ئەڤرۆ نيوز:‏

جێگرێ سەرۆکێ ئەمریکا جێمس ماتیس راگەھاند کو دڤێت روسیا بەرنامێ دروستکرنا ساروخێن ‏ئەتۆمی بدەتە راگرتن، ھەکە روسیا ل سەر ڤێ بەرنامێ بەردەوام بیت ئەم دێ نەچار بین ھێرشی ‏بنگەھێن دروستکرنا وان چەکان بکەین و ژناڤ ببەین.‏

ل ئالیێ دی نوونەرێ ئەمریکا د ناتۆیێ دا ژی راگەھاند کو دڤێت روسیا رێزێ ل پەیمانێن ئاشتیێ ‏ل جیھانێ بگریت و نابیت ب رێیا دروستکرنا ساروخێن نوو کو ھەلگرێ چەکێن ئەتۆمی نە ببیتە ‏مەترسی ل سەر ئاشتیا جیھانێ، ئەو یەک ژ ئالیێ مە ڤە ناھێتە قەبوول کرن و مە بەری نھا ژی ‏ھۆشداری دایە روسیا کو دروستکرنا ڤان جۆرە ساروخان رابگریت.‏

چاڤدێرێن سیاسی ژی دیار دکەن کو ناکۆکیێن ئەمریکا و روسیا ل رۆژھەلاتا ناڤین و ئورۆپا ‏بەرفرەھتر لێ دھێن و ئەمریکا دخوازیت ئاستەنگیان ل ھەمبەر بھێزبوونا روسیا د بیاڤێن سیاسی، ‏ئابووری و سەربازی دا دروست بکەت.‏

ئەڤرۆ نيوز:‏

وەزیرێ دەرڤە یێ سووریێ وەلید موعەیم راگەھاند کو دەم یێ ھاتی پەیوەندیێن تورکیا و سووریێ ‏ئاسایی ببن، لێ ژ بەر ھندێ ژی مە چەندین مەرجێن خوە یێن سەرەکی ھەنە کو دڤێت تورکیا وان ‏مەرجان بجە بینیت و گۆت: (بەری ھەر تشتەکێ دڤێت تورکیا ھەموو ھێزێن خوە یێن سەربازی ژ ‏ئاخا سووریێ ڤەکێشیت و یا دی ژی دڤێت تورکیا ھاریکاریا گرۆپێن ھشکباوەر نەکەت و چەکێن کو ‏بەری نھا داینە وان گرۆپێن ژی دڤێت ژ وان وەربگریت و ھەکە ئەو یەک ھاتە کرن وی دەمی چو ‏ئاستەنگی ل ھەمبەر ئاسایی بوونا پەیوەندیێن مە و تورکیا نامینن).‏

ناڤبری ئەو یەک ژی دیار کر کو تورکیا ھەر ژ دەمێ دەستپێکرنا ئالۆزیێن سووریێ ھەتا نھا گەلەک ‏ئاریشە بۆ وەلاتێن مە دروست کرینە، لێ دڤێت تورکیا پێداچوونێ د ھەلویستێ خوە دا بکەت.‏

ئه‌ڤرۆ نيوز:

رۆژناما تایمز یا بریتانی د راپۆرتەکێ دا دیار کریە کو ھەتا نھا ژی تورکیا نەشیایە سیاسەتەکا ‏راست و دروست ل ھەمبەر ھەر دو وەلاتێن زلھێز یێن جیھانێ ئانکۆ روسیا و ئەمریکا برێڤە ببەت ‏و نھا پتر ژ ھەر دەمەکێ تورکیا تەنگاڤە و دڤێت ئەردۆگان بریارەکا راست بدەت، ھەکە ھەتا چەند ‏مەھێن دی تورکیا ھندەک بریارێن راست نەدەت دێ ئابوورێ تورکیا ژناڤ چیت و رەنگە تورکیا ‏نەشێت ئێدی مووچێن کارمەندێن خوە ژی بدەت.‏

د بەردەوامیا راپۆرتێ دا ھاتیە دیار کرن کو ئەمریکا و روسیا داخوازیێن خوە ژ تورکیا ھەنە و ‏ھەتا نھا تورکیا نەشیایە داخوازیێن وان بجە بینیت، ئەمریکا دخوازیت تورکیا قەشە برۆنسۆنی ‏ئازاد بکەت و ھاریکاریا گرۆپێن ھشکباوەر ل سووریێ نەکەت و ل ھەمبەر ڤێ یەکێ ژی روسیا ‏دخوازیت تورکیا ل ھەمبەر ئەمریکا بکار بینیت د رۆژ ب رۆژێ ئەڤ ناکۆکیە مەزنتر لێ دھێن، د ‏راستی دا نھا تورکیا د ناڤبەرا ھەر دو وەلاتێن زلھێز یێ جیھانێ دا ئاسێ بوویە و نزانیت کا دێ خوە ‏نێزیکی کیژ ئالیەکێ کەت.‏

رۆژناما بریتانی ئاماژە ب سەرەدانا ئەردۆگانی یا بۆ ئەلمانیا دکەت و دیار دکەت کو ئەردۆگانی ‏نەشیا بەرپرسێن ئەلمانیا رازی بکەت کو د بیاڤێن ئابووری دا ھاریکاریا تورکیا بکەن، ئانکۆ سەرەدانا ‏ئەردۆگانی بێ ئەنجام ما و ئەو یەک ژی نیشا ددەت کو دێ رەوشا تورکیا یا ناڤخوەیی پتر ئالۆز ‏بیت.‏

ئه‌ڤرۆ نيوز:

مامۆستایەکێ زانکۆیێ ل رۆژھەلاتێ کوردستانێ دیار دکەت کو سیاسەتا ئەمریکا ل ھەمبەر ئیرانێ ‏پتر د خزمەتا دەستھەلاتا نھا یا ئیرانێ دایە و زیانەکا مەزن ژی دگەھیتە وەلاتیان، سزایێن ئابووری ‏یێن ئەمریکا ل سەر ئیرانێ سەپاندی ژیانا خەلکێ زەحمەت کریە و بەرپرسێن ئیرانێ ژی رۆژ ب ‏رۆژێ پتر زەنگین دبن.‏

حەسەن رەسولی مامۆستایێ زانکۆیێ ل رۆژھەلاتێ کوردستانێ بۆ رۆژناما ئەڤرۆ دیار کر کو مخابن ‏سیاسەتا ئەمریکا بخوە بوویە ئەگەرێ ھندێ کو ژیێ دەستھەلاتا نھا یا ئیرانێ درێژ بیت، چونکو ‏ئەمریکا پێدڤی ب وەلاتەکێ وەکو ئیرانێ ھەیە، ھەکە رژێما نھا یا ئیرانێ نەبیت ئەمریکا دێ ب چ ‏بەھانەکێ دەستێوەردانێ د کاروبارێن رۆژھەلاتا ناڤین دا کەت، ھەبوونا سیستەمێ نھا یێ ئیرانێ ‏بوویە ئەگەرێ ھندێ کو ئەمریکا ب بەھانێن جودا جودا دەستێوەردانێ بکەت و گۆت: (ھەکە ‏براستی ئەمریکا بخوازیت دەستھەلاتا ئیرانێ بگوھۆریت دشێت د ناڤا سالەکێ دا ڤی کاری بکەت، لێ ‏ئەزموونێن چەند سالێن بۆری نیشا ددەن کو ئەمریکا بۆ بەرژەوەندیێن خوە ل رۆژھەلاتا ناڤین ‏ئیرانێ بکار دئینیت، چونکو دەمێ خوەنیشادانێن بزاڤا کەسک و خوەنیشادانێن ڤێ دووماھیێ ل ‏ئیرانێ ھاتنە کرن ئەمریکا بێ ھەلویست ما و نھا خەلکێ ئیرانێ ژی بێ ھیڤی بوویە).‏

ناڤبری ئەو یەک ژی دیار کر کو مخابن ئەمریکا تنێ ھزرا بەرژەوەندیێن خوە یێن ئابووری دکەت، ‏بەرپرسێن ئەمریکا ب تایبەتی ژی ترامپ دخوازیت دەستھەلاتا نھا داخوازیێن وان قەبوول بکەت، ‏ئانکۆ مەرەما ئەمریکا ئەوە نینە دەستھەلات بھێتە گوھۆرین و گەلەک جاران ژی ڤان بخوە ئەو یەک ‏دیار کرینە، ژ بەر ھندێ ژی ئەز دبێژم دڤێت ھێزێن کوردی و ھێزێن دی یێن سیاسی ل ئیرانێ ڤێ ‏راستیێ باش بزانن و گۆت: (ھەتا نھا ستراتیژیا ئەمریکا ل ھەمبەر ئیرانێ ژی دیار نینە، جارەکێ ‏دبێژن ئەم دێ سزایێن توند ل سەر ئیرانێ سەپینین و ل ئالیێ دی دبێژن ئەم بەرھەڤین ل گەل ‏بەرپرسێن ئیرانێ دانوستاندنان بکەین، ئانکۆ دیارە ئەمریکا تنێ دخوازیت داخوازیێن خوە ل سەر ‏دەستھەلاتێ فەرز بکەت).‏

مامۆستایێ زانکۆیێ ئەو یەک ژی نەڤەشارت کو نھا رۆژ ب رۆژێ رەوشا ئابووری یا ئیرانێ خراب ‏دبیت، لێ پرسا سەرەکی ئەوە کا خرابیا رەوشا نھا یا ئابووریێ کارتێکرنا خوە ل کێ کریە، پرانیا ‏بەرپرسێن نھا یێن ئیرانێ وەلاتیێن ئێک ژ وەلاتێن ئورۆپا و ئەمریکا نە، سەرۆک کۆمار و جێگرێن ‏وی ل گەل پرانیا وەزیران و دەولەمەندێن ئیرانێ دشێن ب ساناھی بچنە ئەمریکا یان ژی ئورۆپا و ‏خێزانێن وان ل دەرڤە دژین، سزایێن نھا ئەمریکا ل سەر ئیرانێ سەپاندی چو کارتێکرنا خوە ل وان ‏ناکەت و تنێ خەلکێ ھەژار بووینە قوربانی و گۆت: (دەستھەلاتا نھا یا ئیرانێ ژی شیایە دوژمناتیا ‏ئەمریکا بۆ مانا خوە باش بکار بینیت و پێگەھێ دەستھەلاتا خوە بھێز کەت، ھەتا رەوش وەسا ‏بەردەوام بیت ئەز باوەر ناکەم کو چو گوھۆرینەک وەسا مەزن ل ئیرانێ روو بدەت، وەلاتێن ئورۆپا ‏ژی ژ بەر بەرژەوەندیێن خوە یێن ئابووری دخوازن سیستەمێ نھا یێ ئیرانێ ھەبیت و مە دیت کا ‏چاوا پرانیا وەلاتێن ئورۆپا بزاڤ دکرن کو ئەمریکا سزایێن ئابووری ل سەر ئیرانێ نەسەپینیت، ‏چونکو ئیرانەکا لاواز د بەرژەوەندیا وان دایە و دشێن ھەموو داخوازیێن خوە ل سەر ئیرانێ فەرز ‏بکەن).‏

ناڤھاتی د دووماھیا ئاخڤتنا خوە دا ئەو یەک ژی دیار کر کو گەلەک کریارێن ئەمریکا ل رۆژھەلاتا ‏ناڤین د خزمەتا دەستھەلاتا نھا یا ئیرانێ بوویە، وەکو ریفراندۆما ھەرێما کوردستانێ، چونکو ھەکە ‏دەولەتەکا کوردی ھاتبا ئاڤاکرن دا پێگەھێ ئیرانێ لاواز بیت، لێ ئەمریکا ژی وەکو ئیرانێ دژبەریا ‏دەولەتا کوردی کر و نەھێلا کورد بگەھنە مافێن خوە، ژ بەر ھندێ ژی ئەز دبێژم سیاسەتا ئەمریکا ‏پتر خزمەتا مانا دەستھەلاتا سیاسی یا ئیرانێ دکەت.‏