ئه‌ڤرۆ نیوز:
ئه‌ڤرو سپێدێ‌ 18-9-2018 ل هولا كوچكا پارێزگه‌هێ‌ فه‌رهاد ئه‌مین ئه‌تروشی پارێزگه‌رێ‌ دهوكێ‌ سه‌رپه‌رشتیا كومبونه‌كا تایبه‌ت دگه‌ل لیژنا ئه‌منی یا پارێزگه‌هێ‌ وجێگرێ‌ پارێزگه‌ری وقایمقامێن قه‌زایێن پارێزگه‌هێ‌ و پتر ژ ده‌ه لایه‌نێن سیاسی ل سنورێ‌ پارێزگه‌هێ‌ ورێڤه‌به‌رێ‌ لقا دهوك یا كومسیونا بلند یا هه‌لبژارتن و راپرسیێ‌ ولایه‌نێن په‌یوه‌ندیدار سازكر.
دكومبونێدا پارێزگه‌رێ‌ دهوكێ‌ دیاركر كو ئارمانج ژكومبونێ‌ ئه‌وه‌ ئه‌م وه‌كو كارگێریا پارێزگه‌هێ‌ ولیژنا ئه‌منی وب هه‌ڤكاری دگه‌ل لایه‌نێن سیاسی ل پارێزگه‌هێ‌ هه‌موو ب هه‌ڤرا خو ئاماده‌كه‌ین وهه‌موو به‌رهه‌ڤیا بكه‌ین بو روژا ئه‌نجامدانا هه‌لبژارتنێن په‌رله‌مانێ‌ كوردستانێ‌ كو بریاره‌ ل 30-9-2018 بهێنه‌ كرن وئارامی وئاسانكاریا بو خه‌لكێ‌ پارێزگه‌هێ‌ په‌یداكه‌ین كو ب ئازادی قه‌ستا سندوقێن ده‌نگدانێ‌ بكه‌ن بو وێ‌ یه‌كێ‌ ئه‌ڤ پروسه‌ وه‌كو هه‌ر جار ل پارێزگه‌هێ‌ ب ره‌نگه‌كێ‌ رێكخستی  وجوان بهێته‌ ئه‌نجامدان ورویه‌كێ‌ شارستانی وتازه‌ نیشا خه‌لكێ‌ خو وبیانی بده‌ین.
هه‌روه‌سا گوت: گه‌له‌ك چاڤدێر وكونسل وبه‌رپرسێن رێكخراوێن مروڤایه‌تی وبیانی ونافخویی  ومیدیاكار دێ‌ چاڤدێریا ڤێ‌ پروسێ‌ كه‌ن ودڤێت ئه‌م ژی هه‌موو به‌رهه‌ڤیا بكه‌ین بو سه‌رئێخستنا ڤێ‌ پروسا دیموكراسی وژهه‌موو لایه‌نان خواست كو هه‌ر ئێك ل دوڤ به‌رپرسیاریا خو ڤی ئه‌ركێ‌ نیشتمانی ونه‌ته‌وه‌یی بجهبكه‌ت.
پاش دان وستاندن ژلایێ‌ به‌رهه‌ڤبویانڤه‌ ل دور بابه‌تی هاتنه‌ كرن وپێشنیار وبوچون هاتنه‌ ئالوگوركرن.
ل دوماهیێ‌ گونگره‌كێ‌ روژنامه‌ڤانی هاته‌ ئه‌نجامدان ، پارێزگه‌رێ‌ دهوكێ‌ دیاركر كو ل سه‌ر ئاستێ‌ حكومه‌تا هه‌رێما كوردستانێ‌ لیژنه‌كا بلند هاتیه‌ پێك ئینان وپلانه‌كا باش هاتیه‌ دانان ورێنمایێن تایبه‌ت هاتینه‌ ده‌ركرن كو پروسا هه‌لبژارتنا ب رێك وپێكی وجوان وبره‌نگه‌كێ‌ دیموكراسی بهێته‌ ئه‌نجامدان ، مه‌ دكومبونێدا ئه‌و رێنما وپلان گه‌نگه‌شه‌كرن كو ئه‌م هه‌موو پالشتیا سه‌رئێخستنا پروسا هه‌لبژارتنان بكه‌ین وئه‌ركێ‌ مه‌یه‌ وه‌كو حكومه‌تا  كوردستانێ‌ وپارێزگه‌ها دهوكێ‌ ڤێ‌ پروسێ‌ ب پارێزین كوبره‌نگه‌كێ‌ شارستانی بهێته‌ ئه‌نجامدان .
پارێزگه‌رێ‌ دهوكێ‌ ئه‌و یه‌ك ژی  دیاركر كو ده‌نگ دانا تایبه‌ت ل روژا 28-9-2018 ویا گشتی ل 30-9-2018دێ‌ هێنه‌ ئه‌نجامدان وداخاز ژوه‌لاتیان كر قه‌ستا بنگه‌هێن ده‌نگدانێ‌ بكه‌ن و پشكداریێ‌ دڤێ‌ پروسێ‌ دا بكه‌ن.
هه‌روه‌سا داخاز ژده‌زگیایێن ئه‌منی ژی كر هه‌موو ره‌نگێن هاریكاری وئاسنكاریا دگه‌ل  وه‌لاتیان بكه‌ن ده‌مێ‌ ڤێ‌ پروسا دیموكراسی بجهدكه‌ن وژكوموسیونێ‌ ژی خواست كو هه‌موو كێم وكاسیێن ته‌كنیكی چاره‌سه‌ركه‌ن ومیدیاكارژی دهاریكاربن  وكلتورێ‌ پێكڤه‌ ژیانا نیشتمانی  دناڤ خه‌لكی دا به‌لاڤكه‌ن بو وێ‌ یه‌كێ‌ پروسا هه‌لبژارتنا سه‌ركه‌فتیانه‌ بهێته‌ ئه‌نجامدان.
پاش پسیار هاتنه‌ ئاراسته‌ كرن وبه‌رسڤ ل سه‌ر هاتنه‌ دان.