ئەڤرۆ نیوز، نەوزاد ھلۆری:
سپێدەھیا ئەڤرۆ سنێلەیەکێ ل سنوورێ ناحیا روڤیا یا سەر ب قەزا بەردەرەش خوە خەندقاند و ھەتا نوکە ژی ئەگەرا روودانێ نەھاتیە زانین.
ژێدەرەکێ ل نێزیک روودانێ بو ئەڤرۆ نیوز گۆت: (سپێدەھیا ئەڤرۆ سنێلەیەکێ ل گوندێ ئومەرسینان ل سنوورێ ناحیا روڤیا یا سەر ب قەزا بەردەرەش بناڤێ محەمەد عیان د ژیێ 15 سالیێ دا خوە خەندقاند).
زێدەتر گۆت : (ھەتا نوکە ئەگەرا خوە خەندقاندنا وی سنێلەی نەھاتیە زانین، و تەرمێ وی بو نوژداریا داد ھاتیە رەوانەکرن بو زانینا ئەگەرا روودانێ).
ئه‌ڤرۆ نيوز:
ئەو خەلکێ گەلەک ھەست ب نقروسکا نیڤرۆیان دکەن و خەوا وان دھێت بەردەوام دبیت تووشی نەخۆشیا زەھایمەرێ بن پتر سێ جارکی ھندی وان یێن کێم ھەست ب خەوێ دکەن ل نیڤرۆیان.
ڤەکۆلەران ل زانکویا جونز ھوبکنز گۆت: دەمێ کەسێن دانعەمر ب رۆژێ و ب تایبەت ل نیڤرۆیان خەوا وان دھێت دبیت ئێک ژ نیشانێن زەھایمەرێ بیت، دیسان زانایان دیار کر کو نڤستنا نە دروست ب شەڤێ دبیتە ئەگەرێ خەرفتنێ.
مامۆستایێ ھاریکار ل بەشێ ساخلەمیا عەقلی ل کولیجا جونز ھوبکنز بلومبرغ یا ساخلەمیا گشتی، ئادم سبیر ل دۆر فاکتەرێن ڤێ خەوێ دبێژیت: چالاکیێن عەقلی و راھێنان و سیستەمێ خارنێ ژ فاکتەرێن گرنگە بۆ خوەپاراستنێ ژ نەخۆشیا زەھایمەرێ.
زانایان ڤەکۆلین ل سەر ھزارەھا خوبەخشان کریە ھەر ژ سالا 1958 داکو بگەھنە ئەنجامەکی، خەلکی چەندین سالان پشکنین و تێستێن ساخلەمی دکرن.
ئه‌ڤرۆ نيوز:
سێ کچ کو خەلکێ فرەنسانە و قوتابیێن کولیژا پزیشکی نە ل قوناغا 6ێ و دووماھیێ ل پاریس ژ زانکویا (Paris5 Decartes)ل فرەنسا، ئەڤە بو ماوێ ھەیڤەکێ یە . ب سەرپەرشتیا رێکخراوا (ستێب ئین) وەک خۆبەخش ھاتینە ھەرێما کوردستانێ دا کو خزمەتا ئاوارا بکەن، روژانە ل دەمژمێر 8 سپێدێ ھەتا 3:30 ئێڤاری ل کلینیکا نوژداری یا کەمپا داودیێ و شاریا کار دکەن و ھندەک روژا چوینە دەف ئاوارێن گوندا ژی.
بوچی تە کوردستان ھەلبژارد؟ سەڤدایێ گۆت: (من شیان ھەبون و ھەلبژاردن یا من بۆ کو بچمە ھەر جھەکێ، لێ ژبەرکو ئەسلێ من کوردە، لەوما من کوردستان ھەلبژارد و من دڤیا ھاریکاریا نەتەوا خوە بکەم، ھەرچەندە کوردا باکورم و ل فرەنسا بۆیمە و ژیایمە، بەس من ئەو نێزیکی یا ھەی ل گەل کوردێن ھەر چار پارچێن دیتر).
سەڤدایێ ئەو چەندە ژی گۆت: (من دڤیا بھێم کوردستانێ ببینم، ژبەرکو من دزانی ئێزدی پشتی سالا 2014 و ھاتنا داعشا گەلەک یێن ھاتینە ئێشاندن و من زانی کو کەمپێن وان ھەنە، لەوما من دڤیا ھاریکاریەکا مرۆڤایەتی پێشکێشی وان بکەم، ھەروەسا ژبەرکو ئەم قوتابیێن قوناغا 6ێ و دووماھیێ یا کولیژا پزیشکی نە و دێ تبێ خلاس کەین، ئەڤجا مە دڤیا تشتەکێ جیاواز ببینین ژ وێ ئەوا مە دیتی و خواندی و پتر بکەڤینە د کاریدا ل جھەکێ جیاواز و ئاریشێن جیاوازتر ببینین ژ وان یێن مە دیتین).
چاوا کورددستانێ د ھەلسەنگینی؟ سەڤدایێ گۆت: (من دزانی کوردستان یا پێشکەفتیە و بەحسێ کوردستانێ بو من ھاتبو کرن، بەس ئەڤا من بچاڤێن خوە دیتی گەلەک زێدەتر بو ژ وێ ئەوا بو من ھاتیە گۆتن و ئەوا من پێشبینی دکر و بو من گەلەک یا خۆش بۆ، چونکی وەکی دبینم د گەلەک لایەنا دا یا پێشکەفتیە و ئەو تشت لێ ھەنە ئەوێن د وەلاتەکێ پیشکەفتی دا ھەبن و بتنێ ئەو تشتێ من دیتی کو یێ جیاواز ل گەل پێشبینیێن من برینا کەھرەبێ بو).
ئاوارا چ گازندە ھەبون؟ سەڤدیێ گۆت: (ئاوارە گەلەک پێدڤی ب ھندێ نە کو باخڤن و ئێک گوھداریا وان بکەت، ژبەرکو دەنگێ وان ناگەھیتە چ جھا ھەکو مە دبینن دھێن دئاخڤن و حەز دکەن ئەم گوھێ خوە بدەینێ).
کلیمانتین ژی ئێک ژ وان کچایە گۆت: (یا گرنگ بو من ئەوە خزمەتا مرۆڤایەتیێ بکەم، لێ من ژبەرھندێ کوردستان ھەلبژارد ژبەرکو د ڤان سالێن دووماھیێ دا گەلەک بەحسێ کوردستانێ د میدیایێ دا ھاتە کرن و لبەر گوھێن مە کەفت مە نیاسی و مە زانی کو ئاریشەکا مەزن ل ڤێرە ھەیە، ھەروەسا ھاتنا پەنابەرا بو ئەوروپا و سیاسەت و حوکمەتا مە بخۆڤە مژوول کر و مە بخو ژی ھەست پێ دکر لەوما یا بو مە گرنگ بو کو بھێینە ڤێرە).
ھوون چ دکەن بو ئاوارا؟ کلمانتینێ گۆت: (ئەم رۆژانە ژ دەمژمێر 8 دچینە ناڤ کەمپا دا و دەست ب کارێ خوە دکەین ھەتا دەمژمێر 3:30 ئێڤاری ھەر ئێک ژ مە رۆژانە ھەتا 30 نەخۆشا د مەشینینن و چارەسەر دکەین، نەک بتنێ ل کەمپا داودیێ و شاریا ئەم کار دکەین بەلکو ئەم دچینە گوندا ژی نەخۆشا چارەسەر دکەین).
ھەوە رەوشا ئاوارا و کەمپێ چاوا دیت؟ کلیمانتینێ گۆت: (ئەوا مە دیتی ل کەمپا داودیێ کو کەمپەکا بچووکە بەس کەمپەکا گەلەک باش و ب رێک و پێکە و ھەموو خزمەتگوزاری لێ ھەنە و یا پاقژە و کلینیکێن نوژداری لێ ھەنە و ژ ھەموو لایەکێ ڤە باش یێن ھاتینە دروستکرن، بەس پاشەروژ نینە و ئەڤ چەندە کارتێکرنەکا دەروونی لێ دکەت، چونکی کەس نزانیت دێ پاشەروژا وی چلێ ھێت).
ھەوە بەس ژلایێ ساخلەمیڤە خزمەتا ئاواران کریە یان ژلایێ ماددیڤە ژی؟ ئوغیلی گۆت: (مە ژ ھەردو لایاڤە خزمەتا ئاوارا کریە ھەم ژلایێ ساخلەمیڤە و ھەم ژی ژ لایێ ماددیڤە و نێزیکی ھزار کارتونێن تشتا مە ل سەر 5 ھزار کەسا پارڤە کرن کو ئەو پێداویستی تێدا بون یێن روژانە پێدڤی دبنێ، ھەر کارتونەک بو 5 کەسا بوو).
دەمێ ھەوە ڤیای بھێنە کوردستانێ کار بکەن خێزانێن ھەوە نەبونە رێگر؟ ئوغیلی گۆت: (بو مە عاجز بون و گەلەک دو دل بون بەس نەبونە رێگر، چونکی بو وان ئیران، عیراق، تورکیا، سوریا ئەو دەڤەرن یێن مەترسی تێدا ئەوان و ھند زانیاری نینن کو بزانن کوردستان دەڤەرەکا جیاوازە ژ وان جھا و وەسا دبینن کو یا د مەترسیێ دا لێ ئەم نەشیاینە وان وەسا تێ بگەھینین و باوەریێ بۆ چێکەین کو کوردستان دەڤەرەکا ئێمنە و گەلەک کەمپ و ئاوارە تێدانە ژبەرھندێ ژی روژانە ئەم پەیوەندیێ ب خێزانێن خوە دکەین دا کو بزانن ئەم ب سلامەتین).
پشتی ھوون ھاتینە دناڤ ئاوارا دا ھەوە ھەلسەنگاندنەک کریە و د چ بواردا کێشە ھەنە؟ ئوغیلی گۆت: (مە د بوارێ ساخلەمیێ دا ھەلسەنگاندن کریە و نەخوشیێن وان د ژێکجودانە و چەندین نەخوشی دناڤ ئاوارا دا ھەنە و ھندەک دوم درێژن وەک فشارێ و نەخوشیا شەکرێ بتایبەت کەسێن ب تەمەن ئێشێن وان ئەڤەنە و یێن زارۆیان ژی ئیلتھاب و نەخوشیێن پیستی گەلەک د زورن، ھەورەسا ھندەکا ژی پشت ئێش و لەش ئێش ل دەف ھەیە و ئەم دبینین ئەگەرێن ڤێ چەندێ ژی پتر بۆ نەخوشیێن دەروونی د زڤرن و نەخوشیێن دەروونی ژی د زێدەنە لەوما پێدڤیە ژبلی کلینیکێن تبی یێن سایکولوژی بھێنە ڤەکرن).
ئه‌ڤرۆ نيوز:
ڤەکۆلینەکا نوو دایە دیار کرن کو ئەو قەرەبالغا ژ ئامیرێن تەلەفزیونێ و سێشوارێن پرچی دچیت، دبیت شیانێن مێشکی یێن وەرگرتنا پێزانینان کێم بکەت و زوو پیر ببیت.
مونا عەتارە دروستکەرا ڤێ ڤەکۆلینێ ژ زانکویا ئویا دبێژیت: گەلەک بەڵگە دیار دکەن کو مێشک ب خوارنا پێزانێن بەرەلا تێک دچیت مینا قەرەبالغێن سپی ژ بەر تێکدانا گەھاندنا کێمیاوی.
گەلەک جاران شیرەتا دختوران ئەوە قەرەبالغا سپی بچیتە نەخۆشێن گوھێن وان تەنین ھەی باشترە داکو ئەو زنگزنگا ژ گوھێ وان دھێت کێم ببیت.
ل دووڤ سایتێ (روسیا الیوم) قەرەبالغا سپی و تەنینا گوھی کریارا پیر بوونا مێشکی بلەز دئێخیت، ھەروەسان وان پێ باش نینە ڤی جورێ قەرەبالغێ بکاربینن بۆ چارەسەریا حالەتێ گوھلێبوونێ.
سەرەرای ھندێ کو ئەنجام دبیت ل دووڤ کەتواری بن، بەلێ ھەتا نوکە نەگەھشتینە راستیا کارتێکرنا قەرەبالغا سپی ل سەر مرۆڤان.
تایبەتمەندەکێ بسپور د بوارێ گوھان دا ھوشداری دان کو نفشەکێ تمام یێ بەرھەڤە تووشی مەترسیا نابیستنێ ببیت، کەسێن ژیێن وان کێمی 30 سالیێ چۆنکو گوھداریا موسیقا قەرەبالغ و گران دکەن بشێوەکێ مەزن ل سەر تەلەفونێن خوە.
ئەڤرۆ نیوز، نەوزاد ھلۆری:
دەمەکیچ کێم بەری نوکە کومسیوونا بلند یا ھەلبژارتن و راپرسیێ یا ھەرێما کوردستانێ د کونگرەیەکێ رۆژنامەڤانی دا دیارکر کو 425 سکالا ھاتینە تومارکرن و کومیسون یا بزاڤێ دکەت ب زوترین دەم ئەنجامان رابگەھینیت.
ھندرین محەمەد سەروکێ کومسیوونا بلند یا ھەلبژارتن و راپرسیێ یا ھەرێما کوردستانێ گۆت: (425 سکالا ژلایێ لیست و قەوارێن سیاسیێن پشکدار د ھەلبژارتنان دا گەھشتینە کومسیوونێ، و نابیت ئەم لەزێ د راگەھاندنا ئەنجامان بکەین بەلکو گرنگتر ئەوە ئەنجام د پاقژ و ھور و دروست بن)
زێدەتر گۆت: (کومسیوون یا بزاڤێ دکەت ب زوترین دەم ئەنجامان بو ھەموو لایەکێ ئاشکرا بکەت،و بەشەک ژ سکالایان پێدڤی ب دوڤچون و ڤەکولینێ یە و دبیت پێدڤی ب گازیکرنا لایەنێ سیاسی و بەرپرسێ وێستگەھێن ژی بکەین ،و کومسیون ب رژدێ دێ مافێن ھەموو وان فەرمانبەران پارێزیت ئەڤێن کو ھێرش بو سەر وان ھاتیەکرن ، و بو ڤێ مەرەمێ ژی پارێزەر ھاتینە گرتن و دوسیێن وان دێ ھێنە رەوانەکرن بو دادگەھێ)
ئەڤرۆ نیوز، نەوزاد ھلۆری:
کومسیوونا بلند یا ھەلبژارتن و راپرسیێ یا ھەرێما کوردستانێ دیارکر کو ئەڤرۆ دێ ئەنجامێن نە فەرمیێن ھەلبژارتنێن پەرلەمانێ کوردستانێ ھێنە راگەھاندن.
عەلی بەندی بەرپرسێ ئوفیسا دھۆک یا کومسیوونا بلند یا ھەلبژارتن و راپرسیێ یا ھەرێما کوردستانێ بۆ ئەڤرۆ نیوز گۆت: (بریارە ئەڤرۆ د کونگرەیەکێ رۆژنامەڤانی دا ل ھەولێر ئەنجامێن نە فەرمیێن ھەلبژارتنێن پەرلەمانێ کوردستانێ بھێنە راگەھاندن و تێدا بو ھەموو لایەکێ رون بیت کا سەنگا وان چەندە و ھەر لیست و قەوارەیەکێ سیاسی و بەربژار دەنگێن خوە بزانن).
زێدەتر گۆت: (نوکە جوداکرنا دەنگان ل سنوورێ پارێزگەھا دھۆک دوماھی ھاتیە ، و دێ بو ھەولێر و ئوفیسا نیشتمانی ھێنە رەوانەکرن ، و رەنگە گورانکاری د وان ئەنجامان دا بھێتەکرن یێن کو ئالیێن سیاسی پێشتر وەرگرتی ، ژبەرکو پشتی پێداچۆن د سکالایان دا دێ ئەنجام ھێنە راگەھاندن).
ئه‌ڤرۆ نيوز:
رێڤەبەرێ بەنکا چاندنێ ل پارێزگەھا دھۆکێ ئاشکراکر کو ھەتا نوکە نێزیکی 50 ملیار دینار حوکمەتا ھەرێمێ وەک پشتەڤانی بۆ کەرتێ چاندنێ داینە جۆتیاران و مفاداربووینە.
ھشیار محسن رێڤەبەرێ بەنکا چاندنێ بۆ رۆژناما ئەڤرۆ گۆت: ل تەباخا سالا 2009 مە دەست ب دانا قەرانکر بۆ جۆتیاران ھەتا 20/12/2013 بەردەوام بوو، 1896 جۆتیار مفاداربوون ژ ئەڤان قەران ل سەرانیەری پارێزگەھا دھۆکێ نێزیکی 50 ملیار دینار بۆ ئەڤێ ھەژمارێ ھاتنە تەرخانکرن و کوژمێ ھەتا نوکە ھاتیە زڤراندن بۆ بەنکێ 21 ملیار و 700 ملیۆن دیناران بووینە، پتریا جۆتیاران پێگرین ب رێنمایێن حوکمەتێ و پارێ خوە تینن و ئەڤە تشتەکێ رێژەی یە و ھندەک ژی گیرودکەن، ل دووڤ رێنمایێن وەزارەتا دارایی ھەر جۆتیارەکێ پارێ خوە گیرۆبکەت کوژمێ 12% دێ چیتە سەر وەک سزادان. ھشیاری ئەو ژی ئاشکراکر کو پرۆژێن جۆتیار مفاداربووین، خودانکرنا پەلەوەران 74 پرۆژە بووینە،لێدانا بیران 327 ،کرینا تەرەکتوورا 410 بووینە، کرینا دەراسان شەش بووینە، دروستکرنا 18 خانیێن بلاستیکی، دروستکرنا بیستانا 186 بووینە، نووژەنکرنا بیستانان 241 بووینە کرینا ئامیرێن ئاڤدانێ 275 بووینە، خودانکرنا مێشێن ھنگڤینی 16 بووینە، خودانکرنا ماسیا 13، دروستکرنا گولخانا دوو بووینە، خودانکرنا پەزی 44 بووینە، خودانکرنا چێلا 19 بووینە، راکێشانا کارەبێ بۆ پرۆژێن پەلەوەرا 153 ھەنە، دروستکرنا عومبارێن تەزاندنێ شەش، مفقس ئێک، خودانکرنا گامێش ئێک، گرۆپێن خودانکرنا پەلەوەران دوونە، خەلکێ گەلەک مفاداربووینە و تایبەت قەزایێن شێخان و ئاکرێ و بەردەرش و زاخۆ بووینە.
ھشیار ئەو ژی ئاشکراکر کو سەرەرایی جۆتیارێن زەلام لێ گەلەک ئافرەتان ژی مفا ژ پرۆژێن وەرگرتنا قەرێن چاندنێ دیتی یە، دیسا پێشبینی دکەین ھەر برا یان ھەڤژینێ ئەڤان ژنان ب ھەڤرا مفاداربووینە ژ ئەڤان پرۆژان. ھشیار محسن ئەو ژی ئاشکراکر کو گەلەک مامەلە ھەنە ماینە نیڤە روو و 180 جۆتیار ھەنە و ھندەکا پشک وەرگرتینە و ھندەکا ھێشتا نە وەرگرتینە وئەڤە ل سەر چەند پشکان پشتەڤانیا پرۆژان دھێتەکرن لێ پشتی قەیرانێ مە دەست ب چ پرۆژان نەکریە ھەتا نوکە، کێشا سەرەکی یا مە پارە یە و بەحسەکێ خوەش ھەیە کو ئەو پرۆژێن ماینە نیڤە روو کو دێ ھێنە تەمامکرن و ھندەک پارە ماینە و بەلکو سالا داھاتی بھێتە تەمامکرن و ھەتا نوکە بتنێ گۆتنە و چ تشتێ فەرمی نینە و ئەگەر ھەبیت ژی دێ سالا داھاتی دەست پێ ھێتەکرن.
رێڤەبەرێ بەنکا چاندنێ ب رێکا رۆژناما ئەڤرۆ خواست جۆتیارێن ھەتا نوکە پارێن خوە نەداین ب زووترین دەم بگەھینە بەنکا چاندنێ دا تووش چ سزایێن قانوونی نەبن ب رێژا 12% چ دەنگۆ نینە کو حوکمەت جۆتیاران بوریت و نڤیسار ھاتینە بۆ بەنکێ کو جۆتیارێن پارێن خوە گیرۆبکەن پارە ژێ بھێتە وەرگرتن وەک سزایێن قانوونی.
ناڤبری ئەو ژی ئاشکراکر کو ل ھەیڤا بوری ھەتا 10 جۆتیاران ژ بەر نەدانا قەرێن خوە ھاتینە سزدان، ل ئەڤ سالە ھەتا 120 ملیۆن دیناران وەک سزادان ژ جۆتیاران ھاتینە وەرگرتن.
رێڤەبەرێ بەنکا چاندنێ ئەو ژی دیارکر کو لژنەکا تایبەت ھەیە و ھەیڤانە ب تێلەفونێ ئەو جۆتیار دھێنە ھایدارکرن کو نێزیکی دانا قەری بووینە و جۆتیار دھێتە ئاگەھدارکرن کو ب زووترین دەم سەردانا بەنکا چاندنێ بکەن و ھەکە نەھاتە بەنکێ ب نڤسیار پولیس دھێنە ئاگەھدارکرن و ئەو گازی جۆتیاری دکەن و ھایداردکەن ل سەر دانا قەرێن چاندنێ، قوناغا سیێ نڤسیارەکا فەرمی دەینە تومارا خانوبەران و لژنەکا تایبەت ھەیە ل گەل لژنا مە سەردانا مالا دەستەبەری ئانکو کەفیلی دکەن و ھایدار دکەن کو دڤێت سەردانا بەنکێ بکەی و بڤی رەنگی خەلکێ مە گازندا دکەن بێژن مە ھایدار ناکەین دبێژینێ ئەم ب چەندین قوناغا ھەوە ھایدار دکەین.
ئه‌ڤرۆ نيوز:
رێكخراوا NSA يا نه‌رويجى دو ته‌نده‌ران ژبۆ لايه‌نێن بازرگانى و كۆمپانيان رادگه‌هينيت كو هه‌ر لايه‌كێ حه‌زا كارى هه‌بيت دشێت بۆ ب ده‌ست ڤه ئينانا ڤان خزمه‌تان پێش كێشى رێكخراوا ناڤبرى بكه‌ت.
بۆ پێتر پێزانينان ڤان دو لينكان كليك بكه‌ن:
ته‌نده‌ر 1 TENDER 1
Construction and extension of water network for the WASH Program.
ته‌نده‌ر 2 TENDER 2
Construction of drinking water pipeline for the WASH Program
ئەڤرۆ نيوز:
بەرپرسەکێ بەنکا ناڤەندی یا عیراقێ ئاشکرا کر کو بڕیارە بەغدا ب رێیا بانکێن ئەھلی قەرەکێ بچووک بدەتە وەلاتیێن ھەرێما کوردستانێ.
عابد سالح، رێڤەبەرێ گشتیێ بانکا ناڤەندی ل ھەرێما کوردستانێ دیار کر کو بڕیارە ئاسانکاری بۆ پێدانا قەران ب وەلاتیێن ھەرێما کوردستانێ بھێنەکرن و بۆ باسنیۆز گۆت: ”رەنگە بەنکا ناڤەندی یا عیراقێ قەرزێن بچووک ب رێیا بەنکێن ئەھلی بدەتە وەلاتیێن ھەرێما کوردستانێ و بۆ چەوانیا پێدانا قەران پاش دێ بڕیار و رێنما ھێنە دەرکرن”.
ناڤھاتی ئاماژە دا وێ چەندێ کو دەرفەتەکا باش ھەیە بۆ وێ چەندێ کو ئەو قەرێن ل پارێزگەھێن دی یێن عیراقێ ب وەلاتیان دھێنە دان ل ھەرێما کوردستانێ ژی بھێنەدان و گۆت: “نوکە مامەلێن بەنکی دناڤبەرا ھەولێر و بەغدا دا گەلەک بەر ب پێشڤەچووینە و مە ھیڤیێن مەزن ھەنە ئەو قەرێن ل بەغدا دھێنەدان ژ ھەرێما کوردستانێ ژی بگرن”.
ئەڤرۆ نيوز:
سەرۆکێ لیستا برایەتی و پێکڤەژیانێ ل جڤاتا پارێزگەھا نەینەوا ئاشکرا کر کو حوکمەتا عیراقێ بڕیار یا دای ئەو قوتابیێن ل ھەرێما کوردستانێ د خوینن و خەلکێ مووسل بن، د دەمەکی دا ڤان قوتابیان نە جھێ ئاکنجیبوونێ و نە شیانێن ھاتنوچوونێ ھەنە ژ بەر ڤێ چەندێ مەترسی ھەیە ئەڤ سالە ژ خواندنێ بێ بەھر بن.
بەرەکات شەمۆ، سەرۆکێ لیستا برایەتی و پێکڤەژیانێ ل جڤاتا پارێزگەھا نەینەوا دیار کر کو جڤاتا وەزیران بریارەک دەرکریە بۆ وان نوونەراتیێن ل ھەرێما کوردستانێ ل پارێزگەھێن ھەولێر و دھۆکێ ھەین بۆ ب رێڤەبرنا کاروبارێن قوتابیێن ئاوارە یێن کو ل زانکۆ یێن ھەرێما کوردستانێ د خوینن، پێدڤیە بھێنە داخستن و مامۆستا و قوتابی ڤەگەڕنە مووسل و گۆت: “جڤاتا وەزیران داخواز ژ وەزارەتا خواندنا بلند و ڤەکۆلینێن زانستی یا حوکمەتا عیراقێ کریە ڤێ بڕیارێ بجە بینن”.
ناڤھاتی ئاماژە دا وێ چەندێ کو ئەو قوتابیێن ل زانکۆیێن ھەرێما کوردستانێ د خوینن بەھراپتریا وان کێم نەتەوەنە و پێکھاتن ئێزدی و مەسیحی نە وھەتا نوکە ژی خێزانێن وان ئاوارەنە یان ل دەشتا نەینەوا نە ژ بەر ڤێ چەندێ نەشێن بچنە مووسل و بەردەوامیێ ب خواندنا خوە بدەن، سەرەریی ڤێ چەندێ نەشێن ھاتنوچوونێ بکەن و پشکێن ناڤخۆ ژی نینن لێ بمینن و بۆ مالپەرێ فەرمیێ پارتی دیموکراتی کوردستان گۆت: “ئەڤ بڕیارە بھێتە بجە ئینان دێ قوتابی تووشی ئاستەنگێن مەزن بن و رەنگە ئەڤ سالە ژ خواندنێ بێ بەھر بن”.
ژ ئالیێ خوە ڤە فراکسیۆنێ پارتی دیموکراتی کوردستان ل پەرلەمانێ عیراقێ یاداشتەک دایە سەرۆکاتیا پەرلەمانێ عیراقێ بۆ وێ چەندێ ئەڤ بڕیارە نەھێتە بجە ئینان، چونکی قوتابی ژ ئەگەرێ نەبوونا شیانێن ماددی نەشێن ل مووسل بخوینن و سەرەرایی ڤێ چەندێ ئێمناھیا باژێری ژی نەدئاستێ پێدڤی دایە.
د ھەمان یاداشت دا ھاتیە کو ھژمارا وان قوتابیێن ل ھەرێما کوردستانێ درێژیێ ب خواندنا خوە ددەن دو ھزار و 200 قوتابی نە کو ھەموو ژ ترسێن تیرۆرستێن داعش دا ئاوارەبووینە.
نيشاندان