ئەڤرۆ نيوز:‏

رێڤەبەرێ ئاڤا دھۆکێ بۆ رۆژناما ئەڤرۆ دیار کر، ل ھەیڤا ئیلۆنا بھێت ل دووڤ خواندنا ‏پیڤەری پارێ ئاڤێ ژ وەلاتیان دێ ھێتە وەرگرتن، ھەر وەلاتیەکێ ھەتا وی دەمی نەدانیت، ‏ل دووڤ پێشنیارێن ھاتینە کرن، ھەیڤێن ئێکێ و دویێ دێ 100 ھزار دینار ژێ ھێنە ‏وەرگرتن، ھەیڤێن دووڤ دا ئەو پارە دێ زێدەتر لێ ھێت و دبێژیت: مەرەما مە ژ ڤی ‏سیستەمی ئەوە کو مەزاختنا ئاڤێ کێم بکەین، نە پارا زێدە ژ وەلاتیان وەربگرین.‏

جەلال جەمیل بەرئاشی، رێڤەبەرێ ئاڤا دھۆکێ خویا کر، ل دووڤ بڕیارەکا جڤاتا وەزیرێن ‏ھەرێما کوردستانێ و وەزارەتا باژێرڤانیان، پڕۆژێ دانانا پیڤەرێن کەڤن دێ ھێتە تمامکرن ‏و گۆت: “ل 1/7/2018 دەست ب رووپیڤێ ژ لایێ کۆمپانیەکا لۆبنانی ڤە ل سەرانسەری ‏پارێزگەھا دھۆکێ ھاتیە کرن و ل 1/9/2018 بڕیارە ب دووماھی بھێت، د دەمێ ھەیڤا ‏حەفت و ھەشت دا، ئەو وەلاتیێن ھەتا نوکە پیڤەر نەداناین دێ ھێنە ئاگەھدار کرن کو ‏پیڤەرێ ئاڤێ بدانن و ل ھەیڤا ئیلۆنا بھێت ل گۆرەی خواندنا پیڤەری پارێ ئاڤێ ژ لایێ ‏کۆمپانیێ ڤە، ژ وەلاتیان دێ ھێتە وەرگرتن، پارێ ھەیڤێن حەفت و ھەشت، ھەر ل دووڤ ‏سیستەمێ کەڤن؛ رێڤەبەریا ئاڤا دھۆکێ دێ پارێ ئاڤێ وەرگریت”.‏

ئاشکرا ژی کر، ھەر وەلاتیەکێ ھەتا 1/9/2018 پیڤەری گرێ نەدەت، دێ سیستەمەکێ ‏دی ل ھەمبەر ھێتە ب کارئینان، ل دووڤ پێشنیارێن ھاتینە کرن، ھەیڤێن ئێکێ و دویێ دێ ‏‏100 ھزار دینار ژێ ھێنە وەرگرتن، ھەیڤێن دووڤ دا ئەو پارە دێ زێدەتر لێ ھێت و گۆت: ‏‏”کۆمپانیا پڕۆژە بجە دئینیت، مال مال دێ چیتێ، ئەوێ پیڤەر ھەبیت دێ ھێتە تۆمارکرن، ‏یێ نەبیت دێ ھێتە ئاگەھدارکرن کو پیڤەری بدانیت، ئەڤە دێ ب سەرپەرشتیا رێڤەبەریا ‏ئاڤا دھۆکێ و ل دووڤ رێنمایێن وەزارەتا باژێرڤانیان و رێڤەبەریا گشتی یا ئاڤا ھەرێمێ ‏بیت”.‏

دا زانین کو دانانا پیڤەران دێ بیتە سیستەمەک و پێناسەک ژ لایێ وەزارەتا باژێرڤانیان و ‏رێڤەبەریا گشتی یا ئاڤا ھەرێمێ ڤە بۆ ھاتیە دانان و رازیبوونا جڤاتا وەزیران ژی ل سەر ‏ھاتیە وەرگرتن ل دووڤ خشتەکی و گۆت: “ئێک مێترا مکەعبا ئاڤێ ھەتا پێنج مکەعبا دێ ‏ب 250 دیناران، ژ 6 ھەتا 30 مکەعبا ب 400 دیناران و ژ 31 ھەتا 60 مکەعبا ب 600 ‏دیناران بیت، لێ ھەکە بوونە 61 مکەعب و وێڤە دێ چیتە د قووناغا ھزاری دا. بۆ نموونە: ‏ھەکە مالەک 10 میترێن مکەعب یێن ئاڤێ د ھەیڤەکێ دا ب مەزێخیت کو دبنە 10 ھزار ‏لیترێن ئاڤێ، ئانکو ھەر ھزار لیتر دێ ب 400 دیناران بۆ ھێتە حسابکرن، ئانکو 10 ‏مکەعب دێ ب چار ھزار دیناران بن”.‏

گۆتژی: “ئارمانجا مە ژ ڤی سیستەمی ئەوە کو مەزاختنا ئاڤێ کێم بکەین، نە پارا زێدە ژ ‏وەلاتیان وەربگرین”. ‏

ناڤھاتی ئاماژە ب وێ چەندێ ژی کر، ئەڤ پڕۆژە ل سەرانسەری ھەرێما کوردستانێ، ل ‏سەنتەرێ پارێزگەھان، قەزا، ناحی، کۆمەلگەە و گوندان ھێتە ب جھئینان و پیڤەر بۆ ‏ھەموو مالان ھێنە دانان، کۆمپانی دێ وی پیڤەری خوونیت و ل گۆرەی وی پارەی ژ ‏وەلاتیان وەرگریت. ‏