ئەڤرۆ نیوز ، زنار تۆڤی :
دانا محەمەد رێڤەبەرێ راگەهاندنا فڕۆکخانا سلێمانیێ راگەهاند ، کو کۆمپانیێن فڕۆکەڤانی یێن ئیرانی مژۆلی ئامادەکاریانە بۆ هندێ کو گەشتێن خوە بۆ فڕۆکخانا نێڤدەولەتی یا سلێمانیێ دەستپێبکەنە ڤە.
هەروەسا گوت ژی، ئەم چاڤەرێ دکەین کو ل هەیڤا داهاتیدا گەشتێن دناڤبەرا سلێمانیێ و ئیرانێ دەستپێبکەنە ڤە.
پێشتر دوو کۆمپانیێن فرۆکەڤانی یێن ئیرانی گەشتیار دناڤبەرا سلێمانیێ و ئیرانێ ڤەدگوهاستن و حەفتیانە دوو گەشت ئەنجامددان، بەلێ ب ئەگەرێ ئەنجامدانا ریفراندۆمێ حوکمەتا عێراقێ هەموو گەشتێن ئەسمانی بۆ فڕۆکخانێن هەولێر و سلێمانیێ راگرتبوون.
پاشی ب رێککەفتن ل گەل هەرێما کوردستانێ ، ئیرانێ بریارا راگرتنا گەشتان هەلوەشاند ، بەلێ ژ وی دەمی هەتا نوکە گەشتێن دناڤبەرا ئیرانێ و فڕۆکخانا نێڤدەولەتی یا سلێمانیێ دەست پێنەکریە.
ئه‌ڤرۆنيوز:
رۆژناما (العالم الجديد) به‌لاڤكر كو سه‌رپه‌رشتيارێ هه‌ڤپه‌يمانيا (القرار) يا عيراقى، خه‌ميس خه‌نجه‌ر، دێ كه‌نالێ NRT عه‌ره‌بيه كريت كو به‌رى چه‌ند رۆژان هاتبوو گرتن.
رۆژناما ناڤبرى ژزارده‌ڤێ كارمه‌نده‌كێ وى كه‌نالى به‌لاڤكر” خودانێ كه‌نالى وسه‌رۆكێ ڤه‌لڤينا نه‌وه‌ى نوێ شاسوار عه‌بدولواحد بريارا داخستنا وى كه‌نالى دايه، به‌لێ وى خواستيه كه‌نالى ب گۆژمه‌كێ پباش يێ پاره‌ى بفرۆشيت”.
دياركر ژى كو سه‌رۆكێ هه‌ڤپه‌يمانيا (القرار) خه‌ميس خه‌نجه‌ر كو ل هه‌لبژارتنێن ڤێ دووماهيێ 13 كورسى ل جڤاتا نوونه‌ران بده‌ستڤه‌ئينان رازيبوويه وى كه‌نالى بكريت.
وى كارمه‌ندێ NRT عه‌ره‌بيه كو ئه‌ڤه دو هه‌يڤه مووچێ خوه وه‌رنه‌گرتى دياركر كو تنێ دێ NRT عه‌ره‌بيه هێته فرۆتن ويا كوردى دێ هه‌ر مينيت.
ئاماژه دا ژى كو برياربوو ئه‌و كه‌نال بمينيت تاكو فرۆشتنا وێ ب تمامى ل هه‌يڤا خزيرانا 2018 بهێته ئه‌نجامدان، به‌لێ ژبه‌ر وه‌رنه‌گرتنا كارمه‌ندێن وى مووچێن خوه بۆ ئه‌گه‌رێ ده‌ست ژكاركێشانا 90% ژ وان كارمه‌ندان وتنێ 3 كارمه‌ند ل ئوفيسا سه‌ره‌كى يا كه‌نالى ل سلێمانيێ ماينه وڤێ چه‌ندێ خودانێ كه‌نالى شاسوار عه‌بدولوواحد نه‌چاركر كه‌نالى دابئێخيت به‌رى فرۆتنا وى.
كه‌نالێ NRT عه‌ره‌بيهل رۆژا شه‌مبيا بۆرى 26/5/2018 براوه‌ستاندنا به‌خشێ خوه راگه‌هاند ب مه‌ره‌ما شياندنێ وپێشڤه‌برنا كه‌نالى ولادانا هه‌موو كارمه‌ندان ل سلێمانيێ وهه‌موو پارێزگه‌هان بێ مه‌زاختنا شايستێن وان يێن دارايى يێن ماين.
دهێته زانين كه‌نالێ كوردنيوز ژى كو ب سه‌ر شاسوارى ڤه‌بوو ل رۆژێن بۆرى ژلايێ شاسوارى ڤه هاته داخستن.
ئه‌ڤرۆنيوز:
ب به‌رهه‌ڤبوونا نێچيرڤان بارزانى سه‌رۆك وه‌زيرێن هه‌رێما كوردستانێ وسه‌رۆكێ جڤاتا دادوه‌رى ب وه‌كاله‌ت ووه‌زيرێ داد ل هه‌رێما كوردستانێ، د رێ وره‌سمه‌كى دا حاكم ئازاد حه‌سه‌ن ئه‌حمه‌د وه‌كو داواكارێ گشتى ل به‌رده‌م سه‌رۆك وه‌زيرێن هه‌رێمێ سويندا قانوونى خوار.
ب بريارا جڤاتا دادوه‌رى يا هژمار 24 ل 11/4/2018 كو يا تايبه‌ته ب به‌ربژاركرنا ئازاد حه‌سه‌ن ئه‌حمه‌د، جێگرێ سه‌رۆكێ داواكارێ گشتى بۆ پۆستێ سه‌رۆكێ داواكاريا گشتى ول دووڤ حوكمێ مادێ 10 – شازده ژ قانوونا سه‌رۆكاتيا هه‌رێما كوردستان – عيراق يا هژمار 1 بۆ سالا 2015 وب پشت به‌ستن ب وان ده‌ستهه‌لاتێن كو بۆ جڤاتا دادوه‌رى ل هه‌رێما كوردستانێ هاتيه دان ب گۆره‌ى حوكمێ ماده 1 – چار ژ قانوونا هژمار 2 بۆ سالا 2017 (قانوونا به‌لاڤكرنا ده‌ستهه‌لاتێن سه‌رۆكاتيا هه‌رێما كوردستانێ ل سه‌ر ده‌زگه‌هێن دستوورى يێن هه‌رێمێ) بريار هاته دان ب دامه‌زراندنا حاكم ئازاد حه‌سه‌ن ئه‌حمه‌د وه‌كو سه‌رۆكێ داواكاريا گشتى.
هه‌ر پشتى نيڤرۆيا ئه‌ڤرۆ دوشه‌مبى 28/5/2018، ب به‌رهه‌ڤبوونا نێچيرڤان بارزانى سه‌رۆك وه‌زيرێن هه‌رێمێ وحاكم به‌نگين سه‌رۆكێ جڤاتا دادوه‌رى ب وه‌كاله‌ت وسينان چه‌له‌بى وه‌زيرێ دا ل هه‌رێما كوردستانێ، درێ وره‌سمه‌كى دا حاكم ئازاد حه‌سه‌ن ئه‌حمه‌د وه‌كو داواكارێ گشتى ل به‌رده‌م سه‌رۆك وه‌زيرێن هه‌رێمێ سويندا قانوونى خواند.
نێچيرڤان بارزانى، سه‌رۆك وه‌زيرێن هه‌رێما كوردستانێ پێرۆزباهى ل حاكم ئازاد كر وهيڤيا سه‌ركه‌فتنێ بۆ خواست.
ئه‌ڤرۆنيوز:
سه‌نته‌ره‌كێ عه‌ره‌بى ئورۆپى ل وه‌لاتێ نه‌رويج سوپاسنامه‌كێ ئاراسته‌ى رێڤه‌به‌ريا هاتنوچوونا دهۆكێ دكه‌ت.
رێڤه‌به‌ريا هاتنوچوونا دهۆكێ ئەڤرۆ دوشەمبی ٢٨⁄٥⁄٢٠١٨ به‌لاڤكر كو سەنتەری عەرەبێ ئەورۆپی یێ مافێن مروڤى و قانوونا نیڤدەولەتی یا وه‌لاتێ نەرویج سوپاسنامەک ئاراستەێ رێڤەبەریا ھاتنوچوونا پارێزگەھا دھۆکێ کر ژبەر رۆلێ کارمەندێن ترافیکی یێ بەرچاڤ د رۆژا ھەلبژاتنان دا و چاڤدیری کرنا بارێ ئیمناھیێ و کونترولکرنا کەتواری راپرسینێ ب شێوازەکی زانستی.
ئه‌ڤرۆنيوز:
ئاژانسا سپۆتنيك يا ده‌نگوباسان يا رووسى به‌لاڤكر كو موقته‌دا سه‌در سه‌رۆكێ هه‌ڤپه‌يمانيا سائيرون يێ رژده ل سه‌ر دووركرنێ ژ مالكى وعامرى، دبه‌رانبه‌ر دا دخوازيت ل گه‌ل كوردان وعه‌لاوى وعه‌بادى حوكمه‌تا نوو پێكبينيت.
سپۆتنيك دياركر، نوكه ئاراسته‌يا هه‌ڤپه‌يمانيا سائيرون كو ل رێزا ئێكێ دهه‌لبژارتنان دا هاتيه، ئه‌وه ب چو شێوه‌كى ل گه‌ل نورى مالكى سه‌رۆكێ ليستا ده‌وله‌تا قانوونێ وهادى عامرى سه‌رۆكێ ليستا فه‌تح رێككه‌فتنێ نه‌كه‌ت.
ئاماژه دا كو ل به‌رانبه‌ر دا، موقته‌دا سه‌در يێ رژده ل سه‌ر وێ چه‌ندێ ل گه‌ل كوردان پێكبهێت ، ئه‌وژى پارتى وئێكه‌تى نه، هه‌روه‌سا ل گه‌ل ليستا وه‌ته‌نيه ب سه‌رۆكاتيا ئه‌ياد عه‌لاوى وليستا نه‌سر ب سه‌رۆكاتيا حه‌يده‌ر عه‌بادى.
خوياكر ژى كو ئه‌و ليستێن ناڤبرى دشێن هه‌ڤپه‌يمانيه‌كا مه‌زن وسه‌ره‌كى ل جڤاتا نوونه‌رێن عيراقێ دروست بكه‌ن وكه‌سه‌كى راسپێرن بۆ پێكئينانا حوكمه‌تا داهاتى.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ دوشه‌مبى 28/5/2018 پێشوازى ل خه‌ميس خه‌نجه‌ر سكرتێرێ گشتيێ پرۆژێ عه‌ره‌بيێ عيراقى وشاندێ دگه‌لدا كر.
دوێ ديدارێ دا، خه‌ميس خه‌نجه‌ر سوپاسيا گه‌لێ كوردستانێ وسه‌رۆك بارزانى كر بۆ هاريكارى وحه‌واندنا ئاواره ولێقه‌وميێن عيراقى دچه‌ند سالێن بۆرى دا وپێزانين هه‌بوو بۆ رۆل وكاريگه‌ريا سه‌رۆك بارزانى ل حه‌واندنا ئاواران وب هه‌لويسته‌كێ ديرۆكى هژمارت كو چو جاران ناهێته ژبيركرن.
هه‌ر دوێ كۆمبوونێ دا بيرورا ل دۆر پرۆسا سياسى ل عيراقێ وهه‌لبژارتنان وپێكئينانا حوكمه‌تا عيراقى يا نوو هاتن ئالوگوركرن وهه‌ردو لايه‌نان دووپاتيێ ل هه‌ماهه‌نگيێ كر.
ئەڤرۆ نيوز، لەزگین جۆقی:
رێڤەبەرێ نەخۆشخانا ھیڤی یا زارۆیان ل دھۆکێ دیارکر کو ل رۆژا ٢٩ی گۆلانا ٢٠١٨ سەندوقا پشتەڤانیا پەنچەشێرا زارۆیان ھاتە راگەھاندن و داخوازی ژ ھەموو دەولەمەند و خێرخوازان دکەین ھەڤکاریێ بکەن بۆ چارەسەری و قورتالکرنا زارۆیێن نەخۆشێن پەنچەشێری.
د. نزار بەکر، رێڤەبەرێ نەخۆشخانا ھیڤی یا زارۆیان ل دھۆکێ دیارکر کو ھەتا نوکە گۆژمەکێ پارەی ھاتیە کۆمکرن بۆ چارەسەریا زارۆییێن نەخۆشیا پەنچەشێرێ ھەین، ل سالا بۆری سەندوقا پشتەڤانیا پەنچەشێرێ ھاتیە دانان، ئەڤ گوژمێ پارەی ھاتیە کۆمکرن، ھەکە گەھشتیە نێزیکی حەفت ملیار دیناران دێ شێن ئامیرێ گەویێ بۆ چارەسەریا زارۆییێن نەخۆشیێن پەنچەشێری دابین بکەین ھەتا نوکە ئەڤ ئامیرە نینە و خەلک قەستا دەرڤەی وەلاتی دکەن بۆ وەرگرتنا چارەسەریا گەویێ ب ڤێ گوژمێ ھاتیە کۆمکرن سەنتەرێ نەخۆشیا پەنچەشێرێ بۆ زارۆیان ل دھۆکێ ھاتیە دروستکرن ئەم یێ کار دکەین ب پشتەڤانی و ھەڤکاریا خێرخواز و دەولەمەندان ئامیرێن پێدڤی ژی بۆ چارەسەریا پەنچەشیرا زارۆیان ل دھۆکێ دابین بکەین”.
د. نزار بەکر ئەو ژی دیارکر کو ھەتا نوکە ل دھۆکێ ١١٠ زارۆ یێن ژ نەخۆشیا پەنچەشێری ھاتینە قورتالکرن ھەکە ھەڤکاری ھەبیت و ئامیر و پێدڤی دابینکری بن ستاف و نوشدارێن باش ل دھۆکێ ھەنە دێ شێن ژیانا وان قورتال کەن ژ مرنێ مەرەما سەرەکی ژ راگەھاندنا سەندوقا پشتەڤانیا پەنچەشیرا زارۆیان ئەو خەلک و دەولەمەند و خێرخواز ھەڤکاریا سەندوقێ بکەن دێ ب وی پارەی چارەسەریا نەخۆشیێن پەنچەشیرێ ھێتە کرن.
مەلا جیھاد بێسڤکی، رێڤەبەرێ ئەوقافا دھۆکێ دیارکر کو دانا پارەی و خێری بۆ سەندوقا پشتەڤانیا پەنچەشێرا زارۆیان خێرەکا گەلەک مەزنە، داخوازێ ژ خەلکێ خوە یێ پێ چێبوویی دکەین ھەڤکاریا سەندوقا پشتەڤانیا پەنچەشێرا زارۆیان بکەن چونکو گەلەک یا ب خێرە مرۆڤ ژیانا کەسەکی ژ مرنێ یان نەخۆشی رزگار بکەت، جھێ دلخۆشیا مەیە ئەڤ پرۆژە پشتەڤانیێ یێ بەردەوام بیت ل دھۆکێ ئێکەتیا زانایێن ئیسلامی فەتوا دەرخستیە دبێژن دروستە مالێ زەکاتێ بینن بۆ زارۆیێن پەنچەشێرێ مە چو ئاریشە ل سەر زەکاتێ بۆ نەخۆشێن زارۆیێن پەنچەشێرێ ھەین نینە.
مەلا جیھاد گۆتژی: “ل وەلاتێ ئیماراتێ ھندەک ئاڤرەتان پرچا خوە ژێڤەکرن وێنان فرۆتنا جوانکاریان ئەو پارە ئێنان و کۆمکرن و کرنە سەدەقە بۆ زارۆییێن نەخۆشیا پەنچەشێرێ ھەین ل گەلەک دەولەتان ھونەرمەند ئاھەنگێن خوە دکەن بۆ زارۆیێن نەخۆشیا پەنچەشێری وی پارەی ب مەزێخن داخوازێ دکەین ژ ھەموو گەنج و دەولەمەندان ھەڤکاریا سەندوقا پشتەڤانیا پەنچەشیرێ ل دھۆکێ بکەن.
د. عەبدولرەحمان عەبدولا رێڤەبەرێ سەنتەرێ ژین یێن نەخۆشێن پەنچەشێرا زارۆیان ل دھۆکێ دیارکر کو سالانە ٣٠ ھەتا ٣٥ نەخۆشێن نوو یێن پەنچەشێرا زارۆیان ل دھۆک دھێنە زێدەکرن ماوێ چارەسەریێ ژی ھەتا دو سال و نیڤان ھەتا سێ سال و نیڤان دھێتە ڤەکێشان، ئەڤ نەخۆشیێن قورتالبووین ١١٠ نەخۆش بووینە یێن دیتر ژی بەردەوام چارەسەری وەردگرن رێژا چارەسەریێ ٨٠% ھەتا ٨٥% ژ نەخۆشان ژ پەنچەشێری قورتال دبن.
ئەڤرۆ نیوز ، زنار تۆڤی :
بزاڤێن شكەستن پێ ئینانا هەلبژارتنان یا بەردەوامە بۆ روونشتنا پەرلەمانی و رەتكرنا ئەنجامێن هەلبژارتنێن 12 گولانێ ، ئەڤرۆ ژی 150 پەرلەمانتاران ئیمزا كۆمکرینە ژبۆ روونشتنا پەرلەمانی ، ئەمریكا ژی هۆشداریەکا توند ب بەرەیێ شكەستن ئینایی و سەركردێن عێراقی دایە، كو رەتكرنا ئەنجامێن هەلبژارتنان، دێ ئالۆزیان ل عێراقێ دروست کەت.
رۆژناما ئەلعەرەبی جەدید د راپۆرتەكێدا ژ زارێ وەزیرەکێ حوکمەتا عێراقێ ئاشكرا كریە ، پەرلەمانێ نوکە د دۆلەكێدایە و لیستێن سەرکەفتی ل دۆلەکا دیەر دا ، هەموو لیست یێ بزاڤێ دکەن بۆ پێكئینانا مەزنترین فراكسیۆن، ل پەرلەمانی ژی بەحسێ رەتكرنا ئەنجامێن هەلبژارتنان دهێتە كرن.
ئەو وەزیرە دبێژیت، ئەمریكا پەیامەکا توند بۆ ئەوێن شکەستن خواری و سەركردێن دیار یێن عێراقێ هنارتینە، كو رەتكرنا ئەنجامێن هەلبژارتنان، دێ عێراقێ ڤەگەرینیتە چارگۆشا ئێکێ یا ئالۆزیا تەناهی و سیاسی ل عێراقێ دروست کەت، لەوما ب پێدڤی دزانین، کو هەموو ئەنجامان قەبوول بكەن و لەزێ بكەن د پێكئینانا حوکمەتا نوو یا عێراقێ دا.
هەتا نوکە سێ هزار سكالا ل سەر ئەنجامێن هەلبژارتنێن 12 گولانێ هاتینە دا بۆ پەرلەمانێ عێراقێ ، ژ سەرجەمێ 232 پەرلەمانتارێن بەری نوکە یێن خوە كاندید كرین، ب تنێ 97 كەس ژ وان شیاینە دەنگێن پێدڤی بینن، ئەوێن نە دەرکەفتین ژ ئەنجامێن هەلبژارتنان د نەرازینە و داخوازا رەتكرنا ئەنجاما و دووبارە ئەنجامدانا هەلبژارتنان دکەن.
نيشاندان