ئه‌ڤرۆ نيوز:
هه‌ردو مه‌كته‌بێن سياسى يێن پارتى ديموكراتى كوردستان و ئێكه‌تى نشتيمانى كوردستان ل هه‌ولێر دێ كۆم بن ب مه‌ره‌ما دانوستاندنێ ل دۆر چاوانيا پشكداريكرن د حوكمه‌تا عيراقێ يا داهاتى دا.
سه‌عدى ئه‌حمه‌د پيره، ئه‌ندامێ مه‌كته‌با سياسى و ئاخفتنكه‌رێ ب ناڤێ ئێكه‌تى نشتيمانى كوردستان گۆت: “نيڤرۆيا ئه‌ڤرۆ دوشه‌مبى 6ى ته‌باخا 2018ێ هه‌ردو مه‌كته‌بێن سياسى يێن پارتى ديموكراتى كوردستان و ئێكه‌تى نشتيمانى كوردستان ل هه‌ولێر دێ كۆم بن.
ده‌رباره‌يى ناڤه‌رۆكا كۆمبوونێ سه‌عدى پيره گۆت: “كۆمبوون دێ درێژه‌پێده‌را كۆمبوونێن بۆرى بيت ل دۆر پرسێن سه‌ره‌كى بيت، سه‌ره‌رايى به‌حسكرنا چه‌ند پرسێن ناڤخۆيى يێن كوردستانێ ژى، به‌حس ل بزاڤێن پێكئينانا حوكمه‌تا نوو يا عيراقێ و چاوانيا پشكداريكرنا كوردان د وێ حوكمه‌تێ دا هێته كرن”.
ئه‌ڤرۆ نيوز:
ل دووڤ رێنمایێن نوو ئینانا کرێکارێن سەنتەرێن مەساجێ ھاتیە سنوورداکرن کو چەندین رێنما ھاتینەدانان و دانا دەستووردانێ بۆ ڤەکرنا سەنتەرێن مەساجێ ل دووڤ گۆتنا فەرمانگەھێن پەیوەندار گەلەک ب زحمەت کەفتیە.
شەمال جەعفەر، رێڤەبەرێ کاروبارێن پشکنینێ ل رێڤەبەریا گەشت و گۆزارێ ل دھۆکێ ئاشکرا کر، 17 سەنتەرێن مەساجێ ل پارێزگەھا دھۆکێ ھەنە، 15 ژ وان ناڤ ئۆتێلان دانە و سەر ب رێڤەبەریا گشتی یا گەشت و گۆزارێ ڤەنە، دو سەنتەر ژی ل دەرڤەی ئۆتێلانە و سەر ب زێرەڤانیا ساخلەمیا دھۆکێ نە و گۆت: “رێڤەبەریا گشتی یا ساخلەمیێ مۆلەتێ ددەتە ھەموو سەنتەرێن مەساجێ، لێ گەشت و گۆزار ب تنێ مۆلەتێ ددەتە سەنتەرێن د ناڤ ئۆتێلان دا”.
شەمالی گۆتژی: “ئەو ئۆتێلا سەنتەرێ مەساجێ ھەبیت، دڤێت ژ چار ستێرا کێمتر نەبیت، ئەڤ ھژمارە دا گەلەک زێدەبیت، لێ ھەموو ئۆتێل حەز ناکەن سەنتەرێن مەساجێ ڤەکەن”.
د. عەبدوللا جاسم، سەرۆکێ لژنا ساخلەمیێ ل پەرلەمانێ کوردستانێ بۆ رۆژناما ئەڤرۆ گۆت: “ل دووڤ چەندین رێنمایان سەنتەرێن مەساجێ دھێنەڤەکرن، جلک وەک ئێک بن، خودان باوەرنامە بن، پشکنینێن ساخلەمیێ بۆ ھاتبنەکرن، ب تنێ کارمەندێن ھەشت وەلاتان بۆ ئەنجامدانا مەساجێ ل کوردستانێ ھاتینە دیارکرن، ئەو ژی وەلاتێن: (ژاپون، کووریا باشوور، تایوان، مالیزیا، فلیپین، تایلەند و ئەندونسیا)نە، کارمەندێ مەساجێ، دڤێت ب کێمی دو سالان بسپۆری ل وەلاتێ خوە خواند بیت و نەکێمتر ژ سالەکێ د وی بیاڤی دا کارکربیت ل وەلاتێ خوە و باوەرناما خوە بینیت و یا باوەرپێکریبیت ل وەلاتێ ژێ ھاتی، مورێن قۆنسلخانا عیراقێ ل وی وەلاتی، پەیوەندیێن ھەرێما کوردستانێ ل سەر بیت، ئەڤە ھەتا وی کارمەندی ماف ھەبیت ل وی سەنتەرێ مەساجی کاربکەت”.
ئه‌ڤرۆ نيوز:
ئاژانسا رويته‌رز ل سه‌ر زارێ به‌رپرسێن ئه‌ندونسيا راگه‌هاند كو ژمارا قوربانيێن ئه‌ردهه‌ژا دوهى ل هه‌ردو دورگێن لۆمبرگ و بالى گه‌هشتيه 91 كه‌سان.
به‌رده‌فكێ فه‌رمانگه‌ها كاره‌ساتێن سرۆشتى راگه‌هاند كو دهێته پێشبينيكرن ژمارا قوربانيان هێشتا بلند ببيت ژ به‌ر كو هه‌تا نوكه چاره‌نڤيسێ گه‌له‌ك كه‌سان يێ به‌رزه‌يه و گۆت: “تيمێن مه به‌رده‌وام يێ د لێگه‌ريانێ دا”.
زێده‌تر گۆت: “هه‌تا نوكه تيمێن وان يێن دناڤ پاشمايێن ئاڤاهيێن هه‌رفى دا لێگه‌ريانێ دكه‌ن”.
ئاماژه ب وێ چه‌ندێ ژى كر كو د ناڤا قوربانيان دا چو كه‌سێن بيانى نه‌بووينه.
دوهى بيڤه‌له‌رزه‌كا ب قه‌بارێ 6.1 پله ل دووڤ پيڤه‌رێ ريخته‌ر هه‌ردو دورگێن لۆمبرگ و بالى هه‌ژاندن و به‌رى حه‌فتيه‌كێ ژى بيڤه‌له‌رزه‌كا دى ل هه‌مان ده‌ڤه‌ر دابوو، به‌لێ زيانێن وێ كێمتر بوون كو 16 كه‌سان گيانێ خوه ژ ده‌ست دابوو.
ئه‌ڤرۆ نيوز:
ل گوندێ كانی قرژاله یێ نێزیكی هه‌ولێرێ عەمباره‌كا چه‌ك و ته‌قه‌مه‌نیان په‌قى.
ژێده‌ره‌كى بۆ رووداو راگه‌هاند كو ده‌مژمێر 23:00ى 5ى ته‌باخا 2018ێ، ل گوندێ كانی قرژاله عه‌مباره‌كا چه‌ك و ته‌قه‌مه‌نیان ته‌قیه.
رێڤه‌به‌رێ به‌ره‌ڤانیا باژێرى ل هه‌ولێر شڤان عە‌بدولقادر بۆ رووداوگۆت: “پشتی ته‌قینێ ئاگر ده‌ركه‌فتیه و ئاگر ژی ژ ئالیێ تیمێن وان ڤه هاتیه كۆنترۆلكرن”.
شڤان عە‌بددولقادر دا زانین كو د بوویه‌رێ ده چو زیانێن گيانى نه‌بووینه و هه‌تا نها ژی سه‌ده‌ما ته‌قینێ نه‌هاتیه زانین”.
ب گۆره‌يی پێزانينان ئەو عەمبار يێن هێزێن پیشته‌ڤانى 1 يا هێزێن پێشمه‌رگێ كوردستانێ بوون.
گوندێ كانی قرژاله 10 كیلۆمه‌ترا ژ رۆژاڤایێ باژارێ هه‌ولێرێ يێ دووره.
ئه‌ڤرۆ نيوز:
پارێزگارێ سلێمانیێ دێ سەردانا بەغدا کەت ژبۆ کو ھەولەکا نوو بدەن ھەتا کو تورکیا دۆرپێچا ل سەر فرۆکەخانا سلێمانیێ راکەت.
پشتی شەش مەھان ژ وێ دۆرپێچا کو بەغدا ب سەدەما ئەنجامدانا ریفراندوما سەربەخوەبوونا باشوورێ کوردستانێ خستە سەر ھەردو فرۆکەخانەیێن ھەولێر و سلێمانیێ، کۆمپانیا ماھان یا ئیرانی یەکەمین گەشتا ئەسمانیا خوە بۆ فرۆکەخانەیا ھەولێرێ دەسپێکر و پشتی وێ ژی گەلەک کۆمپانیێن دن ل پەی ھەڤ ھاتن و ھاتنووچوونا فرۆکەیان ژ ترکیێ و وەلاتێن ئورۆپی و عەرەبی ڤە دەست پێ کر.
ھەتا نھا تورکیا بریار نەدایە کو ئەسمانێ خوە ل سەر فرۆکەخانەیا سلێمانیێ ڤەکەت، ئەو ژی وەکو بەھانەیەک پشتی بوویەرا 3ێ تەباخا سالا 2017 کو دو کارمەندێن دەزگەھا میتێ ژ ئالیێ پارتیا کارکەرێن کوردستانێ ڤە ل ھاڤینگەھا دوکانێ ھاتنە رەڤاندن.
ئاخفتنکەرێ ب ناڤێ مەکتەبا سیاسی یا ئێکەتی نشتیمانی کوردستان، سەعدی ئەحمەد پیرە، رەد دکەت، کو د جڤینێن وان یێن ل گەل کۆنسولێ تورکیا یێن ل ھەرێما کوردستانێ دا، بەحسا راکرنا دوورپێچێن سەر فرۆکەخانەیا سلێمانیێ ھاتیە کرن و دبێژیت: “ئەم ھەر جارا کو ل گەل وان روونشتبین، مە بەحسا پێکئینانا حوکمەتا نوو یا عیراقێ و ھەولێن ئالیێن سیاسی یێن بۆ ڤێ ئارمانجێ کریە و ئەم نەچووینە ناڤا ھوودەکاریان.”
ئەڤرۆ نیوز ، زنار تۆڤی:
تەلەڤزیۆنا ئیرانێ دیارکر كو تەهرانێ پلانەک بۆ كێمكرنا بنەمایێن گوهۆرینا دراڤێن بیانی راگەهاندیە، ل وی دەمێ دەستهەلاتدارێن وی وەلاتی هاریکارێ پارێزگارێ بانكا ناڤەندی یا ئیرانێ بۆ كاروبارێن دراڤێن بیانی، پشتی لادانا وی ژ وی پۆستی دگرن.
لدووڤ پلانا تەهرانێ دێ قەدەغەیا سەر نڤێسینگەهێن گوهۆرینا دراڤی بۆ فرۆشتنا دراڤێ بیانی ب نرخێ ئازاد بۆ مەبەستا گەشتكرنێ بۆ دەرڤەی ئیرانێ لابەت، هەروەسا دێ رێکێ ب هناردەكاران دەت بۆ فرۆشتنا دراڤێ بیانی بۆ هاوردەكاران، ل پال نەبوونا سنوورەکێ بۆ هاتنا دراڤێ بیانی و زێری بۆ نافخۆیا وی وەلاتی.
تەلەڤزیۆنا ئیرانی د بەیانناما حوکمەتێ دەربارەی وێ پلانا ڤەگوهاستنێ دا كو بریارە دراڤێ بیانی ب نرخەکێ پالپشتکری ب مەبەستا كرینا کەلوپەلێن سەرەكی و دەرمانان بهێتە تەرخان کرن، ئەڤە ژی ل وی دەمێ کو تەهران بزاڤێ دکەت بۆ روو ب رووبوونا كاریگەریێن دابەزینا بهایێ دراڤێ خوە و یا خوە بۆ سەپاندنا سزایێن ئەمریكا ئامادە دکەت.
پێر دەستهەلاتدارێن ئیرانێ ئەحمەد عێراقچی، هاریکارێ پارێزگارێ بانكا ناڤەندی یا ئیرانێ بۆ كاروبارێن دراڤێ بیانی ژ پۆستێ وی دوور خستیە، ل گەل بەرپرسەکێ دیتر و چار مامەلەكار ب دراڤێن بیانی ڤە گرتینە، ئەڤە ژی وەک بزاڤەک بۆ ئارامکرنا توڕەیا شەقامی ل دژی سیاسەتێن ئابووری و دەرڤە یێن ئیرانێ.
ئه‌ڤرۆ نيوز:
چەندین چالاکڤانێن رۆژھەلاتێ کوردستانێ دیار دکەن کو خوەنیشادانێن ل ئیرانێ بۆ ژناڤبرنا رژێما نھا تێر ناکەن و ل دۆر رۆژھەلاتێ کوردستانێ ژی دیار دکەن کو ھەتا نھا دیار نینە کا دێ پاشەرۆژا کوردان چ بیت، چونکو ھەلویستێ ھێزێن ئۆپۆزسیۆنا ئیرانێ ل دۆر مافێ کوردان ژ رژێما نھا خرابترە و پارتێن کوردی ژی لاوازن و نەشێن سەرکێشیا خەلکی بکەن.
سەعید رەحمانی چالاکڤانێ سیاسی یێ رۆژھەلاتێ کوردستانێ ژ باژێرێ مھابادێ بۆ رۆژناما ئەڤرۆ دیار کر کو خوەنیشادانێن نھا ل ئیرانێ ھەنە وەکو پێدڤی نینن، چونکو دڤێت خوەنیشادان ل ھەموو باژێرێن ئیرانێ و ب تایبەتی ژی ل رۆژھەلاتێ کوردستانێ بەرفرەھتر لێ بھێن دا کو رژێما نھا نەچار بیت داخوازیێن خەلکی قەبوول بکەت یان ژی ژناڤ بچیت، لێ ل رۆژھەلاتێ کوردستانێ بێدەنگیەکا مەزن یا ھەی، چونکو ھەلویستێ ھێزێن ئۆپۆزسیۆنا ئیرانێ ل دۆر مافێ کوردان ژ یێ رژێما نھا خرابترە و ژ بەر ھندێ ژی ئەم نزانین کا دێ پاشەرۆژا مە ل ئیرانێ چ لێ ھێت و گۆت: (ئێک ژ ئەگەرێن سەرەکی یێ بێدەنگیا نھا ل رۆژھەلاتێ کوردستانێ ژی بۆ ڤێ یەکێ ڤەدگەریت کو خەلک نزانن کا دێ رەوشا کوردان چ لێ ھێت).
محەمەد شێخ کانلۆ چاڤدێرێ سیاسی ل باژێرێ ئورمیێ ژی بۆ رۆژناما ئەڤرۆ دیار کر کو رژێما ئیرانێ د چھل سالێن دەستھەلاتا خوە دا چو جاران وەکو نھا تەنگاڤ نەبوویە، رژێم بەر ب نەمانێ ڤە دچیت و ئەو یەک ژی دەلیڤەکا زێرینە بۆ گەلێ کورد ل رۆژھەلاتێ کوردستانێ کو بگەھنە مافێن خوە، ئەو مافێ کو ب سالانە ئەم خەباتێ بۆ دکەین و ب ھزاران شەھید ژی بۆ ھندێ مە یا دایی و گۆت: (لێ مخابن نھا پارتێن رۆژھەلاتێ کوردستانێ لاوازن و نەشیاینە ئێکەتیا خوە دروست بکەن، ژ بەر ھندێ ژی نھا چو ئیرادەکا سیاسی یا ب ھێز یا کوردان ل رۆژھەلاتێ کوردستانێ نینە و پەژاک ژی کو دبێژیت ئەم بۆ رۆژھەلاتێ کوردستانێ کار دکەین ھەتا نھا نەشیایە بسەلمینیت کو خەباتێ بۆ کوردستانێ دکەت و سیاسەتا وان ل گەل راستیا سیاسی و جڤاکی یا کوردان ل رۆژھەلاتێ کوردستانێ ناگونجیت و گەلێ مە خوە ژ پەژاکێ دوور دکەت).
ژیلا عەلیپور چالاکڤانا مافێ ژنان ل رۆژھەلاتێ کوردستانێ ژی ل دۆر رەوشا نھا ل ئیرانێ و رۆژھەلاتێ کوردستانێ دیار کر کو ئەم کەیفخوەشین کو خوەنیشادان ل دژی دەستھەلاتا مەلایان ل ئیرانێ دەستپێکرینە و ئەم ھێڤیدارین کو ئەڤ خوەنیشادانە بەردەوام بن ھەتا رژێما مەلایان ژناڤ دچیت، لێ مخابن بۆ رۆژھەلاتێ کوردستانێ رەوش جودایە، چونکو ئەم نزانین کا دێ رەوش بەر ب کیڤە بچیت و ھێزێن کوردی ژی د ناڤا خوە دا پارچە بووینە و ھەلویستێ وان ل دۆر پاشەرۆژا کوردان ل ئیرانێ زەلال نینە و گۆت: (ھەتا ھێزێن کوردی نەبنە ئێک و ستراتیژیا خوە بۆ خەلکی ئاشکرا نەکەن و دەست ب خەباتا خوە نەکەن ئەز باوەرم دێ ئەڤ بێدەنگیا نھا بەردەوام بیت، چونکو بەری چھل سالان ل رۆژھەلاتێ کوردستانێ خەلکی شۆرەش کر و گەلەک قوربانی دان، لێ سەرکردایەتیا سیاسی وی دەمی نەشیا خوەدان ژ دەنگێ کوردان دەرکەڤیت و ب ھزاران شەھید مە دان و د ئەنجام دا رژێمەکا خرابتر ژ یا شاھێ ل ئیرانێ ھاتە سەر دەستھەلاتێ و ھەتا نھا ژی رۆژانە گەنجێن مە ل سێدارە ددەن و بچووکترین مافێ کوردان ل ئیرانێ نینە).
ناڤھاتیێ داخواز ژ ھەموو پارت و ئالیێن سیاسی یێن رۆژھەلاتێ کوردستانێ کر کو ھەر زوو حوکمەتەکا کوردی ل دەرڤەیی وەلاتی بۆ رۆژھەلاتێ کوردستانێ ئاڤا بکەن دا کارتێکرنێ ل ھەستێن خەلکی ل رۆژھەلاتێ کوردستانێ بکەت و گۆت: (دڤێت پارتێن کوردی ھەست ب بەرپرسیاریا خوە یا دیرۆکی بکەن و ھندەک تشتان بکەن دا کارتێکرنێ ل ھەستێن نەتەوی یێن گەلێ مە بکەت، ھەکە پێنگاڤەکا وەسا بھێتە ھاڤێتن ئەز باوەرم دێ بێدەنگیا نھا ل رۆژھەلاتێ ھێتە شکاندن و گەلێ مە بەرھەڤە بۆ مافێن خوە یێن نەتەوی خوەنیشادانان بکەت و قوربانیان ژی بدەت و مە ئەزموونا ڤێ یەکێ یا ھەی).
ئه‌ڤرۆ نيوز:
ژ بەر پێگری نەکرن ب رێنمایان جھەکێ گەشتیاری ل ھاڤینگەھا ئاشەوا یا سەر ب قەزا ئامێدیێ ڤە دھێتە داخستن و چەندین جھێن دیتر ژی ب کۆژمەکێ پارەی ھاتینە سزادان.
کاروان حەجی سەعید، بەرپرسێ بنگەھێ چاڤدێریا بازڕگانی ل ئامێدیێ بۆ رۆژناما ئەڤرۆ دیار کر کو ئەو بەردەوام دووڤچوونێ ل سەر ھەموو جھێن گەشت و گۆزاری، ھەروەسا جھێن دیتر ژی دکەن ژ پێخەمەت بەڕژەوەندیا گشتی و پاراستنا ساخلەمیا وەلاتیان، ب تایبەتی ژی گەشتیاران و گۆت: “د دووماھی دووڤچوونا مە دا ل سەر ڤان جھێن گەشتیاری؛ یێن دەڤەرێ و ژ بەر پێگری نەکرن ب رێنمایان، مە جھەکێ گەشتیاری بۆ دەمێ چەند رۆژان داخستیە و ھاتیە ھایدارکرن ب سزایێن دژوارتر ھەکە ھات و ئەو رێنمایان بجە نەئینیت”.
ناڤھاتی دیار ژی کر، وان ڤێ جارێ سەرا چەندین جھێن دی یێن گەشتیاری دایە، ژ وان ژی ھندەک ھەنە بۆ جارا ئێکێ یە رێنمایێن نوو وەردگرن، بجهـ نەئینن دێ ھێنە سزادان و گۆت: “بەری چەند رۆژان مە ھژمارەکا جھێن گەشتیاری ل سنوورێ قەزا ئامێدیێ ب کۆژمەکێ پارەی سزادابوون، پشتی کو پێگری ب رێنمایێن گەشتیاری نەکرین”.
ئه‌ڤرۆ نيوز:
روسیا داخواز ژ ئەمریکا کر کو ل سووریێ پێکڤە کار بکەن و پەنابەرێن ل کەمپا روھبان یا کو ل سەر سنۆرێ عیراقێ و سووریێ نە بۆ جھێن وان ڤەگەرینن و ھەموو دەڤەرێن سووریێ ژ تەقەمەنیان پاقژ بکەن و ب ھەماھەنگی ل سووریێ دەست ب ئاڤەدانکرنێ و باشکرنا رەوشا ژیانا وەلاتیان بکەن.
د ڤێ مژارێ دا ل دووڤ ئاژانسا رۆیتەرز یا نووچەیان سەرۆک ئەرکانێ گشتی یێ لەشکرێ روسیا نامەکا تایبەت بۆ سەرۆک ئەرکانێ لەشکرێ ئەمریکا شاندیە و تێدا داخواز ژ سەرۆک ئەرکانێ ئەمریکا کریە کو ئالۆزیێن نھا چارە بکەن و بۆ ڤەگەراندنا پەنابەرێن ل سەر سنۆرێ عیراقێ بۆ دەڤەرێن وان یێن رەسەن پێکڤە کار بکەن، ئاشکرا ژی کریە کو نھا ھژمارەکا گەلەک زێدە تەقەمەنی ل دەڤەرێن جودا جودا یێن سووریێ ژ ئالیێ تیرۆرستان و کۆمێن چەکدار ڤە ھاتینە چاندن و ئەڤ تەقەمەنی ئاستەنگیێ ل ھەمبەر ڤەگەرا پەنابەران دروست دکەن و بۆ ڤێ چەندێ دڤێت ل گەل ئەمریکا پێکڤە ھەموو ئاخا سووریێ ژ تەقەمەنیان پاقژ بکەن.
ژ ئالیێ خوە ڤە ھەتا نھا بەرپرسێن ئەمریکا چو داخۆیانیەک ل سەر ڤێ مژارێ نەداینە، لێ دەزگەھێن راگەھاندنێ و بەرپرسێن روسیا دبێژن د ھەڤدیتنێن ل گەل بەرپرسێن ئەمریکا دا ل دۆر ئاشتیێ و ئارامیێ ل سووریێ گەنگەشە کرینە.
نيشاندان