ئه‌ڤرۆ نيوز:

نێچيرڤان بارزانى، سه‌رۆكێ حوكمه‌تا هه‌رێما كوردستانێ سپێدێ زوو ل هه‌ولێرا پايته‌خت ده‌نگێ خوه‌ دا و كۆنگره‌كێ رۆژنامه‌ڤانى ژى گرێدا.

نێچيرڤان بارزانى، پشتى ده‌نگدانێ د كۆنگره‌كێ رۆژنامه‌ڤانى دا گۆت: “بۆ گه‌لێ كوردستانێ و عيراقێ رۆژه‌كا گرنگ و مێژوويى يه‌، پرۆسه‌كا ديموكراتى كو د رێيا سندوقێن ده‌نگدانێ دا نوونه‌رێن خوه‌ ده‌ستنيشان بكه‌ن. بۆ مه‌ گه‌له‌ك يا گرنگه‌ وه‌لاتى پشكداريه‌كا گه‌رم بكه‌ن. نوكه‌ باران يا دباريت، هيڤيدارم باران بارين نه‌بيته‌ ئه‌گه‌رێ ساكرنا چو لايه‌كى و هه‌موو لايه‌ك بچنه‌ سه‌ر سندوقێن ده‌نگدانێ چونكو بۆ مه‌ ئه‌ڤ هه‌لبژارتنه‌ گه‌له‌ك د گرنگن”.

سه‌رۆك وه‌زيرێن هه‌رێما كوردستانێ د به‌رسڤا پرسياره‌كێ دا بۆ پێكئينانا حوكمه‌تا داهاتى يا عيراقێ ب زۆرينه‌ گۆت: “هه‌ر لايه‌نه‌ك بێ هه‌ڤپه‌يمانى نه‌شێت حوكمه‌تێ پێك بينيت، ئه‌ڤه‌ يا روونه‌، وه‌سان دبينن كو حوكمه‌تا زۆرينه‌ د به‌رژه‌وه‌نديا عيراقێ دا نينه‌، ب تايبه‌ت ل گه‌ل پێكهاتێ كورد، پدڤێت به‌رچاڤ بهێته‌ وه‌رگرتن و هوسان د به‌رژه‌وه‌ندا عيراقێ دايه‌ هه‌كه‌ روو بده‌ت.

نێچيرڤان بارزانى گۆت: “هيڤيدارين ئه‌ڤه‌ ببيته‌ ده‌سپێكه‌كا قوونه‌كا نوو ل عيراقێ، ئه‌ڤ قووناغا پشتى داعشه‌ و دڤێت گرنگيێ بده‌نه‌ خزمه‌نگۆزاريان ل هه‌موو عيراق و هه‌رێما كوردستانێ ژى. وه‌سان دبينين بێ چاره‌كرنا كێشێن ناڤبه‌را هه‌ولێر و به‌غدا چو پێڤه‌چوونه‌ك ل عيراقێ ناهێته‌ ديتن”.

ده‌رباره‌ى كێشێن سيسته‌مێ ده‌نگدانێ ب ره‌نگه‌كێ ئه‌لكترۆنى، نێچيرڤان بارزانى، گۆت: “ئه‌ڤ سيسته‌مه‌ يێ نوو يه‌، ئه‌گه‌رێ هه‌ى كو يێ ب ساناهى نه‌بيت، هه‌تا كو فێر دبن و ب كار بينن، ب گۆره‌ى هه‌موو پيڤه‌ران ئه‌ڤ سيسته‌مه‌ باشتره‌ و جارا ئێكێ يه‌ ل عيراقێ دهێته‌ ب كارئينان، د ده‌نگدانا تايبه‌ت دا مه‌ ديت كو گه‌له‌ك نه‌شيان ده‌نگى بده‌ن، هيڤيدارم كۆمسيۆن كار بۆ وێ چه‌ندێ بكه‌ت ئه‌و كێشه‌ نه‌بنه‌ رێگر ل به‌ر سينگێ وه‌لاتيان و مافێ ده‌نگدانێ نه‌سۆژيت”.

ده‌رباره‌ى وه‌رگرتنا پۆستێ سه‌رۆك كۆمارێ عيراقێ بۆ كوردان، سه‌رۆك وه‌زيرێن هه‌رێما كوردستانێ گۆت: “كێشا مه‌ ل به‌غدا پۆست نينن، كێشا گه‌لێ كوردستانێ يه‌، كێشا ماددێ 140 و داهاتى يه‌، ئه‌ڤه‌ كێشێن رژدن و دڤێت بهێنه‌ ئێكلاكرن. مافێ مه‌يه‌ ژى وه‌كو پێكهاته‌كێ سه‌ره‌كى يێ عيراقێ، پۆسته‌كێ سيادى مه‌ ل به‌غدغ هه‌بيت كو ئێك ژ وان پۆستان سه‌رۆك كۆماره‌ و ب پشت راستى دڤێت ئێك ژ وان پۆستان بۆ كوردان بيت”.