ئه‌ڤرۆنيوز:
ئێڤاريا ئه‌ڤرۆ ئێكشه‌مبى 28/10/2018 وه‌زيرا به‌رگريا ئيتاليا ئێليزابێتا ترێنتا گه‌هشته فرۆكخانا هه‌ولێر يا نێڤده‌وله‌تى وژلايێ كه‌ريم شنگالى وه‌زيرێ پێشمه‌رگه ب وه‌كاله‌ت پێشوازى لێ هاته كرن.
برياره وه‌زيرا به‌رگريا ئيتاليا ل گه‌ل به‌رپرسێن بلند يێن هه‌رێما كوردستانێ كۆم ببيت وبه‌حس ل ره‌وشا هه‌رێما كوردستانێ وعيراقێ بكه‌ن.
ئه‌ڤرۆنيوز:
نێچيرڤان بارزانى، سه‌رۆك وه‌زيرێن هه‌رێما كوردستانێ ئه‌ڤرۆ ئێكشه‌مبى 28/10/2018 پێشوازى ل راشد ئه‌لمه‌نسوورى كۆنسۆلێ ئيماراتێ ل هه‌ولێرێ كر ب هه‌لكه‌فتا ب دووماهى هاتنا كارێ وى.
كونسۆلێ ئيماراتێ سوپاسيا سه‌رۆك وه‌زيران وده‌زگه‌هێن په‌يوه‌نديدار يێن حوكمه‌تا هه‌رێمێ كر بۆ هاريكارى وهه‌ماهه‌نگيێ ل سه‌رخستنا كار وچالاكيێن وى كو بووينه ئه‌گه‌رێ پتر ب هێزكرنا په‌يوه‌نديێن هه‌رێمێ وئيماراتێ، دووپات كر ژى كو ئيمارات گرنگيه‌كا مه‌زن ب په‌يوه‌نديێن خوه ل گه‌ل هه‌رێما كوردستانێ دده‌ت ودێ ئه‌و په‌يوه‌نديه دبه‌رده‌وام بن ژى.
نێچيرڤان بارزانى، كار وچالاكيێن كونسۆلێ ئيماراتێ ل هه‌رێما كوردستانێ ب تايبه‌تى دبوارێ ب هێزكرنا په‌يوه‌نديێن هه‌ردو لا وگه‌هاندنا هاريكاريێن مرۆڤايه‌تى بۆ ئاواره وپه‌نابه‌ران ل سالێن دژوار يێن بۆرى ب بلند نرخاندن وهيڤيا سه‌ركه‌فتنێ بۆ وى خواست دكارێ وى يێ نوو دا، هه‌روه‌سا دياركر كو هه‌رێما كوردستانێ ب گرنگى ڤه سه‌حدكه‌ته په‌يوه‌نديێن خوه ل گه‌ل وه‌لاتێ ئيماراتێ وهاريكارى وئاسانكاريا حوكمه‌تا هه‌رێمێ ژى بۆ كونسۆلێ نوو يێ ئيماراتێ ل هه‌رێما كوردستانێ نيشان دا.
ئه‌ڤرۆنيوز:
ده‌زگه‌هێن راگه‌هاندنێ يێن عيراقى ئه‌ڤرۆ ئێكشه‌مبى 28/10/2018 به‌لاڤكر كو جڤاتا وه‌زيرێن عيراقێ رۆژا سێشه‌مبيا بهێت 30/10/2018 دێ كه‌ته بێهنڤه‌دانا فه‌رمى ل پارێزگه‌هێن عيراقێ ب هه‌لكه‌فتا چله‌يا شه‌هيدكرنا ئيمام حوسێن.
هه‌تا نوكه حوكمه‌تا هه‌رێما كوردستانێ چو داخۆيانى نه‌داينه ل دۆر ڤێ بێهنڤه‌دانێ كا ئايا دێ هه‌رێما كوردستانێ ڤه‌گريت يان نه.
ئه‌ڤرۆنيوز:
به‌رهه‌م سالح ئه‌ڤرۆ ب سه‌ره‌دانه‌كێ چو پارێزگه‌ها هه‌له‌بجه ول ده‌مێ سه‌ره‌دانا مۆنۆمێنتا هه‌له‌بجه ژلايێ وه‌لاتيه‌كى ڤه رێگرى لێ هاته كرن.
ل دووڤ مالپه‌رێ كوردستان تى ڤى، پشتى نيڤرۆيا ئه‌ڤرۆ ئێكشه‌مبى 28/10/2018 ل مۆنۆمێنتا هه‌له‌بجه ل ده‌مێ سه‌ره‌دانا به‌رهه‌م سالحى، وه‌لاتيه‌كى رێگرى لێكر ل ده‌مێ هاتنا ده‌رڤه ژ هۆلا شه‌هيدان وداخواز لێكر ل به‌غدا ببيته پارێزه‌رێ مافێن گه‌لێ كورد ونوونه‌راتيا كوردان بكه‌ت وپشت ل كوردستانێ نه‌كه‌ت وره‌وشا زياندارێن خيانه‌تا 16 ئوكتۆبه‌رێ ل به‌رچاڤ بگريت، به‌لێ زێره‌ڤانێن به‌رهه‌م سالحى ئه‌و وه‌لاتى راكێشا وژ وى جهى دوورخست.
ئه‌ڤرۆ نیوز، نه‌وزاد هلۆرى:
پشكه‌كا وه‌لاتیێن شێلادزێ رێیا سه‌ره‌كى یا ناحیا شێلادزێ بۆ ده‌ڤه‌را زێبارێ گرت و خواست كو رێ ب وان بهێته‌دان بچنه داران.
ئێقبال نێروه سیتوى، وه‌لاتیه‌كێ شێلادزێ یه بۆ ئه‌ڤرۆ نیوز گۆت: (نێزیكێ حه‌فت رۆژایه وه‌لاتێن شێلادزێ دخوازن بچنه ده‌ڤه‌را زێبارێ داران، به‌لێ پولیس و ژینگه رێ ب وان ناده‌ت ژبه‌ركو برینا دارێن ته‌ر و هشك هه‌ردو هاتینه قه‌ده‌غه‌كرن).
زێده‌تر گۆت: (ده‌ڤه‌را نێروه‌ورێكان یا ب مه‌ترسیه و بتنێ به‌رمیله‌كا گازێ لسه‌ر خه‌لكى هاتیه به‌لاڤكرن و ره‌وشا كاره‌با نیشتمانى ژى یا باش نینه ، ئه‌ڤه بوویه ئه‌گه‌ر كو وه‌لاتى بچنه داران و نوكه رێ ژى ناهێته‌دان ئه‌ڤه بوویه ئه‌گه‌ر كو وه‌لاتى رێيا ده‌ڤه‌را زێبارێ بگرن و نه‌هێلن هاتنوچون هه‌بیت و وه‌لاتى دخوازن كو رێ ب وان بهێته‌دان بۆ برینا دارێن هشك).
ب گۆره‌ى پێزانينێن ئه‌ڤرۆ نیوز ژینگه‌ه رێ ب برینا دارێن ته‌ر و هشك ناده‌ت ، ئه‌ڤه ژبه‌ركو گاز لسه‌ر خه‌لكى هاتیه به‌لاڤكرن و خه‌لكێ ده‌ڤه‌را زێبارێ ژى گازندا ل خه‌لكى دكه‌ن كو دارستان و ژینگه‌ها وان هاتیه تێكدان و برین.
ئەڤرۆ نیوز ، زنار تۆڤی:
ل پشتی نیڤرۆیا ئەڤرۆ ئێکشەمبی 28.10.2018 تۆپخانا سۆپایێ تورکی دەڤەرا بەرواری بالا تۆپبارانکر.
ئەڤرۆ ل دەمژمێر 1:45 خولەکی پشتی نیڤرۆ تۆپخانا سۆپایێ تورکی ل ناڤبەرا گوندێ هرۆرێ و دێشێشێ و هندەک جهێن دیتر ل دەڤەرا بەرواری بالا ب چەندین گولە تۆپان تۆپ بارانکر و نوکە ژی تۆپ باران یا بەردەوامە.
ئەڤرۆ نیوز:
تۆرا چاڤدێریا مافێ مرۆڤی ل سووریا راگه‌هاندیه كو 70 شه‌رڤانێن هێزێن سووریا دیموكرات کو پتریا وان كوردن، ب ئەگەرێ هێرشەکا داعشێ هاتینە كوشتن.
وێ رێكخراوێ ئاشكرا كریه، کو ب كێمی ڤه 100 كه‌سێن دیتر ژی برینداربووینه و دبیت هژمارا قوربانیان زێدەتر لێ بهیت..
هەروەسا گۆتیە ژی، نێزیکی 200 چه‌كدارێن داعش كو پێکهاتبوون، ژ زەلام و ژن و زارۆیان کو نیشانگر ڤێبوون، بۆ وه‌رگرتنا گوندێ سوسه و هیجان هێرش كریه سه‌ر دەڤەرا رۆژهه‌لاتا فوراتێ.
هه‌روه‌سا دیارکریە، کو دڤێ هێرشێدا 500 چه‌كدارێن داعش ب گولێن شه‌رڤانێن هێزێن سووریا دیموكراتیك هاتینە كوشتن.
وەکو دیار هێرشا داعشێ ل نیڤا شه‌ڤا ئەینی روودایه و هەتا به‌رێ سپێدەهیا رۆژا شه‌مبیێ یا بەردەوام بوو، هەروەسا چه‌كدارێن داعشێ مفا وه‌رگرتن ژ بارێ سەقایی ئه‌ڤ هێرشه ئه‌نجامدایه، ب جۆرەکێ كو ڤان چه‌كداران زانیە، کو خرابیا سەقای رێگری کریە ژ فرینا فرۆكێن هەڤپه‌یمانان، وان ژی ئەو دەلیڤه بۆ خوە دیتیە.
ئەڤرۆ نیوز، نەوزاد ھلۆری:
پشتی کارکرن بو دەما پێنج سالان و مەزاختنا ب سه‌دان مليۆن دولاران ، بەرھەڤی دھێنەکرن کو مەزنترین پەیکەر کو بو مەلیکێ ھندستانێ ھاتیە درۆستکرن ل چەند روژێن بھێتە ڤەکرن.
ب گوری رۆژنامەیا (دەیلی مەیلی یا بریتانی) سەروک وەزرێن ھندستانێ (ناریندرا مودی) ب ھەلکەفتا 31 سالڤەگەرا (ساردار فالابای باتل) کو ئێکە ژ دامەزرێنەرێن ئەدەبڤانێن ھندی ڤەکەت کو بلنداھیا پەیکەری 183 مەترە و مەزنترە ژ پەیکەرێ ئازادیێ ل نیویورک ، و نوکە درێژترین پەیکەرێ جیھانێ یە ب 30 مەترا و نێزیکە ل پەرستگەھا بوھارا بوزایی ، و پارچا ناڤ دا یا پەیکەری 200 زاویان بەفرەھە و ھەر دناڤ دا ئوتێل و ھولا کونفرانسان ھەیە.
دەستھەلاتدارێن ھندستانێ ددەن دیارکرن کو پێنج سالان کار د چێکرنا پەیکەری دا ھاتیە کرن، و میزانیەکا دوو ملیون دولاری بو ھاتیە مەزاختن ، و 200 ئەندازیار و ھزار کرێکاران تێدا کارکریە و دوو ملیون تەنێن چیمەنتو و ئاسنی د چێکرنا وێدا ھاتینە بکارئینان.
پەیکەر بخوە ژی تێکەلەکە ژ خاچ و خراسانان ، و روویێ دەرڤە ژ برونزی ھاتیە چێکرن ، و دکەڤیتە سەر ئێک ژ رەخێن رووبارێ نارمادا ل ویلایەتا غوجارات ل باشوورێ روژئاڤایێ ھندستانێ.
پاتیلی رولەکێ کارتێکەر ھەبوویە بول دەڤەرا لنیلی بو سەربخوەیێ ل گەل بریتانیا، و بزاڤێن زور ژی بو ئێکگرتنا ھندستانێ کریە و ل مەھا دیسەمبەرا سالا 1950 ژی وەغەرکریە و بریارە رۆژا چوارشەمبی رێورسمێن ڤەکرنا پەیکەری دەست پێ بکەن.
ئەڤرۆ، نیوار محەمەد سەلیم:
د چارچۆڤێ فلمە فیستەڤالا دھۆک 6 یا نێڤدەولەتی دا، فلمێ قوربانی ژ دەرھێنانا رزگار حسێن و قارەمانیا حسێن حەسەن و رەنا سەوری ھاتە نیشادان، د ڤی فلمی دا ھەر چەندە بۆ جارا ئێکێ ژی بوو، بەلێ رەنا سەوری ئەکتەرا گەنج شیا رۆلەکێ گەلەک جوان بگێریت ب گۆرەیی بۆچوونێن ئامادەبوویان، روودانێن وی فلمی د جڤاکی بوون ل دۆر کێشێن ھەڤژینان ل گەل مالا بابێ ژنێ و خێزانا وێ، دیسان د ناڤبەرا ھەڤژینان ب خوە ژی دا.
د کورتە دیدارەکێ دا بۆ رۆژناما ئەڤرۆ، رەنا سەوری دیارکر کو پتریا وان کێشێن د فلمێ قوربان دا یێ د جڤاکی دا ھەین، ھەکە نەبان، مە بەرچاڤ نە دکرن،و د جڤاکێ مە دا چ باش و چو ژی خراب پتریا جاران ژن قوربانیێ ددەت، و دا زانین ژی کو نیڤا ڤان حالەتێن د فلمی دا ھاتینە پێش د مالێن مە ھەموویان دا یێن ھەین، ئانکو ئەڤە کێشێن ھەموو مالانە.
دەربارەی سەربۆرا خوە یا سینەمایێ ژی دا زانین کو بۆ جارا ئێکێ یە وێ د سینەمایێ دا کارکری و گۆت: تشتەکێ گەلەک جودایە ژ یا پێنج سالان من خواندی، بەلێ یا ژ منڤە تشتێ دوھی و پێر و ئەڤرۆ من دیتی تشتەکێ گەلەکێ باشە وەکو جارا ئێکێ، و ھەکە خودێ حەز بکەت دێ یا بەردەوام بم و دێ بینە نموونە بۆ نفشێ نوو دا کو گەلەک کچ چاڤ ل مە بکەن و ڤی کاری بکەن.
نيشاندان