ئه‌ڤرۆنيوز:

كونسۆلێ ئوردونێ ل هه‌رێما كوردستانێ، هه‌يسه‌م ئه‌بولفول، راگه‌هاند، دێ ئاسانكاريێن زێده‌تر بۆ دانا ڤيزێ ب وه‌لاتيێن هه‌رێما كوردستانێ وعيراقێ به‌رهه‌ڤ كه‌ين، ب تايبه‌تى هه‌كه‌ ڤێزا بۆ مه‌ره‌ما گه‌شتا چاره‌سه‌ريێ بيت.

كونسۆلێ ئوردونێ بۆ باسنيوز گۆت” مه‌ گه‌له‌ك ئاسانكارى به‌رهه‌ڤ كرينه‌ بۆ دانا ڤيزا ئوردونى ب وه‌لاتيێن هه‌رێما كوردستانێ وعيراقێ، هه‌م ژ روويێ ده‌مى ڤه‌ وهه‌م ژ روويێ جهى ڤه‌، نوكه‌ وه‌لاتى دشێن ل باليۆزخانا ئوردونێ ل به‌غدا، هه‌روه‌سا ل كونسۆلخانا ئوردونێ ل هه‌ولێرێ داخوازا ڤيزێ پێشكێش بكه‌ن، ب هه‌مان شێوه‌ ل چه‌ندين نڤيسينگه‌هێن گه‌شتيارى وكۆمپانيێن فرۆكه‌ڤانى ژى دشێن داخوازا ڤيزا ئوردونێ بكه‌ن”.

دياركر ژى” نوكه‌ وه‌رگرتنا ڤيزا ئوردونى پێنج رۆژان ڤه‌دكێشيت، دبيت بۆ كه‌سێ نه‌خوه‌ش ئاسانكاريێن زێده‌تر ژى بهێنه‌ كرن ودده‌مێ 24 ده‌مژمێران دا ڤيزه‌ بۆ بهێته‌ دابينكرن”.

ئه‌ڤرۆنيوز:

په‌يڤدارێ مه‌كته‌با سياسى يا ئێكه‌تى نيشتمانى كوردستان راگه‌هاند، كورد دێ ب ئێك شاند وبه‌رنامه‌كێ هه‌ڤپشك دانوستاندنێ ل به‌غدا ده‌ستپێكه‌ن بۆ پێكئينانا حوكمه‌تا نوو يا عيراقێ.

سه‌عدى ئه‌حمه‌د پيره‌، په‌يڤدارێ مه‌ه‌كته‌با سياسى يا ئێكه‌تيێ، ئه‌ڤرۆ ئێكشه‌مبى 19/8/2018 بۆ مالپه‌رێ حزبا خوه‌ گۆت” دێ ب شانده‌كێ هه‌ڤپشك چينه‌ به‌غدا ول گه‌ل لايه‌نێن سياسى يێن عيراقى دانوستاندنێ كه‌ين” گۆت ژى” ئه‌ڤرۆ مه‌ پێشوازى ل شانده‌كێ سونى كر بۆ دانوستاندنێ ل سه‌ر پێكئينانا حوكمه‌تا نوو يا عيراقێ”.

ئاماژه‌ دا” ئێكه‌تى نيشتمانى كوردستان وپارتى ديموكراتى كوردستان ب به‌رنامه‌كێ هه‌ڤپشك دێ دانوستاندنێ ل گه‌ل لايه‌نێن دى يێن عيراقى ل به‌غدا ئه‌نجامده‌ن وبرياره‌ پشتى جه‌ژنا قوربانى دانوستاندن ده‌ستپێبكه‌ن”.

ئه‌ڤرۆنيوز:

ئه‌ڤرۆ ئێكشه‌مبى 19/8/2018 پشتى ڤه‌كرنا رێيا هه‌ولێر – كه‌ركووك كو بۆ ده‌مێ زێده‌تر ژ 10 هه‌يڤان يا گرتى بوو، ئێكه‌مين روودانا هاتنوچوونێ ل سه‌ر وێ رێ هاته‌ تۆماركرن.

فازل حاجى، په‌يڤدارێ پۆليسێن هاتنوچوونا هه‌ولێرێ راگه‌هاند” ئه‌ڤرۆ نيڤرۆ پشتى ڤه‌كرنا رێيا هه‌ولێر – كه‌ركووك ب شێوه‌كێ فه‌رمى، روودانه‌كا هاتنوچوونێ روودا ده‌مێ ترومبێله‌كا خوه‌ ل خێزانه‌كا چار كه‌سى داى ل سه‌ر جادێ ودئه‌نجامدا كه‌سه‌كى گيانێ خوه‌ ژ ده‌ستدا وسێ كه‌سێن دى ژى برينداربوون كو برينا دو ژ وان يا گرانه‌.

گۆت ژى” روودان ل نێزيك چاريانا قوشته‌په‌ روودا، ده‌مێ ترومبێله‌كا جۆرێ تويۆتا  كو سنێله‌كى دهاژۆت خوه‌ ل خێزانه‌كێ داى وئه‌و روودان په‌يداكرى”،

دياركر ” پێرابوونێن قانوونى ل به‌رامبه‌ر وى شۆفێرى هاتن وه‌رگرتن وهاته‌ ده‌سته‌سه‌ركرن”.

ئه‌ڤرۆنيوز:

سه‌رۆك مه‌سعود بارزانى، ئه‌ڤرۆ ئێكشه‌مبى 19/8/2018 پێشوازى ل شاندێ بلند يێ هه‌ڤپيه‌مانيا ميوه‌رێ وه‌ته‌نى يێ عيراقى ب سه‌رۆكاتيا شێخ خه‌ميس خه‌نجه‌ر سه‌رۆكێ هه‌ڤپه‌يمانيا ميحوه‌رێ وه‌ته‌نى كر.

دديداره‌كێ دا بۆچوون ل دۆر پرۆسا سياسى يا عيراقێ وپێكئينانا حوكمه‌تا نوو يا عيراقێ ومفا وه‌رگرتن ژ ئه‌زموون وشاشيێن بۆرى هاتن ئالوگۆركرن.

د وێ كۆمبوونێ دا، هه‌ردو لا  دهه‌ڤرا بوون كو پێدڤيه‌ گه‌ره‌نتى وميكانيزمه‌كا رۆهن بۆ پێگيرى كرنێ ب دستوورى وبجهئينانا رێككه‌فتنان بهێنه‌ دانان ب جۆره‌كى كو رێ ل تاكره‌ويێ درێڤه‌برنا وه‌لاتى دا وپه‌راوێزخستنا پێكهاتان بهێته‌ گرتن.

كۆمبوونێ دووپاتى ل هه‌ماهه‌نگيێ وپه‌يوه‌نديا به‌رده‌واما هه‌ردو لا كر بۆ پشكداريا كارا دپرۆسا سياسى دا وبجهئينان ول به‌رچاڤ وه‌رگرتناوان بنه‌مايێن كو دخزمه‌تا هه‌ڤپشكيا هه‌موو پێكهاتان بيت د حوكمه‌تا داهاتى يا عيراقێ دا.

ئه‌ڤرۆنيوز:

سه‌رۆك مه‌سعود بارزانى ل سه‌لاحه‌دين پێشوازى ل راشد ئه‌لمه‌نسوور كونسۆلێ ئيماراتێ ل هه‌ولێرێ ك

دديداره‌كێ دا، سه‌رۆك بارزانى كار وچالاكيێن خێرخوازى يێن ده‌وله‌تا ئيماراتێ دهاريكاريا ئاواره‌ وپه‌ناپه‌ران ل عيراقێ وهه‌رێما كوردستانێ بلند نرخاند، دووپاتى ژى ل دۆستايه‌تى وبه‌رده‌واميا په‌يوه‌نديان دناڤبه‌را هه‌ردو لا دا كر.

كونسۆلێ ئيماراتێ نامه‌كا تايبه‌ت يا شێخ محه‌مه‌د كورێ زايد ئال نهيان جهنشينێ ئيماراتێ گه‌هانده‌ سه‌رۆك بارزانى وسه‌رۆك بارزانى ژى زێده‌بارى سوپاسگوزاريێ بۆ جهنشينێ ئيماراتێ وكونسۆلێ ئيماراتێ، ده‌ستخوه‌شى ل كار وچالاكيێن خێرخوازيێن ده‌وله‌تا ئيماراتێ كر.