ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ پلا گه‌رمێ يا سوباهى سێشه‌مبى 28/8/2018 ل پاريزگه‌ها دهۆكێ راگه‌هاند.
رێڤه‌به‌ريا ناڤبرى ئاماژه دا كو پلا گه‌رمێ سوباهى ل پاريزگه‌ها دهۆكێ دێ 39 بيت.
به‌لاڤكر ژى كو پلا گه‌رمێ يا سوباهى ل پاريزگه‌ها سلێمانيێ ژى دێ 39 بيت ول هه‌ردو پاريزگه‌هين هه‌ولێرێ وكه‌ركووكێ دێ 41 بيت.
ئه‌ڤرۆنيوز:
سه‌رۆك وه‌زيرێن هه‌رێما كوردستانێ، نێچيرڤان بارزانى، ئه‌ڤرۆ دوشه‌مبى 27/8/2018 پێشوازى ل برێت ماكگۆرك هنارتيێ تايبه‌تێ سه‌رۆكێ ئه‌مريكا بۆ هه‌ڤپه‌يمانيا نێڤده‌وله‌تى يا شه‌رێ دژى داعشێ كر.
دديداره‌كێ دا كو دۆگلاس سيليمان باليۆزێ ئه‌مريكا ل عيراقێ وستيڤ ڤه‌يگن كونسۆلێ ئه‌مريكا ل هه‌رێما كوردستانێ تێدا به‌رهه‌ڤبووين، هه‌ردو لا دانوستاندن ل سه‌ر دووماهى پێشهاتێن ده‌ڤه‌رێ وديالۆكێ دناڤبه‌را لايه‌نێن سياسى يێن عيراقى وهه‌رێما كوردستانێ بۆ پێكئينانا كابينا نوو يا حوكمه‌تا عيراقێ كر ب شێوه‌كى كو حوكمه‌ته‌كا نيشتمانى بيت ول دۆر ڤێ چه‌ندێ رۆلێ هه‌رێما كوردستانێ دوان دانوستاندنان دا ب بلند وگرنگ نرخاند.
ئەڤرۆ نیوز:
سەرپەرشتێ تیمێ حەجیێن هەرێما کوردستانێ ل وەلاتێ سعودیێ د داخۆیڵنیەکێ دا بۆ ئەڤرۆ نیوز راگەهاند کو سوبەهی ب شەڤ کاروانێ ئێکێ یێ حەجیان دێ گەهیتە هەولێر و ژمارا وان 418 کەسن.
نەبەز ئیسماعیل کەمال، سەرپەرشتێ تیمێ حەجیێن هەرێما کوردستانێ ل وەلاتێ سعودیێ گۆت: “سوبەهی 28ی تەباخا 2018 و ل دەمژمێر 10:30 دەقیقە کاروانێ ئێکێ یێ حەجیان دێ ب رێ کەڤیت و دەمژمێر 1:00 دێ گەهیتە هەولێر و ژمارا وان 418 حەجی نە ژ پارێزگەها هەولێر.
ئەڤرۆ نیوز ، زنار تۆڤی:
د نوکە دا کەرتێ گەشتیاری بوویه ئێک ژ ستوونێن ب هێز و ب دەستڤەئیانانا داهاتەکێ ئابووری یێ هەرە باش بۆ هەر وەلاتەکێ د جیهانێ دا، هەروەسا ژ بۆ پێشڤەبرنا کەرتێ گەشتیاری ل هەرێما کوردستانێ و ناساندنا جهێن گەشتیاری، پێدڤیە ل سەر کۆمپانیێن گەشتیاری ریکلاما جهێن گەستیاری یێن هەرێمێ ل دەرڤەی وەلاتی بکەن، ژ پێخەمەت سەرنجا گەشتیارێن بیانی بۆ کوردستانێ رابکێشن و ئەڤە دێ بیتە خالەکا ئەرێنی بۆ پێشخستنا ڤی کەرتی.
دڤی واری دا عەبدولرزاق نهێلی گەشتیارناسەکە بۆ ئەڤرۆ نیوز دیارکر: دڤێت ئەم بنیاتەکێ ب هێز یێ گەشتیاری ل کوردستانێ دانین و دڤێت ئەم بەرێ گەشتیارێن بیانی بدەینە کوردستانێ و بۆ ڤێ چەندێ ژی دڤێت کۆمپانیێن گەشتیاری یێن کوردستانێ ریکلاما جهێن گەشتیاری یێن کوردستانێ ل دەرڤەی وەلاتی بکەن و ب هەموو زمان و رێکێن جودا ب کاربینن و ل گەل هندێ ژی دڤێت کۆمپانیێن مە گەشتیاران ژ دەرڤەی وەلاتی بیننە دناڤا کوردستانێ دا، دیسا گۆت ژی: باشتره رێک نەهێتەدان کو هەر سەرمایەدارەک ببیتە خودانێ کۆمپانیەکا گەشتیاری هەکە کەسانێن شارەزا د بیاڤێ گەشتیاریێ دا کارگێریا وێ کاری برێڤە نەبەن.
هەروەسا گۆت ژی: پێدڤیە دەستەیا گشتی یا گەشتوگوزارێ ل هەرێمێ کاری بۆ کێمکرنا باج و رسوماتێن کۆمپانیێن گەشتیاری دا بکەت و پتر ئاسانکاریان بۆ وات بکەت و دڤێت خودانێن جهێن گەشتیاری ژی بهایێ جهێن ڤەحەواندن و روونشتنا گەشتیاران ئەرزان بکەن، ژ پێخەمەت گەشتیار زێدەتر بهێنە کوردستانێ.
ناڤهاتی زێدەتر خویاکر: بۆ پێشخستنا ڤی کەرتی یا گرنگە هەر رێڤەبەرەکێ کارگێری یێ کۆمپانیەکا گەشتیاری خودان باوەرناما گەشتیاری بیت و هەروەسا شارەزایەکا باش د ڤی بیاڤی دا هەبیت و ل گەل هندێ ژی نابیت رێک بهێتەدان کو کرێکارێن بیانی ل کەرتێ گەشتیاری ل کوردستانێ کار بکەن و دڤێت ریکلاما جهێن گەشتیاری بهێتە کرن.
ئه‌ڤرۆنيوز:
به‌رى ده‌مه‌كێ كێم كۆمبوونا چار لايه‌نين عيراقى ل گه‌ل پارتى ديموكراتى كوردستان وئێكه‌تى نيشتمانى كوردستان ل ئاڤاهيێ مه‌كته‌با سياسى يا ئێكه‌تيێ ل هه‌ولێرێ ده‌ستپێكر.
كۆمبوونا دناڤبه‌را شاندێ هه‌ڤپشكێ پارتى وئێكه‌تى ل گه‌ل شاندێ شيعى ل دووڤ پێزانينان دێ تێدا به‌حسێ پێكئينانا كابينا داهاتى يا حوكمه‌تا عيراقێ وداخوازيێن كوردان هێته كرن، كو دچارچۆڤێ پرۆژه‌كێ هه‌ڤپشكێ پارتى وئێكه‌تى هاتيه به‌رهه‌ڤكرن وپێشكێشى لايه‌نێن عيراقى هاتيه كرن.
ئه‌ڤرۆ دوشه‌مبى 27/8/2018 شاندێ هه‌ڤپشكێ هر چار لايه‌نێن عيراقى ( سائيرون ونه‌سر وحكمه ووه‌ته‌نيه) گه‌هشتبوونه هه‌ولێرێ ول گه‌ل سه‌رۆك بارزانى كۆمببوون.
ئه‌ڤرۆنيوز:
وه‌زاره‌تا به‌رگريا رووسيا راگه‌هاند، ئه‌مريكا دخوازيت ب بيانويا بكارئينانا چه‌كێ كيمياوى، هێرشێ بكه‌ته سه‌ر سووريێ.
پێشتر ژى چه‌ند ژێده‌رين له‌شكرى يێن رووسى به‌لاڤكربوو كو ئه‌مريكا دخوازيت بكارئينانا چه‌كێ كيمياوى ل باژێرێ ئيدلب بكه‌ته بيانو بۆ هێرشكرنێ ل سه‌ر سووريێ.
وه‌زاره‌تا به‌رگريا رووسى دراگه‌هاندنه‌كێ دا به‌لاڤكر” جێگيركرنا مووشه‌كێن دوورهاڤێژ ژ جۆرێ (تۆماهۆك) ل ده‌ريا ناڤه‌راست بۆ هه‌مان مه‌ره‌مه”.
ل حه‌فتيا بۆرى ئه‌مريكا وچه‌ند وه‌لاتێن ئورۆپى هوشدارى دابوو ژبكارئينانا چه‌كێ كۆمه‌لكوژى ل سووريێ وگه‌فێن هێرشكرنێ ل سه‌ر سووريێ كربوون.
ئه‌ڤرۆنيوز:
رۆژناما (القدس العربي) يا له‌نده‌نى دراپۆرته‌كا خوه دا به‌لاڤ دكه‌ت، كوردان كۆمه‌كا مه‌رجان يێن هه‌ين ودخوازن بهێنه بجهئينان وتنێ ب حبرێ ل سه‌ر كاغه‌زێ درازى نينن.
رۆژناما ناڤبرى ئه‌ڤرۆ دوشه‌مبى 27/8/2018 به‌لاڤكر” كورد وسونه بزاڤێ دكه‌ن رۆلێ گرنگ يێ خوه دپێكئينانا مه‌زنترين هه‌ڤپه‌يمانيا دناڤ په‌رله‌مانێ عيراقێ دا دياربكه‌ن كو هه‌ردو هه‌ڤپه‌يمانيێن شيعه پێشبه‌رگيێ ل سه‌ر پێكئينانا وێ دكه‌ن”.
ل ده‌مه‌كى هه‌ڤپه‌يمانيا سائيرون ژلايه‌كى وهه‌ڤپه‌يمانيا ده‌وله‌تا قانوونى پێشبه‌رگيێ ل سه‌ر پێكئينانا مه‌زنترين هه‌ڤپه‌يمانيا په‌رله‌مانى دمه‌ن، وه‌كو رۆژناما (القدس العربي) دبێژيت كورد وسونه ژى ل وێ چه‌ندێ دگه‌رهن كا دێ چ ده‌ستكه‌فت ژ ئێك ژوان هه‌ردو هه‌ڤپه‌يمانيێن شيعه ب ده‌ستڤه‌ئينن.
رۆژنامه دبێژيت” مه‌رجێ وان ئه‌وه ب نڤيسين بيت وپێگيرى ب بجهئينانێ بهێته كرن، نه‌كو تنێ حبرێ ل سه‌ر كاغه‌زێ بيت”.
ل دۆر مه‌رجێن كوردان ژى، ئه‌ندامێن شاندێ دانوستاندكارێ لايه‌نێن كوردى دوپاتيێ ل وێ چه‌ندێ دكه‌ن كو خواستا وان داخوازيێن ره‌وا يێن كوردانه، نه‌كو پله وپۆست، كو گرنگترين ئه‌و داخوازى بودجا هه‌رێما كوردستانێ وچاره‌سه‌ركرنا كێشا ئاخا دابرايا كوردستانێ نه.
ئه‌ڤرۆ نیوز:
رێڤه‌به‌رێ كۆمپانیا دارین گرۆپ، رۆنكرنه‌كێ ل دۆر راپۆرته‌كا ل ئه‌ڤرۆ نیوز به‌لاڤ بووى دده‌ت، كو ل سه‌ر زارێ شوفێره‌كێ ئاماژه ب هندێ هاتیه كرن كو جوتسایدێ (دێره‌لوك – شێلادزێ) گیربوویه.
زكرى به‌شیر، رێڤه‌به‌رێ كۆمپانیا دارین گرۆپ بۆ ئه‌ڤرۆ نیوز دیاركر، ل دووڤ گرێبه‌ستا كۆمپانيێن (دارين گرۆپ و كاڤين گرۆپ) ل گه‌ل حوكمه‌تێ هه‌ى بۆ دروستكرنا جوتسایدێ (دێره‌لوك – شێلادزێ) تا نوكه 95% كار ب دووماهى هاتیه و جوتساید هاتیه قێركرن و ڤه‌كرن و چو گیروبوونه‌ك نه‌كه‌فتیێ، ژبه‌ر كو د گرێبه‌ستا ( كۆمپانیا دارین گرۆپ و كاڤين گرۆپ) ل گه‌ل رێڤه‌به‌ريا رێك و پرا، ب تنێ بڕیار بوو 6 كم رێیێ كو ل گوندێ چه‌لكى ل نێزیك خوانگه‌ها كوردستان ده‌ستپێ دكه‌ت تاكو دگه‌هیته گوندێ كولان ل نێزیك شیف چنارێ بهێته جوتسایدكرن و ماوێ پرۆژه‌ى ژى ل 1/4/2016 تاوه‌كو 23/11/2018 ێ یه و ئه‌ڤ 6 كم جوتسایدى ب تمامى هاتینه دروستكرن و قێركرن، ب تنێ بویاغكرن مایه د ده‌مه‌كێ دا كو نێزیكى سێ هه‌یڤ ژ ده‌مێ كارى ژى ماینه و گۆت” ئه‌و دو كیلومترێن ژ گوندێ كولان بۆ ده‌ستپێكا جوتسایدێ شێلادزێ، ده‌رڤه‌ى گرێبه‌ستا مه‌نه، ژ نوو ل 15/7/2018 ئه‌م هاتینه راسپاردن كو وان دو كیلومتران دروست بكه‌ین، مه‌ژى ژبه‌ر به‌رژه‌وه‌ندیا گشتى و بۆ خزمه‌تكرنا وه‌لاتی و شوفێران و سه‌ره‌راى قه‌يرانا دارايى، بێى به‌رامبه‌ر مه بڕیار دا كو وان دو كلیومتران ژى دروست بكه‌ین و نوكه ئه‌و دو كیلومترێن جوتسایدیێ ژى 50% كار تێدا ب دووماهى هاتیه و دێ كه‌ڤنه د خزمه‌تا خه‌لكى دا.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ دوشه‌مبى 27/8/2018 پێشوازى ل شانده‌كێ هه‌ڤپشك يێ ليستێن سائيرون ونه‌سر وحكمه ووه‌ته‌نيه يێن عيراقى كر.
دكۆمبوونه‌كێ دا شاندێ مێهڤان زێده‌بارى ئاماژه‌دان ب پێگه‌هێ ديرۆكى وسياسى يێ سه‌رۆك بارزانى ل خه‌باتێ دژى ديكتاتۆريه‌تێ وبزاڤێن ئاڤه‌دانكرنا عيراقا نوو، بير وبۆچوونێن خوه ل دۆر پرۆسا سياسى يا عيراقى وچاوانيا پێكئينانا حوكمه‌تا نوو وهه‌لبژارتنا هه‌رسێ سه‌رۆكاتيان وميكانيزما كاركرنێ وگه‌ره‌نتيا بجهئينانا رێككه‌فتنێ دناڤبه‌را لايه‌نان بۆ سه‌رۆك بارزانى به‌رچاڤكر.
دپشكه‌كادى يا وێ كۆمبوونێ دا بير وبۆچوون ل دۆر شاشيێن سياسى ئالوگور كر كو دقۆناغا پشتى سالا 2003 دپرۆسا سياسى يا عيراقێ وحوكمرانيێ دا هاتينه ئه‌نجامدان وروناهى هاته خستن ل سه‌ر وێ ميكانيزما كو دێ رێگر بيت ل دوباره‌بوونا شاشيان.
هه‌ر دوێ كۆمبوونێ دا دووپاتى ل سه‌ر پێگيرى كرن وبجهئينانا هه‌رسێ پرنسيبێن هه‌ڤپشكى وته‌وافوق وهه‌ڤسه‌نگى دپرۆسا سياسى دا وپشكداريا هه‌موو پێكهاتێن عيراقێ دحوكمرانيێ دا هاته كرن.
ئەڤرۆ نیوز ، زنار تۆڤی:
رۆژا ٣ ئیلۆنا 2018 بۆ ئێکەمین کۆمبوونا پەرلەمانێ عیراقێ هاتە دەستنیشان کرن.
سەرۆک کۆمارێ عیراقێ رۆژا ٣ ئیلۆنا داهاتی بۆ ئەنجامدانا ئێکەمین روونشتنا پەرلەمانێ عیراقێ دیار کر.
لدووڤ مەرسوومەکێ کۆماری کو وێنەک گەهشتیە دەستێ ئەڤرۆ نیوز، ئەڤرۆ دوشەمبی ٢٧ تەباخا ٢٠١٨، فوئاد مەعسووم، سەرۆک کۆمارێ عیراقێ، لدووڤ مادێن ٥٤ و ٧٣ یێن دستورێ عیراقێ، داخواز ژ پەرلەمانێ هەلبژارتی یێ عیراقێ کریە، کو ئێکەمین کۆمبوونا خولا چارێ یا پەرلەمانێ عیراقێ، ل رۆژا دوشەمبێ ٣ ئیلۆنا ٢٠١٨ ب سەرۆکاتیا مەزنترین پەرلەمانتار ئەنجام بدەن.
نيشاندان