ئەڤرۆنیۆز ، سالار دۆسكی:

 رێڤەبەرێ‌ گشتیێ‌ كارەبێ ل پارێزگه‌ها دهۆكێ‌ دكۆنگرەكێ‌ رۆژنامەڤانی دا كو ئەڤرۆ 17/7/2018 ل رێڤەبەریا ناڤبری هاتيه‌ ئه‌نجامدان، بەحسێ‌ رەوشا كارەبا گشتی ل پارێزگەهێ‌ و پرۆژێ‌ نوویێ‌ وەزارەتا كارەبێ‌ كر.

كەمال محەمەد صالح، رێڤەبەرێ‌ گشتیێ‌ كارەبێ ل پارێزگه‌ها دهۆكێ راگەهاند،  هەرێما كوردستانێ‌ پێدڤی ب 4500 مێگاواتێن كارەبێ‌ یە، 2500 هەتا 2800 مێگاواتێن كارەبێ‌ ل بەر دەست يێن هه‌ين، چەندین مێگاوات بۆ پارێزگەهێن نه‌ينه‌وا و كەركووك و كارگەهێن چیمەنتوو و ئاسنی دچن و2100 مێگاوات دمینن، بەهرا (هەولێر 42%سلێمانی 33% و نیڤ، دهۆك 24%) رۆژانە 450 مێگاوات بۆ دهۆك دهێن، 52 مێگا بۆ كەمپان، 40 مێگا بۆ چەپەرێن پێشمەرگەی، ل پرۆژێن ساخلەمی و ئاڤێ‌ و گرتیخانان كارەب 24 دەمژمێری یە 76 مێگا دچن هەموو 168 مێگا دچن، یا دگەهیتە خەلكی 380 مێگانە، 11 دەمژمێران كارەب هەیە، 131 هزار 605 پشكدارێن كارەبێ‌ مە هەنە، پارێ‌ هاتیە وەرگرتن ل ئەڤ سالە 24 ملیار 515 ملیۆن دينارن”.

ناڤبری گۆت ژی: 2491 گوهۆرك ل دهۆكێ يێن هه‌ين، 307 ئەڤ سالە سوتینە، سال بۆ سال دەمژمێرێن كارەبێ‌ بەر ب كێمبوونێ‌ دچن.

رێڤەبەرێ‌ گشتیێ‌ كارەبێ‌ بەحسێ‌ سیستەمێ‌ نوو یێ‌ وەزارەتا كارەبێ‌ كر وب گرنگی ل قەلەم دا وگۆت” ئارمانج نە ئەوە كۆمكرنا پارانە، به‌لكو ب تنێ‌ بۆ نەهێلانا زێدەگاڤیانە و دیاركرنا كارەبا بەرزەیە و چارەسەكرنا گوهۆركێن دهێنە سوتن، دەمژمێرێن كارەبێ‌ 11 نه‌ دێ‌ بیتە دو بەرامبەر”

، ئاماژە كرە وێ‌ چەندێ‌ ژى كو ل ئادارا ئەڤ سالە پرۆژە هاتیە ئیمزاكرن وبۆ سەرانسەری هه‌رێما كوردستانێ‌ یە، دانانا پیڤەران بێ‌ بەرامبەرە و دناڤ مالا دا نابیت و میزانی دێ‌ ب عامودان ڤە هێنەگرێدان.

ناڤبری بەحسێ‌ سيمكارتی كروگۆت”ئارمانج ژ دانانێ‌ ئەوە كونتاككرنا سەنتەرێ‌ كارەبێ‌ یە ل گەل پشكداری،  دو رێيێن پارە دانێ‌ هەنە، رێ هەیە وەكو نوكە دێ‌ بسولە بۆ وەلاتی چیت و دێ‌ پارە هێتە وەرگرتن، ب رێيا كارتێ‌ و هەیڤانە دێ‌ بۆ خەلكی هێت، گوهۆرین ل سەر بهایێ‌ كارەبێ‌ ناهێتەكرن، هەكە سێ هەیڤان بسولە بۆ وەلاتی چو و پارێ‌ كارەبێ‌ نەدا ، مە ماف يێ هه‌ى كارەبێ‌ برین، لێ‌ نوكە پشتی سێ‌ هەیڤان كومپوتەر دێ‌ هوشداریێ‌ دەت و دێ‌ بلۆك كەت و كارەبا وی دێ‌ هێتە كێمكرن”.

ناڤبری گۆت ژی” موه‌لیدەێن كارەبێ‌ دێ‌ هەر مینن و هەكە دەمژمێرێن كارەبا گشتی زێدەبوون، دێ‌ پارێ‌ ئەمپێری هێتە خوار، هەر گوهۆرینەكا ئابووری دروست بیت، دێ‌ بەر ب 24 دەمژمێری چین، بسولە هەیڤانە دێ‌ چیت، پرۆژە پتر دخزمەتا وەلاتیان دایە بەری یا حوكمەتێ‌”.

هێشتا گۆت” پرۆژە ل هەیڤا ئادارى دەست پێكریە و ده‌مێ‌ پرۆژەی 18 هەیڤن و ل دووماهیا 2019 دێ‌ هێتە بجهئینان 100% “.

كەمالى ئەو ژی گۆت: 2300 میتەر گەهشتینە وەزارەتێ‌ و دێ‌ هەولێر و سلێمانیێ‌ هێنە دانان، ئەو گۆتن ژى ره‌تكر كو 10% ژپرۆژەى ل دهۆكێ هاتبیتە دانان”.