ئه‌ڤرۆنيوز:
برياره ل هه‌فتيا بهێت وه‌زاره‌تا دارايى وئابوورى ل هه‌رێما كوردستانێ ده‌ست ب به‌لاڤكرنا مووچێ هه‌يڤا ته‌مووزا 2018 بكه‌ت.
ژێده‌ره‌كى ژ وه‌زاره‌تا دارايى ل هه‌رێما كوردستانێ بۆ ئه‌ڤرۆنيوز دياركر” ل ده‌ستپێكێ دێ مووچێ هه‌ردو وه‌زاه‌رتێن پێشمه‌رگه هێته به‌لاڤكرن وپاشى مووچێ وه‌زاره‌تا په‌روه‌ردێ”.
ئه‌ڤرۆنيوز:
سه‌رۆكێ په‌رله‌مانێ عيراقێ محه‌مه‌د حه‌لبوسى برياردا كۆمبوونا په‌رله‌مانێ عيراقێ بۆ هه‌لبژارتنا سه‌رۆكێ كۆمارا عيراقێ بۆ ده‌مژمێر 8 ئه‌ڤ شه‌ڤه هاته پاشخستن.
بريار بوو ل ده‌مژمێر ئێكێ پشتى نيڤرۆ يا ئه‌ڤرۆ سێشه‌مبى 2/10/2018 كۆمبوونا په‌رله‌مانێ عيراقێ بۆ هه‌لبژارتنا سه‌رۆك كۆمارى بهێته ئه‌نجامدان.
ئه‌مجه‌د ته‌ليع رۆژنامه‌ڤانێ عيراقى ژئاڤاهيێ په‌رله‌مانێ عيراقێ بۆ ئه‌ڤرۆنيوز دياركر، ژبه‌ر نه تمامبوونا نيسابا قانوونى يا په‌رله‌مانتاران، حه‌لبوسى برياردا كۆمبوونا په‌رله‌مانى بۆ ئه‌ڤ شه‌ڤه بهێته پاشخستن.
ئه‌ڤرۆ نيوز:
پارتى ديموكراتى كوردستان هوشداريێ دده‌ته د. به‌رهه‌م سالح و ئێكه‌تى نشتيمانى كوردستان دده‌ت كو هه‌كه به‌ربژارێ خوه بۆ پۆستێ سه‌رۆك كۆمارێ عيراقێ ڤه‌نه‌كێشيت، به‌ختێ وه‌زيرێ ژ ده‌رڤه يێ عيراقێ ژى دێ ژ ده‌ست ده‌ت.
ژێده‌ره‌كى ژ ناڤ پارتى ديموكراتى كوردستان بۆ باسنيوز راگه‌هاند كو پارتى ب چو ره‌نگه‌كى خوه ڤه‌ناكێشيت و كانديدێ خوه بۆ پۆستێ سه‌رۆك كۆماريێ ڤه‌ناكێشيت، بگره لايه‌نێن عيراقى ژى پشته‌ڤانيا به‌ربژارێ پارتى بۆ پۆستێ سه‌رۆك كۆماريا عيراقێ دكه‌ن.
هه‌مان ژێده‌ر دا زانين ژى كو هێشتا ده‌رفه‌ته‌ك ل هه‌مبه‌ر د. به‌رهه‌م سالح مايه دا كو پۆسته‌كى ل به‌غدا ب ده‌ست ڤه بينيت و گۆت: “هه‌كه به‌رهه‌م سالح خوه ژ به‌ربژاركرنێ ڤه‌كێشيت، دێ چانسێ وێ چه‌ندێ هه‌بيت، ببيته وه‌زيرێ ژ ده‌رڤه يێ عيراقێ”.
زێده‌تر گۆت: “هه‌كه خوه ژ به‌ربژاريێ ڤه‌نه‌كێشيت، دێ به‌ختێ بوون ب وه‌زيرێ ژ ده‌رڤه‌يێ عيراقێ ژى ژ ده‌ست ده‌ت و پارتى دێ ڤيتۆيێ دانيته سه‌ر”.
نه‌ڤه‌شارت ژى كو پارتى كێشه ل سه‌ر چو كه‌سان نينه د ناڤ ئێكه‌تيێ دا پۆستێن بلند ل به‌غدا وه‌ربگرن، به‌لێ هه‌كه به‌رهه‌م سالح خوه ژ به‌ربژاركرنێ ڤه‌نه‌كێشيت، دێ وى به‌ختى ژ ده‌ست ده‌ت.
ئه‌ڤرۆ نيوز:
ئاخفتنكه‌رێ ب ناڤێ كۆمسيۆنا بلندا سه‌ربه‌خۆيا هه‌لبژارتن و راپرسيێ ل هه‌رێما كوردستانێ راگه‌هاند كو ل هه‌ر جهه‌كێ ئيرادا ده‌نگداران ل بن گه‌فێ بيت، ده‌نگێن وى بنگه‌هى دێ هێنه پووچكرن. دا زانين ژى كو ئه‌ڤرۆ فۆرمێن هه‌موو پارێزگه‌هان گه‌هشتينه كۆمسيۆنێ و د داتابه‌يسى دا دهێنه تۆماركرن دا كو بشێن ئه‌نجامێن ده‌سپێكى رابگه‌هينن.
شێروان زرار، ئاخفتنكه‌رێ ب ناڤێ كۆمسيۆنا بلندا سه‌ربه‌خۆيا هه‌لبژارتن و راپرسيێ ل هه‌رێما كوردستانێ د داخۆيانيه‌كێ دا بۆ رووداو راگه‌هاند ژ دوهى ئێڤارى فورمێن هه‌ولێر، سلێمانى و دهۆك گه‌هشتينه و دهێته چاڤه‌رێكرن به‌رى نيڤرۆيا ئه‌ڤرۆ فۆرمێن هه‌له‌بچه ژى بگه‌هن.
گۆتژى: “كارمه‌ندێن مه ل پشكا داتا و ئاماران ل ده‌مژمێر 9:30 ده‌قيقه‌يا سێده‌هيا ئه‌ڤرۆ مژوولى دانانا داتابه‌يسێن وان فورمانه كو گه‌هشتينه ده‌ست، ده‌رباره‌يى ئه‌نجامێن ده‌سپێكى ژى 85% ژ ئه‌نجامان ب رێيا وه‌تس ئاپى گه‌هشتينه ده‌ستێ مه ل ده‌ف مه د پاراستى نه، 15% يا مايى، ب بۆچوونا جڤاتێ ئه‌و 15% يا مايى، ته‌مام بكه‌ين، پاشان هه‌ردو فورمان جودا هه‌ڤبه‌ر بكه‌ين، پاشان ئه‌ڤه بهێته كرن و ئه‌نجامێن ده‌سپێكى بهێنه راگه‌هاندن”.
دا زانين ژى كو بڕياره ئه‌ڤرۆ لژنا بلندا سكالا ل گه‌ل لژنا هاريكاريان ل ئوفيسا نشتيمانى، كو ده‌ست ب وه‌رگرتنا سكالايان كريه، بڕياره ژ لايێ لژنا بلندا كۆمسياران كو ژ پێنج كه‌سان پێك هاتيه، هووربينيێ د وان سكالان دا بكه‌ت.
ئەڤرۆ نیوز، قائید میرۆ:
مامۆستایەکێ زانکۆیێ ئاشکراکر، پۆستێ سەرۆک کۆمارێ عێراقێ مولکێ چو حزبەکا دیاریکری نینە و ئێکەتیێ شاشیەکا مەزنکر بێی پارتی دکتۆر بەرھەم سالح بەربژێرکری، ژبەرکو مەزنترین حزبا کوردستانیە.
پڕۆفیسۆر خەلیل ئیسماعیل بۆ نیۆز دیارکر” پێدڤیە ھەردو حزبێن سەرەکیێن ھەرێما کوردستانێ دناڤبەرا خوەدا بگەھنە رێکەفتنێ لدۆر بەربژێرەکی بۆ پۆستی سەرۆک کۆمارێ عێراقێ، چونکە پۆستێ سەرۆک کۆماری بەھرا ھەرێما کوردستانێ و ھەر کەسەکێ ئەڤی پۆستی وەر بگریت دێ نوونەرایەتیا عێراقێ و ھەرێما کوردستانێ بکەت، ئەڤەژی بابەتەکێ ھەستیار و گرنگە بۆ کوردان.
پرۆفیسۆر خەلیل ئیسماعیل ئاماژەکر” نابیت ئێکەتی بێی پارتی کەسەکی بکەتە بەربژێر بۆ وەرگرتنا پۆستێ سەرۆک کۆماری، ژبەرکو سەرۆک کۆمارێ مولکێ چو حزبەکا دیاریکری نینە و پارتی ژی زۆرترین کۆرسی ل ھەلبژارتنێن بۆری یێن پەرلەمانێ عێراقێ بدەستڤە ئیناینە و دانانا دکتۆر بەرھەم بێی وەرگرتنا بۆچوونا پارتی شاشیەکا مەزنبو ئێکەتیێ کری.
ئه‌ڤرۆ نيوز:
شاندێ پارتى ب سه‌رۆكاتيا نێچيرڤان بارزانى و عادل عه‌بدولمه‌هدى، سه‌ركردێ ديارێ شيعان كۆمبوون.
ئه‌ڤرۆ شاندێ پارتى ديموكراتى كوردستان ب سه‌رۆكاتيا نێچيرڤان بارزانى، جێگرێ سه‌رۆكێ پارتى ديموكراتى كوردستان ل به‌غدا ل گه‌ل عادل عه‌بدولمه‌هدى، سه‌ركردێ ديارێ شيعێن عيراقێ كۆمبوو.
ب گۆره‌يى پێزانينان د ڤێ كۆمبوونێ دا شاندێ پارتى و عه‌بدولمه‌هدى دانوستاندن ل سه‌ر پرسا پێكئينانا حوكمه‌تا داهاتى يا عيراقێ و پرسا سه‌رۆك كۆمارى كۆم بووينه.
ئه‌ڤرۆ نيوز:
جێگرێ رێڤه‌به‌رێ كۆمسيۆنا بلندا سه‌ربه‌خۆيا هه‌لبژارتن و راپرسيێ لقێ سلێمانيێ راگه‌هاند كو ل پارێزگه‌ها سلێمانيێ قردێلا سۆر ل 115 سندوقێن ده‌نگدانێ هاتيه دان.
ديار نه‌سره‌دين، بۆ خه‌ندان راگه‌هاند كو ل پارێزگه‌ها سلێمانيێ قردێلا سۆر ب 115 سندوقان ڤه‌يه و سكالا ل سه‌ر هاتيه تۆماركرن، “ئه‌و سندوق ئه‌ڤرۆ دێ بۆ هه‌ولێرێ بۆ نڤيسينگه‌ها نشتيمانى هێنه ره‌وانه‌كرن بۆ پشت راست بوون ژ وێ چه‌ندێ كو ئه‌و سندوقێن ده‌نگان دێ هێنه هژمارتن يان نه”.
ئاماژه ب وێ چه‌ندێ ژى كر كو هژمارتن و نه‌هژمارتنا وان ده‌نگان دێ گوهۆڕينێ ل سه‌ر ده‌نگێن لايه‌نێن سياسى كه‌ت.
ئەڤرۆ نیوز، لەزگین جۆقی:
ئولدارەکێ ئێزدیان دیارکر کو ل حەفتیا بھێت دێ رێورەسمێن جەژنا جەمایێ ل پەرستگەھا لالش دەست پێ کەن بۆ دەمێ حەفت رۆژان دێ د بەردەوام بن.
خواجە خەتاری ئولدارێ ئێزدیان بۆ ئەڤرۆ نیوز دیارکر کو جەژنا جەمایێ ئێکە ژ جەژنێن دێرینێن ئێزدیان رێورەسمێن وێ بۆ دەمێ حەفت رۆژان ل پەرستگەھا لالش دێ ھێنە گێران.
دا زانین ژی کو ھەموو ئێڤاریان چرایێن ئاقد و نیشانگەھێن خاسا دھێنە تێ خستن ھەر ئێزدیەکێ قەستا لالش بکەت پێدڤیە د سەر پرا سەلاتآ را بچیت و بچنە مەزارگەە و خاسا زیارەتی و ھەموو ئێڤاریا سەما دھێتە کێشان و قەول و بەیت و قەسیدە دھێنە گۆتن ل رۆژا چارێ ژ جەژنێ پەری دھێتە سوارکرن و رۆژا پێنجێ یا جەژنێ رێورەسمێن قەپاغێ دھێنە کرن و رۆژا د دووڤ دا ژی بەریێ شباکێ دھێتە سوارکرن ھەر کەسەکێ نەمۆرکری بیت ب ئاڤا کانیا سپی دھێتە مۆرکرن و سەردەریێن خاسا سماتێ چێدکەن خەلک ھەموو قەستا پەرستگەھا لالش دکەن بۆ گێرانا رێورەسمێن جەژنا جەمایێ.
خەیری بۆزانی، رێڤەبەرێ گشتی یێ کاروبارێن ئێزدیان ل وەزارەتا ئەوقاف و کاروبارێن ئاینی ل ھەرێما کوردستانێ دیارکر کو ب ھەلکەفتا ھاتنا جەژنا جەمایێ بڕیار ھاتیە دان ببیتە بھێنڤەدانا فەرمی بۆ ھەموو فەرمانبەرێن ئێزدی.
دا زانین ژی کو ئەڤ سالە رێورەسمێن جەژنا جەمایێ ل رۆژا 6-10-2018 دەست پێ دکەن ھەتا رۆژا 12-10-2018 دێ بەردەوام بن ل سەر گێرانا رێورەسمێن جەژنا جەمایێ ل پەرستگەھا لالش ئانکو حەفتیا بھێت ژ بەر جەژنا جەمایێ بھێنڤەدانە بۆ ئێزدیان ل دامودەزگەھێن حوکمەتێ.
ئه‌ڤرۆ نيوز:
فه‌رسه‌ت سۆفى، په‌رله‌مانتارێ خولا چارێ يا په‌رله‌مانێ كوردستانێ ژ فراكسيۆنا پارتى ديموكراتى كوردستان بۆ رووداو راگه‌هاند كو ب گۆره‌يى ماددێ 61 د قانوونا هه‌لبژارتنێن په‌رله‌مانێ كوردستانێ دا، هه‌ر حزبه‌كا بايكوتا په‌رله‌مانێ كوردستانێ بكه‌ت، كورسيێن وان دێ ب گۆره‌يى سيسته‌مه‌كى ب سه‌ر ليستێن دى دا هێنه به‌لاڤكرن.
په‌رله‌مانتارێ خولا به‌رێ يا په‌رله‌مانێ كوردستانێ دا زانين كو ب گۆره‌يى وى سيسته‌مى ده‌نگێن وێ ليستا خوه ژ په‌رله‌مانى ڤه‌كێشايى دێ بۆ وێ ليستا پترترين ده‌نگ برين و نه‌گه‌هشتينه كورسيێ و ب ره‌نگه‌كى هه‌تا دووماهى كورسى، ئانكو دێ بۆ لايه‌نێ ژى هه‌موويان نێزيكتر بۆ كورسيێ چيت.
ئەڤرۆ نیۆز، قائید میرۆ:
ب گورەی ئاخفتنا چاڤدێران پڕۆسا ھەلبژارتنێن پەرلەمانێ کوردستانێ ھەتا رادەیەکێ زۆر یا سەرکەفتی بوویە و چاڤدێرەکژی دبێژیت، زێدەگاڤیێن مەزن نەھاتینە تۆمارکرن.
ھشیار مالو، سەرۆکێ پرۆگرامێن ھەلبژارتنان بۆ ئەڤرۆ نیۆز دیارکر” پڕۆسا ھەلبژارتنێن پەرلەمانێ کوردستانێ رۆژا ئێک شەمبی کو بڕێڤەچوون، گورەی ئەڤێ چاڤدێریا مە کری ھەتا رادەیەکێ زۆر پڕۆسا ڤێجارێ باشتر رێڤەچوو چو پێشێلکاریێن مەزن نەھاتینە تۆمارکرن. ھیشار مالو ئاشکراکر، ل سەرتاسەری ھەرێما کوردستانێ مە ب رێیا ٦٠٠ چاڤدێران ب ھویری چاڤدێریا پڕۆسێ ھەلبژارتنان کریە، راستە ھژمارەک سکالا ھاتینە تۆمارکرن، بەلێ ھەموو پێشێلکاریێن ھاتینە تۆمارکرن پێشێلکاریێن زۆر مەزن نەبووینە.
ل دۆر رەتکرنا ئەنجامێن ھەلبژارتنان ھشیاری گوت” ل ھەموو دنیایێ وەسا یە ھێزێن زۆر دەنگان بدەستڤە نەئینن دکەڤنە تۆمەتبارکرنا پڕۆسێ و پشتی چەند رۆژێن دیژی ئەف نەڕازیبوونا نوکە ھەی لدۆر ئەنجامێن ھەلبژارتنان نامینە.
نيشاندان