ئه‌ڤرۆ نيوز:

ئەندامەکێ سەرکردایەتیا پارتی دیموکراتی کوردستان- ئیران راگەھاند کو ئەم رێ نادەین ‏سیناریۆیێن ل رۆژئاڤایێ کوردستانێ ھاتنە بجھئینان ل رۆژھەلاتێ کوردستانێ بھێنە دوبارەکرن و ‏ھەر پارت و ئالیەکێ سیاسی کار بۆ بەرژەوەندیێن نەتەوی یێن گەلێ کورد ل رۆژھەلاتێ کوردستانێ ‏بکەت ئەم دێ پشتەڤانیێ لێ کەین.‏

رۆستەم جیھانگیری ئەندامێ سەرکردایەتیا پارتی دیموکراتی کوردستانی- ئیران د دیدارەکا تایبەت ‏دا ل گەل رۆژناما ئەڤرۆ ل دۆر رەوشا ڤێ دووماھیێ ل رۆژھەلاتێ کوردستانێ دیارکر کو دەمەکە ‏پێشمەرگێن مە دەست ب چالاکیێن خوە ل رۆژھەلاتێ کوردستانێ کرینە و مە مەیدانا خەباتا خوە ‏بەرفرەھتر لێ کرینە، لێ ڤێ دووماھیێ ھندەک چالاکی و ل رۆژھەلاتێ کوردستانێ دھێنەکرن کو ‏جھێ گومانێ نە و گۆت: (ئەم وەکو پارتی دیموکراتی کوردستان/ ئیران ل دژی ھندێ نە کو ‏سیناریۆیێن بەری نھا ل رۆژئاڤایێ کوردستانێ ھاتنە بجھئینان نھا ل رۆژھەلاتێ کوردستانێ بھێنە ‏دوبارەکرن، چونکو ئەو یەک د گەل راستیا سیاسی و جڤاکی یا رۆژھەلاتێ کوردستانێ ناگونجیت).‏

ناڤبری د بەردەوامیا ئاخڤتنا خوە دا ئەو یەک ژی دیارکر کو پشتی ئالۆزیێن ل سووریێ پیلانەک د ‏ناڤبەرا دەولەتێن روسیا، ئیران و رژێما ئەسەدی ل گەل پەکەکێ ھاتە دانان و رێ نەدان پارت و ‏ئالیێن نەتەوی یێن رۆژئاڤایێ کوردستانێ د پرۆسا گرنگ یا وی دەمی دا جھێ خوە بگرن و براستی ‏ئەز دشێم بێژم کو سیناریۆیا وان ل رۆژئاڤایێ کوردستانێ باش ھاتە بجھئینان و نھا ل ڤێ دووماھیێ ‏ئەم دبینین کو بزاڤەکا وەسا بۆ رۆژھەلاتێ کوردستانێ ژی دھێتە کرن و گۆت: (ھەفتیا بۆری ‏پەژاکێ پرۆژەکا خوە بۆ ئیرانێ و رۆژھەلاتێ کوردستانێ راگەھاند کو مخابن د پرۆژێ وان دا ‏بەحسێ رزگارکرنا ئیرانێ دھێتەکرن، ئانکۆ وان نەڤێت رژێما نھا ژناڤ بچیت دا گەلێ کورد ل ‏رۆژھەلاتێ کوردستانێ بگەھنە مافێن خوە، چونکو بۆ ھەموو ئالیەکێ ئاشکرایە کو ھەتا رژێما نھا ‏یا ئیرانێ ل سەر دەستھەلاتێ بیت گەلێ کورد ل رۆژھەلاتێ کوردستانێ و ئیرانێ ناگەھنە مافێن ‏خوە، ژ بەر ھندێ ژی دڤێت رژێما نھا یا ئیرانێ ژناڤ بچیت).‏

ئەندامێ سەرکردایەتیا پارتی دیموکراتی کوردستان/ ئیران د پشکەکا دی یا ئاخڤتنا خوە دا ئاماژە ‏ب ڤێ یەکێ ژی کر کو شەرێ مە ل دژی رژێما ئیرانێ یە و ئەم شەری بۆ بدەستڤەئینانا مافێ ‏نەتەوی یێ گەلێ کورد ل رۆژھەلاتێ کوردستانێ دکەین و ھەتا کورد ل ئیرانێ نەگەھنە مافێن خوە ‏یێن نەتەوی دێ خەباتا مە ژی بەردەوام بیت و گۆت: (شەرێ ڤێ دووماھیێ ل باژارێ مەریوانێ کو ‏پەژاکێ بەرپرسیاریا خوە ل ھەمبەر وی شەری راگەھاند جھێ گومانێ یە، چونکو سالا بۆری ‏چەندین ئەندامێن پەژاکێ ب دەستێ پاسدارێن ئیرانێ ھاتنە شەھید کرن و پەژاکێ چو ھەلویست ‏نەبوو، ل ئورمیێ و ھەورامانێ چەندین جاران ئەندامێن پەژاکێ ب دەستێ پاسداران ھاتنە شەھید ‏کرن و پەژاکێ چو ھەلویستەکی وەسا نەبوو و ھەفتیەکێ بەری نھا ژی وەکو من گۆتی وان بەرنامێ ‏خوە بۆ رزگارکرنا ئیرانێ راگەھاند و نھا ژی د چالاکیەکێ دا چەندین پاسدارێن ئیرانێ کوشتینە).‏

رۆستەم جیھانگیری ئەو یەک ژی دیارکر کو ئەم دەستخوەشیێ ل ھەر بزاڤەکێ دکەین کو ل ‏رۆژھەلاتێ کوردستانێ د بەرژەوەندیا گەلێ مە دا بیت و گۆت: (به‌لێ مخابن تشتێن ڤێ دووماھیێ ‏جھێ پرسیارێ نە و ئەم ھێڤیدارین چو پیلانێن دی ل پشت پەردەیی دا نەبیت، چونکو بەری نھا ‏پەژاکێ بەرنامێ خوە بۆ ئیرانێ دروست کربوو و بۆ ھەموو پارتێن رۆژھەلاتێ کوردستانێ ژی ‏ھنارتبوو، لێ ھەموو پارتێن رۆژھەلاتێ کوردستانێ ھەر زوو دژبەریا خوە ل ھەمبەر ڤێ یەکێ ‏دیارکرن، چونکو ئەوا نھا ل ژێر ناڤێ خوەسەریا دیموکراتیک ل رۆژئاڤایێ کوردستانێ دھێتەکرن ل ‏گەل داخوازیێن گەلێ مە ل رۆژھەلاتێ کوردستانێ ناگونجیت و ئەم ھەموو سیناریۆیێن وەسا رەت ‏دکەین و داخوازیێن گەلێ مە ل رۆژھەلاتێ کوردستانێ ئاشکرانە و گەلێ مە دخوازیت بگەھیتە ‏مافێ خوە یێ نەتەوی و ب خوەسەریا دیموکراتیک پرسا کوردی ل ئیرانێ ناھێتە چارەکرن).‏

ئەندامێ سەرکردایەتیا پارتی دیموکراتی کوردستان/ ئیران د دووماھیا ئاخڤتنا خوە دا ئەو یەک ژی ‏دیارکر کو دەمەکە ھندەک ھێز بزاڤێ دکەین ل رۆژھەلاتێ کوردستانێ ناکۆکیان د ناڤبەرا پارتێن ‏سیاسی دا دروست بکەن ب تایبەتی ژی دخوازن ناکۆکیان د ناڤبەرا مە و ھندەک ئالیێن دی دروست ‏بکەن، مە ھەتا نھا ل دژی وان بزاڤان ھەلویستەکێ ئاشکرا ھەبوویە و جارەکا دی دوپات دکەم کو ‏یێن بخوازن بۆ بەرژەوەندیێن نەتەوی یێن گەلێ مە ل رۆژھەلاتێ کوردستانێ خەباتێ بکەن ئەم ‏دەستخوەشیێ ل وان دکەین، لێ بزاڤێن کو ل دژی گەلێ مە بن دێ رەت کەین و ل دژی وان دێ ‏خوەدان ھەلویست بین.‏