ئەڤرۆ نیوز ، زنار تۆڤی:
فه‌ره‌یدون دره‌خشانی کو خه‌لکێ شارێ مه‌ریوانە ل رۆژهه‌لاتێ كوردستانێ و خۆجهە ل بریتانیا و بسپۆرێ وارێ ماتماتیکێ یە و شیایە خه‌لاتێ ماتماتیكا فیلدز و 15 هزار دۆلارێن كه‌نه‌دی ب ده‌ستڤە بینیت.
پرۆفیسور فه‌ره‌یدون دره‌خشانی یێ ناسیار ب ( كۆچه‌ر بیركار) ماموستایێ ماتماتیكێ یە ل زانكۆیا كامبرێچ یا بریتانی.
خه‌لاتێ فیلدز ل سالا 1954 وەرە هەتا نوکە ژ لایێ رێكخراوا فیلدز ل شارێ تۆرێنتۆ یێ كه‌نه‌دی هه‌ر چار سالان جارەکێ دهێتەدان بۆ دو هەتا چار ڤەکۆلەرێن ژێر ته‌مه‌نێ 40 سالیێ دا د وارێ ماتماتیكێدا.
فه‌ره‌یدون دره‌خشانی ل سالا 2016 دا خه‌لاتێ جڤاتا ماتماتیكا ئه‌مریكا ب ده‌ستڤە ئینایە.
ئه‌و گەنجێ كورد ل سالا 1979 ل گوندێ نه‌ی یێ سه‌ر ب شارێ مه‌ریوان ڤە ژ دایكبوویه، برواناما به‌كالۆریۆسێ ل زانكۆیا تەهرانێ ل پشکا ماتماتیكێ به ده‌ستڤەئینایە و پاشی ماسته‌ر و دكتۆرا ل زانكۆیا ناتینگهام ل بریتانیا ب ده‌ستڤە ئینایه د هه‌مان وار دا.
ئەڤرۆ نیوز ، زنار تۆڤی:
ئەڤرۆ چارشەمبی 1.8.2018 و لدووڤ داخوازا دۆنالد ترامپی سه‌رۆكێ ئه‌مریكا وه‌زاره‌تا گه‌نجینا وى وه‌لاتى سزا دانایە سه‌ر دو وه‌زیرێن توركیا.
وه‌زاره‌تا گه‌نجینا ئه‌مریكا سزا دانایە سه‌ر هه‌ردو وه‌زیرێن داد و ناڤخوه یێن وەلاتێ توركیا و كۆچكا سپى راگه‌هاند، کو توركیا چو بهانێن قانوونی و شه‌رعى بۆ ده‌سته‌سه‌ركرنا قەشێ ئەمریکی ئه‌ندۆر برۆنسۆن نینن.
ئەڤرۆ نیوز، زنار تۆڤی:
فلمێ دکیۆمێنتاری روو ب روو بوونا مرنێ ب کەتەری یێ پێشمەرگێ کەتیبا ئەندازەیی یا فەرماندەیا پشتەڤانیا ئێک خەلاتێ (Press Vitez Golden Beggar) ل 24 فلمە فیستیڤالا نێڤدەولەتی (International festival of local Television) ل وەلاتێ (سلوڤاکیا) وەرگرت.
سەروەر عەبدوللا دەرهێنەرێ فلمێ روو ب رووبوونا مرنێ ب کەتەری بۆ ئەڤرۆ نیوز دیارکر: کو فلمێ روو ب روبوونا مرنێ ب کەتەری ناڤێ فلمێ دوکیومێنتاری یێ کەتییا ئەندازەیا پێشمەرگێ فەرماندا هێزێن پشتەڤانیا ئێکە، چیرۆکا ڤی فلمی ل سەر تیمەکا پێشمەرگەیە کارێ ڤێ تیمێ راکرن و ژناڤبرنا بۆمب و مینێن داعشێ یە، نێزیکی سێ سالا ل دەمێ شەرێ پێشمەرگەی ل گەل تیرورستێن داعش و ل هەموو بەروکێن شەری هاتیە وێنەکرن.
ناڤهاتی زێدەتر گوت: سێ ژ قارەمانێن ڤی فلمی شەهید دبن و چەند ژی بریندار بووینە ل دەمێ وێنەکرنا فلمی دا، دیسا ئەڤ فلمە بەرهەمێ سالا 2017 یە، پشکداری د چەندین فیستیڤالێن جیهانی دا کریە و پشکدارە ل چەندین فیستڤالێن نێڤدەولەتی و هەتا نوکە چەندین خەلاتێن نێڤدەولەتی وەرگرتینە و دوماهیک خەلات ل وەلاتێ سلوڤاکیا ل فلمە فیستیڤالا نێڤدەولەتی (International festival of local Televisions) د خولا 24 دا خەلاتێ (Press Vitez Golden Beggar) وەرگرتیە.
ئەڤرۆ، باسم قاسم شنگالی:
ئەڤرۆ ل کەمپا جەم مشکۆ ل سنۆرێ قەزا زاخۆ بیرەوەریا سالڤەگەرا کۆمکوژیا ئێزدیان ئەو ل شنگالێ روودای ل مالباتا شەما دێرۆ ب چەندین چالاکیان هاتە ساخکرن خێزانا شەمێ ژ ئێك ژ ئەوان خێزانان بو دئەوێ هێرشێ دا بو قوربانی و کو چەند کەس ژ خێزانا وێ هاتنە شەهید کرن و گرتن و دو کچێن وێ خێزانێ بناڤێ
جیلان و جیهان خوە دناڤە دەستێن تیرۆرستێن داعشێ رەهێت دەستێ خوە برین و سەرێ خوە دان ل رێیا ئۆلا خوە
ل رۆژا3ى ته‌باخا 2014ێ،رێكخراوا تیرۆرستیا داعشێ هێرشى قه‌زا شنگالێ كر و تاوانێن دژى مرۆڤایه‌تیێ د ده‌رهه‌قێ ئێزدیان دا ئه‌نجام دان ،بگره ژ كوشتن و گرتن و كه‌نیزه و ده‌ربه‌ده‌ركرن و ئاواره‌بوون و كۆچكرنێ و تالانكرن و وێرانكرنێ،رۆژا 3/8/2018ێ دبته بۆرینا چار سالان بسه‌ر كۆمكوژیێ دا و دماوێ ڤان چار سالان دا ل ئاستێ ناڤخۆیى و نێڤ ده‌وله‌تى وه‌ك پێدڤى كار بۆ ب جینۆساید ناساندنا كه‌یسا ئێزدیان و سزادانا تیرۆرستێن داعشێ نه‌هاتیه كرن و هێشتا كۆمكوژى به‌رده‌وامه،بتنێ حكومه‌تا هه‌رێما كوردستانێ خۆ ل كه‌یسى كریه خودان و حكومه‌تا عێراقێ و جڤاكێ نێڤ ده‌وله‌تى ئه‌ڤ كه‌یس پشتگوهـ هاڤێتیه،لگه‌ل قوربانى و ڤان ئێش و ئازار و نه‌خۆشیێن ئێزدیان دیتین ئیرۆ قه‌بارێ كۆمكوژیا ملله‌ته‌كى یێ دئێته كچككرن و ونداكرن،ئه‌ڤجا هه‌ڤده‌م لگه‌ل ساخكرنا بیره‌وه‌ریێ دڤێت ئالیێن شۆله‌ژێ رۆنكرنه‌كێ بۆ رایا گشتى یا ئێزدیان بده‌نه خویاكرن،ژبه‌ر ڤان خال و پرسێن ل خوارێ كو ئاسێ ماینه:
1_كه‌یسا جینۆسایدێ ل ئاستێ ناڤخۆیى و نێڤ ده‌وله‌تى دچ قۆناغ دایه.
2_چاره‌نڤیسێ ب هه‌زاران گرتیێن ئێزدى دیارنینه.
3_هه‌لدان و پاراستنا گۆرێن بكۆم.
4_ره‌وشا سیاسى و ئێمناهیێ ل ده‌ڤه‌را شنگال.
5.نه‌بوونا نوونه‌رێ خه‌لكێ شنگالێ ل په‌رله‌مانێ عێراقێ.
6_سزادانا كه‌سێن ده‌ست دگه‌ل داعشێ هه‌ین و پێكڤه‌ژیان لگه‌ل ده‌وروبه‌ران دێ چاوا بت.
7_ئاڤه‌دانكرنا شنگالێ و دابینكرنا خزمه‌تكاریان و قه‌ره‌بووكرنا خه‌لكێ.
8_ڤه‌گه‌ریانا ئاواران.
9_ گرنگیدان ب رزگاربوویان و سێویان.
ئه‌ڤ پرسگرێك و چه‌ند پرسێن دى ئاسێ ماینه،دڤێت بێنه ئاشكه‌راكرن كو پشت بیره‌وه‌ریا چارێ دێ ره‌وش چاوا بت و به‌ره‌ف چ ئاراسته‌ى ڤه چت،ژبه‌ركو پاشه‌رۆژا ئێزدیان ل شنگال دیارنینه و به‌ره‌ف چارنڤیسه‌كى نه‌دیار ڤه دچیت.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ چارشه‌مبى 1/8/2018 ل گه‌ل بريت مه‌كگورك هنارتيێ تايبه‌تێ سه‌رۆكێ ئه‌مريكا بۆ هه‌ڤپه‌يمانيا نێڤده‌وله‌تيا دژى داعشێ وشانده‌كێ دگه‌لدا كو پێكهاتبوو ژ ستيڤ ڤاگن كونسۆلێ ئه‌مريكى يێ نوو ل هه‌رێمێ وهژماره‌كا شيره‌تكاران كۆمبوو .
مه‌كگوركى دكۆمبوونێ دا ئاماژه دا كو سه‌رۆك بارزانى به‌رده‌وام دووپاتى ل وێ چه‌ندێ دكر كو ب شكاندنا داعشێ شه‌رێ تيرۆرێ ب دووماهى ناهێت وگۆت”نوكه ئه‌م دبينين شه‌رێ تيرۆرێ يێ چوويه قۆناغه‌كا نوو وشێوێن دى دێ وه‌رگريت، ئه‌م شانازيێ ب وێ هه‌ڤپشكيێ وهه‌ماهه‌نگيێ دكه‌ين كو مه ل گه‌ل پێشمه‌رگێ كوردستانێ دشه‌رێ دژى تيرۆرێ دا هه‌ى ودێ به‌رده‌وام ژى بين”.
ناڤبرى رۆلێ سه‌رۆك بارزانى وهه‌رێما كوردستانێ دهه‌ڤكێشێن سياسى دا وشه‌رێ شكاندنا تيرۆرستان ل ده‌ڤه‌رێ بلند نرخاند وب رۆله‌كێ گرنگ وئێكلاكه‌ر هژمارت.
ره‌وشا سياسى يا عيراقێ پشتى هه‌لبژارتنان وده‌نگوباسێن پێكئينانا حوكمه‌تا عيراقى يا نوو ته‌وه‌ره‌كێ دى يێ وێ ديدارێ بوو، سه‌رۆك بارزانى دووپاتكر كو پێدڤيه پرۆسا سياسى ل سه‌ر هه‌رسێ بنه‌مايێن هه‌ڤپشكيێ وته‌وافوقێ وهه‌ڤسه‌نگيێ ب هه‌موو هوورده‌كاريێن خوه‌ڤه بهێته ئاڤاكرن وميكانيزم وده‌م ژى بۆ بجهئينانا وان هه‌رسێ پرنسيبان بهێته دانان بۆ وێ چه‌ندێ هه‌موو پێكهات هه‌ست بكه‌ن كو دپرۆسا سياسى دا ل عيراقێ هه‌ڤپشكن وهه‌ر ل بن رۆناهيا وان هه‌رسێ پرنسيبان ژى دا حوكمه‌ت بهێته پێكئينان.
مه‌كگورك دياركر كو رۆلێ هه‌رێما كوردستانێ يێ گرنگ وئێكلاكه‌ره وئه‌و سێ بنه‌مايه رێيێن دروست وگونجاينه وپشته‌ڤانيێ لێ دكه‌ين.
ناڤبرى ئاماژه دا كو ئه‌مريكا دێ يا به‌رده‌وام بيت ل سه‌ر هاريكاريا عيراقێ وهه‌رێما كوردستانێ ودروستكرنا ئاڤاهيێ كونسولخانا ئه‌مريكى ل هه‌ولێرێ بۆ داهاتيه‌كێ درێژ يێ هه‌ڤكاريێ هژمارت ودياركر كو ده‌ليڤێن زۆر بۆ كارێ هه‌ڤپشك يێن هه‌ين وژبۆ بده‌ستڤه‌ئينانا سه‌قامگيريێ وباوه‌ريا زێده‌تر كار دكه‌ن.
ئه‌ڤرۆنيوز:
ئێكه‌تيا ته‌پا پێ يا عيراقى شێوێ ئه‌نجامدانا خۆلا ناياب يا داهاتى 2018 – 2019 راگه‌هاند.
ئێكه‌تيا ناڤبرى ئاماژه دا كو 20 يانه دێ پشكداريێ دخۆلێ دا كه‌ن و دو يانێن ريزا دووماهيێ ژ خۆلا ناياب ژ وه‌رزێ بۆرى دێ داكه‌ڤنه خۆلا پلا ئێك ودو يانێن سه‌ركه‌فتيێن ئێكێ ژ خۆلا پلا ئێك يا وه‌رزێ بۆرى دێ سه‌ركه‌ڤن بۆ خۆلا پلا ناياب.
دهێته زانين يانا زاخۆ ل رێزا 20 ودووماهيێ هاتبوو درێزبه‌ندا خۆلا ناياب يا عيراقى دا ل وه‌رزێ بۆرى وب ڤێ چه‌ندێ دێ داكه‌ڤيت بۆ خۆلا پله ئێك ل گه‌ل يانا كه‌ربه‌لا ئه‌وا ل رێزا 19 وبه‌رى دووماهيێ هاتى.
ئه‌ڤرۆنيوز:
ل دووڤ نڤيساره‌كا وه‌زاره‌تا په‌روه‌ردێ ل هه‌رێما كوردستانێ رێنمايه‌ك بۆ دانا مۆله‌تا بێ مووچه بۆ مامۆستايان هاتيه ده‌ركرن.
دوێ رێنمايێ دا ئاماژه ب وێ چه‌ندێ هاتيه كرن كو پشتى 15/9/2018 بۆ مامۆستايان نينه داخوازا مۆله‌تا بێ مووچه بكه‌ن، مۆله‌ت ژى دێ ل سه‌ر بنه‌مايێ وێ چه‌ندێ هێته دان كا تاكو چه‌ند پێدڤى بيت وكاريگه‌رى ل سه‌ر ميلاك وبسپۆريێ نه‌بيت.
هه‌روه‌سا هاتيه رۆهنكرن كو ب چو جۆره‌كى نابيت مامۆستا ده‌وامێ نه‌كه‌ت، تاكو فه‌رمانا مۆله‌تا بێ مووچه بۆ دهێته ده‌ركرن.
دوێ رێنمايێ دا دووپاتى هاتيه كرن، ئه‌و مامۆستايێن ل دووماهيا سالا 2015 مۆله‌تا دو سالێن بێ مووچه وه‌رگرتى، مافێ دو سالێن دى يا مۆله‌تا بێ مووچه يا هه‌ى.
ل دۆر مۆله‌تا دايكينيێ ژى هاتيه كو ئه‌و مامۆستايا دمۆله‌تا دايكينيێ دابيت، پشتى ب دووماهى هاتنا مۆله‌تێ، مافێ هه‌ى داخوازا مۆله‌تا بێ مووچه بكه‌ت.
ديسا ئاماژه دايه، هه‌كه مامۆستايه‌كێ بڤێت مۆله‌تا خوه ب هه‌لوه‌شينيت وده‌ست ب كار بكه‌ت، بۆ وى هه‌يه پشتى هه‌فتيه‌كێ يان تاكو 31/12/2018، هه‌كه پشتى وێ رۆژێ بيت، دڤێت چاڤه‌رێ بكه‌ت تاكو سالا نوو يا خواندنێ، ئه‌گه‌ر نه نه‌شێت مۆله‌تا خوه ب هه‌لوه‌شينيت.
دوێ رێنمايێ دا دووپاتى هاتيه كرن كو پشتى 31/12/2018 نابيت داخوازا هه‌لوه‌شاندنا مۆله‌تا بێ مووچه ب چو شێوه‌كى بهێته بلند كرن وكار پێ ناهێته كرن، دووپاتى ژى هاتيه كرن دانا مۆله‌تێ وهه‌لوه‌شاندنا وێ ده‌ستهه‌لاتا وه‌زيرێ په‌روه‌ردێ يه.
هه‌كه ئێك دوباره داخوازا مۆله‌تا بێ مووچه بكه‌ت، پێدڤيه ده‌ست ب كارى بكه‌ت، پاشى داخوازيه‌كێ بۆ مۆله‌تێ پێشكێش بكه‌ت، هه‌روه‌سا ئه‌وێن ل ده‌رڤه‌ى وه‌لاتى نه ونه‌شێن بزڤرن، دڤێت راپۆرتا نوشدارى يا وى وه‌لاتى پێشكێشى نوونه‌راتيا حوكمه‌تا هه‌رێما كوردستانێ بكه‌ن، پشتى په‌سه‌ندكرنا وێ ژلايێ فه‌رمانگه‌ها په‌يوه‌نديێن ده‌رڤه ل هه‌رێمێ مۆله‌ت دێ هێته كرن.
ئه‌ڤرۆنيوز:
ل دووڤ كه‌نالێ حوره عيراق يێ ئه‌سمانى، بريارا راگرتنا مووچێ خانه‌نشينيا په‌رله‌مانتارێن عيراقى يێ خۆلێن به‌رێ ب فه‌رمانا حه‌يده‌ر عه‌بادى سه‌رۆك وه‌زيرێن عيراقێ بوو.
كه‌نالێ ناڤبرى ژ ژێده‌ره‌كى ڤه‌گۆهاست” دادگه‌ها فيدرالى بريار دايه ب راگرتنا مه‌زاختنا مووچێ خانه‌نشينيا ئه‌ندامێن به‌رێ يێن جڤاتا نوورێن عيراقێ”.
دياركر ژى”بريار ل سه‌ر داخوازا حه‌يده‌ر عه‌بادى سه‌رۆك وه‌زيرێن عيراقێ بوو”.
هه‌ر په‌رله‌مانتاره‌كێ عيراقى كو دهاته خانه‌نشينكرن، مووچێ خانه‌نشينيا وى 10 مليۆن دينار بوون كو دبيته 80% مووچێ وى يێ په‌رله‌مانتاريێ، هه‌روه‌سا مووچێ 10 پاسه‌وانێن تايبه‌ت ژى بۆ دهاته مه‌زاختن.
ئه‌ڤرۆنيوز:
وه‌زاره‌تا په‌روه‌ردێ ل هه‌رێما كوردستانێ دنڤيساره‌كێ دا ئه‌ڤرۆ چارشه‌مبى 1/8/2018 بۆ رێڤه‌به‌ريێن گشتى يێن په‌روه‌ردێن پارێزگه‌هێن هه‌رێمێ، ژيێ وه‌رگرتنا قوتابيان ل باخچێن زارۆيان ورێزا ئێكێ بنه‌ره‌تى ديار دكه‌ت.
ل دووڤ وێ نڤيسارێ، ژدايكبوويێن 1/1/2014 هه‌تا 31/12/2014 دێ ل ئاستێ ئێكێ هێنه وه‌رگرتن وژدايكبوويێن 1/1/2013 هه‌تا 31/12/2013 دێ ل ئاستێ دويێ هێنه وه‌رگرتن.
وه‌رگرتنا قوتابيان ل رێزا ئێكێ بنه‌ره‌تى ژى ژدايكبوويێن 1/1/2012 هه‌تا 31/12/2012 دێ هينه وه‌رگرتن.
نيشاندان