ئه‌ڤرۆ نيوز:
ده‌مژمێر 7:45 ده‌قيقه‌يى سپێده‌هيا ئه‌ڤرۆ رۆژا دوشه‌مبى سێ چه‌كدار چوونه ناڤ ئاڤاهيێ پارێزگه‌ها هه‌ولێر و پشتى چار ده‌مژمێران ژ ئۆپه‌راسيۆنا ئاسايش و هێزێن ئه‌منى يێن هه‌ولێر، هه‌ر سێ هێرشبه‌ر هاتنه كوشتن و ئۆپه‌راسيۆن ب دووماهى هات.
تاهر عه‌بدولا، جێگرێ پارێزگارێ هه‌ولێر بۆ رووداو راگه‌هاند: هێرش نێزيكى ده‌مژمێر 8:00ى سپێده‌هيا ئه‌ڤرۆ روودابوو. سێ چه‌كداران خواست بچنه ژوور، ئێك ژ پۆليسێن به‌رده‌رگه‌هى ژى بريندار بوو.
هێرشبه‌ران دو چايچيێن پارێزگه‌هێ وه‌كو ئێخسير گرتبوون، ئێك ئازاد كر و ئێك ژى شه‌هيد بوو.
ئه‌ڤرۆ نيوز:
دۆنالد تره‌مپ، سه‌رۆكێ ويلايه‌تێن ئێكگرتيێن ئه‌مريكا ب دژوار به‌رسڤا حه‌سه‌ن رۆحانى، سه‌رۆكێ ئيرانێ دده‌ت و د په‌يامه‌كێ دا دبێژيت: “هه‌كه جاره‌كا دى گه‌فا بكه‌ت، ده‌رئه‌نجامێن خراب دێ هه‌بن”.
شه‌رێ راگه‌هاندنا واشنتۆ و ته‌هران د به‌رده‌وامن و د نوونرين پێشهات دا، دۆنالد تره‌مپ “گه‌له‌ك ب دژوارى” به‌رسڤا حه‌سه‌ن رۆحانى دا.
پشتى رۆحانى به‌رى نوكه راگه‌هاند كو ئه‌نجامدانا شه‌رى ل گه‌ل ئيرانێ دێ بيته “دايكا هه‌موو شه‌ران”، تره‌مپ ب تويته‌كى ل تۆڕا جڤاكى يا توويته‌رى به‌رسڤا وى دا.
تره‌مپ د توويته‌كى دا كو ئاراسته‌يى رۆحانى كريه دبێژيت: “جاره‌كا دى گه‌فان ل ئه‌مريكا نه‌كه‌يى، هه‌كه نه دێ د كارڤه‌دانان دا وه‌سان نالى، كو كێم كه‌س وه‌كو ته ب درێژاهيا مێژوويێ ژ به‌ر نالى بن”.
دا زانين ژى كو ئێدى ئه‌مريكا وه‌لاته‌ك نينه ل هه‌مبه‌ر گۆتنێن نه ل ئاست و گۆتنێن دينێن تۆند ب راوه‌ستيت، “هشيار به”.
To Iranian President Rouhani: NEVER, EVER THREATEN THE UNITED STATES AGAIN OR YOU WILL SUFFER CONSEQUENCES THE LIKES OF WHICH FEW THROUGHOUT HISTORY HAVE EVER SUFFERED BEFORE. WE ARE NO LONGER A COUNTRY THAT WILL STAND FOR YOUR DEMENTED WORDS OF VIOLENCE & DEATH. BE CAUTIOUS!
— Donald J. Trump (@realDonaldTrump) July 23, 2018
ئەڤرۆ نیوز، باسم قاسم شنگالی:
ئەڤرۆ دو شەمبی 23-7-2018 ل گوندێ سکێنیێ ل باشووری قەزا شنگالێ مینەکا چاندی ب گەنجەکی ڤە پەقی و کوشت.
ژیدەرەکی بۆ ئەڤرۆنیوز گۆت: ئەڤرۆ سپێدێ دەمێ چوویە گۆندێ سکێنیێ مینەک پیڤە پەقی ب ئەگەرێ وان پاشمایێن داعش ل دووڤ خوە ھێلاین ل دەڤەرێ”.
ئاماژە کره وێ چه‌ندێ ژى كو ئەڤ گەنجه ب ناڤێ “ئيبراھیم قولۆ” بوو، خەلکێ ناحیا گرعزێرە ژیێ وی 27 سالن.
خویاکر ل گەل داگیرکرنا شنگالێ ژ ئالیێ تیرۆرستێن داعش، پتریا مال و سازی و جھێن گشتی یێن وێ دەڤەرێ، ھاتبوونە مینرێژکرن، به‌لێ ھێشتا جھێن مینرێژکری ماینە و ب تەمامی نەھاتینە پاقژکرن.
ئه‌ڤرۆ نيوز:
ب گۆره‌يى پێزانينێن ل به‌ر ده‌ست ئه‌ڤرۆ نيوز هه‌تا نوكه دو چه‌كدارێن هێرش كريه سه‌ر ئاڤاهيێ پارێزگه‌ها هه‌ولێر هاتينه كوشتن و نوكه ئێك مايه، هه‌ر چه‌نده پێشتر دهاته راگه‌هاندن كو دو چه‌كدارن.
ئه‌ڤرۆ سپێدێ ده‌مژمێر 7:15 ده‌قيقه سێ چه‌كداران ب ده‌بانجه و كلاشينكوفێ هێرش كريه سه‌ر باره‌گايێ پارێزگه‌ها هه‌ولێر ل ناڤه‌ندا باژێرى و ب گۆره‌يى پێزانينان دو كه‌سان هاتينه كوشتن و ئێك ژى مايه.
پێشتر تاهر عه‌بدولا، جێگرێ پارێزگارێ هه‌ولێر، راگه‌هاند كو نوكه ره‌وشا ئارامه و وه‌لاتيان پشت راست دكه‌ين كو چو تشت نينه و گۆت: “هێزێن ئاسايشێ يێن چووينه ژوور و ره‌وش نوكه ل بن كونترۆلا وانه”.
زێده‌تر گۆت: “چه‌كداران ب چه‌كێ سڤك هێرش كريه سه‌ر باره‌گايێ پارێزگه‌هێ و زێره‌ڤانه‌كێ به‌ر ده‌رگه‌هى بريندار كريه و چووينه ژوور ڤه ل قاتێ سيێ خوه ئاسێ كريه”.
دا زانين ژى هێشتا ناسناما وان ديار نه‌بوويه كو سه‌ر ب چو لايه‌نه‌كى نه و مه‌ره‌ما وان چيه و گۆت: “هه‌ر تشته‌كێ د ده‌ربارێ وان و ناسناما وان دا بهێته گۆتن يا زێده يه”.
ئه‌ڤرۆ نيوز:
بەرپرسەکێ پارتی دیموکراتی کوردستان ئاشکرا کر کو پارتی دێ لیستا بەربژارێن خوە بۆ ھەلبژارتنێن پەرلەمانێ کوردستانێ ئێکلاکەت و داخواز ژ جەماوەرێ پارتی کر، بۆ پشتڕاستبوونا ناڤێن خوە سەرەدانا بنگەھێن تۆمارا دەنگدانێ بکەن.
بلند ئیسماعیل، بەرپرسێ لقا 16 یا پارتی دیموکراتی کوردستان بۆ رۆژناما ئەڤرۆ دیار کر کو ئەڤە چەندین رۆژە مەکتەبا سیاسیا پارتی دەست ب ئێکلاکرنا ناڤێن بەربژارێن خوە بۆ ھەلبژارتنێن پەرلەمانێ کوردستانێ کریە و مەکتەبا سیاسی دگەل جڤاتێن سەرکردایەتی و لقێن خوە ل ھەموو دەڤەرێن کوردستانێ کۆمبوویە، بەلێ ھێشتا نەگەھشتینە ئەنجامێن دووماھیێ و گۆت: “بڕیارە ڤان دو رۆژێن بھێت ئەڤ بابەتێ دیارکرنا بەربژێران ئێکلا ببیت، چونکی ئەم دخوازین ب لیستەکا ھەژی و سەرکەفتی بچینە د ناڤ پڕۆسا ھەلبژارتنێن ئیلۆنا داھاتی، ژ بەر کو پارتی ھێزا ئێکێ یە ل ھەرێما کوردستانێ و پێشبینیا زۆرترین دەنگ دکەین”.
ناڤھاتی ئاماژە دا وێ چەندێ کو داخوازێ ژ دەنگدەر و جەماوەرێ پارتی دکەین ل ھەر دەڤەرەکێ سەرەدانا بنگەھێن نووکرنا تۆمارا دەنگدەران بکەن داکو ناڤێن خوە پشتڕاست بکەن، چونکی بەری پڕۆسا ھەلبژارتنان دێ تۆمارا دەنگدەران ھێتە نووکرن و دڤێت وەلاتی سەرەدانا بنگەھێن دیاری بکەن و گۆت: “ئەم وەک پارتی دخوازین جەماوەرێ پارتی پێگیربیت ب سەرەدانا بنگەھێن تۆمارا دەنگدەران و ناڤێ خوە پشتڕاست بکەن، ب تایبەتی ئەڤێن بۆ جارا ئێکێ یە دێ پشکداریێ د پڕۆسا دەنگدانێ دا کەن”.
ژ ئالیێ خوە ڤە شێروان زرار پەیڤدارێ کۆمسیۆنا بلندا ھەلبژارتن و راپرسیان ل ھەرێما کوردستانێ دیار کر کو ل رۆژا 7-7-2018ێ داخواز یا ژ قەوارێن سیاسی ھاتیە کرن ناڤێن بەربژارێن خوە پێشکێشی کۆمسیۆنێ بکەن و بۆ باسنیۆز گۆت: ”ھەتا رۆژا 25-7-2018ێ پێشکێشکرنا ناڤێن بەربژاران بۆ کۆمسیۆنێ دێ یا بەردەوام بیت”.
ناڤھاتی ئاماژە دا وێ چەندێ کو ل دووڤ قانوونا ھژمارە ئێک یا سالا 1992 شەش مەرج بۆ وەرگرتنا بەربژاران ھاتینە دیارکرن، ئەو ژی پێکھاتینە ژ شیانێن خواندنێ و نڤیسینێ و رابردوویەکێ پاقژ ھەبیت و پشکداری د رێکخستنێت حزبا بەعس دا نەکربیت و ئەندامێ وێ حزبێ نەبیت و ژیێ وی ژ 25 سالان کێمتر نەبیت و ئاکنجیێ ھەرێما کوردستانێ بیت”.
پەیڤدارێ کۆمسیۆنا بلندا ھەلبژارتن و راپرسیان ل ھەرێما کوردستانێ خویا کر کو ئەو داخوازیێن بۆ وان دھێن دێ ئاراستەیی ھەر ئێک ژ وەزارەتا ناڤخۆ و دەستەیا دەستپاکیێ ل ھەرێما کوردستانێ کەن بۆ وێ چەندێ ئەو ژی ڤەکۆلینێ ل سەر کەسایەتی و رابردوویێ بەربژاری بکەن، داکو بزانن چو ئاستەنگێن قانوونی نینن.
ئه‌ڤرۆ نيوز:
ئەندامەکا لیژنا پەروەردێ و خواندنا بلند ل پەرلەمانێ کوردستانێ ئاشکرا کر، ئەڤ سالە دێ ھژمارەکا زێدەترا قوتابیان ل زانکۆ و پەیمانگەھان ھێنە وەرگرتن و دبێژیت: ئەڤێن نەھێنە وەرگرتن، ب تنێ دو رێک ھەنە، ئەو ژی: ئێک: خواندنا ئێڤاریان، دو: زانکۆ پەیمانگەھێن ئەھلی بەردەوامیێ بدەنە خواندنا خوە.
شوکریە شێخانی، ئەنداما لیژنا پەروەردێ ل پەرلەمانێ کوردستانێ بۆ رۆژناما ئەڤرۆ گۆت: ”ھێشتا دیار نینە دێ ھژمارا ئەڤان قوتابیێن دەرچوویێن پۆلا 12 ئامادەیی چەندبیت کو ل زانکۆ و پەیمانگەھان بھێنە وەرگرتن، سالا بۆری تێکرایێ قوتابی 60% د ھاتنە وەرگرتن ل زانکۆ پەیمانگەھان، بەلێ ئەڤ سالە پێشبینی دھێتەکرن تێکرایێن کێمتر ژی بھێنە وەرگرتن، چونکو ئەڤ سالە ئینانا تێکرایان کێمتربوویە ژ سالا بۆری و دێ تێکرایێن ژ 60% کێمتر ژی ھێنە وەرگرتن، ئەڤە ژی ڤەدگەڕیتە سەر شیانێن خواندنا بلند و ڤەکۆلینێن زانستی”.
ل دۆر قوتابیێن نەھێنە وەرگرتن شوکریە شێخانی گۆت: “مخابن سالانە ھژمارەکا قوتابیێن دەرچوویێن ئامادەیی ژ ئەگەرێ کێمیا تێکرایێ وان ل چو زانکۆ و پەیمانگەھەکا حوکمەتێ ناھێنە وەرگرتن، ھەرچەندە پشتی مە بزاڤێن زۆر کرین، کۆلیژ و پەیمانگەھێن ئێڤاریان ژی ل حوکمەتێ ھاتینە ڤەکرن و ب کرێیەکا کێمتر ل زانکۆ و پەیمانگەھێن ئەھلی قوتابی دشێن بخوونن، بەلێ ئەڤە ژی بارگرانیە ل سەر قوتابی، پشتی چەندین سالێن خواندنێ ب پارە بچیتە کۆلیژ و پەیمانگەھان، رێیا دویێ ب تنێ ئەڤە بچنە زانکۆیێن ئەھلی”.
ئه‌ڤرۆ نيوز:
ل ئەفغانستانێ شەرەکی دژوار د ناڤبەرا تالیبانێ و داعشێ دا ھەیە و د ناڤا سێ رۆژان دا ١٢٤ چەکدار ژ ھەردو ئالیان ھاتنە کوشتن و سوپایێ ئەفغانستانێ و ئەمریکا ژی ل دژی داعشێ و رێکخستنا تالیبانێ ئۆپەراسیۆنێن سەربازی ئەنجام ددەن.
ل پارێزگەھا جوزجان یا ئەفغانستانێ ئەڤ ھەفتیەکە شەرەکی دژوار د ناڤبەرا چەکدارێن تالیبانێ و تیرۆرستێن داعشێ دا ھەیە و داعشێ پشکەک ژ ئاخا پارێزگەھا جوزجان کریە ژێر کۆنترۆلا خوە و ژ تالیبانێ دخوازیت کو دەڤەرێ بجە بھێلیت و ل ھەمبەر دا تالیبان ژی داعشێ وەک رێکخستنەکا بیانی یا تیرۆرست بناڤ دکەت و بۆ ڤێ چەندێ ژی بریار دایە کو داعشێ ژ سنۆرێن ئەفغانستانێ دەربخینیت.
محەمەد رەزا ئەندامێ جڤاتا پارێزگەھا جوزجانێ د داخۆیانیەکی دا بۆ ئاژانسا نووچەیان DPI یا ئەلمانیا راگەھاند کو ل ناڤەندا پارێزگەھا جوزجانێ ھێزێن وان دەستھلاتدارن لێ ل دەڤەرێن چیایی داعش و چەکدارێن تالیبانێ ھەنە و گۆت: (شەرێ د ناڤبەرا داعشێ و تالیبانێ بۆ کۆنترۆلکرنا دەڤەرێن چیاییە و د ئەنجاما شەرێ سێ رۆژان دا ژ ھەردو ئالیان ١٢٤ چەکدار ھاتنە کوشتن کو ٧٢ کەس ژ وان چەکدارێن تالیبانێ نە و ٥٢ چەکدار ژی ژ داعشێ نە).
ئەندامێ جڤاتا جوزجانێ راگەھاند کو نھا 15% پارێزگەھا وان ل ژێر کۆنترۆلا داعشێ یە لێ ل دەڤەرێ تالیبان گەلەک ژ داعشێ ب ھێزترە و گۆت: (بۆ مە ھەردو ئالی ژی جھێ مەترسیێ نە ژ بەر کو بەردەوام ھێرشێن تیرۆرستی ئەنجام ددەن و ئۆپەراسیۆنێن مە ب ھەڤکاریا فرۆکێن شەری یێن ئەمریکا ل دژی ھەردو کۆمێن چەکدار بەردەوام دکەن و ھەتا ب تەمامی کۆمێن چەکدار نەھێنە ژناڤبرن مرۆڤ نەشێت بەحسێ ئارامیا پارێزگەھا جوزجانێ و ھەموو دەڤەرێن ئەفغانستانێ بکەت).
ئه‌ڤرۆ نيوز:
بڕياره ئه‌ڤرۆ ل باژێرێن به‌غدا و به‌سرا و چه‌ند باژێرێن دى يێن عيراقێ خوه‌نيشاندانێن به‌رفره‌ـ بهێنه ئه‌نجام دان و هێزێن زۆرێن ئه‌منى ژى ل به‌غدا هاتينه به‌لاڤكرن.
ب گۆره‌يى پێزانين ل ده‌زگه‌هێن راگه‌هاندنێ هاتينه به‌لاڤكرن ل مه‌يدانا ته‌حرير و ده‌ڤه‌رێن دى يێن باژێرێن به‌غدا هێزێن زۆرێن ئه‌منى ژ ترسا خوه‌نيشاندانێن به‌رفره‌هـ دا خستينه حاله‌تێ ئاماده باشيێ.
ئه‌ڤه د ده‌مه‌كى دايه دوهى خوه‌نيشاندان ل به‌سرا و به‌غدا هاتنه ئه‌نجام دان و خوه‌نيشانده‌ران داخوازا دادگه‌هكرنا گه‌نده‌لكاران و هه‌لوه‌شاندنا جڤاتا پارێزگه‌هان و ده‌سته‌لاتا باژێرێن وان كرن و ره‌خنه‌يێن دژوار ژى ل بێده‌نگيا حزبان گرتن.
ماوێ زێده‌ر ژ دو حه‌فتيانه خوه‌نيشاندان ل باژێرێن عيراقێ دژى نه‌بوونا خزمه‌تگۆزاريێن ئاڤ و كاره‌ب و ده‌ليڤێن كارى يا به‌رده‌وامه و هه‌تا نوكه 15 خوه‌نيشانده‌ر هاتينه كوشتن و ب سه‌دان خوه‌نيشانده‌ر ژى بريندار بووينه.
ئه‌ڤرۆ نيوز:
ژێده‌رێن ده‌نگوباسان راگه‌هاندن كو ئێك ژ وان چه‌كدارێن هێرش كريه سه‌ر ئاڤاهيێ پارێزگه‌ها هه‌ولێر هاته كوشتن و هێشتا شه‌ر يێ به‌رده‌وامه ژ به‌ر كو چه‌كداره‌كێ دى يێ مايى.
ئه‌ڤرۆ سپێدێ ده‌مژمێر 7:15 ده‌قيقه دو چه‌كداران ب ده‌بانجه و كلاشينكوفێ هێرش كريه سه‌ر باره‌گايێ پارێزگه‌ها هه‌ولێر ل ناڤه‌ندا باژێرى و هێشتا نه‌هاتينه ده‌سته‌سه‌ركرن.
تاهر عه‌بدولا، جێگرێ پارێزگارێ هه‌ولێر، راگه‌هاند كو نوكه ره‌وشا ئارامه و وه‌لاتيان پشت راست دكه‌ين كو چو تشت نينه و گۆت: “هێزێن ئاسايشێ يێن چووينه ژوور و ره‌وش نوكه ل بن كونترۆلا وانه”.
زێده‌تر گۆت: “دو چه‌كداران ب چه‌كێ سڤك هێرش كريه سه‌ر باره‌گايێ پارێزگه‌هێ و زێره‌ڤانه‌كێ به‌ر ده‌رگه‌هى بريندار كريه و چووينه ژوور ڤه ل قاتێ سيێ خوه ئاسێ كريه”.
دا زانين ژى هێشتا ناسناما وان ديار نه‌بوويه كو سه‌ر ب چو لايه‌نه‌كى نه و مه‌ره‌ما وان چيه و گۆت: “هه‌ر تشته‌كێ د ده‌ربارێ وان و ناسناما وان دا بهێته گۆتن يا زێده يه”.
نيشاندان