ئه‌ڤرۆ نيوز، عه‌زيز هه‌ورامى:
ته‌قه سپێده‌هيا ئه‌ڤرۆ زوو ل باره‌گايه‌كێ دى يێ پارتى ديموكراتى كوردستان ل پايته‌ختێ ره‌وشه‌نبيرى هاته كرن و هه‌تا نوكه ئه‌نجامده‌رێن وێ ژى نه‌هاتينه ده‌سته‌سه‌ركرن.
سه‌عيد پشده‌رى، به‌رپرسێ لقا 4 يا پارتى ديموكراتى كوردستان بۆ ئه‌ڤرۆ نيوز راگه‌هاند كو سپێده‌هيا ئه‌ڤرۆ زوو ل ده‌مژمێر 1:00 ترۆمبێله‌ك كو هه‌تا نوكه جورێ وێ نه‌يێ دياره زێده‌تر ژ 10 گوله‌يان به‌ردانه ئاڤاهيێ لژنا ناوچا پارتى يا رۆژهه‌لات ل پارێزگه‌ها سلێمانيێ”.
گۆتژى: “پشتى بۆرينا ڤێ ترۆمبێلێ جاره‌كا دى بزاڤ كر دووباره بێت و ته‌قه‌يى بكه‌ت، به‌لێ جارا دويێ بۆ سلامه‌تيا خوه و پاراستنا گيانێ خوه، زێره‌ڤانێن باره‌گايێ لژنێ به‌رسڤا گوله‌يێن وان دا و ب ڤێ چه‌ندێ ژى زوو ره‌ڤين و نه‌شيان بۆ جارا دويێ ته‌قه‌يى بكه‌ن”.
به‌رپرسێ لقا چار ئاماژه ب وێ چه‌ندێ ژى كر كو د ڤێ هێرشا وان دا بۆ سه‌ر باره‌گايێ پارتى چو زيان نه‌بوون و گۆت: “ئه‌ڤه جارا گه‌له‌كێ يه ته‌قه ل باره‌گايێن پارتى ل سلێمانيێ دهێته كرن و هێزێن ئه‌منى يێن ڤى باژێرى نه‌شياينه سنوره‌كى بۆ ته‌قه‌كه‌ران بدانن”.
سه‌عيد پشده‌رى نه‌ڤه‌شارت ژى كو پشتى بوويه‌رێ هێزێن ئه‌منى گه‌هشتينه جهێ روودانێ و ده‌ست ب ڤه‌كۆلينان كريه و گۆت: “هێزێن ئه‌منى ل سلێمانيێ هه‌تا نوكه نه‌شياينه باره‌گايێ مه ل سلێمانيێ ب پارێزن”.
ئه‌ڤرۆنيوز:
رێڤه‌به‌ريا به‌ره‌ڤانيا باژێرى ل پارێزگه‌ها دهۆكێ راگه‌هاند، ئه‌ڤرۆ ئه‌ينيێ 3 ته‌باخا 2018 گه‌نجه‌كێ 17 سالى ل زاخۆ دئاڤێ دا خه‌ندقى.
رێڤه‌به‌ريا ناڤبرى دبه‌رپه‌رێ خوه دا ل سه‌ر تۆرا جڤاكى يا ئه‌نستگرام به‌لاڤكر” ئه‌ڤرۆ ئێڤارى تيمێن نقومه‌ڤانێن زاخۆ هاتنه ئاگه‌هداركرن كو گه‌نجه‌كێ 17 سالى ل نێزيك تاخێ مهه‌نديكى خه‌ندقيه وتيمێن نقومه‌ڤانان ل جهێ روودانێ به‌رهه‌ڤبوون وله‌شێ وى گه‌نجى ژئاڤێ ئيناده‌ر وهاته هنارتن بۆ نوشداريا داد”.
دياركر ژى” هه‌ر ئه‌ڤرۆ ئێڤارى تيمێن نقومه‌ڤانێن زاخۆ شيان گه‌نجه‌كێ خه‌لكێ باژێرێ دهۆكێ كو ژيێ وى 14 سال بوون ل نێزيك پرا ده‌لال ژ روودانا خه‌ندقينێ رزگار بكه‌ن وهاته هنارتن بۆ نه‌خوه‌شخانا زاخۆ.
ئه‌ڤرۆنيوز:
سه‌رۆك بارزانى دپه‌يامه‌كێ ب هه‌لكه‌فتا سالياد چارێ يا كۆمه‌لكوژيا ئێزديان ب ده‌ستێ تيررۆستێن داعشێ، راگه‌هاند، حوكمه‌تا هه‌رێما كوردستانێ هه‌موو بزاڤێن خوه بۆ ڤه‌گه‌راندنا ره‌ڤانديان خستينه كار وهژماره‌كا زۆر ژێ ڤه‌گه‌راندينه.
سه‌رۆك بارزانى دپه‌ياما خوه دا گۆت ژى” به‌لێ ديتن وڤه‌گه‌راندنا هه‌موو ره‌ڤانديان وئاساييكرنا ره‌وشا شنگالێ وئاڤه‌دانكرنا وێ، ئه‌ركه‌كێ هه‌مه‌لايه‌ن وهه‌ڤپشكه وپێدڤيه له‌ز تێدا بهێته كرن”.
دياركر ژى” ل ساليادا كاره‌ساتا شنگالێ، سلاڤان دهنێرين بۆ گيانێ پاقژێ شه‌هيدێن وێ كاره‌ساتێ، ل ده‌مێ روودانا وێ جينۆسايدێ دا، هه‌موو خه‌لكێ كوردستانێ ل گه‌ل خوشك وبرايێن ئێزدى دا ئازار كێشان، له‌وما كور وكچێن مه ژ هه‌موو كوردستانێ هاتن وگياني خوه بۆ ئازادكرنا شنگالێ به‌خشى”.
سه‌رۆك بارزانى دپه‌ياما خوه دا گۆت ژى” خوشك وبرايێن ئێزدى پشكه‌كن ژ گه‌لێ كوردستانێ وچو ره‌وشه‌كا سه‌پاندى ژى نه‌شێت وان ژ گه‌لێ خوه دابرينن، حوكمه‌تا هه‌رێما كوردستانێ هه‌موو بزاڤێن خوه بۆ ڤه‌گه‌راندنا ره‌ڤانديان خستينه كار وهژماره‌كا زۆرژێ ڤه‌گوراندينه، به‌لێ ديتن وڤه‌گه‌راندنا هه‌موو ره‌ڤانديان وئاساييكرنا ره‌وشا شنگالێ وئاڤه‌دانكرنا وێ، ئه‌ركه‌كێ هه‌مه‌لايه‌نه وهه‌ڤپشكه وپێدڤيه له‌ز تێدا بهێته كرن”.
ئه‌ڤرۆنيوز:
رۆژناما (الاخبار) يا لوبنانى دراپۆرته‌كا خوه دا كو ئه‌ڤرۆ ئه‌ينيێ 3 ته‌باخا 2018 به‌لاڤكرى، دياركر كو سه‌رۆكێ ليستا ده‌وله‌تا قانوونێ نورى مالكى يێ نێزيك بووى ژ پێكئينانا مه‌زنترين هه‌ڤپيمانى دناڤ په‌رله‌مانێ عيراقێ دا.
وێ رۆژناما لوبنانى ئاماژه دا كو ئه‌و داخوازا دوهى پێنجشه‌مبى مالكى ئاراستهكرى بۆ ب له‌زكرنێ دراگه‌هاندنا ئه‌نجامێن هژمارتنا ده‌نگان ب ده‌ست به‌گه‌يه ل سه‌ر وێ چه‌ندێ كو مالكى يێ پشت راسته كو دشێت مه‌زنترين هه‌ڤپه‌يمانى پێكبينيت.
رۆژناما ناڤبرى ژزارده‌ڤێ چه‌ند ژێده‌رێن نێزيك ژ مالكى ڤه‌گۆهاست” هه‌ڤپه‌يمانيا چاڤه‌رێكرى ب سه‌رۆكاتيا مالكى دێ پێك هێت ژ هه‌ر ئێك ژ ده‌وله‌تا قانوونێ وليستا فه‌تح ب سه‌رۆكاتيا هادى عامرى و30 په‌رله‌مانتارێن ليستا نه‌سر يا عه‌بادى، زێده‌بارى هه‌ردو حزبێن كوردى پارتى ديموكراتى كوردستان وئێكه‌تيا نيشتمانى كوردستان و35 په‌رله‌مانتارێن سونه”.
ئاماژه دا كو سه‌رۆكێ ره‌وتێ سه‌درى موقته‌دا سه‌در دێ بيته ئوپۆزسيۆن، سه‌ره‌راى وێ چه‌ندێ كو ليستا وى (سائيرون) ل رێزا ئێكێ هاتبوو دهه‌لبژارتنان دا ب 54 كورسيان.
ئەڤرۆ نیوز،باسم قاسم شنگالی
کچەکا ئێزدی ئەڤرۆ ئه‌ینیێ 3/8/2018 ژدەستێن رێکخراوا داعش يا تیرۆرستی ل سووریێ هاتە رزگارکرن
حسێن قائيدى، بەرپرسێ نڤسینگەها کاروبارێن رەڤاندیان ل دهۆکێ بۆ ئەڤرۆنيوز گۆت “ئەڤرۆ ب هەڤکاریا نڤیسينگەها مە کچەکا ئێزدى ژده‌ستێ داعشێ ل سووریێ هاتە رزگارکرن”.
گۆت ژى” كچا رزگاربووى بناڤێ (رەهەڤ سلێمان ) ژيێ وێ 12 سالن و خەلکا کۆمه‌لگەها (تەلبەناتە) ل رۆژهەلاتی باشووری قەزا شنگالێ
دياركر “ل دەمێ ل 3/8/2014 داعشێ دەڤەرا شنگالێ داگێرکری ئەو كچ مینا ب هەزاران کچ و ژنێن ئێزدی هاتبوو ره‌ڤاندن ل گەل خێزانا خوە”.
خوياكر ژى”،نڤیسنگەها کاروبارێن رەڤاندیان ل دهۆکێ یا بەردەوامە بۆ بزاڤا رزگاركرنا وان ره‌ڤانديێن هەتا نۆکە ماینه ددەستێن تیرۆرستێن داعشێ دا”.
ئه‌ڤرۆنيوز:
بۆ جارا ئێكێ دديرۆكا خوه دا هه‌لبژارتيێ عيراقێ يێ ته‌پا پێ ئه‌ڤرۆ ئه‌ينيێ 3 ته‌باخا 2018 گه‌هشته باژێرێ رام الله يێ فلستينى بۆ ئه‌نجامدانا ياريه‌كا هه‌ڤالينى ل گه‌ل هه‌لبژارتيێ فلستينێ.
برياره سوباهى ل ده‌مژمێر 5 ئێڤارى هه‌ردو هه‌لبژارتيێن عيراقێ وفلستينێ ل ياريگه‌ها (فه‌يسه‌ل ئه‌لحوسه‌ينى) ل رام الله وێ ياريا هه‌ڤالينى ئه‌نجام بده‌ن.
ئەڤرۆنیۆز، سالار دۆسكی:
ب بەرهەڤبوونا وەزیرێ كاروبارێن شەهید و ئەنفالكریان ل حوكمەتا هەرێما كوردستانێ، وپارێزگەرێ دهۆكێ ب وەكالەت و چەندین بەرپرسێن حزبی و حكومی و ئەندامێن پەرلەمانێن كوردستانێ و عیراقێ، ئەڤرۆ ئه‌ينيێ 3/8/2018 ل هۆلا كونفرانسان ل زانكۆيا دهۆكێ كارەساتا شنگالێ هاتە ساخكرن..
پارێزگەرێ دهۆكێ ب وەكالەت ووەزیرێ شەهیدان و ئەنفالكریان و كچەكا ئێزدی یا ژ دەستێ داعشێ قورتال بووی پەیڤێن خوە پێشكێشكرن و بەحسێ ڤێ بیرهاتنێ هاتەكرن و رۆلێ حوكمەتا هەرێمێ و خەلكێ پارێزگەها دهۆكێ بلند هاتە نرخاندن و خواستن ئەو كچێن نوكە ژێر دەستێ داعشێ بهێنە قورتالكرن و ئەڤ كارەساتە ب جینوساید بهێتە نیاسین و حوكمەتا هەرێمێ پتر رۆلێ خوە بگێریت بۆ چارەسەكرنا ڤان كچ و ژنێن رزگاربوویی ژلایێ دەروونی ڤە.
پاشى چەندین برگێن هونەری هاتنە پێشكێشكرن وەكو ستران و تابلویێن هونەری و پارچە مۆزیكە كو ژلایێ كۆمەكا هونەرمەندێن شنگالێ و دەڤەرێ ڤە هاتبوونە بەرهەڤكرن.
ئەڤرۆ نیوز ،باسم قاسم شنگالێ
ئەڤرۆ ل ئۆسترالیا ل باژێرێ ئەدمیرال سالڤەگەرا کۆمکوژیا ئێزدیان ئەوا ل رۆژا3ى ته‌باخا 2014ێ ژلایێ رێكخراوا تيرۆرستيا داعشێ ڤە د هێرشا ل سه‌ر قه‌زا شنگالێدا هاتيه ئه‌نجامدان و تاوانێن دژى مرۆڤايه‌تيێ د ده‌رهه‌قێ ئێزديان دا ئه‌نجام داین هاته ساخكرن.
ئەڤرۆ ئه‌ينيێ 3 ته‌باخا 2018 ل باژێرێ ئەدمیرال ل ئۆسترالیا کۆمکوژیا ئێزدیان ب چەندین چالاکيێن جورە جور و نیشاندانا دو کورتە فلمان کو ئێك ژ وان بناڤێ (کەزەب) کو بەرهەمێ تیپا گرعزێر یا هۆنەری بو ویێ دى ژ دەرهینانا نەوزاد شێخانی بوو کو هاتبوونە چێکرن دسەر وێ تاوانێ .
نيشاندان