ئەڤرۆ نیوز ، زنار تۆڤی :
ئەڤرۆ دوشەمبی 9.7.2018 جارەکادی فرۆکێن سۆپایێ تورکی ب بەهانەیا هەبوونا چەکدارێن پەکەکێ گەلیێ بازێ ل سنورێ ناحیا کانی ماسێ بۆمبە بارانکر.
ئامەد سالح وەلاتیەکێ وێ دەڤەرێ یە بۆ ئەڤرۆ نیوز دیارکر: ئەڤرۆ دوشەمبی و لدەمژمێر 4:40 خولەک جارەکا دی فرۆکێن سۆپایێ تورکی گەلیێ بازێ ل ناحیا کانی ماسێ یێ سەر ب قەزا ئامێدیێ ڤە بۆمبە بارانکر و ڤێ چەندێ ترسەک ئێخستە دلێ خەلکێ گوندێن دەوروبەر و هەروەسا ئەڤە د ماوێ ڤان رۆژان دا دو جاران فرۆکان ئەڤ گەلیە بۆمبە بارانکر.
ئه‌ڤرۆنيوز:
كۆمسيۆنا بلند يا هه‌لبژارتنان ل عيراقێ راگه‌هاند، ئه‌ڤرۆ هژمارتنا ب ده‌ست يا ده‌نگان بۆ وان سندووقان دێ هێته ئه‌نجامدان كو تانه ل سه‌ر هاتين ل شه‌ش پارێزگه‌هێن عيراقێ، ژێده‌ره‌كێ رۆژنامه‌ڤانى ژى ل پارێزگه‌ها موسه‌نا بۆ ئه‌ڤرۆنيوز دياركر بريار ئه‌وبوو ده‌نگێن سندووقێن تانه ل سه‌ر يێن پارێزگه‌ها موسه‌نا، ل باژێرێ سه‌ماوه سه‌نته‌رێ پارێزگه‌هێ بهێنه هژمارتن، به‌لێ ب شه‌ڤ يێن هاتينه ڤه‌گۆهاستن بۆ به‌غدا.
له‌يس جه‌بر، په‌يڤدارێ كۆمسيۆنا بلند يا هه‌لبژارتنان ل عيراقێ د به‌ياننامه‌كێ دا راگه‌هاند” ئه‌ڤرۆ دوشه‌مبى 9/7/2018 هژمارتنا ب ده‌ست بۆ وان سندووقان دێ هێته ئه‌نجامدان كو تانه ل سه‌رن ل پارێزگه‌ها به‌غدا، ئه‌وژى هه‌ر شه‌ش پارێزگه‌هێن به‌سره وميسان وناسريه وموسه‌نا وديوانيه وواست”.
دياركر” پرۆسا هژمارتنا ده‌نگان ب ده‌ست ل هۆلێن پێشانگه‌ها نێڤده‌وله‌تى يا به‌غدا دێ ب رێڤه‌چيت ونوونه‌رێن نه‌ته‌وێن ئێكگرتى وباليۆزخانان ولايه‌نێن سياسى وده‌زگه‌هێن راگه‌هاندنێ دێ تێدا به‌رهه‌ڤ بن”.
ژلايه‌كێ دى ڤه، ژێده‌ره‌كێ رۆژنامه‌ڤانى ل پاريزگه‌ها موسه‌نا بۆ ئه‌ڤرۆنيوز گۆت” بريار بوو هژمارتنا ب ده‌ست يا ده‌نگێن دناڤ سندووقێن تانه ل سه‌ر هاتين ل پارێزگه‌ها موسه‌نا هه‌ر ل باژێرێ سه‌ماوه سه‌نته‌رێ پارێزگه‌هێ بهێته ئه‌نجامدان، به‌لێ دياره ئه‌و سندووقێن ده‌نگدانێ ب شه‌ڤ يێن هاتينه ڤه‌گۆهاستن بۆ به‌غدا تاكو ئه‌و پرۆسه ل وێرێ بهێته ئه‌نجامدان”.
وى ژێده‌رى گۆت ژى” ئه‌و دادوه‌رێ هاتيه راسپاردن بۆ ب رێڤه‌برنا ئۆفيسا پارێزگه‌ها موسه‌نا يا كۆمسيۆنا بلند يا هه‌لبژارتنان ل عيراقێ، چو داخۆيانيێن رۆژنامه‌ڤانى ناده‌ت”.
ئەڤرۆ نیوز ، زنار تۆڤی:
ئەڤرۆ 9.7.2018 خولەکا چارەسەریێن دەستپێکی بۆ 25 وەلاتی و فەرمانبەرێن میری و حزبی ژ لایێ خاچا سورا جیهانی ل عێراقێ ل ناحیا كانی ماسێ هاتە ڤەكرن.
رێبەر ئیبراهیم ئێک ژ پشکدارێن وێ خۆلێ یە بۆ ئەڤرۆ نیوز دا دیارکرن: خاچا سورا جیهانی ل عێراقێ رابوویە ب ڤەکرنا خولەکا چارەسەریێن دەسپێکی بۆ 25 وەلاتیێن ناحیا کانی ماسێ و دێ ماوێ دو رۆژان یا بەردەوام بیت، هەروەسا باوەرنامە دێ ل سەر پشکداران خولێ هێنە دابەشکرن و ئەڤ خولە گەلەک دباشن بهێنە ڤەکرن و ئەم مفایەکێ باش ژێ دبینین، هەروەسا ئەڤ خولە ب هاریکاریا رێڤەبەریا ناحیا کانی ماسێ هاتینە ڤەکرن.
ئه‌ڤرۆنيوز:
نوشداره‌كا تایبەتمەند ب نەخوه‌شيێن گوهـ و دفن و گەوريێ ل دھۆکێ دیارکر ھەکە هێدفۆن ب ره‌نگه‌كێ دروست بھێتە بکارئينان ئەو ژی دەنگ نورمال بیت بۆ دەمێ گەلەک دەمژمێران نەھێتە بکارئینان چو مەترسى ل سەر گوھلێبوونێ نينە.
سه‌یران سالم محه‌مەد سه‌لیم، نوشدارا تایبەتمەندا گوهـ و دفن و گەوریێ ل نەخوه‌شخانا ئازادی یا فێرکرنێ ل دھۆکێ بۆ نوش نیوز دیارکر کو گه‌له‌ك تشتێن گرنگ يێن هه‌ين پێدڤیە بکارئينەرێن ھێدفۆنا بزانن ئەو ژی بلنداھیا دەنگی و درێژاھیا وەختی بکارئينانا ھێدفۆنێ ئەڤە ھەردو تشت گه‌له‌ك دگرنگن بۆ وان کەسێن ھێدفۆنێ بکاردئینن، چونکى ھەکە دەنگ گەلەک یێ بلند بیت، دبيت مەترسی ل سەر گوھلێبوونێ ھەبیت و کارتێکرنێ ل دەمارا گوھلێبوونێ بکەت ھەتا ھەتایێ و ھەکە دەنگ یێ نزم بیت یێ نورمال بیت به‌لێ بۆ دەمێ چەند دەمژمێران بۆ نموونە سێ ھەتا چار دەمژمێران د رۆژێ دا بێ بێنڤەدان رۆژ ل دووڤ رۆژێ دێ کارتێکرنێ ل گوھی کەت و ب درێژیا سالان دێ مەترسى کەڤيتە سەر گوھى و گوھلێبوونێ.
سه‌یران سالم ئاشکەرا کر کو شێوێ دروست بۆ بکارئینانا ھێدفونێ ئەوە مرۆڤ ب دەنگەکێ نورمال بۆ دەمەکێ کێم بکار بینيت، باشترە مرۆڤ گەلەک بکارنەئینيت د رۆژێ دا، ئانکو زێدەتر نەبیت ژ دەمژمێره‌كێ و بێھنڤەدان د ناڤبەرا بکارئینانا ھێدفۆنێ دا ھەبیت،دياركر ژى كو ئەو ھێدفۆنێن کوالێتیا وان باش دچێترن ژ یێن کوالێتیا وان نەباش ئانکو کوالێتیا ھێدفۆنێ ژی گەلەک یا گرنگە بۆ وان کەسێن بکاردئینن.
ئەڤرۆ نیوز ، زنار تۆڤی:
وەزارەتا پەروەردێ یا حوکمەتا هەرێما کوردستانێ رێنمایێن پێدانا مۆلەتا بێ مووچە بۆ مامۆستایان دەركرن، كو دێ ل سالا خواندنا (2018-2019) كار پێ هێتە کرن.
ئەڤرۆ دووشەمبی 9 تەمۆزا 2018، وەزارەتا پەروەردا هەرێما کوردستانێ رێنمایێن نوو بۆ پێدانا مۆلەتا بێ مووچەیێ بۆ مامۆستایان دەكرن، كو لدووڤ وێ بڕیارێ مامۆستا دشێن هەر ژ سوبەهی 10 تەمۆزێ هەتا 15 ئیلۆنا 2018 داخوازیا خوە پێشكێش پەروەردێن قەزایان بكەن.
ئه‌ڤرۆ نیوز ، نه‌وزاد هلۆرى:
بۆ ئێكه‌مین جار ل پارێزگه‌ها دهۆكێ و ده‌ڤه‌را ئاكرێ ، جوتیاره‌كێ گونده‌كێ ناحیا دینارته رابوویه ب چاندنا كه‌نگران د مالا خوه دا ، وه‌ك ئه‌و ديار دكه‌ت كو ئه‌ڤ ساله وى 300 كیلۆ ژ كه‌نگرا به‌رهه‌مئینان و سالا بهێت دێ زێده‌تر چینیت.
عارس هنارى، ئه‌و جوتیاره بۆ ئه‌ڤرۆ نیوز گۆت: (كه‌نگر ئێكه ژ به‌رهه‌مێن چیایى و تنێ ل ده‌ڤه‌رێن چیایى و هنده‌ك جاران ل ده‌شتان چێدبن وگه‌له‌ك ب زه‌حمه‌ت كه‌سه‌ك بشێت دمال دا بچینیت، ئه‌ڤ ساله ئه‌ز رابووم وه‌كو ده‌ستپێشخه‌ریه‌ك من رووبه‌ره‌كێ زۆر یێ ئه‌ردێ خوه دناڤ ره‌زى ل مال كریه كه‌نگر و د سالا ئێكێ دا 300 كیلۆ به‌رهه‌م دا).
زێده‌تر گۆت: (هه‌كه باران د ده‌مێ خوه دا باریبان دا زێده‌تر ژ 750 كیلۆیێن كه‌نگرا به‌رهه‌م ئینم و من ل به‌ره سالا بهێت زێده‌تر كه‌نگرا بچینم).
جوتیارێ ناڤبرى د درێژاهیا ئاخڤتنێن خوه دا دیاركر ژى كو وى دندكێن كه‌نگرا هشك چاندینه و پاشى سه‌خبێریه‌كا باش بۆ كر و پاقژ دكرن هه‌تاكو گه‌هشتیه به‌رهه‌مى و زێده‌تر گۆت: (ده‌ستكه‌فتنا كه‌نگرا ل چیایى كاره‌ك ب زه‌حمه‌ت و ب وه‌ستيانه و هنده‌ك جاران ژى ژبه‌ر سوتنا پوش و پاوانى به‌رهه‌مێ كه‌نگرا نامینیت ژبه‌رڤێ من فه‌ردیت كو ئێدى ئه‌ڤرۆ وێڤه كه‌نگرا ل مال به‌رهه‌م بینم و چه‌ند رۆژێن بۆرى ب شێوازێ زوباره من هه‌موو ئه‌و كه‌نگرێن چاندين چنین، و پاشى ل بازارى كیلۆ ب 14 هزار دیناران هاته فرۆتن).
پێشتر ئه‌حمه‌د جه‌میل ئه‌بو زێد، رێڤه‌به‌رێ چاندنا ئاكرێ بۆ ئه‌ڤرۆ نیوز دیاركربوو كو ئه‌ڤ ساله 25 ته‌نێن كه‌نگرا ل سنورێ ده‌ڤه‌را دینارتێ و گوندێن وێ هاتبونه به‌رهه‌مئینان و گۆت بوو: (گورانكاریێن كه‌شوهه‌وایى و سوتنا پوش و پاوانى ب تایبه‌تى ژلایێ فروكێن توركى ڤه و په‌یدابوونا هنده‌ك جۆرێن نه‌خوه‌شیان، كارتێكرن ل سه‌ر كێمبوونا به‌رهه‌مێ كه‌نگرێ ل ده‌ڤه‌رێ كربوو).
ئەڤرۆ نیوز ، زنار تۆڤی:
سێ گەشتیارێن عەرەبێن عێراقی ل دەریاچەیا دووکان خەندقین و تیمێن مەلەڤانیا قەزا دووکان تەرمێن وان دناڤا وێ دەریاچێدا ئیناینەدەر.
رێڤەبەریا پۆلیسێن پارێزگەها سلێمانیێ راگەهاندیە، ل سپێدەهیا ئەڤرۆ سێ وەلاتی ب ناڤێن (ح. ر.س) ژ دایکبوویێ 1982 ، ( ع. ع. م) ژ دایکبوویێ 1991 و هەڤژینا وی بناڤێ (د. س. د) ژ دایکبوویا 1993 کو هەرسێک عەرەبن و خەلکێ بەغدانە، ب مەبەستا گەشتکرنێ هاتبوونە سەیرانگەها دووکان ، بەلێ د وێ دەریاچێدا خەندقینە.
ئەڤرۆ نیوز:
بێهنا بن کەفشان یا نەخۆشە و گەلەک جاران بێهنەکا نەخۆش ژێ دهێت ب تایبەتی ل وەرزێ هاڤینێ، بۆ ڕێگریكرنێ ل خوها بن کەفشان و نەهێلانا وێ بێهنا نەخۆش،ب ڤی رەنگی چاره‌سه‌ر بكه.
پێكهاته:
ئێک لیمۆن…..ئاڤ
چاوانیا ب كارئینانێ:
لیمۆنێ بكه 2 پارچە، پاشی کەرێن وێ لیمۆنێ ل بن کەفشێن خوە بدە و بهێلە هەتا بن کەفشێن تە هشك دبن، پشتی هشك بوونێ خوە بشۆ و ئێدی بێهنا نەخۆش ل بن کەفشێن تە نامینیت.
به‌لێ ئه‌و كه‌سێن پیستەکێ هه‌ستیار هه‌ین، پێدڤیه ئاڤا لیمۆنێ بگرن و ل گه‌ل پیچەکا ئاڤێدا تێكه‌ل بكه‌ن، پاشی ب هندەک پەمپی ل بن کەفشێن خوە بدەن، بهێلە هەتا هشك دبیت پاشی خوە بشۆ.
ڤێ كریارێ بۆ ماوێ چه‌ند رۆژان دووباره بكه بۆ هندێ کو كاریگه‌ریا وێ زێدەتر بیت و ب ئێكجارى بێهنا نەخۆش یا بن کەفشان نه‌مینیت.
نيشاندان