ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 13ى ته‌باخا 2018ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1210 دينار |
| 1 يۆرۆيێ ئه‌ورۆپى | 1370 دينار |
| 1 ليرێ توركى | 180 دينار |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز:
بريكارێ وه‌زاره‌تا پێشمه‌رگه‌يى، سه‌ربه‌ست له‌زگين راگه‌هاند كو بێ هه‌ڤپشكى ل گه‌ل پێشمه‌رگه‌يى، حه‌شدا شه‌عبى و هێزێن عيراقى نه‌شێن ئاراميا شنگال ب پارێزن.
سه‌ربه‌ست له‌زگين دا زانين ژى كو پشتى پێكئينانا حوكمه‌تا داهاتى يا عيراقێ پێدڤيت كێشا پاراستنا شنگالێ د ناڤبه‌را هه‌ولێر و به‌غدا دا ئێكلا ببيت، هه‌ڤپه‌يمانيا نێڤده‌وله‌تى ژى د وێ باوه‌ريێ دايه.
ده‌رباره‌يى ڤه‌كێشانا هێزێن حه‌شدا شه‌عبى ژى ژ ده‌ڤه‌رێ گۆت: “حه‌شدا شه‌عبى ژ ده‌ڤه‌رێ خوه ڤه‌نه‌كێشايه، ب تنێ گوهاڕتن د جهێن خوه دا كرينه”.
ئەڤرۆ نیوز، نەوزاد ھلۆری:
زانکویا پولیتەکنیکی یا دھۆک بو خواندنا سالا 2018-2019 دەرفەتێن خواندنێ ل کولیژێن تەکنیکی بو دەرچوێن پەیمانگەھان راگەھاندن.
ب گورەی راگەھاندنەکێ کو مالپەرێ سەرەکیێ سەروکاتیا زانکۆیا پولیتەکنیکی یا دھۆک بەلاڤکریە ، تێدا ھاتیە، سەروکاتیا زانکویا پولیتەکنیکی یا دھۆک دەرفەتێن خواندنێ بو دەرچویێن پەیمانەھا تەکنیکی ل پکشێن کولیژێن تەکنیکی ب سیستەمێ پارالێل بو خواندنا سالا 208-2019 راگەھاندن.
د راگەھاندنا سەروکاتیا زانکویا ناڤبری ھاتیە ژی کو خوێندکار دشێن ئەڤرۆ وێڤە ھەتا رۆژا 30-8-2018 سەرەدانا تومارا گشتی یا سەروکاتیا زانکۆیا پولیتەکنیکی یا دھۆک بکەن بو وەرگرتنا فورمێن پێشکێشکرنێ.
ئه‌ڤرۆ نيوز:
د داخۆيانيه‌كا تايبه‌ت دا بۆ ئه‌ڤرۆ نيوز، هۆگر عه‌زيز، په‌يڤدارێ رێڤه‌به‌ريا پۆليسێن باژێرێ هه‌ولێرێ راگه‌هاند كو بۆ پتر پاراستنا ئه‌منيه‌تا باژێرێ هه‌ولێر، شه‌ش هزار كاميرێن چاڤدێريێ دهێنه دانان.
په‌يڤدارێ پۆليسێن هه‌ولێر ئاشكه‌را ژى كر كو دانانا وان كاميران مفايه‌كێ مه‌زن بۆ ئاشكه‌راكرنا تاوان و تاوانباران هه‌يه.
هۆگر عه‌زيز دبێژيت: “دانانا ڤان ره‌نگه كاميران ژبۆ رێيێن سه‌ره‌كى و چارينا دێ هێنه دانان و ب ڤى ره‌نگى دێ باشتر كونترۆلا ره‌وشا باژێرى هێته كرن و دشێن د ده‌مه‌كێ كێم دا تاوانباران ئاشكه‌را بكه‌ت”.
هۆگر عه‌زيز ئاماژه ب وێ چه‌ندێ ژى كر كو كۆمپانيه‌ك رابوويه ب دانانا ڤان كاميران و ئه‌ڤ پرۆژه به‌رى داعش بوو، به‌لێ ژ به‌ر هنده‌ك ئاريشا د ده‌مێ خوه دا نه‌هاتيه بجهئينان و گۆت: “كارمه‌ندێن پۆليس و ئاسايش و هاتنوچوون و به‌ره‌ڤانيا باژێرى ب هه‌ڤرا ل ژوورا كاميرێن چاڤدێريێ دێ چاڤدێريا ڤان كاميران كه‌ن”.
په‌يڤدارێ پۆليسان دلته‌نگيا خوه ل هه‌مبه‌ر وان كاميرێن چاڤدێريێ دياركر يێن خه‌لكى بۆ مالێن خوه داناين كو گرنگيێ ناده‌نه رێكخستنا سيسته‌مى و كوالێتيا وان و گۆت: “ئه‌و كاميرێن مالان يێن كوالێتيه‌كا باش هه‌يى گه‌له‌ك د كێمن”.
ئه‌ڤرۆ نيوز، رۆژهات لۆقمان:
ل سێمێلێ گه‌نجه‌كێ رۆژئاڤايێ كوردستانێ كو كارێ چايچياتيێ دكه‌ت، وه‌كو هه‌ڤشێوه‌يێ سترانبێژێ وه‌غه‌ركرى يێ ئيرانێ، مورته‌زا پاشا يه و ب ڤێ چه‌ندێ ژى جوداهيه‌ك ل گه‌ل وى و كه‌سانێن دى دروست بوويه.
دده‌ته زانين ژى كو ل ده‌سپێكێ وى چو پێزانين ل سه‌ر سترانبێژێ وه‌غه‌ركرى يێ ئيرانى نه‌بوون، به‌لێ پشتى كه‌سه‌كى ئه‌و ئاگه‌هداركرى كو وه‌كو وى يه، ئه‌وى دووڤچوون بۆ بابه‌تى كريه و ته‌ماشه كريه كو هه‌ڤشێوه‌يێن ئێكن.
پاشا دبێژيت: “گه‌له‌ك يێ خۆشحالم ب ڤێ چه‌ندێ و خه‌لك ژ من دخوازن بۆ وان سترانێن وى بێژم و وێنا ل گه‌ل بگرم”.
ئه‌ڤرۆ نيوز:
به‌پرسێ ميحوه‌رێ كه‌ركووك – پردێ، د. كه‌مال كه‌ركووكى هاته گوهۆڕين و كه‌سه‌كێ دى ل جهێ وى هاته دانان.
به‌رى ده‌مه‌كێ كێم د رێ و ره‌سمه‌كى دا ب ئاماده‌بوونا چه‌ندين فه‌رماندێن پێشمه‌رگه‌يى، د. كه‌ما كه‌ركووكى وه‌كو به‌رپرسێ ميحوه‌رێ كه‌ركووك – پردێ هاته گوهۆڕين و ل جهێ وى نورى حه‌مه عه‌لى ده‌ست ب كار بوو.
د په‌يڤه‌كێ دا، كه‌مال كه‌ركووكى راگه‌هاند كو ئه‌و وه‌كو پێشمه‌رگه‌ك دێ هه‌ر ل وى ميحوه‌رى وه‌كو پێشمه‌رگه به‌رده‌واميێ ده‌ته كارێ خوه و گۆت: “چ جوداهى نينه كى سه‌رپه‌رشتێ ميحوه‌رى يه و يا گرنگ خزمه‌ت كرنه و كاك نورى حه‌مه عه‌لى ژى خزمه‌ته‌كا گه‌له‌ك به‌رچاڤ ل ڤى سنورى هه‌يه”.
كه‌ركووكى زێده‌تر گۆت: “كه‌ركووك باژێره‌كێ داگيركريه و دڤێت هه‌موو بزاڤێن خوه بێخينه كار دا كو وى باژێرێ داگيركرى زرگار بكه‌ين و ب هه‌موو ره‌نگان دێ خزمه‌تێ كه‌ين”.
ئەڤرۆ نيوز:
حەسەن محەمەد عەلی ئەندامێ سەرکردایەتیا جڤاتا سووریا دیموکراتیک و ئێک ژ ئەندامێن شاندێ کو سەرەدانا شامێ کربوو بۆ ئاژانسا “ئانھا” دیار کر کو ل سەر داخوازا سەرۆکێ روسیا ڤیلادەمیر پوتین حوکمەتا سووریێ داخواز ژ مە کربوو کو سەرەدانا شامێ بکەین و پرسێن خوە ل گەل شامێ ب رێیا دانوستاندنان چارە بکەین و گۆت: (بێگومان گەلەک پرس ھەنە کو دڤێت د ناڤبەرا مە و شامێ دا بھێنە چارەکرن، ئەو دەڤەرێن نھا ل ژێر کۆنترۆلا ھێزێن سووریا دیموکراتیک پێدڤی خزمەتگوزاریانە و ژ بەر ھندێ ژی دڤێت ل گەل حوکمەتا سووریێ دانوستاندن بھێنە کرن).
ئەڤرۆ نيوز:
وەزارەتا دەرڤە یا مەغربێ د داخۆیانیەکێ دا راگەھاند کو د چارچۆڤێ سزایێن ئەمریکا یێن ل سەر ئیرانێ وەلاتێ مە ژی دێ ھەموو پەیوەندیێن خوە یێن سیاسی و ئابووری ل گەل ئیرانێ دەتە راگرتن و ھەتا ئیران دەستان ژ ھەلویستێ خوە یێ خراب ل دژی جڤاکێ نێڤدەولەتی بەرنەدەت ئەم پێداچوونێ د ھەلویستێ خوە دا ناکەین.
د بەردەوامیا داخۆیانیێ دا ئەو یەک ژی ھاتیە دیار کرن کو د چارچۆڤێ ڤان سزایان دا وەلاتێ مە دێ ھەموو پەیوەندیێن بەنکی ل گەل ئیرانێ دەتە راگرتن و ئەم ھێڤیدارین کو وەلاتیێن مە ژی وەکو جاران سەرەدانا ئیرانێ نەکەن.
ئەڤرۆ نيوز:
عەلیرزا نوری زادە شارەزایێ کاروبارێ سیاسی یێ ئیرانی د داخۆیانیەکێ دا دیار دکەت کو سزادانا تورکیا و ئیرانێ ژ ئالیێ ئەمریکا ڤە نھا ب تەمامی د خزمەتا روسیا دایە، چونکو ئیران گەلەک تەنگاڤ بوویە و دێ نەچار بیت گەلەک داخوازیێن روسیا قەبوول کەت و ل ئالیێ دی دو رۆژ بەری نھا ئەردۆگانی ژی دیار کربوو کو تورکیا دێ ژ ھەڤپەیمانێن نوو گەریت کو دیارە ئارمانجا ئەردۆگانی روسیایە، ژ بەر ھندێ ژی سزایێن ئەمریکا یێن ل سەر تورکیا و ئیرانێ ڤان ھەر دو وەلاتان پتر بەر ب روسیا ڤە دبەت و روسیا مفادارێ ئێکێ یە.
ناڤبری ھەروەسا دیار دکەت کو چەندین سالن ئەمریکا ژ بەر سیاسەتا خوە یا ل دژی ھندەک وەلاتێن ھەرێمێ وەسا کریە کو روسیا ب ھێزتر ژ جاران بیت، بەری نھا ژی دەمێ ئەمریکا رێککەفتنا ئەتۆمی ل گەل ئیرانێ ئیمزا کری سعوودیە و چەندین وەلاتێن دی یێن عەرەبی خوە ژ ئەمریکا دوور کرن و بەرێ خوە دانە روسیا، نھا ژی ھەمان تشت ل دۆر ئیرانێ و تورکیا دوبارە دبیت و گۆت: (روسیا نەدشیا ھەڤڕکیا ئەمریکا بکەت، لێ سزادانا ھندەک وەلاتێن رۆژھەلاتا ناڤین ژ ئالیێ ئەمریکا ڤە وەسا کر کو ئەو خوە نێزیکی روسیا بکەن و سعوودیێ بەری نھا گەلەک چەک ژ روسیا کڕین و نھا تورکیا ژی دێ کڕیت و ئەڤە ھەموو د خزمەتا روسیا دانە).
نيشاندان