەر کارێ وی کۆم بکە، پاشی دەمێ دبیتە بەحس ل سەر ھاتە کرن تو ژی دانوستاندنێ د گەل بکە، دێ بینی ھێدی ھێدی یێ ب نک تڤە دھێت و د گەل تە روونیت.
نامان بۆ بنڤیسە: نامان بۆ ھەڤژینێ خوە بنڤیسە و دەربرینێ ژ ھەستێن خوە بکە، وەبکە ھەست ب ئەڤینی و کەیفخۆشیا تە بکەت دەمێ تە دبینیت، بۆ دیار بکە کو ئەو دەمێ ئەو ژ دەرڤەی مال دبۆرینیت ئەو دەمێ کۆمبوونا ھەو و دەمێ پەروەردەکرنا زارۆیێ، ھەوەیە، وێ ھەستێ بۆ چێکە کو نەشێی بەرپرساتیا ھەموو تشتان وەرگری و تو حەز دکەی ئەو ل نک تەبیت و ھاریکاریا تە بکەت، لێ ھشیار بی بەحسی زیانێن دوورکەفتنا وی ژ مالێ نەکەی، چونکو دێ وێ ھەستێ کەت کو تو یا وی تۆمەتبار دکەی و پاشی دێ تۆرە بیت.
ھەکە زارۆیێن تە ل وی عەمری بن بشێن دەربرینێ ژ ھەستێن خوە بکەن، ھان بدە داخوازێ ژ بابێ خوە بکەن بمینیتە ل مال چونکو ئەو یێن ژێ خەریب بووین.
داخواز بکە شیڤەکا خۆش و تو ب خوە ب دەستێن خوە بۆ بەرھەڤ بکە و پاشی بەرنامەیەکێ رەوشەنبیری یێ دلخۆش بەرھەڤ بکە، بلا زارۆیێن تە ستران و ھەلبەستان بێژن و ھندەک بەیکانان بەرھەڤ بکە.
وێ ھەستێ بۆ چێکە کو تو رۆژانە یا دھێیە گوھۆرین، ھەکە ئەو ھەست بۆ چێبوو دێ دلگەرمی ڤەگەریانا مالێ بیت و دبیت دەرکەفتنێن خوە کێم بکەت.
رۆژانە شێوازێ شەکرنا پرچا خوە بگوھۆرە و کراسێن جوان ل بەر خوە بکە یێن تو کێم دکەیە بەرخوە، وەکو کراسێن شەڤبێریان و ماکیاژەکێ تەمام بدانە دا ھەست بکەت تو ب ئێکجاری یا ھاتیە گوھارتن.
ژوورا خوە نڤستنێ بگوھۆرە: دەستپێکێ زارۆیێن خوە بنڤینە، پاشی فەرشێ تەختی بگوھۆرە و رۆناھیەکا کز ھلکە، بێھنێن خوەش ل ژوورێ برەشینە، یا باشە ژی ھەکە خوارنەکا سڤک بەرھەڤ بکەی وەکو شرینیان و دو گلاسێن خۆشاڤێ و بلا د خەملاندی بن، بێ گومان دێ پێ دلخۆش بیت و دێ بیتە ھاندەرەکێ ب ھێز زوو ڤەگەریتە مال.
ئه‌ڤرۆ نيوز:
کەسێن رەشبین ھەردەم دبێژن ھەر ئێشەکا خودێ حەز کری دێ ھێـەمە و خو بلا چەند خوە بپارێزین ژی، لێ د راستی دا و ل گۆرەی ڤەکۆلینێن زانستی، پاراستنا شێوازێ ژانێ دێ ھاریکار بیت کو تە ژ گەلەک نەخۆشیان بپارێزیت، بلا ترسا تووشبوونێ ب نەخۆشیا پەنجەشێرێ یان ھەر نەخۆشیەکا دی یا ب ترس ل دەردۆرا تە ھەبیت ژی، ل دووڤ ڤان شیرەتان ھەرە دێ مفایەکێ مەزن ژێ بینی:
سەنگێ خوە بپارێزە:
سەنگێ زێدە و قەلەوی ئەگەرن کو مرۆڤ تووشی گەلەک نەخۆشێن دۆمدریژ بیت وەکو نەخۆشیا شەکرێ و فشارا خوینێ و ھەتا پەنجەشێرا مەمکی ژی، بتایبەت ل ژنا قەلەو.
وەرزش:
نۆشدار شیرەتان ل ژنان دکەن د ھەموو قۆناغێن عەمری دا رۆژانە 30 دەقیقان راھێ،انێن وەرزشی بکەن، ئەو ژی بۆ ب ھێزکرنا ساخلەمیێ و خوە پاراستن ژ نەخۆشیان و بتایبەت پەنجەشێرا مەمکی.
دەرمانێن ھورمۆن د ناڤ دا بکارنەئینە:
بەری تو دەرمانێن ب ھورمۆن بکاربینی پرسیارا نۆشداری بکە و ب تایبەت ھەکە نیشانێن تووشبوونا ب پەنجەشێرا مەمکی ل نک تە ھەبن، ژ وان ھورمۆنان دوور بکەڤە یێن ئەترۆجینی و رۆجسترۆنی ل تە زێدە دکەن ھەکە ئەو نەخۆشی د ناڤا مالباتا تەدا ھەبیت.
شیردانا سروشتی:
ئێک ژ رێیێن خوەپاراستنێ ژ نەخۆشیا پەنجەشێرا مەمکی ئەوە ژن شیرێ خوە بدەتە زارۆیێ خوە، شیردانا سروشتی ناھێلیت لەشێ ژنێ تووشی قەبارێن مەزن یێن ئەترۆجینی بیت، ئەو یەک ژی دێ ھاریکار بیت وی ھورمۆنی د لەشێ خوە دا راگریت.
پشکنینێن بەردەوام:
گرنگترین رێ بۆ خوەپاراستنێ ژ پەنجەشێرا مەمکی پکشنینێن بەردەوام و پێشوەختن، بزاڤان بکە د ژیێ 40 سالیێ ھەر سال جارەکێ پکشنینان بکە.
ئه‌ڤرۆ نيوز:
حکومەتا عێراقی بریارا دایە سوباھی رۆژا 1-11-2018 ئێکەم گۆرێ ب کۆمی ل قەزا شنگال بھێتە ڤەکرن و ساخلەمیا شنگالێ ژی بێ ئاگەھیا خوە ژ پشکنینا DNA بۆ قوربانیان دیارکر.
سەعدون موراد قاسم، موختاری گۆندی حەردان ل قەزا شنگال بۆ رۆژنامەیا ئەڤرۆ دیار کر کو لیژنا ژ بەغدا ھاتیە دەڤەرا حەردان بۆ ڤەکرنا گۆرێن ب کۆم ل حەردان دی گۆندێ حەردان دەست ب ڤەکرنا ئێکەم گۆری ب کۆم ھێتە کرن ل دەستپێکی مە داخواز کریە ل دووڤ ستاندەرێن جیھانێ و تیمێن دەولی بھێن نوکە وان گۆتیە مە تیمێن دەولی دگەل مە دانە بۆ کارکرنێ، بەری نوکە ژی ل حەردان پشکنین بۆ وان کەسان ھاتیە کرن یێن کەس و کارێن وان ل کارەساتا شنگال بووینە قوربانی ل تەباخا سالا 2014ێ ژلایێ رێکخراوا تیرۆرستێن داعش ڤە نوکە ژی لیژنا بەغدا ھاتیە دەست ب ڤەکرنا گۆرێن بکۆم بھێتە کرن ل دۆریانا حەردان ل قەزا شنگال سێ یان چار گۆرێن ب کۆم ھەنە ھەتا نوکە ژمارا کەسێن تێدا ھاتینە شەھیدکرن ئاشکرا نەبوویە.
ئەو ژی دیار کر، ل کارەساتا شنگال دۆرێن 400 کەسێن خەلکێ گۆندی حەردان ژ ھەردوو رەگەزان ھاتنە گرتن و رەڤاندن و بێ سەروشینکرن ب پشتەڤانیا نڤیسینگەھا رزگارکرنا رەڤاندیێن ئێزدی ھژمارەک ژ خەلکێ حەردان ھاتینە رزگارکرن، لێ دۆرێن 60 ھەتا 70 زەلامان ھاتبوونە گرتن ھەتا نوکە چارەنڤیسێ وان دیارنینە.
ئاشکرا کرکو بەری تیرۆرستێن داعش ھیرشی سەر حەردان بکەن دۆرین دو ھزار کەسان ل گۆندی ژیان دناڤ 300 خانیان دا وبەردەوام گۆندی حەردان بەرفرەە دبوو و خەلکێ بۆ خوە خانی ئاڤادکرن و ژیانا خوە دبۆراندن، لێ تیرۆرستێن داعش ژیان ل دەڤەرێ تێکدان ھەتا نوکە دۆرێن 20 مالان یێن زڤرینە حەردان یێن دیتر ھیشتا ل ئاواری دژین.
فەلاح حەسەن، ئەندامێ لیژنا ڤەکۆلینی وکۆمکرنا بەلگەنامەیان ل دھۆکێ بۆ رۆژنامەیا ئەڤرۆ دیار کر کو بەغدا بریار دایە مە پەیوەندی پێڤە نێنە ھەکە ل رۆژا 2018-11-1 گۆرەکی بکۆم بھێتە ڤەکرن نە ب ریێا مە یە و مە پەیوەندی پێڤە نینە.
د. بەرەکات حاجو بەرپرسێ کەرتێ تەندروستی ل قەزا شنگال بۆ ئەڤرۆ دیارکر کو ئەم ل سەر پشکنینا دی ئێن ئەی بۆ ڤەکرنا گۆرێن ب کۆم نەھاتینە ئاگەھدارکرن و چو نڤیسار ژی بۆ مە نەھاتیە دێ گۆرەکێ ب کۆم ھێتە ڤەکرن ل دەڤەرا شنگال د ڤان رۆژان دا.
حۆکمەتا عیراقێ ب تایبەتی ژی لیژنا بلند یا ھەڤپشک ھاتیە پێکئینان ژ ئالیێ جڤاتا وەزیران ڤە یا پێکھاتیە ژ 22 کەسان دگەل لیژنەکا ناڤدەولەتی یا ڤەکۆلینی بریار داینە ل رۆژا 1-11-2018 ئێکەم گۆری ب کۆم ل شنگال ب تایبەتی ژی ل دەڤەرا حەردان بھێتە ڤەکرن.
وەیس نایف سەرۆکێ جڤاتا قەزا شنگال بۆ ئەڤرۆ دیار کر کو پێدڤیە ل دووڤ ستاندەرێن جیھانی گۆرێن بکۆم بھێنە دیکومێنتکرن و ڤەکرن و نابیت بێ ستاندەرێن جیھانی دەستکاری دگۆرێن ب کۆم دا بھێنە کرن، چونکو دێ زیانێ گەھینتە جینوسایدا شنگال و پێدڤیە ھەموو کار بھێنە کرن ل دووڤ ستاندەرێن جیھانی بۆ جینوسایدا شنگال گۆرێن بکۆم بھێنە ڤەکرن.
حسێن کورو قائیدی، رێڤەبەرێ نڤیسینگەھا رزگارکرنا رەڤاندیێن ئێزدی ل دھۆکێ سەر نڤیسینگەھا سەرۆکێ حکومەتا ھەرێما کوردستانێ ڤە دیار کر کو ھەتا ل رۆژا ئێکی ژ جینوسایدا شنگال پتر ژ 1500 کەسان ژلایێ تیرۆرستێن داعش ڤە ھاتینە کوشتن ھەتا نوکە ژی 69 گۆرێن بکۆم یێن ھاتینە دیتن ل قەزا شنگال.
ئه‌ڤرۆ نيوز:
ژ لایێ وەزارەتا نافخۆیا حوکمەتا ھەرێما کوردستانێ لیژنەکا بلند ھاتیە پێک ئینان بۆ راکرنا ھەموو پارزینگەھێن نەقانوونی ل ھەرێما کوردستانێ و سەرۆکێ لیژنێ ژی دبێژیت، مە ھۆشداری دایە ھەموو پارزینگەھێن نەقانوونی د دەمێ 60 رۆژان دا رانەکەن دێ ھێزەکا وەزارەتا نافخۆ پارزینگەھێن وان دگەل ئەردی راستکەت.
ل ھەرێما کوردستانێ نێزیکی 500 پارزینگەھێن قانوونی و نەقانوونی کار دکەن و پشکەک ژ وانا بەری نوکە ھاتبوونە گرتن، بەلێ ژ بەر کو بێ مۆلەت کاردکەن دەست ب کارێ خوە کریە و شارەزا ژی ھۆشداریێ ددەن ل دۆر مەترسیێن ڤان پارزینگەھان ل سەر ژیانا وەلاتیێن ھەرێما کوردستانێ، ب تایبەتی ئەڤێن دکەڤنە نێزیک باژێڕان.
د. سامی جەلال، رێڤەبەرێ دیوانا وەزارەتا نافخۆ بۆ رۆژناما ئەڤرۆ گۆت “ژ لایێ وەزارەتا نافخۆیا حوکمەتا ھەرێما کوردستانێ لیژنەکا بلند بۆ نەھێلانا پارزینگەھێن نەقانوونی ھاتیە پێک ئینان و ئەز وەکی سەرۆکێ لیژنێ و 9 ئەندامان دەست بکاربووینە و بڕیارە پێداچوون ب ھەموو پارزینگەھێن گازێ دا بھێتە کرن ل سەرانسەری ھەرێما کوردستانێ، نوکە مە دەست ب کارێ خوە کریە دو لیست مە ھەنە، کو قۆناغا ئێکێ 28 پارزینگەە ھەنە دێ پێداچوون ب کارێ واندا بھێتەکرن و مەرجێن ساخلەمیێ و ژینگەھێ ھەتا دوماھیێ ب سەردا ھێتە بجھئینان.
ژلایێ خۆڤە ژی ھندرێن راغب، پەیڤدارێ دەستەیا پاراستن و سەخبێرکرنا ژینگەھێ بۆ رۆژناما ئەڤرۆ دیار کر “بڕیارەکا نوو ژلایێ وەزارەتا سامانێن سرۆشتی ھاتیە دەرکرن بۆ پارزینگەھێن ھەرێما کوردستانێ و ل گۆرەی بڕیارێ 21 مەرج ھاتینە دیارکرن، ھەر پارزینگەھەک ئەڤان 21 مەرجان بجە نە ئینیت دێ ھێتە گرتن، مخابن ل ھەرێما کوردستانێ ژبلی پارزینگەھێن نە قانوونی یێن ب قانوونێ ژی کار دکەن و مۆلەت ھەیە مەرجێن ساخلەمیێ و ژینگەھێ تێدا نینە، لەوڕا ئەگەر ئەڤ مەرجە بھێنە بجھئینان دێ پێنگاڤەکا زۆرا باشبیت بۆ رێکخستنا وان پارزینگەھان.
سامی جەلال گۆت ژی” قۆناغا دویێ لیستەکا دی ھەیە کو ل 164 پارزینگەھن پێدڤیە بھێنە راکرن و مە مۆھلەت دایە وان پارزینگەھێن نەقانوونی ددەمێ 60 رۆژان دا بھێنە راکرن، ھەگەر ھەتا ژڤانێ دیاریکری نەھاتنە راکرن، ئەڤە بێگومان ژلایێ ھێزەکا سەر ب وەزارەتا نافخۆ ھێنە راکرن و دگەل ئەردی ھێنە راستکرن، لیژنا مە یا ھەمیشەیە و ئێدی رێکێ نادەین ب ڤەکرنا پارزینگەھێن نەقانوونی ل ھەرێما کوردستانێ.
ھندرێن راغب ئەو یەک ژی دیار کر “مخابن ئەڤ پارزینگەھێن نە قانوونی بووینە گەف ل سەر ساخلەمیا وەلاتیان و پیسکرنا ژینگەھا ھەرێما کوردستانێ، ژ بەر کو مەرجێن ژینگەھێ تێدا نینە و ھندەک ژوان زۆر نێزیکن ل جھێ ئاکنجیبوونا وەلاتیان، چەندین جاران ژی مە لایەنێن پەیوەندیدار ئاگەھدار کرینە و ھەوێن گرتنا وان پارزینگەھان ھاتینە ئەنجامدان، بەلێ ھێشتا ھژمارەکا زۆر ماینە و ئەگەر سنورەک بۆ نەھێتەدانان ئەڤە چو گومان تێدا نینە دێ کاریگەریێن خراپ ل سەر ژیانا وەلاتیان و ژینگەھا ھەرێما کوردستانێ ھەبن، ئەم ژی یێ چاڤدێریا لیژنێن حوکمەتێ دکەین، چونکو تنێ مە زانیاری داینە لایەنێن پەیوەندیدار پێدڤیە ب ھێزێ بھێنە گرتن و مەرج تێدا بھێنە بجھئینان.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 31ى چريا ئێكێ 2018ێ بهايێ زێر و زيڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 گرام زێرێ (ع) 18 | 37500 |
| 1 گرام زێرێ (ع) 21 | 42500 |
| 1 گرام زێرێ (ع) 22 | 44500 |
| 1 گرام زيڤ | 3000 |
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 31ى چريا ئێكێ 2018ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:3
| 100 دولارێ ئه‌مريكى | 120.600 دينار |
| 100 يۆرۆيێ ئه‌ورۆپى | 138.000 دينار |
| 100 ليرێ توركى | 21.500 دينار |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
نيشاندان