ئه‌ڤرۆ نيوز:
سه‌فا جابرى،رێڤه‌به‌رێ كاروبارێن كومسيونا بلندا سه‌ربخوه‌يا هه‌لبژارتنان ل عيراقێ، دياركر ، ل چه‌ند ده‌مژمێرێن بهێت، ئه‌نجامێن هه‌لبژارتنان بۆ په‌رله‌مانێ عيراقێ دێ هێنه راگه‌هاندن و گۆت: ڤه‌كولينا ل دۆر ئه‌نجامێن هه‌لبژارتنان ل كه‌ركووكێ چو كاتێكرنێ ل سه‌ر راگه‌هاندنا ئه‌نجامان ناكه‌ت.
ئه‌ڤرۆنيوز:
شه‌ش حزبێن كوردستانى ل باژێرێ سلێمانيێ به‌رى ده‌مه‌كێ كێم كۆمبوون ودووپاتى ل سه‌ر ره‌تكرنا ئه‌نجامێن هه‌لبژارتنان كر وروودانێن شه‌ڤا بۆرى ژى ل سلێمانيێ خسته سه‌ر ستويێ هێزێن ب سه‌ر ئێكه‌تيێ ڤه.
دبه‌ياننامه‌كا هه‌ڤپشك دا كو هه‌ر ئێك ژ ( بزاڤا گۆران، كۆمه‌لا ئيسلامى، ئێكگرتووى ئيسلامى، حزبا شيوعى يا كوردستانى، بزاڤا ئيسلامى وهه‌ڤپه‌يمانيا ژبۆ ديموكراسيێ ودادپه‌روه‌ريێ) پشتى كۆمبوونێ به‌لاڤكرى، هێرشكرنا ل سه‌ر باره‌گايێ سه‌ره‌كى يێ بزاڤا گۆران ژلايێ چه‌ند چه‌كداران ڤه شه‌رمزاركر وراگه‌هاند” ڤى كارى دئێخينه ستوويێ هێزێن ئێكه‌تيێ وئه‌ڤ ره‌فتاره نه‌ديموكراسى ونه‌شارستانى ناڤوده‌نگيا ملله‌تێ مه كێم دكه‌ت”.
ژلايێ خوه‌ڤه، موسه‌نا ئه‌مين نوونه‌رێ ئێكگرتوو ئيسلامى دوێ كۆمبوونێ دا د كونگره‌كێ رۆژنامه‌ڤانى دا پشتى كۆمبوونێ گۆت” مه ڤان چه‌ند حزبان بريار دايه ل رۆژێن داهاتى پێنگاڤێن توندتر وئێكلاكه‌رتر ئه‌نجام بده‌ين وپێدڤيه ئه‌و ئه‌نجامانه بهێنه هه‌لوه‌شاندن وئه‌نجامێن راسته‌قينه بهێنه راگه‌هاندن”.
ل دۆر هێرشا شه‌ڤا بۆرى ل سه‌ر باره‌گايێ سه‌ره‌كى يێ گۆران ، گۆت” دهێرشكرنێ دا ل سه‌ر بزاڤا گۆران، ته‌قه ل وێ ژۆرێ هاته كرن كو سه‌ركردان تێدا دكۆمبوونێ دا بوون، ئه‌ڤه بكارئينانا هێزا چه‌كدارى يا حزبى يه وبزاڤه‌كا تيرۆرستى يه وژئه‌گه‌رێ وێ هێرشێ شۆفێرێ مالپه‌رێ خه‌ندان گيانێ خوه ژده‌ست دا”.
ئه‌ڤرۆ نيوز، نيوار محه‌مه‌د سه‌ليم:
به‌رپرسێ مه‌كته‌با هه‌لبژارتنێن پارتى ديموكراتى كوردستان ل لقا شنگال راگه‌هاند كو هێشتا ده‌نگێن كه‌مپێن ئاواران نه‌هاتينه هژمارتن و هه‌تا ئه‌و ده‌نگ نه‌هێنه هژمارتن هێزا دروست يا پارتى ديار نابيت.
جه‌عغه‌ر شنگالى، به‌رپرسێ مه‌كته‌با هه‌لبژارتنێن پارتى ديموكراتى كوردستان ل لقا شنگال بۆ ئه‌ڤرۆ نيوز گۆت: “هێشتا ده‌نگێن ئاوارێن شنگال ل ناڤا كه‌مپان نه‌هاتينه ژێك جودا كرن و ژ به‌ر هندێ ژى نه‌شێين رێژا دروست يا ده‌نگدان ل شنگال رابگه‌هينين”.
زێده‌تر گۆت: “ئه‌م گه‌له‌ك د گه‌شبينين و پارتى دێ سه‌ركه‌فتنه‌كا گه‌له‌ك مه‌زن ب ده‌ست خوه ڤه ئينيت، به‌لێ ژ به‌ر كو هێزا ده‌نگێن شنگال د كه‌مپێن ئاواران دايه، هێشتا نه‌شيێن بێژين كا چه‌ند به‌ربژارێن شنگال سه‌ركه‌فتينه”.
ل سنورێ قه‌زا شنگال و كه‌مپێن ئاوارێن شنگال نێزيكى 185 هزار ده‌نگده‌ران مافێ ده‌نگدانێ هه‌بوو و رێژه‌كا باش ژ وان ده‌نگده‌ران ده‌نگێ خوه داينه.
پێشتر عسمه‌ت ره‌جه‌ب، به‌رپرسێ لقا 14 ل نه‌ينه‌وا بۆ ئه‌ڤرۆ نيوز راگه‌هاند كو پارتى ديموكراتى كوردستان ل سنورێ پارێزگه‌ها نه‌ينه‌وا حه‌فت كورسى مسوگه‌ر كرينه و شه‌رى بۆ كورسيا هه‌شتێ دكه‌ت و ليستا ئێكێ يا وێ پارێزگه‌هێ يه.
ب ره‌نگه‌كێ گشتى ل سنورێ پارێزگه‌ها نه‌ينه‌وا رێژا پشكداريكرن د هه‌لبژارتنێن گشتى يێ عيراقي دا گه‌هشتبوو 42%ێ.
ئه‌ڤرۆنيوز:
به‌رپرسه‌كێ پارتى ل به‌غدا راگه‌هاند، ب گۆره‌ى ئه‌و ئه‌نجامێن ده‌ستپێكى ئه‌وێن بده‌ست مه كه‌فتين، دگه‌شبينين كورسيه‌كێ بده‌ستڤه‌بينين.
سه‌باح ئاكره‌یی، كارگێرێ لقێ پێنج يێ پارتی دیموكراتی كوردستان ل به‌غدا گۆت” ل پارێزگه‌ها به‌غدا رێژا پشكداريا خه‌لكى دپرۆسا ده‌نگدانێ دا 35% بوو، ئه‌ڤه ژى دبيته ئه‌گه‌ر كو به‌ربژاران پێدڤى ب ده‌نگێ كێمتر هه‌بيت بۆ سه‌ركه‌فتنێ، چونكى هژمارا ده‌نگده‌ران يا كێمبوو كه ئه‌و چه‌نده دبه‌رژه‌وه‌نديا مه‌دا بوو ومه شه‌نسه‌كێ مه‌زن يێ هه‌ى كو به‌رژارێ مه سه‌ركه‌فتنێ ب ده‌ستڤه‌بينيت”.
سه‌باح ئاكره‌یی زێده‌تر بۆ مالپه‌رێ فه‌رميێ پارتى گوت” ب گۆره‌ى وان ئه‌نجامێن ده‌ستپێكى ئه‌وێن گه‌هشتينه مه، به‌ربژارێ مه ل سه‌رجه‌مێ ده‌نگێن بنگه‌هه‌كى گه‌له‌ك ده‌نگ يێن ب ده‌ستڤه‌ئيناين، له‌وما ئه‌م دگه‌شبينين كورسيه‌كێ ل به‌غدا ب ده‌ستڤه‌بينين، ئه‌ڤه ژى سه‌ركه‌فتنه‌كا مه‌زنه بۆ پارتى كو پشتى روودانێن 16 ئوكتۆبه‌رێ كورسيه‌كێ ل به‌غدا ب ده‌ستڤه بينين”.
دياركر” كوردێن به‌غدا ل پتريا ده‌ڤه‌رێن پارێزگه‌ها به‌غدا ده‌نگ ب به‌ربژارێ پارتى ديموكراتى كوردستان دايه”.
ئه‌ڤرۆنيوز:
سه‌ركرده‌كێ ليستا فه‌تح ب سه‌رۆكاتيا هادى عامرى راگه‌هاند، ئه‌و كه‌سێن ئاسنێن لافيته وپۆسته‌رێن بانگه‌شا به‌ربژارێن هه‌لبژارتنان ل عيراقێ برين، پتر بوون ژ ده‌نگده‌ران.
كه‌ريم نورى، سه‌ركردێ ليستا فه‌تح كو ئه‌و ليسته ژ ميليشيێن حه‌شدا شه‌عبى پێكهاتيه وپشكدارى دهه‌لبژارتنێن جڤاتا نوونه‌رين عيراقێ دا كريه بۆ ده‌زگه‌هێن راگه‌هاندنێ يێن عيراقى گۆت” كێمبوونا رێژا پشكداريێ دهه‌لبژارتنان دا زه‌نگه‌كا مه‌ترسيداره بۆ سياسه‌تمه‌داران”.
كه‌ريمى داخوازكر پێداچوون ب سياسه‌ت وعه‌قليه‌تا حوكمرانيێ پشتى سالا 2003 بهێته كرن، چونكى وه‌لاتيێن عيراقێ ب نه‌چوونێ بۆ سه‌ر سندووقێن ده‌نگدانێ، توره‌ييا خوه ل به‌رانبه‌ر سياسه‌تمه‌دارێن وه‌لاتى نيشان دا.
دياركر ژى” ئه‌و هژمارا كه‌سێن پشكدار بووين دراكرنا ئاسنێن د بانگه‌شا هه‌لبژارتنان دا هاتينه بكارئينان، دده‌مێ دو يان سێ ده‌مژمێران دا، كو ب گوژمه‌كێ پاره‌ى دێ فروشن، گه‌له‌ك زێده‌تر بوو ژ هژمارا كه‌سێن پشكدارى دده‌نگدانێ دا كرى”.
ل دووڤ ئامارێن كۆمسيۆنا بلند يا هه‌لبژارتنان ل عيراقێ 44% ژ ده‌نگده‌رێن عيراقێ پشكدارى دهه‌لبژارتنان دا كر، ئانگو ب ڤى شێوه‌ى 46% ژ ده‌نگده‌ران پشكدارى نه‌كريه.
ئه‌ڤرۆنيوز:
سه‌رۆكێ فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند، پارتى ژ ده‌نگده‌ران وئێكه‌تيێ ژ ميليشيێن حه‌شدا شه‌عبى حه‌قێ (ئاخ فرۆشى) يا خوه وه‌رگرت.
ئومێد خۆشناو، سەرۆکێ فراکسیۆنا پارتی ل پەرلەمانی کوردستان ل به‌رپه‌رێ خوه ل سه‌ر تۆرا جڤاكى يا فه‌يسبووكى به‌لاڤكر” گه‌لێ كوردستانێ ل به‌رامبه‌ر خه‌باتا نه‌ته‌وى يا پارتى، حه‌قێ وێ حزبێ دايێ ودهه‌لبژاتنان دا ب سه‌ر ئێخست”.
ئومێدى گۆت ژى” سه‌ره‌راى وى هه‌موو شه‌رێ ده‌روونى وتيرۆرا هزرى، خه‌لكێ كوردستانێ پارتى بجه نه‌هێلا وده‌نگ پێدا”.
دياركر ژى” ئێكه‌تيێ حه‌قێ خيانه‌تا 16 ئوكتۆبه‌رێ وراده‌ستكرنا كه‌ركووكێ ب ميليشيێن حه‌شدا شه‌عبى وئيرانێ وه‌رگرت ووان ميليشيان وئيرانێ هه‌ر چ ژده‌ستێ وان هاتى، سه‌خته‌كارى بۆ ئێكه‌تيێ دهه‌لبژارتنان دا كر”.
ئاشكراكر ژى” حزبێن سلێمانيێ ژبه‌ر بێ ده‌نگيا وان به‌رامبه‌ر خيانه‌تا 16 ئوكتوبۆرێ، نوكه سزايێ وێ بێ هه‌لويستيێ وه‌ردگرن وهه‌ر چ ونه‌حه‌قيه‌كا به‌رامبه‌ر وان هاتبيته كرن، بێ ده‌نگى دهێته رێيا وان وداديێ ناكه‌ت، چاوان بێ ده‌نگى هه‌لبژارت، پێدڤيه وه‌سا ژى ب بێ ده‌نگى قه‌بوول بكه‌ن وحه‌قێ خوه وه‌رگرت”.
ئەڤرۆ نیوز، نەوزاد ھلۆری:
پارتی دیموکراتی کوردستان ل بازنا پارێزگەھا نه‌ينه‌وا حەفت کورسی مسوگەرکرینە و کورسیا ھەشتێ ژی ب سیستەمێ سانت لیگۆ دێ بو پارتی بیت و ب ڤی ئەنجامى پارتی دکەڤیتە بەرا ھەموو لیست و قەوارێن سیاسی ل مووسل و ل رێزا ئێکێ دھێت.
عسمەت رەجەب بەرپرسێ لقێ 14ێ پارتی دیموکراتی کوردستان ل نه‌ينه‌وا بۆ ئەڤرۆ نیوز گۆت: (ب گورەی ئەنجامێن دەستپێکی یێن ھەلبژارتنێن پەرلەمانێ عیراقێ ل بازنێ نه‌ينه‌وا پارتی دیموکراتی کوردستان حەفت کورسی مسوگەر کرینە و کورسیا ھەشتێ رەنگە ب سیستەمێ سانت لیگۆ بۆ پارتی بکەڤیت).
زێدەتر گۆت: (حەشد سەعبی تەزویر و رێگریەکا زور ل دەنگدەر و بەربژارێن پارتی ل بازنێ نه‌ينه‌وا کریە، هه‌كه‌ر پارتی دا دەنگێن زێدەتر ب دەست خوه ڤە ئینیت).
ب گورەی ئاخفتنێن بەرپرسێ لقێ پارتی ل نه‌ينه‌وا لیستا پارتی نێزیکێ 600 ھزار دەنگان ب دەست خوه ڤە ئینایە و ل بارا رێزبەندا بەربژاران ژی گوت: (ھەتا نھا مە چو رێزبەندی بۆ بەربژاران نەکرینە، بەلێ ئەم یێ بزاڤان دکەین کو ھەموو زانیاریان کۆم بکەین و رێزبەندیا بەربژاران دەربێخین و بەلاڤ بکەین).
نيشاندان