ئەڤرۆ نيوز:

قایمقامێ قەزا شنگالێ بۆ رۆژناما ئەڤرۆ دیار کر، کوردێن ئێزدی ژ بەر ھەڤڕکیا سیاسی و نەبوونا ئارامیێ و خزمەتگۆزاریان ڤەناگەڕنە سەر جھێن خوە، دیسا گەلەک ئەو کەسێن ڤەگەریاینە شنگالێ، ژ بەر ھەبوونا ئارامیا ھەرێما کوردستانێ جارەکا دی ڤەدگەڕنە ھەرێمێ ڤە و دبێژیت: ھەتا نوکە پتری 52 ھزار کەسان کو دبنە 15% ئاوارێن شنگالێ ڤەگەڕیاینە سەر جھێن خوە.

مەحما خەلیل، قایمقامێ قەزا شنگالێ ئاشکرا ژی کر، دەمێ چار سالانە ئێش و ئاوارێن کوردێن ئێزدی د ناڤ ئێش و ئازاران دا دژین و گۆت: “ھەتا نوکە رەوشا ژیانا وان یا باش نینە و ئاوارەنە و نەشێن ب ڤی رەنگی ڤەگەڕنە سەر مال و مۆلکێن خوە، دیسا نوکە ژی ئێزیێن مە د ناڤ گۆڕێن ب کۆم دانە و تەرمێن وان نەھاتینە دەرخستن، دیسا ژ بەر ئەو نەئارامیا ل دەڤەرا شنگالێ ھەی و نەبوونا خزمەتگۆزاریان، ھەتا نوکە ب تنێ 15% ئاوارێن شنگالێ یێن ڤەگەڕیاینە شنگالێ و رەوشا ژیانا وان یا باش نینە”.

گۆتژی: “دەڤەرێن ئێزدیان، ب تایبەتی شنگالێ بوویە جھێ دەستێوەردانا ئەجیندایێن دەرەکی و نە ئارامیەکا تمام ب سەر وان دەڤەران دا ھاتیە، ژیان ل شنگالێ نەمایە، شنگالی ژ بەر وێ ھەڤڕکیا سیاسی و نەبوونا ئارامیێ و ھەبوونا ھێزێن پەکەکێ و حەشدا شەعبی و خزمەتگۆزاریان ڤەناگەڕنە سەر جھێن خوە “.

مەحما خەلیل خویا ژی کر، رەوشا ژیارا ئاوارێن ئێزدی ل ھەرێما کوردستانێ یا خرابە، لێ ئەو ئارامیا ھەی، یا وەکری کو د ناڤ کەمپان دا بۆ وان ژ ڤەگەڕیانێ خوشتر بیت، ئەڤە چار سالە د کەمپان دا دژین و سەرما و گەرم ژی کاریگەریێ ل سەر دکەن و گۆت: “ئاوارێن ئێزدی یێن ژ ژیانا ئاوارەییێ بێزار بووینە، ئەو رەوشا ب سەر کوردێن ئێزدی دا ھاتی بوویە ئەگەرێ وێ چەندێ خەلک تووشی نەخوشیێن دەروونی ببن، بەلێ پێدڤیە بزاڤ بھێتە کرن رەوشا ژیانا وان ئاواران بھێتە باشکرن”.

ئه‌ڤرۆ نيوز:

سیاسەتمەدار و نڤیسەرەکێ کورد ل وەلاتێ سوید دیار دکەت کو نھا تورکیا، ئیران و عیراق لاواز بووینە و دڤێت کورد بزاڤا چارەکرنا ئالۆزیێن وان ھەر سێ وەلاتان نەکەن و پێدڤی کورد خواندنەکا راست بۆ رەوشا نھا بکەن و خوە نێزیکی ئەمریکا بکەن چونکو نھا گەلەک خالێن ھەڤپشک د بەرژەوەندیێن کوردان و ئەمریکا دا ھەنە.

بوبێ ئەسەر سیاسەتمەدار و نڤیسەرێ کورد کو ل وەلاتێ سوید دژیت د دیدارەکا تایبەت دا ل گەل رۆژناما ئەڤرۆ بەحسێ رەوشا کوردان ل رۆژئاڤا و باشورێ کوردستانێ کر و دیار کر کو ل ھەرێما کوردستانێ ب سەرۆکاتیا مەسعود بارزانی کوردان ھەتا نھا سیاسەتەکا راست یا نەتەوی برێڤە برینە و شیاینە گەلەک کارێن باش بکەن، سالا بۆری دەلیڤەکا زێرین بۆ کوردان ھاتبوو پێش لێ مخابن ژ بەر خیانەتا ١٦ ئوکتوبەرێ ل کەرکووکێ کوردان نەشیان بگەھنە ئارمانجا خوە یا پیرۆز و دەولەتا خوە راگەھینن و گۆت: (لێ ئەز دشێم بێژم کو دەمەکە کورد ل ھەرێما کوردستانێ بووینە دەولەت و وەکو دەولەتەکێ کاروبارێن خوە برێڤە دبەن، نھا ژی رەوشەکا نوو ھاتیە پێش، دوژمنێن گەلێ کوردستانێ ئانکۆ ھەر چار وەلاتێن داگیرکەرێن کوردستانێ جارەکا دی لاواز بووینە و ناکۆکیێن نھا د ناڤبەرا تورکیا و ئەمریکا دا ب تەمامی د بەرژەوەندیا کوردان دانە و دڤێت کورد مفایێ ژ ڤێ رەوشێ وەربگرن).

ناڤبری د بەردەوامیا ئاخڤتنا خوە دا ئەو یەک ژی دیار کر کو دڤێت کورد ب چو رەنگەکێ بزاڤێ نەکەن کو ئاریشێن تورکیا و عیراقێ چارە بکەن، بەلکو دڤێت کورد ئێدی خواندنەکا راست و دروست بۆ سیاسەتا نێڤدەولەتی بکەن و ل گۆر بەرژەوەندیێن خوە یێن نەتەوی کار بکەن، ژ بەر ھندێ ژی گرنگە کورد ناکۆکیێن خوە یێن بچووک بدەنە رەخەکێ و ھەموو پێکڤە ل گۆر بەرژەوەندیێن نەتەوی سیاسەتێ بکەن و گۆت: (گەلەک خالێن ھەڤپشک د ناڤبەرا بەرژەوەندیێن کوردان و ئەمریکا دا ھەنە، ھەروەسا کوردان گەلەک بەرژەوەندیێن ھەڤپشک ل گەل ھەڤپەیمانێن ئەمریکا ژی ھەنە وەکو ئیسرائیلێ و ژ بەر ھندێ ژی دڤێت کورد خوە بۆ قۆناغەکا وەسا گرنگ ئامادە بکەن، داگیرکەرێن کوردستانێ ھەتا نھا ھەموو شیانێن خوە بۆ ژناڤبرنا کوردان بکار ئیناینە و بلا ھەر کەسەک باش بزانیت کو چو دەمەکێ ھەر چار وەلاتێن داگیرکەرێن کوردستانێ نابنە ھەڤالێن کوردان، ژ بەر ھندێ ژی دڤێت کورد خوە پتر نێزیکی ئەمریکا بکەن و بەرژەوەندیێن خوە ب پارێزن و مفایەکا باش ژ ناکۆکیێن نھا ل دەڤەرێ ب یایبەتی ژی د ناڤبەرا ئەمریکا و تورکیا دا وەربگرن).

ل دۆر رەوشا رۆژئاڤایێ کوردستانێ ژی نڤیسەرێ کورد راگەھاند کو مخابن ل وێرێ بەرژەوەندیێن نەتەوی نەھاتنە پاراستن و پەیەدێ سیاسەتەکا شاش برێڤە بر، ب ھزاران لاوێن کورد بۆ پاراستنا سووریێ کرنە قوربانی و ھەتا نھا ژی چارەنڤیسێ رۆژئاڤایێ کوردستانێ دیار نینە و مەترسی ل سەر کوردان ل سووریێ ھەیە و گۆت: (ھەتا ل رۆژئاڤایێ کوردستانێ ژی ھێزەکا نەتەوی و ب ھێز ل مەیدانێ نەبیت و کار بۆ بەرژەوەندیێن کوردان نەکەت ئەز باوەرم دێ رەوشا خراب یا ل رۆژئاڤایێ کوردستانێ بەردەوام بیت).

ناڤھاتی ئەو یەک ژی دیار کر کو تورکیا دەولەتەکا ب ھێزە و دشێت جارەکا دی خوە نێزیکی ئەمریکا بکەت و ئاریشێن خوە چارە بکەت، کارێ دەولەتان وەسا برێڤە دچیت، ژ بەر ھندێ ژی دڤێت چو دەمەکێ کورد پشتا خوە ب وەلاتێن داگیرکەرێن کوردستانێ ئانکۆ تورکیا، ئیران، سووریێ و عیراقێ گەرم نەکەن، ب جھێ ڤێ یەکێ دڤێت کورد بەرێ خوە بدەنە ئەمریکا و وەلاتێن رۆژئاڤا، چونکو مە گەلەک بەرژەوەندی ل گەل وەلاتان ھەنە و ھەکە ھێزێن کوردی بشێن خواندنەکا راست بۆ گوھۆڕینێن نھا ل رۆژھەلاتا ناڤین بکەن دێ شێن ببنە مفادارێ ئێکێ ژ ڤان ناکۆکیان و گۆت: (دڤێت کورد ل دژی وان ھێز و ئالیان خوەدان ھەلویست بن یێن کو دەمەکە ل دژی بەرژەوەندیێن نەتەوی یێن کوردان کار دکەن و زیان گەھاندینە دۆزا کوردان، ھەکە کورد ھشیار بن دێ شێن گەلەک تشتان بدەستڤە بینن و بەرۆڤاژی ڤێ یەکێ ژی بێگومان دێ تووشی زیانەکا دی بن).