ئه‌ڤرۆ نيوز: ره‌وان نهێلى:
نافز ناوپردانی سه‌رۆكێ لژنا پيشه‌سازى و وزێ ل جڤاتا پارێزگه‌ها هه‌ولێرێ ئه‌ڤرۆ ل هه‌ولێرێ د كۆنگره‌كێ رۆژنامه‌ڤانى دا، راگه‌هاند: ئه‌ڤرۆ برياره‌ك ب ده‌ستێ وان گه‌هشتى يه كو وه‌زاره‌تا نه‌فتا عيراقێ بريار دايه رۆژانه 5مليون لترێن پانزينێ بۆ هه‌رێما كوردستانێ بهنێريت، كو رۆژانه دو مليون لتر بۆ هه‌ولێرێ و دو مليون لتر بۆ سلێمانيێ و مليونه‌ك بۆ دهۆكێ و ئه‌ڤ چه‌نده دێ بيته ئه‌گه‌رێ ئه‌رزانبوونا بهايێ پانزينێ و لترا پانزينێ ژ 600 بۆ 650 ده‌رباز نابيت.
ئه‌ڤرۆ نيوز، فاتما مزوورى:
به‌لاڤبوونا هێزێن میلیشیاتێن حوسی ل یه‌مه‌ن ل سه‌ر ده‌ریا رۆژئاڤا ل وی وه‌لاتی يا به‌رده‌وامه و وه‌كو كارڤه‌دانه‌ك ژی ل هه‌مبه‌ر تێكچونا رێزێن وان چه‌كدارێن حوسی فرۆكخانا مه‌ده‌نی یا حوده‌یده بۆمبه‌رێژ كريه.
چه‌كدارێن حوسی ژبلی بۆمبه‌رێژكرنا فرۆكخانا حوده‌یده ته‌قه‌كرن ب چه‌كێن قه‌ناس و ب ئامانجگرتنا وه‌لاتیان ل ئاڤاهیێن بلند یێن باژێرى زێده‌تر كرينه.
چاڤكانیێن نووچه‌یان ئاماژه ب وێ یه‌كێ دكه‌ن كو چه‌كدارێن حوسی ده‌ست ب كۆلانا چه‌ند جادێن باژارێ حوده‌یده و لێدانا سه‌نگه‌ران ژبۆ شه‌ركرن و رێگریكرن ل ره‌ڤینا وان چه‌كدارێن خوه كرينه كو ب نیازا جودابوونێ نه.
هه‌روه‌سا تێ گۆتن كو حوسیان هژماره‌كا چه‌كدارێن خوه یێن كو بنیازن بره‌ڤن گرتينه و ته‌مه‌نێ وان ژ 12 سالی ده‌رباس نابيت و د زیندانێن خوه دا ئه‌شكه‌نجه دده‌ن.
ئه‌ڤرۆ نيوز، فاتما مزوورى:
دوهى به‌رپرسێ په‌يوه‌نديێن ژ ده‌رڤه يێ شه‌پێلا پاشه‌رۆژا كوردىل سوريێ عه‌بدولحه‌ميد ته‌مۆ، ل گۆنده‌كێ رۆژئاڤايێ كوردستانێ ژ لايێ گرۆپه‌كێ چه‌كدار ڤه هاته ره‌ڤاندن.
ناڤه‌ندا شه‌پێلا پاشه‌رۆژا كوردى د به‌ياننامه‌كێ دا گۆت: “ده‌مێ به‌رپرسێ په‌يوه‌نديێن ژ ده‌رڤه يێ شه‌پێلا پاشه‌رۆژا كوردى عه‌بدولحه‌ميد ته‌مۆ، ده‌ما كو دوهى ده‌مژمێر 6:00ى ئێڤارى ژ باژێرێ درێسيێ به‌ر ب مالا خوه ڤه ل گۆندێ جه‌نازيێ دچوو، ژ لايێ گرۆپه‌كێ چه‌كدار ڤه هاته ره‌ڤاندن”.
د به‌يانناما وێ پارتيا كوردى دا هاتيه ژى: “گرتنا ته‌مۆى د چارچۆڤێ زنجيرا گرتن و ره‌وڤاندنا چالاكڤان و سه‌ركردێن جڤاتا نشتيمانى يا كوردى دايه و به‌رامبه‌ر هه‌ر زيانه‌كێ ل سه‌ر ژيانا وى، په‌يه‌دێ به‌رپرس دبينين”.
داخواز ژى ژ هێزێن په‌يه‌دێ كريه كو چاره‌نڤيسێ ته‌مۆى ديار بكه‌ن و ده‌ست ژ “سياسه‌تا تيرۆرێ” ل دژى كادر و سه‌ركردێن شه‌پێلا پاشه‌رۆژا كوردى ل رۆژئاڤا به‌رده‌ن.
ئه‌ڤرۆ نيوز، فاتما مزوورى:
به‌پرسێ وه‌لاتێ گواتمالا دبێژن كو رابوونا ڤۆلكانا فيۆگۆ يا بوويه ئه‌گه‌رێ كاره‌ساته‌كا مه‌زن و ب ڤێ سه‌ده‌مێ ژى 25 كه‌س هاتنه كوشتن و 300 كه‌سێن دژى بريندار بووينه.
وه‌كو ئه‌و ئامارێن هاتينه پشت راست كرن 25 كه‌س هاتنه كوشتن و 300 كه‌سێن دى ژی بریندار بوونه.
ئه‌ڤ بوركانه ل دووریا 40 كیلۆمێتران ل باشوورێ رۆژئاڤایا وی وه‌لاتی دوكێلێن سپی و ئاگر ژێ دهاته خوارێ ب بلندبوون و زێده‌بوونا وێ بوركانێ هنده‌ك ده‌ڤه‌ر ژ وه‌لاتیان هاتنه ڤالاكرن و باله‌فرگه‌هێن ئۆرۆرا یا پایته‌خت هاتیه گرتن.
جیمی مۆرالیس سه‌رۆك كۆمارێ گواتیمالا فه‌رمانا رزگاركرنا وه‌لاتیان ژ بال رێكخستیا هه‌وارهاتنێ دا.
سیرخیۆ كاباناس سه‌رۆكێ تیمێن هه‌وارهاتنێن سرۆشتى ژبۆ ميديايان راگه‌هاند: ئه‌ڤرۆ مه‌وادێن كۆ ژ ڤۆلكانێ ده‌ركه‌فتين ب ئاراسته‌یا باژێروكه‌كێ وی وه‌لاتی د بزاڤێ دایه و هه‌روه‌سا كارمه‌نده‌كێ سه‌ر ب تیمێن وان گيانێ خوه ژ ده‌ست دایه.
ئاژانسا رویته‌رز راگه‌هاندیه: هنده‌ك كه‌سان ب سه‌ده‌ما وێ ڤۆلكانێ گيانێ خوه ژ ده‌ست دايه و هاتينه بریندار كرن و ئۆپه‌راسیۆنا ڤالاكرنا ده‌ڤه‌رێ و ڤه‌گوهاستنا خه‌لكی ده‌ستپێكريه.
به‌رپرسیێن وه‌لاتێ گواتامالا ب وه‌لاتیێن خوه راگه‌هاندينه كو باشتره ماسكان بكاربینن دا كو ئه‌و دوكێل ژ وێ ڤۆلكانێ ده‌ردكه‌ڤیت زه‌ره‌رێ نه‌گه‌هیننه هه‌نه‌سادانا وان و دبێژن ژی نێزیكى ئێك ملیۆن وه‌لاتیان ترسا ڤۆلكانێ ل سه‌ر هه‌یه.
هه‌روه‌يا حوكمه‌تا گواتیمالا راگه‌هاندیه: نێزیكى ئێك ملیۆن وه‌لاتی بێ مال و حال بوونه.
ب سه‌ده‌ما وێ ڤۆلكانا مه‌زن ژی سوپایێن وه‌لاتی د ئاماده‌باشیێ ده‌نه ژبۆ رزگار كرنا وه‌لاتیان.
ئه‌ڤرۆ نيوز، فاتما مزوورى:
وه‌زاره‌تا په‌ترۆلا ئیرانێ د داخویانیه‌كێ دا كو ل ل سایتێ فه‌رمیێ وه‌زاره‌تا (شانا) دیار كریه: رێكه‌فتنێن هه‌ردو ئالیان د دۆر تێچوون و ده‌سته‌به‌ریێن كرێیا ڤه‌گوهاستنا په‌ترۆلێ ل ستوویێ خوه گرتينه ل كێلگه‌هێن كه‌ركووكێ بۆ پارزينگه‌هێن ئیرانێ ب رێژه‌یا 30 حه‌تا 60 هزار به‌رمیلان د رۆژه‌كێ دا و دانا وێ په‌ترۆلێ ژ لايێ ئیرانێ و ژبۆ باشوورێ عیراقێ كه‌فتیه د وارێ بجهئينانێ دا.
هه‌روه‌سا خوه‌یا كریه:تانكه‌رێن په‌ترۆلێ ئه‌ڤرۆ ل كه‌ركووكێ گه‌هشتنه پارزينگه‌هێن رۆژئاڤایا پارێزگه‌ها ئیلامێ و پرسگرێكێن لوجستیكی ل سه‌ر رێیا وێ رێكه‌فتنێ هاتنه چاره‌سه‌ر كرن.
هه‌ر د وێ ده‌ربارێ دا وه‌زاره‌تا په‌ترۆلا عیراقێ راگه‌هاند: ده‌ست ب شاندنا په‌ترۆلا كه‌ركووكێ ژبۆ ئیرانێ هاتیه كرن و بڕیاره پرۆژه‌یه‌كێ دامه‌زراندنا هێله‌كا ڤه‌گوهاستنا په‌ترۆلێ د ناڤبه‌را كه‌ركووكێ و ئیرانێ بهێته بجهئينان.
عاسم جیهات په‌یڤدارێ وه‌زاره‌تا په‌ترۆلێ راگه‌هاند: ئه‌و هێلا دهێته دامه‌زراندن و دشیان دایه هه‌ر رۆژ 250 هزار به‌رمیلێن په‌ترۆلێ ره‌وانه‌ى ئیرانێ بكه‌ت.
هه‌روه‌سا راگه‌هاندیه: عیراق دێ هه‌مان رێژه‌یا په‌ترۆلێ ل باشوورێ وه‌لاتی ل ئیرانێ وه‌رگريت و ئیران ژی دێ مفای ژ وێ رێژه‌یا په‌ترۆلێ وه‌رگريت ژبۆ دابینكرنا پێدڤیێن وه‌لاتیێن كرمانشانێ.
ئەڤرۆ نیوز، فاتما مزووری:
ل سەر سنورێ عیراق-تورکیا ل باژێرێ جۆلەمێرگێ سێ لەشکرێن توکیا ھاتنە کوشتن و دو ژی بریندار بوون.
سەرۆک ئەرکانیا تورکیا راگەھاند، ل باژێرکێ شەمزینان یێ سەر ب جۆلەمێرگێ ڤە، گەریلایێن پەکەکێ ب مووشەکان ھێرشی لەشکرێ تورکیا کر کو دەما وان لەشکران کارێ پاراستنا وێ رێ دکر و د ئەنجام دا سێ لەشکر ھاتنە کوشتن و دو ژی بریندار بوون.
سەرۆک ئەرکانیا تورکیا ئاماژە ب وێ چەندێ ژی کر کو ئەو دێ ل وان دەڤەران ل دژی پەکەکێ ئۆپەراسیۆنەکا بەرفرھـ ئەنجام دەن.
ئەڤرۆ:
بریارە پەرلەمانێ کوردستانێ د ڤێ ھەفتیێ دا کۆم ببیت و پرۆژە قانوونا چاکسازیا مووچێ خانەنشینان گەنگەشە بکەت.
ڤەمان فەیسەل ئەندامێ لژنا قانوونی یا پەڕلەمانێ کوردستانێ راگەھاند، ئەڤرۆ دەمژمێر یازدەی سپێدێ، ھەردو لژنێن دارایی و قانوونی یێن پەڕلەمانی، دێ ل دۆر پرۆژێ چاکسازیێ کۆم بن و گۆت:(ھەکە نیسابێ قانوونێ یێ روونشتنا وان لژنان تەمام ببیت، دێ راپۆرتەکا ھەڤپشک ل دۆر پرۆژەی بەرھەڤ کەن).
هه‌ر د ڤى ده‌رباره‌ى دا، فه‌رسه‌ت سۆفى ئه‌ندامێ په‌رله‌مانێ كوردستانێ ئاشكه‌را كر كو رۆژا چارشه‌مبى و د ناڤ هۆلا په‌رله‌مانێ كوردستانێ دا دێ ديار بيت كا كى دژى پرۆژه‌يه و كى ژى ل گه‌ل پرۆژه‌يه.
ھەکە ھەردو لژنێن دارایی و قانوونی راپۆرتا خوە یا ھەڤپشک ل دۆر پرۆژەی بەرھەڤکر، پەرلەمان دێ د ڤێ ھەفتیێ دا کۆم بیت و دەنگی ل سەر پرۆژێ چاکسازیێ دەت.
ئەڤرۆ نیوز :
ئێك ژ كێشێن سه‌ره‌كی یێن خه‌لکێ ، ئه‌وه كو پرچێ وان ب رەنگەکێ ب لەز دوەریێت ، لەوما پتریا دەمان ئەو پرسیار دهێتە کرن کو ئەم چاوا دێ پرچێ خوە ژ وەریانێ رزگار کەین؟.
نووچەک د مالپه‌رێ homeremedies دا بەلاڤبوویه و ئه‌و چەندە روون كریه كو نۆشداران چه‌ند رێیه‌ک داناینه بۆ رزگاربوونێ ژ ڤێ لاوازیا موویێن سه‌ری ، وان د له نووترین ڤەکۆلین دا ئه‌و چەندە سه‌لماندیه كو پتریا جاران وه‌ریانا پرچی ژ تێكچوونا هۆزمۆنان یان سترێسێ یان دروستبوونا چه‌ند مادێن كیمیایی یێن زیانبه‌خش د سه‌ریدا دروست دبیت، ژبەر هندێ نۆشداران چه‌ند رێیه‌ك داناینه كو ئەم دشیێن خوە پێ رزگار بگەین ژ هه‌لوه‌ریانا پرچی و ب هێزکرنا وی :
. مه‌ساجكرنا سه‌ری ب زه‌یتا زهیتوونان : نۆشدار دبێژن هەکە رۆژانه دووجاران سه‌رێ خوە مه‌ساج بكه‌ی ب زه‌یتا زهیتوونان ، ئه‌ڤە دی هاریكاریا تە کەت د كێمكرن و نه‌هێلانا هه‌لوه‌ریانا پرچی ب شێوه‌کێ باش ، ئه‌ڤە ژی ب ئەگەرێ هندێ کو ئەڤ مه‌ساجكرنه بوریکێن خوینێ چالاك دکەت و زڤرینا خوینێ تێدا ڤەد‌گه‌رینیت ، لەوما ئه‌ڤە دێ بیته ئەگەرێ هندێ کو موویێن سەری ب هێزتربن و پرچێ مرۆڤی هند نەوەریێت.
. رۆژانه ماسكێ هێکێ د پرچێ خوە بده: نۆشداران ئه‌و چەند ژی روون كریه كو ب كارئینانا زه‌رکا هێکێ ل گه‌ل دوو كه‌فچکێن ژ زه‌یتا زهیتوونان و تێكه‌لكرنا وان ب شێوازەکێ باش ، پاشی د پرچێ خوە بده بۆ ماوێ 15 بۆ 20 خوله‌كان و پاشی بشۆ ، ئه‌ڤە ژی دێ بیته ئەگەرێ باشتركرنا موویان و دێ بهێزتر لێ هێن.
ئەڤرۆ نیوز ، تۆڤی :
ئێك ژ وان فێقیێن کو مفای دگەهینیتە لەشێ مرۆڤی خۆخه، هه‌روه‌سا شه‌ربه‌تا وێ ژی یا ده‌وله‌مه‌نده ب مادێ خوارنێ و ڤیتامینێن جۆراوجۆر، كو چه‌ندین پێدڤیێن جه‌سته‌یی دابین دکەت و مرۆڤی ژ گەلەک نەساخیان دپارێزیت.
مالپەرێ organicfact بەحسێ مفایێن ڤەخوارنا شه‌ربه‌تا خۆخێ دکەت و دبێژیت ، ڤەکۆلینێن نوو سه‌لماندیە كو شه‌ربه‌تا خۆخێ گەلەک یا ب مفایه بۆ لەشی و پاراستنا لەشی ژ نه‌ساخیان ، ئه‌ڤە ژی ڤەدگەریت بۆ هەبوونا رێژه‌کا زۆر یا مادێن خوارنێ و مادێن ریشالی و دژی ئۆكسانێ کو لەشی ژ چەندین نەساخیێن مه‌ترسیدار دپارێزن.
. ڤەخوارنا شه‌ربه‌تا خۆخێ مرۆڤی ژ نەساخیا په‌نجه‌شێرێ دپارێزیت : ڤیتامین C و B6 و E گەلەک د شه‌ربه‌تا خۆخێدا هەیە و لەشی دپارێزیت ژ نه‌خۆشییێن په‌نجه‌شێرێ و ناهێلیت جه‌سته تووشی چو ماده‌کێ ژه‌هراوی ببیت، ل گه‌ل هندێ ژی مادێ ریشالی و دژی ئۆكسانێ تێدا هەیه كو دژایه‌تیا خانێن په‌نجه‌شێرێ دکەت و ژناڤ دبەت.
. شه‌ربه‌تا خۆخێ كێشێ كێم دکەت : ئه‌ڤ شه‌ربه‌ته هایكاریا مرۆڤی دکەت د كێمكرنا كێشێ دا ، ئه‌ڤە ژی ڤەد‌گه‌ریت بۆ هندێ كو کێم كالۆر تێدایه و د هه‌ر كووپەکێ ڤێ شه‌ربه‌تێدا نێزیكی 60 كالۆر تێدا هەیه، ئه‌ڤەژی رێژه‌کا گەلەک كێمە و ئەڤە هاریکاریێ دکەت بۆ کێمکرنا کێشا مرۆڤی.
. شه‌ربه‌تا خۆخێ مرۆڤی ژ نەساخیا ته‌نگه‌نه‌فه‌سیێ رزگار دکەت: ئه‌ڤ شه‌ربه‌ته گەلەک یا ب مفایە بۆ ئه‌و كه‌سێن کو ب ئەگەرێ كێشا ته‌نگه‌نه‌فه‌سیێ دنالینن و گەوریا وان ئیلتیهاب لێ ، ئه‌ڤە ژی ب ئەگەرێ هندێ کو ڤێ شه‌ربه‌تێ پێكهاتەکێ ده‌وله‌مه‌ند هەیه و ڤیتامینێن C و D و B6 تێدا هەیە ، دەمێ مرۆڤ ڤەدخوت گەوریا مرۆڤێ سافی دکەت و وان ئیلتیهاباتان ناهێلیت.
ئه‌ڤرۆ نيوز، فاتما مزوورى:
سكرێ ئه‌ليسۆ يێ كو توركيا ل سه‌ر رووبارێ ديجله‌ى ئاڤا دكه‌ت دێ بۆ عيراقێ بيته ئه‌گه‌رێ كێشێن مه‌زن.
سه‌رۆكێ ئێكه‌تيا جۆتياران، حه‌يده‌ر ئه‌سه‌د، هوشدارى دا كو هه‌كه كێشا ئاڤێ مه‌زن ببيت ل ناڤه‌راست و باشوورێ عيراقێ دبيت كو حه‌فت مليۆن كه‌س ژ جهێن خوه كۆچبه‌ر ببن.
پێدڤيا عيراقێ سالانه ل 60 مليار مه‌ترێن سێجا يێن ئاڤێ يه، د داهاتى دا ئه‌ڤ رێژه دێ بيته 76 مليار مه‌ترێن سێجا.
جێگرێ سه‌رۆك كۆمارێ عيراقێ راگه‌هاند كو ئه‌ڤ سيسته‌مێ توركيا گرتيه به‌ر بوويه ئه‌گه‌رێ ئاريشێن جدى يێن ئاڤێ، “ره‌وشێ ب مه‌ترسى دبينين”.
سه‌رۆكێ ناڤه‌ندا پێشخستنا وزێ و ئاڤێ ل عيراقێ له‌يس شه‌بر ژى دا زانين كو هه‌كه حوكمه‌تا عيراقێ يا پێدڤى نه‌كه‌ت، ئاڤا ديجله‌ى دێ 50% كێم بيت و ئيرانێ ژى ئاڤا زێ يێ بچووك گرتيه، ب وى ده‌مى پرۆژێ ئاڤا ڤه‌خوارنێ يا قه‌لادزێ ژى راوه‌ستيايه و دێ كێشه ل سه‌ر هه‌رێما كوردستانێ و عيراقێ هه‌بيت.
هه‌ر ب گۆره‌ى بڕيارا راگرتنا ئاڤێ ژ لايێ حوكمه‌تا ئيرانێ ڤه، ب هزاران ماسى ژى ل زێ يێ بچووك ژناڤ چووينه.
نيشاندان