ئه‌ڤرۆنيوز:
رێڤه‌به‌ريا گشتى يا كه‌سناشيێ وبيڤه‌له‌رزان ل هه‌رێما كوردستانێ دياركر كو سوباهى پلێن گه‌رمێ دێ ل هه‌رێما كوردستانێ هێنه خوار.
رێڤه‌به‌ريا ناڤبرى پلێن گه‌رمێ ل پارێزگه‌هێن هه‌رێما كوردستانێ وكه‌ركووكێ به‌لاڤكرن.
دياركر ژى كو پلا گه‌رمێ يا ئه‌ڤرۆ ئه‌ينيێ 14/9/2018 ل پاريزگه‌ها دهۆكێ 42 پله‌يه وسه‌باهى شه‌مبيێ 15/9/2018 پلا گه‌رمێ ل پاريزگه‌ها دهۆكێ دێ 39 بيت.
ئه‌ڤرۆنيوز:
پشتى كۆمبوونا ئه‌ڤرۆ ئه‌ينيێ دناڤبه‌را كۆسرت ره‌سول وبه‌رهه‌م سالح، ئيكه‌تيێ وهه‌ڤپه‌يمانيێ به‌ياننامه‌كا هه‌ڤپشك ده‌ركر.
د وێ به‌ياننامێ دا هاتيه”ئه‌ڤرۆ ئه‌ينيێ 14/9/2018 ل سلێمانيێ ول مالا كۆسره‌ت ره‌سول عه‌لى جێگرێ سكرتێرێ ئێكه‌تى نيشتمانى كوردستان وب به‌رهه‌ڤبوونا به‌رهه‌م سالح سه‌رۆكێ هه‌ڤپه‌يمانيێ كۆمبوونا بلند يا ئێكه‌تى نيشتمانى كوردستان وهه‌ڤپه‌يمانى بۆ ديموكراسيێ وداپه‌روه‌ريێ هاته ئه‌نجامدان”.
وێ به‌ياننامێ ئاماژه دا”هه‌ردو لا دووپاتى ل سه‌ر چاره‌سه‌ركرنا قه‌يرانێن كوردستانێ وئه‌و كێشێن روو ب روويێ وه‌لاتيان بووين، ئه‌ڤه ژى دچارچۆڤێ رێككه‌فتنا سياسى يا هه‌مه‌لايه‌نه بۆ رێكخستنا ناڤمالا كوردستانى ب هه‌ڤپشكيا هێز و لايه‌نێن سياسى”.
ل دووماهيا وێ به‌يانناما هه‌ڤپشك دا هاتيه دياركرن كو” بريار هاته دان كۆمبوون دبه‌رده‌وام بن”.
ئه‌ڤرۆنيوز:
شانده‌كێ هه‌ڤپه‌يمانى بۆ ديموكراسى ودادپه‌روه‌رى ب سه‌رۆكاتيا به‌رهه‌م سالح ئه‌ڤرۆ ئه‌ينيێ 14/9/2018 گه‌هشته مالا كۆسره‌ت ره‌سول جێگرێ سكرتێرێ گشتيێ ئێكه‌تى نيشتمانى كوردستان، چاڤدێره‌كێ سياسى ژى بۆ ئه‌ڤرۆنيوز دياركر دبيت ئێكه‌تى به‌رهه‌م سالحى بۆ پۆستێ سه‌رۆكاتيا كۆمارا عيراقێ به‌ربژاره بكه‌ت.
دوهى جڤاتا سه‌ركردايه‌تيا ئێكه‌تى نيشتمانى كوردستان كۆمبوو وپشتى كۆمبوونێ به‌ياننامه‌ك ده‌ركر وتێدا ئاماژه دابوو كۆمبوون ل سه‌ر چار بابه‌تان هاتبوو كرن، كو ئێك ژوان بابه‌تان ل دۆر بريارا هه‌ڤپه‌يمانى بۆ ديموكراسى ودادپه‌روه‌رى كو دانوستاندنێ ل گه‌ل ئێكه‌تيێ بكه‌ن بۆ ئێكگرتنێ وئێكه‌تيێ ژى پێشوازى ل ڤێ بريارێ كريه وشانده‌ك بۆ دانوستاندنێ ل دۆر ئێكگرتنا هه‌ردو لايه‌نان پێكئينايه.
هه‌ر دوهى پێنج ئه‌ندامێ ديار يێن هه‌ڤپه‌يمانيێ ده‌ست ژناڤ رێزێن وێ حزبا به‌ردابو وبه‌ياننامه‌كا تژى ره‌خنه ل سه‌ر به‌رهه‌م سالح به‌لاڤكربوو.
چاڤدێره‌كێ سياسى ژى بۆ ئه‌ڤرۆ نيوز گۆت” خوه ڤه‌كێشانا هه‌ڤپه‌يمانيێ ژ هه‌لبژارتنێن په‌رله‌مانێ كوردستانێ پێنگاڤا ئێكێ بوو يا چوونا وێ حزبا نوو بۆ ناڤ رێزێن ئێكه‌تيێ”.
وى چاڤدێرى زێده‌تر گۆت” ده‌مه‌كێ درێژه چاڤێ به‌رهه‌م سالحى ل پۆستێ سه‌رۆكاتيا كۆمارا عيراقێ يه ول خۆلا بۆرى ژى هه‌ڤركێ فوئاد مه‌عسووم بوو، به‌لێ دده‌نگدانا په‌رله‌مانتارێن ئێكه‌تيێ وپارتى ل به‌غدا، فوئاد مه‌عسووم پتر ده‌نگ ژ به‌رهه‌م سالحى ئينان وپۆستێ سه‌رۆكاتيا كۆمارێ وه‌رگرت”.
ئاماژه دا ” كۆمبوونا ئه‌ڤرۆ يا كۆسره‌ت ره‌سول وهژماره‌كا سه‌ركردێن ئێكه‌تيێ ل گه‌ل به‌رهه‌م سالحى ل دۆر چوونا هه‌ڤپه‌يمانيێ يه بۆ ناڤ رێزێن ئێكه‌تيێ وده‌ستپێكه‌كه بۆ بزاڤا به‌ربژاركرنا به‌رهه‌م سالحى بۆ پۆستێ سه‌رۆكاتيا كۆمارى، ب تايبه‌تى كو سوباهى شه‌مبيێ 15/9/2018 روونشتنه‌كا گرنگ يا په‌رله‌مانێ عيراقێ يا هه‌ى بۆ هه‌لبژارتنا سه‌رۆكێ په‌رله‌مانى كو ئه‌و پۆسته بۆ عه‌ره‌بێن سونه‌يه و9 به‌ربژار يێن بۆ وى پۆستى هه‌ين”.
خوياكر ژى” ئه‌و هه‌ردو كورسيێن هه‌ڤپه‌يمانيا به‌رهه‌م سالحى دهه‌لبژارتنێن په‌رله‌مانێ عيراقێ ب ده‌ستڤه‌ئينان، پشتى چوونا هه‌ڤپه‌يمانيێ بۆ ناڤ رێزين ئێكه‌تيێ، دێ ئه‌و هه‌ردو كورسى ژى ل سه‌ر كورسيێن ئيكه‌تيێ زێده‌بن”.
ئه‌ڤرۆنيوز، باسم قاسم شنگالى
پشتی سێ سالان ل سەر کۆمکوژیا ئێزدیان ئەوا ل 3/8/2014 ل قەزا شنگالێ روودای و ب هەزاران ژ ئێزدیان هاتينە کوشتن ورەڤاندن و دەستەسەرکرن ژ لایێ رێکخراوا تیرۆرستیا داعشێ ڤە ـ لەورا رێورسمێن ڤان جمایان ل چیایێ شنگالێ نەدهاتن گێران ب شێوەیەکی فەرمی بۆ ده‌مێ سێ سالان هاتبوون راوەستاندن،
ئه‌ڤرۆ ئه‌ينيێ 14/9/2018 رێ وره‌سمێن جمایا شێشمس و شێخ بەرەکات ل چیایێ شنگالێ هاتن گێران كو ئه‌ڤرۆ دبيته رۆژا پەری سوارکرنێ ژ جمایا شێشمس و شێخ بەرەکات و ب ئامادەبوونا ب سەدان ژ خەلکێ دەڤەرا شنگالێ پەری هاتنە سوارکرن.
ئه‌ڤرۆ نیۆز، قائید میرۆ
شه‌ڤا بۆری دده‌مێ ڤه‌گه‌ڕیانێ بۆ مال كارمه‌نده‌كێ نه‌خۆشخانه‌یه‌كا تایبه‌ت كه‌فته به‌ر ده‌ستڕێژیا گولله‌یێن هژماره‌ك چه‌كداران و ده‌م و ده‌ست گیانێ خوه ژده‌ستدا پۆلیسێن هه‌ولێرێ ژی دبێژن تۆمه‌تبار هاتیه ده‌سته‌سه‌ركرن.
هۆگر گه‌لالی، په‌یڤدارێ پۆلیسێن هه‌ولێرێ بۆ ئه‌ڤرۆ نیۆز دیاركر” شه‌ڤا بۆری كارمه‌نده‌كێ نه‌خۆشخانا سویدی یا تایبه‌ت لباژێڕێ هه‌ولێرێ دده‌مێ ڤیایه ڤه‌گه‌ڕیت مالا خوه لسه‌ر جاده‌یا 100 مه‌تری هاتیه كوشتن، پشتی روویدانێ ژی هێزێن پۆلیسان ده‌ست ب ڤه‌كۆلینان كریه و شیاینه ئه‌ڤرۆ رۆژا پێنج شه‌مبی تۆمه‌بتارێ روویدانێ بهێته ده‌سته‌سه‌ركرن ل قه‌زا كۆیه.
هۆگر گه‌لالی ئاماژه بڤێ چه‌ندێ كر” ئه‌نجامده‌رێ روویدانێ هه‌مبه‌ر دادوه‌ری دانپێدان ب كوشتنا كارمه‌ندێ نه‌خۆشخانا سویدی كریه و ئه‌ڤچه‌نده دده‌مێ ڤه‌كۆلینێ ئه‌شكره كریه ب شاشی ته‌قه ل كارمه‌ندی كریه و وه‌سا زانیه دوژمنێ ویه.
گوره‌ی زانیاریێن ئه‌ڤرۆ نیۆز ئه‌نجامدانا روویدانێ بۆڤێ چه‌ندێ ڤه‌دگه‌ڕیت، تۆمه‌تباری ئاریشه دگه‌ل نۆشداره‌كێ نه‌خۆشخانێ هه‌نه و به‌ری چه‌ند رۆژان كه‌سێ هاتیه كوشتن تڕۆمبێلا ئه‌ڤی نۆشداری كڕیه و تۆمه‌تباریژی وه‌سا زانیه ئه‌ڤه نۆشداره دناڤا تڕۆمبێلێ دا.
ئەڤرۆ نیوز:
ھەلبژارتیێ ئیتالیا نوکە د ماوەکێ نەخوش دا دەرباز دبیت د مێژوویا خوە دا دیسان نەبونا یاریزانێن ستێر و ئەو کێشەیێن توشی ئێکەتیا تەپاپێ یا ئیتالیا بوین.
ژ سالا ١٩٥٩ قارەمانا جیھانێ چار جاران نەشیایە سەرکەفتنێ د یاریێن فەرمی دا توماربکەت و دوماھی سەرکەفتن ھەمبەر ھەلبژارتیێ ئەلبانیا بوو ب گۆلەکێ بێ بەرامبەر ل ڤاڤارتنێن موندیالا روسیا ل ٩ چریا دویێ یا ٢٠١٧، پشتی ڤێ سەرکەفتنێ ئیتالیا دو وەکھەڤی و دو خوسارەتی داینە کو ل سەر دەستێ سوید ھاتبو دەرخستن ژ یاریێن ڤەبر یێن دەربازبونا موندیالێ.
د یاریێن ھەڤالینی دا ل سالا ٢٠١٨ ھەلبژارتیێ ئیتالیا شیایە سەرکەفتنێ ل سەر ھەلبژارتیێ سعودیێ توماربکەت ب دو گۆلان بەرامبەر گۆلەکێ ب سەرپەرشتیا راھێنەرێ خوە روبێرتو مانشینی ل ٢٨ ھەیڤا ئەیارا بوری.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن: د روودانەکا ترافیکێ دا چار کەس برینداربوون.
ناڤهاتی زێدەتر گۆت: ئەڤرۆ پێنجشەمبی 13 ئیلۆنا 2018 و ل دەمژمێر 3:17 خولەکی ئێڤاری ل سەر جادا سەرەکی یا ناحیا زاویتە بۆ کۆمەلگەها باگێرا و ل نێزیک گەلیێ قەنتارا روودانەکا هاتنوچوونێ روودایە ژ جۆرێ لێگدان ل گەل بەرچانێ جادێ کو ترۆمبێلەکا دهوک تایبەت ژ جورێ ( BMW ) ژبن کونترولا شوفێری دەرکەفتیە و خوە ل پەرچانێ جادێ دایە، دئەنجامێ ڤێ روودانێ دا چار کەس برینداربووینە و هاتینە ڤەگوهاستن بۆ نەخۆشخانا تەنگاڤیا و هەروەسا زيان ب ترومبێلێ کەفتیه.
هەروەسا گۆتیە ژی: ئەگەرێ ڤێ روودانێ زفریت بۆ نەپێگریا شوفێران ب رێنمایێن هاتنوچوونێ و بکارئینانا لەزاتیێ.
ئەڤرۆ نیۆز ، رەمەزان هەرنی:
پشكا روشنبیری و هونەریا بارزان پێشانگەهەكا شێوەكاری بۆ هونەرمەندا شێوەكار (فەهیما باپیر) ڤەكر ل هولا ساخلەمیا بارزان بهەلككەفتا رێكەفتنا 11 ێ ئیلونێ.
حەسەن بابەكر ، بەرپرسێ پشكا روشنبیری و هونەریا بارزان بۆ ئەڤرۆ نیۆز گوت : ب هەلكەفتا 11 ێ ئیلونێ پشكا روشنبیری و هونەریا بارزان پێشانگەهەكا شێوەكاری بۆ هونەرمەندا كچ یا دەڤەرا بارزان ( فەهیما باپیر) ڤەكر ب بەرهەڤبۆنا (خەلات بارزانی ) نونەرێ سەروك بارزانی ل بارزان و هژمارەكا بەرپرسێن سیاسی و حكومی و هونەرمەند خەلكێ دەڤەرێ.
حەسەنی گوت ژی : د پێشانگەهێ دا هژمارەكا بەرچاڤا كەڤالێن هەمە رەنگ هاتبۆن نیشاندان دەربرین ل دلوڤانیا ئافرەتێ و جوانیا سروشتێ دەڤەرا بارزان دكر ل گەل هژمارەكا كەڤالێن كەسایەتیێن كورد ، ئەڤە بۆ جارا چەندیێ یە پێشانگەه بۆ هونەرمەندا ناڤبری دهێنە ڤەكرن وب ریارە ل چەندجهێن دی ژی بهێن ڤەكرن.
ئەڤرۆ نیوز ، زنار تۆڤی:
شەڤا 13_14 ئیلۆنا 1987 داستانا کانی ماسێ هاتە ئەنجامدان و هێزێن پێشمەرگێ کوردستانێ دربەکێ مەزن ل هێز و دیڤەلانکێن رژێما بەعس دا ل سنۆرێ ناحیا کانی ماسێ، فەرماندەکێ هێزێن پێشمەرگەی یێ داستانا کانی ماسێ بناڤێ مەسعود چەلکی بۆ ئەڤرۆ نیوز گۆت: هێــزێت پێشمەرگەهێ قەهرەمـان و چافنەترسێت لقا ئێکـا خەباتکـەر کو پێکهـاتبوون ژ هێز و رێکخـراو و دامودەزگەهـێت راگەهـاندنێ و پەیوەندی یا و برینپێچ و دەرمانسازو رێکخـراوا ئێکەتیا لاوان و قوتابیێن دیموکـراتا کورستانێ و هێزا پشتیوانی و هەیئەتا لقێ و بەرپرسێ لیژنا ئامێدیێ ل گەل هەیئەتا لیژنێ و دامودەزگـەهێن راگەهـاندنێ و هێز و رێکخـراوێن لەشکەری و هێــزا بەرگری مللـی یا سەر ب لیژنا ناوچـا ئامێدیێ ڤە و هێزەکـا ئێکەتیا نیشتیمانی کوردستان کو ژ چەند پێشمەرگێت قەهرەمان پێک هاتبوون و چەند رێکخـراوێن لەشکەری یێت سنورێ لیژنا زاخـو ل گەل سەربەست سندوری کو ئەندامێ لیژنا زاخـو بوو، دیسا چەند رێکخـراوێن لەشکەری و ل گەل هندەک هێزێن بەرگری مللی یێت سنورێ لیژنا دهوکێ ل گەل سەعدو کورکی کو هینگێ ئەندامێ لیژنا دهوکـێ بوو، هەروەسا هندەک رێکـخراو هێزێت سنورێ لیژنا ناوجــا شێخـان یا خەباتکەر ل گەل سەبـری بامرنی كو ئەندامێ لیژنا شێخان بوو،
ئەڤە هەمـوو کەفتنە رێ بۆ جـهێن دیارکـــری و هێزێن خـوە ئێخستنە دئامادە باشــیێ دا و چــاڤەرێی دەمژمێر( سفر ) بوون و ل گەل چریسکـا گوریا چەکـێ پێشمەرگەی ل سـەنتەرێ باژێرکـێ کانی ماسێ
پێکڤە و ب ئێک دەم دا ئاگـری ب رێژنە سەر سەرێ دوژمنـی و ئاخـویر و چەپەرێت وان ب سەردا بکەنە کاڤل و وێــران بکەن.
ناڤهاتی گۆت ژی: هەلبەت ب شێوازەکێ پارتیزانی و دیسپلینی هێزێت لەشکەری و لوجستی و هەوار هاتنێ و وهێزێن پالپشت ب چەکـێ خوەیێ گران ڤە ل جهێت دیارکری بنـەجه و ئاکنجـی بوون و نێزیکـی بەربانگــێ عەیشا و مانە چاڤەرێ و ئاگــەهـی دەنگــێ شــەری و بروسیا ئاگــرێ ئێــکەمین بازووک و ڕۆکێتـا پیروزی و سەرکەفتنـا هــەری مەزن بوون،لەوما ب خـوینەکـا گــەرم و ب دلەکـێ شێرانە و ب باوەریەکـا موکــوم و مـەزن کورێت پارتـی و بارزانــی ب حیکمەت و شارەزاییەکا مەزن و تەکتیکەکـا زیرەک شیان خـوە بگەهیننە ناڤ بارەگـایێ فەوجـا کومـاندوس یا لەشــکەرێ عێراقێ و ل دورێت کاتژمـێر ( ۱۱) شــەڤێ ئێکــەمین گــوللا بازووکـــێ بەرەف بارەگـــایێ فەوجـێ هــاتە داوەشاندن و تەقـاندن و ل گـــەل دا ب سەدان گولێت بازووک و RBG یا بوونە شێلک و شەلیتک و ئێکێ دگۆتە یا دی جهـێ من بکە و دەنگـێ رەشاش و BKS و دوشکا و تلیلیێت پێشمەرگا و سلوگان و ناڤ خوەدانێت کورێت بابا تێکەلی ئێک بوون و دەڤەرا بەرواری بالا ژ خـابیری و حەتـا کوڕر زێـــری ب درێژاهیـا( ٤۰ km ) بۆ ئێک مەیدانا شەری و دوزەخەکـا حەق لبن پێت دوژمنـی هەلکـرو د دەمەکـێ کێم دا هێـز ئیرادا لەشکەرێ عێـراقێ شکـاند و قەت شــیانێت بەرگریێ و شەرکرنێ نەمـان و هەر زوو ساخ و مــری کــەتن ددەستێت قەهرەمــانێت لقا ئــێکا خەباتکـەر دا و ئاخـویرو بارەگـایێت ون ب سەردا ئینان و ئاگر بەردایێ و هەمـوو ئالیات و تەجهیـزاتێت لەشکەری زریپوش و چەک و جەبلخــانە کەتـن بەر دەستێ پێشمەرگـێت قەهـرەمـان.
مەسعودی دیارکر ژی: بارەگایێت دو فەوجـا ل سەنتەرێ ناحیا کانی ماسـێ و رێڤەبەریا ناحـیێ و رێڤـەبەریا پولیسا و بارەگــایێ رێکخستنا حـزبا بەعـس و هەموو دەزگەهێن میری ل ناحـیێ دا، بارەگایێ لەشــکەری ل ( گرێ سۆور )ل روژهــەڵاتــێ باژێرکی کو هێــزەکـا بەرچــاڤ یا لەشکەرێ لێ بوو، دیسا زنجیرا چیایێ شــارانیێ کــو دکــەڤیتە باکــورێ کانی ماسـێ و بارەگایێ سریا( قەلاویسکی و رەبیــا کانیا تا ) لێ بوون یێت لەشکەرێ عێراقێ.
هەروەسا بلنداهیـا هنـداڤ گــوندێت ( یاتـێ و ئاستەنگێ ) ل روژهەڵاتـێ باژێرکـی کـو دو رەبیێت لەشکەری لێ بوون، بلنداهیێت باشورێ باژێرکـی کو دبێژنێ( باروخـێ ) کو ژ چەند سەنگەر و ڕەبیێت لەشکەری و بارەگایێ سریەکا لەشکەری ل وێرێ بوون.
ئەڤ بازنە ب ئێکجــاری هەموو پێکــڤە کــەفتنه دبن کونتـرول و ئیرادا پێشمەرگەهێ قەهرەمـان دا و ب چــەند دەمژمێرەکێت کێم هاتنە کونترول کــرن و
ب دەهــان کوشتی و بریندار ژ هێزێت عێـراقێ و ب سەدان ئێخسیر کەتن بەر دەستێ پێشمەرگەی.
هەلبەت هەر زوو دەست ب برین پێچی و چارەسەریا پێدڤی بۆ بریندارا هاتە کـرن و ئێخسیر ژی ل جهەکی دیارکری هاتنە کومکــرن.
زێدەتر دیارکز: کو زیان و قوربانیێت وان وەکـو پێشمەرگە مخــابنی کو جهـێ داخەکـا مەزن بو کو ( محەمەد سالح بــووتی ) بەرپرسێ لــیژنا ئامــێدیێ و فەرماندە و سەرکردێ ژێهـاتی ل هێرشا سەر گرێ سۆور ) شەهید دبیت و ( یوسف سالح ئەرتوشی) پێشمەرگێ قەهرەمـان و چافنەترس ل گەل ( تەمەر رەمەزان ) ی دا بوو ل هێرشا سەر بارەگایێ ( فەوجا کوماندوسا ) ل سەنتەرێ باژێرکی شەهید دبیت و هەردو دەملدەست دگەهــنە کـاروانـێ شەهیدا و چەند بریندارەک ژ پێشمەرگێت پەهــلەوان هەبوون.
دیسا ل بازنـێ( گرکا و سەرێ حەمـێ ) ل میحوەرێ ( گرکا ) ل هێرشا سەر رەبیا( گرێ دولابێ ) ل هنـداڤ جـادا گشتی پێشمەرگێ قەهرەمـان وچافنەترس ( سالح سەلیم سندی ) ژ لیژنا ناوچـا زاخــۆ شەهید دبیت و دگەهیتە کاروانـێ نەمـرا.
هەلبەت هەر جهـێ وێ شـەڤێ پێشمەرگەی هێرش بو بری گەلەک ب سانەهی هاتنە کونترول کرن و دەست ب سەرداگـــرتن و هندەک بازنە و میحـوەر هێلان دورپێچ کـری حەتا سپێدێ چونکــو پلان وەسا بوو و پێـدڤی بــو وەکـی خوە بڕێڤە بچـیت و بهێتە جێبەجـێ کرن.
دیسا بازنێ سەرێ (حەمێ و گـرکا ) ژ رۆژئاڤـــای ڤە و بازنـێ ( کانی ماسـێ ) ژ روژهەڵاتـی ڤە هەردو هەر وێ شەڤێ هــاتنە گـرتن و سـێ فەوجێت هێــزێنت لەشکەرێ عێــراقێ هێـــلان دناڤــبەرا خـوەدا و بێ حەول و مەفــەر مان و دڤێ داستانێ دا 700 سەربازێن عیراقی هاتنە ئێخسیرکرن و هژمارەکا مەزن ژی ژێ هاتنە کوشتن.
ئه‌ڤرۆنيوز:
ل سه‌ر سكالايا رێڤه‌به‌رێ به‌رێ يێ پۆليسێن به‌سرا، دادگه‌هێ ئه‌ڤرۆ پێنجشه‌مبى 13/9/2018 فه‌رمانا ده‌سته‌سه‌ركرنێ بۆ ئه‌سعه‌د ئه‌لعيدانى پارێزگه‌رێ به‌سرا ده‌ركر.
ليوا روكن ( جاسم ئه‌لسه‌عدى) رێڤه‌به‌رێ به‌رێ يێ پۆليسێن پارێزگه‌ها به‌سرا دياركربوو كو فه‌رمانا ده‌سته‌سه‌ركرنا پارێزگه‌رێ به‌سرا ئه‌سعه‌د ئه‌لعيدانى ب گۆره‌ى مادا 433 ژ قانوونا سزايێن عيراقى كو يا تايبه‌ته ب ناڤزراندنێ ژ دادگه‌ها ديالا هاتيه ده‌ركرن كو ل دووڤ سكالايه‌كا من، ژبه‌ر وان ئاخڤتنێن پارێزگه‌رێ به‌سرا ل روونشتنه‌كا په‌رله‌مانێ عيراقێ دده‌رحه‌قێ وى دا بێ به‌لگه گۆتين”.
دياركر ژى” ته‌حه‌ديا پاريزگه‌رێ به‌سرا دكه‌م كو ل وێ روونشتنا په‌رله‌مانێ عيراقێ ئه‌ز ب گه‌نده‌ليێ تۆمه‌تبار كريم، به‌لگه‌يه‌كێ پێشكێش بكه‌ت”.
ژلايێ خوه‌ڤه، ئه‌سعه‌د ئه‌لعيدانى پارێزگه‌ري به‌سرا بۆ (المربد) دياركر كو وى باوه‌رى ب دادگه‌هێ يا هه‌ى دئێكلاكرنا سكالايا ل سه‌ر وى هاتيه تۆماركرن ژ لايێ رێڤه‌به‌رێ به‌رێ يێ پۆليسێن پارێزگه‌ها به‌سرا”.
گۆت ژى” يێ به‌رهه‌ڤم ل به‌رده‌م دادگه‌هێ ئاماده‌بم وبه‌لگێن وى ل سه‌ر رێڤه‌به‌رێ به‌رێ يێ پۆليسێن به‌سرا هه‌ين پێشكێش دادگه‌هێ بكه‌ت ومن تۆمارێن ده‌نگى يێن هه‌ين يێن هنده‌ك ئه‌فسه‌ران ل سه‌ر وى ويا گرنگه دادگه رۆلێ خوه دسزادانا خه‌مسارى دا ببينيت، چ ئه‌ز بم يان رێڤه‌به‌رێ به‌رێ يێ پۆليسان”.ببينيت”.
پاريزگه‌رێ به‌سرا دروونشتنا په‌رله‌مانێ عيراقێ ل رۆژا شه‌مبيا بۆرى دشه‌ره‌ده‌ڤه‌كێ دا ل گه‌ل حه‌يده‌ر عه‌بادى سه‌رۆك وه‌زيرێن عيراقێ گۆتبوو عه‌بادى” رێڤه‌به‌رێ پۆليسێن به‌سرا دزيگه‌ره وبه‌رتيلان وه‌ردگريت ومن چه‌ندين جاران داخواز ژ هه‌وه كر وى لاده‌ن، به‌لێ هه‌ر ل سه‌ر من هاته سه‌پاندن د پۆستێ خوه دا بمينيت”.
نيشاندان