ئه‌ڤرۆ نيوز:
به‌رى ده‌مه‌كێ كێم مه‌سعود بارزانى، سه‌رۆكێ پارتى ديموكراتى كوردستان ل ئێك ژ بنگه‌هێن ده‌نگدانێ يێن گشتى ده‌نگێ خوه دا.
سه‌رۆك بارزانى د داخۆيانيه‌كا رۆژنامه‌ڤانى دا پيرۆزباهى ل كوردستانيان كر ب هه‌لكه‌فتا برێڤه‌چوونا پرۆسا ده‌نگدانا په‌رله‌مانێ كوردستانێ.
دا زانين ژى كو ملله‌ت دێ بڕيارێ ده‌ت كا هه‌ر هێزه‌كێ سه‌نگا وێ چه‌نده و گۆت: “هيڤى خوازم كو ئه‌م هه‌موو دخزمه‌تا خه‌لكێ كوردستانێ دا بين”.
ئه‌ڤرۆ نيوز:
محه‌مه‌دێ حاجى مه‌حمود، سكرتێرێ پارتيا سوشاليست ديموكراتى كوردستان راگه‌هاند، دڤێت خه‌لكێ كوردستانێ يێ هوشيار بيت و رێ نه‌ده‌يت پێشێلكارى روو بده‌ن.
محه‌مه‌دێ حاجى مه‌حمود پشتى پشكداريكرنێ د پرۆسا ده‌نگدانێ دا ل ئێك ژ بنگه‌هێن ده‌نگدانێ يێن سه‌ر ب پارێزگه‌ها هه‌له‌بچه ڤه، راگه‌هاند كو ئه‌و هيڤى خوازه كو پرۆسا ده‌نگدانێ ب ره‌نگه‌كێ ئارام ب رێڤه بچت.
سكرتێرێ پارتيا سوشاليست ديموكراتى كوردستان ئاماژه ب وێ چه‌ندێ ژى كر كو دڤێت خه‌لكێ كوردستانێ يێ هشيار بيت و رێ نه‌ده‌ت پێشێلكارى و سه‌خته‌كارى روو بده‌ن.
ئه‌ڤرۆ نيوز:
نێچيرڤان بارزانى سه‌رۆكێ حوكمه‌تا هه‌رێما كوردستانێ و جێگرێ سه‌رۆكێ پارتى ديموكراتى كوردستان وه‌كو وه‌لاتێ ئێكێ يێ هه‌رێما كوردستانێ ل بنگه‌هێ ديار به‌كر ل باژێرێ هه‌ولێرێ ده‌نگێ خوه دا.
نێچيرڤان بارزانى د كۆنگره‌كێ رۆژنامه‌ڤانى دا، راگه‌هاند كو داخواز ژ هه‌موو ده‌زگه‌هێن ئه‌منى كريه كو ئه‌منيه‌تا بنگه‌هێن ده‌نگدانێ ب باشى راگرن و هيڤى ژى ژ وه‌لاتيان خواست كو ب ره‌نگه‌كێ به‌رفره‌هـ بچنه سه‌ر سندوقێن ده‌نگدانێ و ده‌نگێ خوه بده‌ن.
هيڤى ژ لايه‌نێن سياسى ژى كر كو ئه‌نجامێن هه‌لبژارتنان ب هه‌ر ره‌نگه‌كێ هه‌بيت قه‌بوول بكه‌ن ب ره‌نگه‌كێ پێش وه‌خت و ئه‌نجام ب چ ره‌نگ بن كار ژبۆ ئاڤاكرنا و پێشڤه‌برنا كوردستانێ بكه‌ن.
ل دۆر سيناريۆيێن نوو يێن پێكئينانا حوكمه‌تێ ژى گۆت: “هێشتا زوويه بڕيارێ ل سه‌ر بابه‌تێ پێكئينانا حوكمه‌تا نوو يا هه‌رێما كوردستانێ بده‌ين”، ده‌رباره‌يى به‌ربژارێ وان ژى بۆ پۆستێ سه‌رۆكاتيا حوكمه‌تا هه‌رێما كوردستانێ ژى گۆت: “هێشتا زوويه”.
ده‌رباره‌يى پۆستێ سه‌رۆك كۆماريا عيراقێ ژى د به‌رسڤه‌كا پرسياره‌كا رۆژنامه‌ڤانان دا گۆت: “پارتى ديموكراتى كوردستان و ئێكه‌تى نشتيمانى كوردستان هه‌ر ئێكێ به‌ربژارێ خوه يێ هه‌يى و خه‌لكه‌كێ دژى به‌ربژارن، به‌لێ هيڤى دكه‌م ب ئێك به‌ربژار بچينه هه‌لبژارتنا سه‌رۆك كۆماريا عيراقێ، ژ به‌ر كو د به‌رژه‌وه‌ندا كوردان دا نينه ب دو به‌ربژاران بچنه هه‌لبژارتنێن پۆستێ سه‌رۆك كۆماريا عيراقێ.
ئه‌ڤرۆ نيوز:
سپێده‌هيا ئه‌ڤرۆ رۆژا ئێكشه‌مبى رێكه‌فتى 30ى ئيلۆنا 2018ێ ده‌نگدانا گشتى بۆ په‌رله‌مانێ كوردستانێ ده‌سپێكر.
ب گۆره‌يى داتايێن كۆمسيۆنا بلندا سه‌ربه‌خۆيا هه‌لبژارتن و راپرسيێ ل هه‌رێما كوردستانێ سێ مليۆن و 85 هزار و 461 كه‌سان مافێ ده‌نگدانێ د هه‌لبژارتنێن په‌رله‌مانێ كوردستانێ دا هه‌يه، ژ وێ ژمارێ ژى دو مليۆن و 911 هزار و 313 كه‌سان مافێ پشكداريكرنێ د ده‌نگدانا گشتى دا هه‌يه.
ب ره‌نگه‌كێ گشتى ل سه‌رانسه‌رى هه‌رێما كوردستانێ نێزيكى 700 كه‌سان خوه به‌ربژار كريه و دێ هه‌ڤركيێ ل سه‌ر 111 كورسيێن په‌رله‌مانێ كوردستانێ كه‌ن.
ل سنورێ پارێزگه‌ها دهۆكێ نێزيكى 100 به‌ربژاران هه‌نه كو 40 ژ وان پارتى و 21 ئێكه‌تى و 18 ئێكگرتوو و گۆان سێ و هه‌ر ئێك ژ كۆمه‌ل و نه‌وه‌يى نوێ ژى ئێك كانديد هه‌يه.
ب گۆره‌يى ئه‌وان داتا و ئامارێن ب ده‌ست ئه‌ڤرۆ نيوز كه‌فتين، بۆ هه‌لبژارتنێن په‌رله‌مانێ كوردستانێ كۆمسيۆنا بلندا سه‌ربه‌خۆيا هه‌لبژارتن و راپرسيێ ل سه‌ر ئاستێ هه‌رێما كوردستانێ 218 بنگه‌هێن لاوه‌كى و هزار و 327 به‌نگه‌هێن ده‌نگدانێ و پێنج هزار و 811 ويستگه‌هێن ده‌نگدانێ ئاماده كرينه، ب ره‌نگه‌كى ل پارێزگه‌ها هه‌ولێر 577 بنگه‌هێن لاوه‌كى و بنگه‌هێن ده‌نگدان و دو هزار و 271 ويستگه‌هـ هاتينه دانان. ل پارێزگه‌ها سلێمانيێ 536 بنگه‌هێن لاوه‌كى و بنگه‌هێن ده‌نگدانێ و هزار و 468 ويستگه‌هـ هاتينه دانان. ل پارێزگه‌ها دهۆكێ ژى 303 بنگه‌هێن لاوه‌كى و بنگه‌هێن ده‌نگدان و هزار و 343 ويستگه‌هـ هاتينه دانان. ل هه‌له‌بچه ژى 136 بنگه‌هێن لاوه‌كى و بنگه‌هێن ده‌نگدانێ و 129 ويستگه‌هـ هاتينه ئاماده كرن.
هه‌ر ب گۆره‌يى ئامارێن كۆمسيۆنێ بۆ هه‌لبژارتنێن 30ى ئيلۆنێ زێده‌تر ژ 35 هزار فه‌رمانبه‌ران هاتينه مه‌شقكرن و د ماوێ چه‌ند رۆژێن بهێت دا 42 هزار فه‌رمانبه‌رێن دى كو د تايبه‌تن ب رۆژا هه‌لبژارتنان دێ مه‌شق پێ هێته كرن و رۆژا 15ى ئيلۆنێ ژى هه‌موو كه‌لوپه‌ل و پێدڤيێن كۆمسيۆنێ دێ گه‌هنه باره‌گايێ ئوفيسا نشتيمانى ل هه‌ولێر.
ب گۆره‌يى داتايێن كۆمسيۆنێ ل پارێزگه‌ها هه‌ولێرێ مليۆنه‌ك و 101 هزار و 518 كه‌سان مافێ ده‌نگدانێ هه‌يه و ژ وان ژى مليۆنه‌ك و 34 هزار و 864 كه‌سان د ده‌نگدانا گشتى و 66 هزار و 654 كه‌سان ژى د ده‌نگدانا تايبه‌ت دا مافێ پشكداريكرن د هه‌لبژارتنان دا هه‌يه.
ب گۆره‌يى داتايێن كۆمسيۆنێ ل پارێزگه‌ها سلێمانيێ مليۆنه‌ك و 195 هزار و 417 كه‌سان مافێ ده‌نگدانێ هه‌يه و ژ وان ژى مليۆنه‌ك و 133 هزار و 655 كه‌سان د ده‌نگدانا گشتى و 61 هزار و 762 كه‌سان ژى د ده‌نگدانا تايبه‌ت دا مافێ پشكداريكرن د هه‌لبژارتنان دا هه‌يه.
ب گۆره‌يى داتايێن كۆمسيۆنێ ل پارێزگه‌ها دهۆك 719 هزار و 375 كه‌سان مافێ ده‌نگدانێ هه‌يه و ژ وان ژى 676 هزار و 860 كه‌سان د ده‌نگدانا گشتى و 42 هزار و 515 كه‌سان ژى د ده‌نگدانا تايبه‌ت دا مافێ پشكداريكرن د هه‌لبژارتنان دا هه‌يه.
ب گۆره‌يى داتايێن كۆمسيۆنێ ل پارێزگه‌ها هه‌له‌بچه 69 هزار و 151 كه‌سان مافێ ده‌نگدانێ هه‌يه و ژ وان ژى 65 هزار و 934 كه‌سان د ده‌نگدانا گشتى و 3 هزار و 217 كه‌سان ژى د ده‌نگدانا تايبه‌ت دا مافێ پشكداريكرن د هه‌لبژارتنان دا هه‌يه.
ئه‌ڤرۆنيوز:
كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ دبرياره‌كا ب له‌ز دا كو ل شه‌ڤا 29 ل سه‌ر 30 ئه‌يلوولا 2018 ده‌ركرى دبێژيت ئه‌و ده‌نگده‌رێ ب ره‌گه‌زناما عيراقى ده‌نگێ خوه بده‌ت، پێدڤيه ناسناما بارى كه‌سايه‌تى ژى دگه‌لدا بيت.
كۆمسيۆنێ دياركر” ئه‌و ده‌نگده‌رێ پاسه‌پۆرتا عيراقى يان كارتا نيشتمانى دگه‌لدا بيت دشێت ب ئێك ژوان ده‌نگێ خوه بده‌ت، به‌لێ ئه‌وێ ره‌گه‌زناما عيراقى ب تنێ دگه‌لدا بيت نه‌شێت ده‌نگێ خوه بده‌ت، هه‌كه ناسناما بارێ كه‌سايه‌تى دگه‌لدا نه‌بيت”.
پێشتر كۆمسيۆنێ دياركربوو كو ده‌نگده‌ر دشێت ب ئێك ژ سێ به‌لگه‌نامان ده‌نگێ خوه بده‌ت”ئه‌وژى ره‌گه‌زناما عيراقى، يان كارتا نيشتمانى، يان پاسه‌پۆرتا عيراقى وده‌نگده‌ر نه‌شێت ب ناسناما بارێ كه‌سايه‌تى ده‌نگى بده‌ت”.
ئه‌ڤرۆنيوز:
وه‌زيرێ خواندنا بلند وڤه‌كۆلينێن زانستى ل هه‌رێما كوردستانێ ژڤانێ راگه‌هاندنا ناڤێن قوتابيان ل زانكۆ وپه‌يمانگه‌هان ئاشكراكر.
يوسف گۆران، وه‌زيرێ خواندنا بلند وڤه‌كۆلينێن زانستى بۆ مالپه‌رێ فه‌رمى يێ وه‌زاره‌تا خوه گۆت” ل ده‌ستپێكا هه‌يڤا 10 ناڤێن ده‌رچوويێن رێزا 12 ئاماده‌يى ل زانكۆ وپه‌يمانگه‌هێن هه‌رێما كوردستانێ دێ هێن”.
گۆت ژى” ناڤێن ده‌رچوويێن خۆلا ئێكێ ودويێ پێكڤه دێ هێنه راگه‌هاندن”.
ل 4 هه‌تا 19/9/2018 قوتابيێن رێزا 12 ئاماده‌يى ب رێيا سيسته‌مێ زانكۆلاين فۆرمێن وه‌رگرتنێ ل زانكۆ وپه‌يمانگه‌هان داگرتبوون.
ئه‌ڤرۆنيوز:
سوباهى ئێكشه‌مبى 30/9/2018 ل ده‌مژمێر 8 سپێدێ ده‌نگدانا گشتى ل هه‌رێما كوردستانێ دێ هێته ئه‌نجامدان، چو ئه‌نجام ژى دفه‌رمى نينن تاكو كۆمسيۆن به‌لاڤ نه‌كه‌ت.
هندرين محه‌مه‌د، سه‌رۆكێ كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ راگه‌هاند، پشتى 72 ده‌مژمێران ژ ئه‌نجامدانا هه‌لبژارتنان، كۆمسيۆن دێ پێگير بيت ب به‌لاڤكرنا ئه‌نجامێن ده‌ستپێكى يێن هه‌لبژارتنان.
گۆت ژى” چو ئه‌نجامه‌ك ژى يا فه‌رمى نينه تاكو كۆمسيۆن به‌لاڤ نه‌كه‌ت”.
ئه‌ڤرۆنيوز:
به‌رى ده‌مه‌كێ كێم ياريا دێربى دناڤبه‌را ريال مه‌دريد وئه‌تله‌تيكۆ مه‌دريد ل سه‌ر ياريگه‌ها سانتياگۆ برنابيۆ ب وه‌كهه‌ڤيێ بێ گۆل ب دووماهى هات.
ب ڤى ئه‌نجامى ئه‌تله‌تيكۆ خزمه‌ته‌كا مه‌زن پێشكێشى به‌رشه‌لونا كر كو هه‌ر مايه ل سه‌رێ رێزبه‌ندا خۆلا ئيسپانى يا ته‌پا پێ ب 14 خالان وريال ژى ب ڤێ وه‌كهه‌ڤيێ گه‌هشته خالا 14 و ل رێزا دويێ دهێت ب جوداهيا گۆلان ل گه‌ل به‌رشه‌لونا. ئه‌تله‌تيكۆ مه‌دريد ژى گه‌هشته خالا 12 ول رێزا چارێ دهێت.
ئه‌ڤرۆنيوز:
كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ راگه‌هاند، بكارئينانا مۆبايلێ وئامێرێ وێنه‌گرتنێ دناڤ ويستگه‌هێن ده‌نگدانێ دا قه‌ده‌غه‌يه وهه‌ر فه‌رمانبه‌ره‌كێ سه‌رپێچيێ بكه‌ت، دێ هێته بێ به‌هركرن ژ پارێ بۆ وى هاتيه ته‌رخانكرن.
ئيسماعيل خورمالى، بريارده‌رێ كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ راگه‌هاند” ل دووڤ رێنمايێن كۆمسيۆنێ بكارئينانا مۆبايلێ وئاميرێ وێنه‌گرتنێ قه‌ده‌غه‌يه دناڤ ويستگه‌هێن ده‌نگدانێ دا ودڤێت فه‌رمانبه‌رێن كۆمسيۆنێ وبريكارێن قه‌وارێن سياسى رێ نه‌ده‌ن ب چو شێوه‌كى ئه‌و كاره بهێته كرن”.
گۆت ژى” بۆ فه‌رمانبه‌رێن كۆمسيۆنێ، هه‌ر سه‌رپێچيه‌ك دێ وان بێ به‌هر كه‌ت ژ وى گۆژمێ پاره‌ى ئه‌وێ بۆ هاتيه ته‌رخانكرن، زێده‌بارى لايه‌نێ قانوونى يێ وێ چه‌ندێ”.
ئه‌ڤرۆنيوز:
دياريێن گه‌را حه‌فتێ دا ژ خۆلا ئينگليزى يا ته‌پا پێ، يانا لێڤه‌رپۆل پشتى شه‌ش سه‌ركه‌فتنان ئه‌ڤرۆ شه‌مبيێ ل ده‌رڤه‌ى ياريگه‌ها خوه ل گه‌ل يانا شيلسى ب ئه‌نجامێ 1-1 وه‌كهه‌ڤ بوو.
گۆلا يانا شيلسى ل خۆله‌كا 25 ژلايێ ياريكه‌رێ وێ يێ به‌لجيكى ئيدن هازارد هاته تۆماركرن وگۆلا وه‌كهه‌ڤيێ يا لێڤه‌رپۆل ل خۆله‌كا 89 ژلايێ دانيێل ستوريدج ڤه هاته تۆماركرن.
ب ڤى ئه‌نجامى يانا لێڤه‌رپۆل خالين خوه گه‌هاندنه 19 خالان ل رێزێ دويێ پشتى رێزا ئێكێ ژده‌ستداى بۆ يانا مانشسته‌ر ستى ئه‌وا ل سه‌رێ رێزبه‌ندێ دهێت ب 19 خالان ب جوداهيا گۆلان ل گه‌ل لێڤه‌رپۆل خودانا رێزا دويێ. يانا شيلسى ژى خالێن خوه گه‌هاندنه 17 خالان ول رێزا سيێ دهێت.
نيشاندان