ئاكرێ ، نه‌وزاد هلۆرى:
باژێرێ ئاكرێ هه‌ر دكه‌ڤن دا ناڤه‌ندا پێكڤه‌ژیانا ئولى و نه‌ته‌وى بوویه ، هه‌ر چه‌نده نها چو جوهى و زه‌رده‌شتى نه‌ماینه، به‌لێ چه‌ندین شوونوار و جهێن تایبه‌ت ب وان ڤه ل ده‌ڤه‌رێ يێن هه‌ين، ئێك ژوان جهان دبێژنێ (بووكا جوهیان) كو دكه‌ڤیته نێزیك ره‌زێ میرا، ئه‌و ره‌زێ كو ناڤ و ده‌نگییه‌كا تایبه‌ت هه‌یه و چه‌ندین ستران پێ هاتینه گوتن.
سه‌عيد شه‌ريف، نڤيسه‌ر ل باژێرێ ئاكرێ بۆ ئه‌ڤرۆ نيوز گۆت “به‌رێ بووكا جوهیان دكه‌ڤن دا جهه‌كێ تایبه‌ت یێ جوهیان بوو خه‌لكه‌كێ زۆور سه‌ره‌دان بۆكرینه،و به‌ر ب خوه دكه‌ڤیته چیایه‌كێ بلند و نێزیك كه‌لها مه‌زارگه‌هێ شێخ عه‌بدولعه‌زیز گه‌یلانى و 100 مه‌تران بلنده و بوویه ئێك ژ شوونوارێن گرنگ یێن جوهیان و دكه‌ڤیته رۆژهه‌لاتا باژێرێ ئاكرێ”.
زێده‌تر گۆت”هه‌ر چه‌نده چو ژێده‌رێن فه‌رمى نینن كو ئاماژه ب دیرۆكا ئه‌وى به‌رى و چێروكا وێ بكه‌ن، به‌لێ ب گۆره‌ى دووماهى ڤه‌گێران، دهێته گوتن كو به‌رێ بووكا جوهیان دزڤریت بۆ وێ یه‌كێ كو دهێته گۆتن رۆژه‌كێ ژ رۆژان زارۆيه‌كێ ساڤا یێ جوهى ل گه‌ل دایكا خوه قه‌ستا وى جهى كر بوو، پاشى وى زارۆكێ خوه پیسكرو دایكا وى ئه‌و ب نانى پاقژكرو ژبه‌ركو د ئاینێ جوهیان دا ئه‌ڤ یه‌ك تشته‌كێ كرێت بوو و ب رێده‌ركه‌فتن ژ ئاینى دهاته هژمارتن، دبێژن خودێ ئه‌و ژن كره به‌ر و ل وێ رۆژێ هه‌تا نها ئه‌و به‌ر ب به‌رێ بووكا جوهیان دهێته نیاسین و نها بوویه ئێك ژ هێما و شوونوارێن جوهیان ل ده‌ڤه‌رێ و خه‌لكه‌كێ زور سه‌ردانێ بۆدكه‌ت”.
به‌رێ بووكا جوهیان نێزیكێ دو مه‌تران يێ بلنده و مه‌تر و نیڤان يێ فرهه‌يه ، ب ئێك ژ به‌رێن سه‌رنجراكێش و ژ جۆرێ (به‌ره مرى) دهێته نیاسین.
نيشاندان
