ئه‌ڤرۆ نيوز، فاتما مزوورى:
د چارچۆڤێ هه‌لبژارتنێن سه‌رۆكایه‌تیا كۆمارا توركیا دا، موحه‌ره‌م ئینجه به‌ربژێرێ پارتیا كۆمارا گه‌ل “جه‌هه‌په” ل باژێرێ ئامه‌دێ، روونشتنه‌ك گرێدا و د وێ روونشتنێ دا به‌حسا پرسا كوردان كر و راگه‌هاند: دڤێت پرسا كوردان ل توركیا ب ئاشتی بهێته چاره‌سه‌ر كرن.
ئاشكه‌را ژى كر كو گه‌لێ كورد وه‌كو هه‌ر نه‌ته‌وه‌‌كێ دى دخوازيت حورمه‌تا خوه هه‌بيت و ئه‌ڤ چه‌نده ژی ژ مافێن سه‌ره‌كى یێن وانه.
ئه‌ڤرۆ نيوز، فاتما مزوورى:
كۆمبوونا گوپیتكا د ناڤبه‌را دۆنالد تره‌مپ سه‌رۆكێ ئه‌مریكا و كیم جۆنگ ئۆن سه‌رۆكێ كۆریا باكوور ب رێڤه چوو.
كۆمبوونا ئێكێ ده‌مژمێر 4:00ى سپێدێ ب ده‌مێ هه‌ولێری ب رێڤه‌چوو كو 45 خوله‌كان به‌رده‌وامی هه‌بوو.
پشتی كۆمبوون ب دووماهی هاتى ژی هه‌ردو ئالیان پرێس كۆنفرانسه‌ك گرێدا و د وى كونفرانسى دا تره‌مپ راگه‌هاند: هه‌ست ب كه‌یفخوه‌شیێ دكه‌م، دانوستاندنێن باش دێ مه هه‌بن و ئه‌ڤه ژی سه‌ركه‌فتنه‌كه مه‌زنه و جهێ شانازیی یه.
گۆتژى: “ب نێرینا من دێ مه تێكه‌لیێن باش ل گه‌ل ئێك هه‌بن و چو گومان ژی دڤێ یه‌كێ دا نینن”.
كیم جۆنگ ئۆن ژی راگه‌هاند: ب ساناهی ئه‌م نه‌گه‌هشتینه ڤێ قووناغا نها ئه‌م تێدا ژ به‌ر كو گه‌له‌ك ئاسته‌نگ هه‌بوون، لێ مه شيا ب سه‌ر وان ئاسته‌نگان دا سه‌ربكه‌ڤین حه‌تا ئه‌م گه‌هشتینه ڤێره و چاڤێ مه ژی ل پاشه‌رۆژێ یه.
پاشان شاندێن هه‌ردو وه‌لاتان كو وه‌زیرێن ده‌رڤه ژی د ناڤ دا ئاماده ب‌بوون و ب سه‌رۆكایه‌تیا تره‌مپ و كیم جۆنگ ئۆن كۆمبوون.
پاشان سه‌رۆكێ كۆریا باكوور راگه‌هاند كو ل گه‌ل تره‌مپ ده‌ستپیكێن باش هه‌بوون و هیڤی ژی خوه‌ست كو ل هه‌ڤ گه‌هشتنێن باش هه‌بن و شاشیێن ده‌رباس بووی جاره‌كا دى دووباره نه‌بنه‌ڤه.
ئەڤرۆ نيوز:
رێڤەبەرێ گشتی یێ گەشتوگۆزارێ ل پارێزگەھا دھۆکێ بۆ رۆژناما ئەڤرۆ دیار کر کو وان ھەموو بەرھەڤی بۆ ھاتنا گەشتیاران د رۆژێن جەژنا رەمەزانا پیرۆز دا کرینە و گۆت: ”پێشبینی دھێتەکرن د ھەر رۆژەکا جەژنێ دا ب کێمی پێنج ھزار گەشتیار سەرەدانا پارێزگەھا دھۆکێ بکەن”.
عوبەیدوللا داود، رێڤەبەرێ گشتی یێ گەشتوگۆزارێ ل پارێزگەھا دھۆکێ ئاشکرا کر کو رێڤەبەریا وان د ھەموو ھەلکەفتان دا پلانەکا باش د دانیت داکو بشێن ب شێوەکێ باش پێشۆازی و خزمەتا وان گەشتیاران بکەن یێن سەرەدانا جھێن گەشتیاری یێن پارێزگەھا دھۆکێ دکەن و گۆت: “ب مەرەما خزمەتکرنا گەشتیارێن د رۆژێن جەژنا رەمەزانا پیرۆز دا سەرەدانا پارێزگەھا دھۆکێ دکەن مە 15 تیمێن خودان شیان ل سەر ئاستێ پارێزگەھا دھۆکێ پێک ئیناینە و ئەڤ تیمە دێ ل دەرگەھێن سەرەرکی یێن گەشتیار تێدا دھێنە دھۆکێ و ل جھێن گەشتیاری ژی ھەبن و دێ ئاڤێ و شریناھیان و رێبەرێن گەشتیاری و بزنێز کارتا کو وێب سایت و ھژمارێن تەلەفۆنێن رێڤەبەریا گشتی یا گەشتوگۆزارێ ل سەرن ل سەر گەشتیاران بەلاڤ کەن و چەندین لافیتە ژی بۆ بخێرھاتنا گەشتیاران مە ل جھێن گەشتیاری ھەلاویستینە و سەرەرایی ڤێ چەندێ زێدەتری 100 دەست ئاڤان مە یێن نووژەنکرین داکو بێ بەرامبەر د خزمەتا گەشتیاران دا بن “.
ناڤھاتی ئاماژە دا وێ چەندێ کو کو ل دووڤ وێ ئامارا ل بەر دەستێ وان ئەو دشێن د رۆژەکێ دا زێدەتری 15 ھزار گەشتیاران ل ئۆتێل و مۆتێلێن پارێزگەھا دھۆکێ ب حەوین و ھەر دەم بۆ ھەلکەفتان وان یەدەکەک ژی ھەیە، ھەروەسا ھەما ھەنگیەکا باش دگەل سازیێن پەیوەندیدار ژی ھەیە وەکو رێڤەبەریێن ئاسایش و پۆلیس و ھاتنوچوون و ساخلەمیێ و کۆمەلێن ئۆتێل و مۆتێلان و کۆمپانیێن گەشتیاری و حەج و عومرێ یێن پارێزگەھا دھۆکێ و گۆت: “ئەو خوارنگەھێن مۆلەت پێ ھاتیە دان د ھەیڤا رەمەزانا پیرۆز دا کار بکەن دڤێت د رۆژێن جەژنێ ژی دا د ڤەکری بن و سەرەرایی ڤێ چەندێ ئەو خوارنگەھێن خوارنێن سەر پێ لێ دھێنە ئامادەکرن ل سنوورێ دەڤەرا ئامێدیێ دێ د ڤەکری بن و مە بزاڤا کری ھندەک خوارنگەھێن دی ژی بھێنە ڤەکرن، بەلێ ئاریشا وان ئەوە کرێکار نینن د جەژنێ دا ل بەر کار بکەن”.
ل دووماھیێ رێڤەبەرێ گشتی یێ گەشتوگۆزارێ ل پارێزگەھا دھۆکێ خویا کر کو ئەو دێ بۆ دەمێ 10 رۆژان ئامارا ھاتنا گەشتیاران وەرگرن ھەر ژ رۆژا 12/6/2018ێ ھەتا رۆژا 21/6/2018ێ و پێشبینی دھێتەکرن د ھەر رۆژەکا جەژنێ دا ب کێمی پێنج ھزار گەشتیار سەرەدانا جھێن گەشتیاری یێن پارێزگەھا دھۆکێ بکەن و گۆت: “ب ھەلکەفتا جەژنا رەمەزانا پیرۆز ب ناڤێ رێڤەبەریا گشتیا گەشتوگۆزارێ ل پارێزگەھا دھۆکێ جەژنا سەرۆک بارزانی و خێزانێن سەربلندێن شەھیدان و پێشمەرگێن قەھرەمان و ھەموو خەلکێ کوردستانێ پیرۆز دکەم”.
ئەڤرۆ نيوز، ژیمان سەعید:
ب ھەلکەفتا رۆژا جیھانیا خوین بەخشینێ ئەڤرۆ ب شەڤ دێ ھەوەکا دی یا خوین بەخشینێ ل ناڤ بازاری ھێتە کرن و رێڤەبەرێ بەنکا خوینێ دخوازیت ب رەنگەکێ بەرفرەە وەلاتی پشکداریێ تێدا بکەن.
عادل عەبدولسەلام رێڤەبەرێ بەنکا خوینێ بۆ ئەڤرۆ نيوز گۆت: “ب ھەلکەفتا رۆژا جیھانیا خوین بەخشینێ سوباھی ل دەمژمێر 9:00 ل پارکا نەورۆز ل ناڤا بازارێ دھۆکێ دێ ھەوەکا خوین بەخشینێ ھێتە ئەنجام دان”.
رێڤەبەرێ بەنکا خوینێ ئاشکەرا ژی کر کو ل نیڤا ھەیڤا رەمەزانێ ئەوان دەست ب کارێ خوە کریە و ھەتا نوکە چووینە چەند مزگەفتنەکا و گۆت: “مە شیایە ھەتا نوکە 330 بتلێن خوینێ کۆم بکەین”.
عادل عەبدولسەلام خۆیا کر کو رۆژانە نێزیکی 50 ھەتا 60 بتلێن خوینێ ددەنە نەخۆشان و پتریا نەخۆشان ژی ئەون یێن تەلاسیمیا و نەخۆشیێن گران ھەین.
ل دووماھیێ ژی رێڤەبەرێ بەنکا خوینێ ھیڤی خواست کو خەلک ھەموو د ھاریکار بن ل گەل وان دوێ ھەوێ دا و ب رەنگەکێ بەرفرەە پشکداریێ تێدا بکەن و خوینێ ببەخشن.
ئەڤرۆ نيوز، نیوار محەمەد سەلیم:
ئەندامەکا پەرلەمانێ کوردستانێ راگەھاند کو بڕیارە ئەڤرۆ پەرلەمانێ کوردستانێ کۆم ببیت و پێشبینی دھێتە کرن پرۆژێ خانەنشینیێ بھێتە پەسەندکرن.
د. زوزان سادق، ئەنداما فراکسیۆنا پارتی دیموکراتی کوردستان ل پەرلەمانێ کوردستانێ بۆ ئەڤرۆ نيوز گۆت: ”رۆژا سێشەمبی رێکەفتی 12ی خزیرانا 2018ێ پەرلەمانێ کوردستانێ دێ کۆم بیت و بەرنامێ کارێ روونشتنێ ژی دانوستاندنە ل دۆر پرۆژێ قانوونا چاکسازیێ د خانەنشینیا مووچە و دەرمالان دا”.
پرۆژێ قانوونا چاکسازیێ د خانەنشینێن مووچە و دەرمالان دا د ماوێ بۆری دا ل پەرلەمانێ کوردستانێ ھاتبوو پەسەندکرن، بەلێ کارڤەندانێن نەرازیبوونێ یێن دژوار لێ کەفتن، ژ بەر ھندێ ژی فراکسیۆنا پارتی ل گەل 9 فراکسیۆنێن دی یێن پەرلەمانێ کوردستانێ داخوازا ڤەگەراندنا قانوونێ بۆ پەرلەمانی کر.
ئەڤە سێ ھەیڤە ئەو ژڤان ب دووماھی ھاتی، بەلێ ژ ئەگەرێ ھەڤرکیێن ناڤبەرا فراکسیۆنا دا نەھاتیە پەسەندکرن، بۆچوونێن جودا ل دۆر ماددێن (3 و 8 و 11) ل سەر پرۆژێ قانوونێ ھەنە کو بەحس ل خانەنشینیا مووچە و دەرمالان دکەن.
ئەڤرۆ نيوز:
شارەزایەکێ بوارێ ئاڤێ راگەھاند کو ژێدەرێ سەرەکی یێ ئاڤا دھۆکێ ل سەر رووبارێ دیجلەیە و گرتنا ئاڤا رووبارێ دیجلە دێ زیانان ب ئاڤا دھۆکێ گەھینیت، بەلێ ناگەھیتە وی ئاستی کو ئاڤ نەمینیت.
ئەندازیار ڤەگێر ئەحمەد، جێگرێ رێڤه‌به‌رێ ئاڤا دەوروبەرێن دھۆکێ بۆ (باسنیۆز) دیار کر گرتنا ئاڤا رووبارێ دیجلە دێ زیانێ ب ئاڤا ڤەخوارنێ ل پارێزگەھا دھۆکێ ب گشتی گەھینیت، چونکو ژێدەرێ سەرەکی یێ ئاڤا دھۆکێ کو پرۆژێ خراب دێمی یە ژ رووبارێ دیجلە بوویە و پشتی گرتنا ئاڤا دیجلە بێگومان دێ کارتێکرن و زیانەکا مەزن ب ئاڤا دھۆکێ گەھینیت، بەلێ ناگەھیتە وی ئاستی کو ئاڤ نەمینیت، چونکو مە ھندەک ژێدەرێن دی ژی ھەنە دێ شێین ئاڤێ ژێ بینین.
ناڤھاتی ئاشکرا ژی کر کو بەری نوکە د ھەر چرکەیەکێ دا نێزیکی 600 مەترێن ئاڤێ یێن سێجا دھاتنە خوارێ، بەلێ نوکە ئەڤ رێژە بۆ نێزیکی 266 مەترێن ئاڤێ یێن سێجا کێمبوویە و ڤێ ژی زیانەکا مەزن دێ ب کەرتێ چاندنێ ژی ل پارێزگەھا دھۆکێ گەھینیت، ب تایبەت ل قەزا سێمێلێ، چونکو پتریا چاندنا قەزا سێمێلێ ل سەر ئاڤا رووبارێ دیجلە بوویە.
ئەڤرۆ نيوز:
سەرۆکێ لیژنا سۆتەمەنیێ ل جڤاتا پارێزگەھا دھۆکێ بۆ رۆژناما ئەڤرۆ دیار کر کو پشتی جەژنا رەمەزانا پیرۆز جڤاتێن سێ پارێزگەھێن ھەرێمێ ل گەل لیژنا سامانێن سرۆشتی ل پەرلەمانێ کوردستانێ دێ ل دۆر بھایێ پانزینێ کۆمبن و گۆت: “35% ژ خەلکێ پارێزگەھا دھۆکێ گازا سپی وەرگرتیە”.
عەبدولێەمەد تێلی، سەرۆکێ لیژنا سۆتەمەنیێ ل جڤاتا پارێزگەھا دھۆکێ ئاشکرا کر کو وان وەکو لیژنا سۆتەمەنیێ ل جڤاتا پارێزگەھا دھۆکێ ژڤانەک ل گەل جڤاتێن ھەر دو پارێزگەھێن ھەولێر و سلێمانیێ و لیژنا سامانێن سرۆشتی ل پەرلەمانێ کوردستانێ دانایە کو پشتی جەژنا رەمەزانا پیرۆز ل دۆر بھایێ پانزینێ کۆمبن و گۆت: “ئەم بەری نوکە ل گەل کۆمپانیێن ئینانا پانزینێ کۆمبووینە وان کۆمپانیان بوومە دیارکریە کو ئەو نەشێن پانزینێ ژ بھایێ نوکە ھەی کێمتر ب فرۆشن، بەلێ ھەکە حوکمەت بھێتە سەر ھێلێ و پانزینێ بەلاڤ بکەت رەنگە ژ بھایێ نوکە ئەرزان تر بھێتە فرۆتن”.
ناڤھاتی ئاماژە دا وێ چەندێ کو حوکمەتا بەغدا بۆ ھەر پارێزگەھەکا ھەرێمێ 15 ملیۆن لترێن گازا سپی دەتنیشانکربوون، بەلێ ژ وان 15 ملیۆن لتران ب تنێ 11 ملیۆن لتر گەھشتبوونە پارێزگەھا دھۆکێ و پشتی رەوشا سەقایی گەرم بووی حوکمەتا ناڤھاتی ھنتارتنا گازێ راوەستاند و ئەڤە ددەمەکی دایە پارێزگەھا دھۆکێ پێدڤی یا ب 60 ملیۆن لترێن گازا سپی ھەی بۆ وێ چەندێ ھەموو وەلاتی وەرگرن و گۆت: “د ئەڤ سالە دا 35% ژ خەلکێ پارێزگەھا دھۆکێ گازا سپی وەرگرتیە”.
ئەڤرۆ نیوز ، زنار تۆڤی :
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ مالپەرێ ئەڤرۆ نیوز دا خویاکرن: د روودانەکا هاتنوچوونێدا شەش کەس بوونە قوربانی.
ناڤهاتی زێدەتر دا دیارکرن : ل دەمژمێر ١٢:٠٠ شەڤا بوری روودانەک ژ جۆرێ لێگدان دناڤبەرا سێ ترۆمبێلان دا روودایە ل نێزیک گوندێ مرێبا ل سنورێ ناحیا قەسروک یا سەر ب قەزایا شێخان ڤە دناڤبەرا ترۆمبێلەکا تایبەت شوفرلێت ئۆپترا و بارهەلگرەکا بیکاب دێر و ترۆمبێلەکا چاندنێ ژ جۆرێ تراکتور فورگێسن و د ئەنجامدا دو کەسان گیانێ خوە ژ دەست دا و چار کەسێن دیتر بریندار بووینە ، کو زێدەباری هندێ زیانێن ئابووری ژی گەهشتنە وان ترۆمبێلان.
ئه‌ڤرۆ نیوز ، نه‌وزاد هلۆرى:
شه‌ڤا پیروز (لیله القدر) ئێكه ژ شه‌ڤێن گه‌له‌ك پیروز د هه‌یڤا ره‌مه‌زانێ دا و موسلمان ب گه‌رما و گه‌رم ب په‌رستن و زكر و خوادنا قورئانێ ساخ دكه‌ن كو ئه‌و ژى ل گه‌ل بانگێ مه‌غره‌ب ده‌ست پێ دكه‌ت و هه‌تا نڤێژا سپێدێ ڤه‌دكێشیت.
گرنگى یا شه‌ڤا پیروز یان ب بها د وێ یه‌كێ دایه كو خودایێ مه‌زن دبێژیت شه‌ڤا ب بها ب خێرتره ژ هزار هه‌یڤان كو دبیته به‌رامبه‌ر په‌رستن و ساخكرنا په‌رستنا 83 سال و چه‌ند هه‌یڤان و ئه‌ڤ یه‌ك ده‌لیڤه‌یه بو موسلمانان كو د ژیه‌كێ كورت دا زورترین په‌رستن و زكرى بكه‌ن.
ئه‌وا گرنگ ئه‌وه كو چوو ئایه‌ت و فه‌رموده نینن ئاماژه ب دیاركرنا شه‌ڤا دیاركرى بده‌ن كو ب دروستى بو موسلمانان دیاربیت كیژان شه‌ڤه ، به‌لێ د هند فه‌رموده‌یان دا ئاماژه پێ هاتیه‌كرن كو شه‌ڤا پیروز یان ژى شه‌ڤا ب بها دكه‌ڤیته 10 شه‌ڤێن دوماهیا هه‌یڤا ره‌مه‌زانا پیروز ب تایبه‌تى د شه‌ڤێن كت دا ئانكو شه‌ڤێن 21 و 23 و 25 و 27 و 29ێ ره‌مه‌زانێ. خودایێ مه‌زن د قورئانا پیروز دا د دوو سوره‌تان دا به‌حس ل شه‌ڤا ب بها (لیلە القدر) كریه كو ئه‌و ژى هه‌ردوو سوره‌تێن قه‌در و دوخانن ، و پێغه‌مبه‌ر ژى لسه‌ر گرنگى یا ساخكرنا شه‌ڤا ب بها دبێژیت : (مَنْ قَامَ لَيْلَةَ القَدْرِ إيمَانَاً ؤاحْتِسَابَاً غُفِرَ لَھُ مَا تَقَدَّمَ مِنْ ذَنبِه) زانا و شرۆڤه‌كارێن ئیسلامى پشتى كو راڤه‌كرنا شه‌ڤێن پیروز و موعجیزه‌یا هاتنه‌خوارا سوره‌تا قه‌در و دوخان كرى دده‌ن دیاركرن كو شه‌ڤا ب بها چه‌ند ئاماژه‌یه‌ك بو ده‌ردكه‌ڤن كو شه‌ڤا ب بها دكه‌ڤیته د شه‌ڤا 27ێ دا. ئه‌و دده‌ن دیاركرن كو ژبه‌ركو سوره‌تا قه‌در ژ 30 په‌یڤان پێكدهێت كو ئاماژه‌یه بو رۆژێن هه‌یڤێ و هژمارا جوزئێن قورئانا پیروز و دیسان ژ 114 پیتان پێكدهێت كو ئه‌و ژى ئاماژه‌یه بو هژمارا سوره‌تێن قورئانێ.
زانا گه‌هشتینه وێ باوه‌ریێ كو سوره‌تا قه‌در دوو موعجیزه‌یێن گرنگ هه‌نه كو دیار بیت شه‌ڤا ب بها دكه‌ڤیته 27ێ ئه‌و ژى ژبه‌ر دوو ئه‌گه‌ران
1- په‌یڤا (هى) كو مه‌به‌ست ژێ په‌یڤا (لیلە القدر) دبیته په‌یڤا 27ێ و ئاماژه‌یه‌كا روونه بو دیاركرنا شه‌ڤا ب بها كو لیلە القدره.
2- سوره‌تا قه‌در كو ژ 30 په‌یڤان پێكدهێت ، و ئه‌گه‌ر سه‌حا په‌یڤێن 5 و 10 و 12ێ ، دێ بینین كو په‌یڤا لیلە القدر تێدا هاتیه و ب كومكرنا وان دبیته 27 ، ئه‌ڤ یه‌ك ژى ئاماژه‌یه‌كا دن یا روونه بو دیاربوونا شه‌ڤا ب بها كو لیلە القدره
ئەڤرۆ نیوز ، زنار تۆڤی :
سه‌رۆك بارزانی پێشوازی ل بالیۆزێ ئه‌مریكا ل عێراقێ و شاندەکێ ل گه‌ل دا كر دیار کر : ئەوا بۆ هه‌رێما كوردستانێ گرنگ پێدڤیه لایەنێن سیاسی پێگیربوونا خوه ب سێ پره‌نسیپان دیاربكه‌ن ، ئه‌و ژی هه‌ڤپشكی و ته‌وافوق و هه‌ڤسه‌نگی د بیاڤێن جودا یێن حوكمرانیێ دا.
بالیۆزێ ئەمریکا دۆگلاس سیلیمانی د کۆمبوونا خوە دا ل گەل سەرۆک بارزانی گوت : وه‌لاتێ وی دخوازیت هه‌رێما كوردستانێ بهێز بیت و رۆله‌كێ كاریگه‌ر د پرۆسا سیاسی یا عێراقێ دا هه‌بیت.
هه‌ر د وێ كۆمبوونێ دا هه‌ردو لایەنان بووچونێن خوە ل دۆر دوماهی پێشهاتێن سیاسی و ده‌ركه‌فتنا هه‌ڤكێشه‌یێن نوو ل عێراقێ و قوناغا پشتی هه‌لبژارتنان و بزاڤێن پێكئینانا حوکمه‌تێ و پرۆسا هه‌لبژارتنان و ئه‌نجامێن وان دیارکرن ، بارزانی دایە دیارکرن : گه‌له‌ك تێبینی ل سه‌ر رۆلێ كۆمسیۆنێ و ب رێڤه‌برنا پرۆسا هه‌لبژارتنان و ده‌ستكاری ئه‌نجام و سه‌خته‌كاریان هه‌بوو و دا زانین ژی: پارتی چو نوونه‌ر د كۆمسیۆنا هه‌لبژارتنان دا نه‌بوون، لێ ب مه‌ره‌م ژماره‌كا زێده یا ده‌نگێن پارتی هاتینه سۆتن ب تایبه‌ت ده‌نگێن كه‌مپان و یێن خوشك و برایێن ئێزدی.
د درێژ‌یا ئاخڤتنێن خوه دا، سه‌رۆك بارزانی دووپات كر : پارتی ژ بۆ نه‌هێلانا گۆمان و پاقژیا پرۆسا هەلبژارتنان ، ب هه‌موو رێكاران رازیبوویه ئه‌گه‌ر دوباره‌كرنا هه‌لبژارتنان ژی بیت، به‌لێ بزاڤێن یاریكرنێ ب ئه‌نجامان و هه‌لوه‌شاندنا ده‌نگێن پێشمه‌رگه‌ی ب چو ئاوایه‌كی ناهێنە قه‌بوولكرن و تنێ ژ بۆ مه‌ره‌مێن سیاسی ئه‌و كاره دهێتە كرن.
خویا ژی كر : كاركرن بۆ هه‌لوه‌شاندنا ده‌نگێن پێشمه‌رگه‌ی ئاماژه‌یه‌كا مه‌ترسیداره و كاركرنه بۆ هه‌لوه‌شاندنا پاشه‌رۆژ و چاره‌نڤیسێ كوردستانێ، له‌وما ب چو ئاوایه‌كی ئەم ڤێ بریارێ قەبوول ناکەین.
نيشاندان