ئه‌ڤرۆنيوز:

ئه‌ڤرۆ 25 ئه‌يلولا 2018 ساله‌ك ب سه‌ر ئه‌نجامدانا ريفراندۆما سه‌ربخوه‌يا كوردستانێ ده‌رباز دبيت، ل ناڤ په‌رله‌مانێ ئورۆپى ل بروكسل پايته‌ختا به‌لجيكا، كوردستانيێن چار پارچێن كوردستانێ ئه‌و هه‌لكه‌فته‌ ساخكر.

نه‌جمه‌دين كه‌ريم پاريزگه‌رێ كه‌ركووكێ وه‌كو به‌رگريكاره‌كێ ئه‌نجامدانا ريفراندۆمێ پشكدارى دپانێلێ دا كر ورۆهنكر كو ريفراندۆم مافێ ره‌وايێ گه‌لێ كورد بوو وبرياره‌كا دروست يا سه‌ركردايه‌تيا سياسى يا كوردستانێ بوو.

گۆت ژى” رۆژا 25 ئه‌يلولا 2017 رۆژه‌كه‌ دديرۆكا گه‌لێ كورد دا ب زيندى مينيت وكه‌س نه‌شێت لاده‌ت، راسته‌ پشتى وێ تووشى له‌شكرێ داگيركه‌ر بووين وگه‌لێ مه‌ ل كه‌ركووكێ وده‌ڤه‌رێن دى ب ره‌وشه‌كا ب زه‌حمه‌ت دانه‌، به‌لێ ئه‌و تشته‌كێ نوو نينه‌ دديرۆكا گه‌لێكورد دا”.

دياركر” ده‌ستخوه‌شيێ ل هه‌موو وان كه‌سان دكه‌م يێ پشكدارى دريفراندۆمێ دا كرى وپێدڤيه‌ شانازيێ بوێ رۆژێ بكه‌ين، چونكى مه‌ بۆ هه‌موو جيهانێ گۆت كو مه‌ سه‌ربخوه‌يێ دڤێت ودێ هه‌ر ئه‌و رۆژه‌ هێت”.

ئه‌ڤرۆنيوز:

ب به‌رهه‌ڤبوونا  سه‌رۆك بارزانى ئه‌ڤرۆ سێشه‌مبى 25/9/2018 ل هه‌ولێرێ كه‌رنه‌ڤاله‌كا مه‌زن هاته‌ سازكرن وتێدا سه‌رۆك بارزانى په‌يڤه‌ك پێشكێشكر.

سه‌رۆك بارزانى دپه‌يڤا خوه‌ دا گۆت” سالا بۆرى وه‌كو ئه‌ڤرۆ هه‌وه‌ بريارا چاره‌نڤيسێ خوه‌ دا وهه‌وه‌ ديرۆك تۆماركر، پيرۆزباهيا وێ رۆژێ ل هه‌وه‌ دكه‌م وپيرۆزباهيێ ل هه‌وه‌ دكه‌م وسوپاسيا وه‌فادارى ولسوزيا هه‌وه‌ دكه‌م ووان تبلێن هه‌وه‌ ماچى دكه‌م كو وێ رۆژێ هه‌وه‌ مۆركر”.

سه‌رۆك بارزانى زێده‌تر گۆت” مافه‌كێ قانوونى وسروشتى يێ هه‌موو ملله‌ته‌كى يه‌ بريارێ ل چاره‌نڤيسێ خوه‌ بده‌ت، هه‌وه‌ ژى سالا بۆرى وه‌كو ئه‌ڤرۆ بريارا چاره‌نڤيسێ خوه‌ دا. به‌لێ مخابن خراب هاته‌ شرۆڤه‌كرن، دڤێت پرسيار ژ هه‌وه‌ بهێته‌ كرن. ئه‌رێ بۆچى هه‌وه‌ ئه‌و بريار دا؟ ئه‌رێ ده‌ردێ هه‌وه‌ چى يه‌؟ ل شوينا وێ چه‌ندێ بهێن قه‌ره‌بوويا كه‌سوكارێن ئه‌نفال وكيميابارانێ وده‌ربه‌ده‌ريێ وئاواران بكه‌ن، بزاڤكر سزايێن گرانتر بێخنه‌ سه‌ر ڤى خه‌لكى، تاوان نه‌بوو خه‌لكه‌ك بێژيت، من دڤێت ب ڤى شێوه‌ى بژيم، پێدڤى بوو په‌نا بۆ دانوستاندنێ وديالۆكێ بربا، ئه‌وژى خواست وداخوازا مه‌بوو، كه‌سێ نه‌گوتبوو رۆژا پاشتر دێ سه‌ربه‌خوه‌يێ راگه‌هينين، به‌لێ مخابن جاره‌كادى دێ بێژم خراب هاته‌ شرۆڤه‌كرن”.

گۆت ژى” ب ديتنا مه‌ ب چو شێوه‌كى مه‌ پێنگاڤ به‌روڤاژى دستوورى نه‌هاڤێتينه‌، ل دستوورى دا هاتيه‌” پێگيريكرن ب وى دستوورى ئێكه‌تيا ئازادانه‌ يا عيراقێ دپارێزيت” هه‌كه‌ دستور هاتبا بجهئينان، مه‌ په‌نا بۆ ريفراندۆمێ نه‌دبر، به‌لێ هه‌موو ده‌رگه‌ داخستن وبۆمه‌ چو ئومێد نه‌هێلان تاكو پێكڤه‌ بژين وهه‌ڤپشك بين، ژوێ ژى ده‌رچوو كو مه‌ سزا بده‌ن، هنده‌ك ژ هه‌موو سنوران ده‌ربازبوون وهه‌موو سنورێن خوه‌ به‌زاندن وخواست ئيراده‌ وكه‌رامه‌تا مه‌ بشكێنن، له‌وما مه‌ بريار دا بمرين ونه‌هێلين كه‌رامه‌ت وئيرادا مه‌ بشكێت”.

سه‌رۆك بارزانى گۆت ژى” سوپاس بۆ هه‌وه‌يێن خۆراگر، سوپاس بۆ دلسۆزى ووه‌فاداريا هه‌وه‌، سوپاس بۆ پێشمه‌رگێن قه‌هره‌مان، ئه‌ڤ ئه‌زموونه‌ ژى وه‌كو هه‌موو ئه‌زموونێن پێشتر، دياربوو كو ب ئاسنى وئاگرى وب شه‌رى كێشا كوردى ناهێته‌ چاره‌سه‌ركرن، دڤێت ب لێكتێگه‌هشتنێ وباوه‌ريا هه‌ڤپشك ودانوستاندنێ بيت، دڤێت ب رێزلێكگرتنێ بيت، ئه‌م وى ده‌مى ونوكه‌ ول پاشه‌رۆژێ ژى داكۆكيێ ل سه‌ر بژارده‌يا خوه‌ دكه‌ين كو ئاشتى ودرێژكرنا ده‌ستێ برايه‌تيێ بۆ هه‌موو لايه‌كى”.

خوياكر ژى”ئه‌وا ب ديالوكێ ولێكتێگه‌هشتنێ وهاريكاريێ بۆ هه‌ردو لايه‌نا ب ده‌ستڤه‌ دهێت، 100 سالان ژى ب شه‌رى نه‌ ب ده‌ست مه‌ڤه‌ دهێت ونه‌ ب ده‌ست وان ژى ڤه‌ دهێت، نوكه‌ ژى ده‌ليڤه‌كا نوو يا هاتيه‌ پێش، ب تايبه‌تى پشتى هه‌لبژارتنێن 12 گۆلانا بۆرى، هه‌لبژارتنێن په‌رله‌مانێ فيدرالى ل به‌غدا، دوان هه‌لبژارتنان دا گه‌له‌ك كه‌سان وه‌سا دزانى كو دووماهيا پارتى يه‌، به‌لێ ب هيمه‌تا هه‌وه‌يێن خه‌باتكه‌ر ووه‌فادار وپارتى په‌روه‌ر، هوون شيان پارتيا خوه‌ بكه‌نه‌ پارتا هژمار ئێك ل سه‌ر ئاستێ هه‌موو عيراقێ، سه‌نگا پارتى  بۆ هه‌موو لايه‌كى دياربوو كو پارتى هژماره‌كا گه‌له‌ك مه‌زنه‌ دهه‌ڤكێشێ دا، له‌وما كه‌س نه‌شێت دسه‌ر را ببۆريت”.

سه‌رۆك بارزانى گۆت ژى” به‌رى چه‌ند رۆژان ل گه‌ل فراكسيۆنا پارتى ل په‌رله‌مانێ به‌غدا روونشتم، من داخوازكر چاوان دڤێت به‌رگريێ ژ مافێ خه‌لكێ كوردستانێ بكه‌ن، وه‌سا به‌رگريێ ژ مافێ وه‌لاتيێن دى يێن باژێرێن دى يێن عيراقێ بكه‌ن، به‌رگريێ ژمافێن برايێن توركمان، كلدان وئاشوورى سريان وئه‌رمه‌ن بكه‌ن، به‌رگريێ ژ بيرورايێن ئازادى سياسى وئايينى ومه‌زهه‌بى بكه‌ن”.

ئاماژه‌ كر” گه‌له‌ك به‌حسێ ئێكرێزيا ناڤمالا كوردى دهێته‌ كرن، ب ديتنا من هوون هه‌موو ديده‌ڤانن كو مه‌ گه‌له‌ك يا كرى تاكو ناڤمالا كوردى يا ئێكرێز بيت، پارتى ژ گه‌له‌ك ژ مافێن خوه‌ هاته‌ خوار، بۆ وێ چه‌ندێ وێ ئێكرێزيێ بپارێزيت، به‌لێ مخابن جهێ خوه‌ نه‌گرت، به‌روڤاژى ل دژى پارتى بكارئينا، ناڤمالا كوردى وئێكرێزيا كوردى ژى مه‌رجێ خوه‌ يێ هه‌ى، بنه‌مايێ نيشتمانى ونه‌ته‌وى يێ هه‌ى، ئه‌و بنه‌مانه‌ وه‌كو چه‌تره‌كينه‌ بۆ مه‌ هه‌موويان، ده‌مێ ژوان بنه‌مايان دهێته‌ لادان، رامانا وێ ئه‌وه‌ ئێكرێزيا كوردان وناڤمالا كوردى هاته‌ تێكدان، هه‌روه‌كو ل 16 ئوكتۆبه‌رێ رووداى، پێدڤيه‌ پێگيرى بنه‌مايێن نيشتمانى ونه‌ته‌وى بن، ئه‌ڤه‌ ئه‌ساسن”.

دياركر ژى” چه‌ند رۆژه‌ك مه‌ يێن ماين بۆ تۆماركرنا ديرۆكه‌كا پر سه‌روه‌رى، ل 30 ڤێ هه‌يڤێ رۆژا هه‌لبژارتنێن په‌رله‌مانێ كوردستانێ يه‌، رۆژه‌كا چاره‌نڤيسسازه‌، رۆژه‌كه‌ هوون دێ بريارێ ده‌ن ئايا هه‌وه‌ دڤێت كوردستانا هه‌وه‌ يا چاوان بيت؟ ئه‌من وئاسايش يا به‌رقه‌رار بيت تێدا؟ به‌خته‌وه‌رى به‌رقه‌رار بيت؟ پشت راستم هه‌وه‌ ئه‌و چه‌نده‌ دڤێت، له‌وما داخوازێ ژ هه‌وه‌ دكه‌م وێ رۆژێ ئه‌م هه‌موو په‌يمانێ ل گه‌ل شه‌هيدێن خوه‌ دووباره‌ بكه‌ين، وه‌فادار بين بۆ خوينا وان شه‌هيدان، ده‌نگ ب ليستا 183 بده‌ين، بۆ وێ چه‌ندێ گوهۆرينێن مه‌زن بهێنه‌ كرن، چاكسازيا هه‌مه‌لايه‌نه‌ بهێته‌ كرن، دوێ باوه‌ريێ دامه‌ هوون ل رۆژا 30 هه‌يڤێ دێ چنه‌ سه‌ر سندووقان”.

زێده‌تر گۆت”ئه‌م وێ سۆزێ دده‌ينه‌ هه‌وه‌ كو به‌رده‌وام دراستگۆ بيت دگه‌ل هه‌وه‌ دا، سۆزێ دده‌ينه‌ هه‌وه‌ هه‌كه‌ كه‌رامه‌ت وئيراده‌ وسه‌روه‌ريا هه‌وه‌ كه‌فته‌ دمه‌ترسيێ دا، مرنێ ب هه‌لبژێرين وبه‌رگريێ ژ هه‌وه‌ بكه‌ين، سۆزێ دده‌ينه‌ هه‌وه‌ چ ژمه‌ بهێت بۆ خزمه‌تا هه‌وه‌ خه‌مساريێ نه‌كه‌ين”.

ئه‌ڤرۆنيوز:

ئومێد خوشناو به‌ربژارێ پارتى يێ هژمار 50دليستا 183 يا پارتى ديموكراتى كوردستان ل به‌رپه‌رێ خوه‌ ل تۆرا جڤاكى يا فه‌يسبووكى به‌لاڤكر په‌ياما سه‌رۆك بارزانى ل سلێمانيێ كه‌سێن گه‌نده‌ل وحزبێن گه‌نده‌ل شه‌پرزه‌كرن.

ئومێد خوشناو دبێژيت” په‌ياما سه‌رۆك بارزانى ل سلێمانيێ ل رۆژا 23/9/2018 ناڤه‌رۆ‌كا وێ يا جه‌وهه‌رى يا ب هێز بوو، په‌يامه‌ك بوو بۆ گوهۆرينێن مه‌زن وسه‌ركه‌فتنا مه‌زن، ب تايبه‌تى ب سه‌ركه‌فتنا مه‌زن دشێن ل به‌رنامێ پاشه‌رۆژێ يێ حوكمه‌تا هه‌رێما كوردستانێ درێژيێ ب چاكسازيێن خوه‌ يێن مه‌زن بده‌ين وچاكسازيه‌كا بنه‌ره‌تى بكه‌ين، له‌وما ڤێ په‌يامێ كه‌سێن گه‌نده‌ل دناڤ حزبێن دى دا شه‌پرزه‌كرن، ژبێ به‌رسڤى وبێ كه‌ره‌سته‌يێ ته‌حه‌دى كرنێ، نه‌چارن ده‌ست ببه‌ن بۆ دۆسێيا شنگالێ، ئه‌وا ل شنگالێ رووداى وداعشێ وهنده‌ك عه‌شيره‌تێن وێ ده‌ڤه‌رێن به‌رامبه‌ر خووشك وبرايێن مه‌ يێن ئێزدى كرى درندايه‌تيه‌كا دى بوو بۆ سه‌ر ملله‌تێ كورد نه‌كو تنێ بۆ برا وخووشكێن مه‌ يێن ئێزدى”.

دپشكه‌كا دى يا نڤيسينا خوه‌ دا، خوشناو دبێژيت” دڤى چارچۆڤه‌ى دا،  پێرابوونێن پێدڤى

ل به‌رامبه‌ر هه‌ر خه‌مساريه‌كێ هاته‌ كرن وهه‌رچه‌نده‌ تاكه‌ هێز ل شنگالێ ول سه‌ر چيايێ شنگالێ ماين، هێزا پارتى ديموكراتى كوردستان بوو وقوربانى دان وخه‌لكێ شنگالێ ژى به‌رده‌وام ڤێ راستيێ دووباره‌ دكه‌ن، به‌لێ ل ده‌ف مه‌ سه‌يره‌ كه‌سانه‌ك هنده‌ روو قايم بن خودانێن خيانه‌تا 16 ئوكتۆبه‌را 2017 بن، بێ شه‌رمكرن دۆسييا تاوانكاريێ به‌رامبه‌رى شنگالێ بكه‌نه‌ به‌رنامێ‌ بانگه‌شا هه‌لبژارتنان، ئه‌م نه‌ترساينه‌ وخوه‌ دوور ناكه‌ين ژى ژ هه‌ر پێرابوونه‌كێ به‌رامبه‌ر خوه‌، چونكى ده‌مه‌كه‌ مه‌ ملێ خوه‌ دايه‌ به‌ر پێشكه‌فتن وخه‌مساريان وئه‌م پێشه‌نگين ل بزاڤێن جدى بۆ چاكسازيێ، نه‌كو ئه‌وێن تنێ ل شاشێن تيڤيان وده‌زگه‌هێن ميديايێ چاكسازيێ ب موزايه‌ده‌ دفرۆشن”.

ل دووماهيێ دبێژيت” ب پشته‌ڤانيا كوردستانيان، ب ئيرادا پيلايى يا پێشمه‌رگه‌ى، ب باوه‌ريا ب هێزا سه‌رۆك بارزانى، ل 30 ئه‌يلولێ بۆ هه‌موو جيهانێ دێ سه‌لمينين كو ئه‌م نوونه‌رين راسته‌قينه‌ يێن ملله‌تى نه‌ وب سه‌ركه‌فتنا مه‌ دێ پاشه‌رۆژه‌كا گه‌شتر بۆ كوردستانێ دابين كه‌ين”.

ئه‌ڤرۆنيوز:

به‌رى ده‌مه‌كێ كێم ب به‌رهه‌ڤبوونا سه‌رۆك مه‌سعود بارزانى، كه‌رنه‌ڤالا مه‌زن يا پشته‌ڤانيا ليستا 183 يا پارتى ديموكراتى كوردستان بۆ هه‌لبژارتنێن په‌رله‌مانێ كوردستانێ ب پشكداريا ده‌هان هزار كه‌سان ل ياريگه‌ها فرانسوا هه‌ريرى ل هه‌ولێرێ ده‌ستپێكر.