ئه‌ڤرۆنيوز:

ئاكنجيێن گونده‌كێ ب سه‌ر باژێرێ ديانا ل سنورێ قه‌زا سۆران ب هه‌موو شێوه‌كى بانگه‌شا هه‌لبژاتنێن په‌رله‌مانێ عيراقێ ل گوندێ خوه‌ قه‌ده‌غه‌ دكه‌ن وئه‌گه‌رێ وێ چه‌ندێ ژى دزڤرينن كو ناخوازن هه‌ستيارى ودوبه‌ره‌كى دناڤبه‌را بنه‌مالێن گوندى دا دروست ببيت.

كازم ئه‌سعه‌د، موختارێ گوندێ هه‌سنان گۆت” گوندێ مه‌ ل بنارێ چيايێ حه‌سه‌ن به‌گى يه‌ كو زێده‌تر ژ 70 خێزانان تێدا دئاكنجى نه‌ كو مژوولى كارێ ئاژه‌لدارى وچاندنێ نه‌، مه‌ بريار دايه‌ بانگه‌شا هه‌لبژارتنێن په‌رله‌مانێ عيراقێ ئه‌نجام نه‌ده‌ين”.
موختارێ گوندێ هه‌سنان زێده‌تر بۆ باسنيوز گۆت” په‌يوه‌نديێن جڤاكى يێن خه‌لكێ گوندى گه‌له‌ك ب هێزن وخودان كه‌لتۆره‌كێ جوان وره‌سه‌نن، ل پێناڤى به‌رده‌وامبوونا ڤان په‌يوه‌نديان دناڤبه‌را واندا، خه‌لكێ گوندى ب ئێك ده‌نگ بريار دايه‌ ب هه‌موو شێوه‌كى بانگه‌شا هه‌لبژارتنان بۆ په‌رله‌مانێ عيراقێ قه‌ده‌غه‌ بكه‌ن ورێ ب چو به‌ربژاره‌كى وحزب ولايه‌نه‌كى نه‌ده‌ن پۆسته‌ر ودرووشمێن خوه‌ ل گوندى به‌لاڤ بكه‌ن تاكو نه‌بيته‌ ئه‌گه‌رێ وێ چه‌ندێ كو دلێ خه‌لكێ گوندى، ب تايبه‌تى گه‌نجان، ژ هه‌ڤدو بمينيت وروو ب روو ئێك ببن”.

دياركر ژى” ل گه‌ل وێ چه‌ندێ كو بانگه‌شه‌ ل گوندێ مه‌ قه‌ده‌غه‌يه‌، به‌لێ ژبۆ ڤه‌گه‌راندنا مافێن مه‌ يێن دستوورى، ئه‌ركى هه‌ر تاكه‌كى يه‌ ل هه‌رێما كوردستانێ به‌ر ب سندووقێن ده‌نگدانێ بچيت، ئه‌م ژى وه‌كو ئاكنجيێن گوندێ هه‌سنان ب شێوه‌كێ گشتى ل رۆژا ده‌نگدانێ دێ ب گه‌رمى به‌ر ب سندووقێن ده‌نگدانێ چين وده‌نگێ خوه‌ ده‌ين”.

ئه‌ڤرۆنيوز:

ئه‌ندامه‌كێ مه‌كته‌با سياسى يا پارتى ديموكراتى كوردستان راگه‌هاند، هه‌كه‌ به‌غدا دستوورى بجه نه‌ئينيت وسازان وهه‌ڤپشكيا راسته‌قينه‌ بۆ كوردان نه‌زڤريت ل عيراقێ، دێ كورد رێيا سه‌ربخوه‌يێ گريت.

رۆژ نورى شاوه‌يس، ئه‌ندامێ مه‌كته‌با سياسى يا پارتى بۆ كوردستان 24 گۆت” پێدڤيه‌ ئه‌م هه‌موو بزاڤێ بكه‌ين دستوورێ عيراقێ بهێته‌ بجهئينان، هه‌روه‌سا حوكمه‌ته‌كا هه‌ڤپشكيا راسته‌قينه‌ ل سه‌ر بنه‌مايێ سازانێ وهه‌ڤپشكيا راسته‌قينه‌ بهێته‌ دروستكرن، هه‌كه‌ ئه‌ڤه‌ بهێته‌ كرن تا راده‌كێ بۆ كوردان باشه‌، به‌لێ هه‌كه‌ نه‌هێته‌ كرن تاكه‌ رێيا مه‌ بابه‌تێ ريفراندۆمێ يه‌ كو درژد بين ل سه‌ر داخوازيا گه‌لێ مه‌ ئه‌وژى سه‌ربخوه‌يا كوردستانێ يه‌”.

ئه‌ڤرۆنيوز:

مه‌سرور بارزانى، ئه‌ندامێ مه‌كته‌با سياسى يا پارتى ديموكراتى كوردستان وشيره‌تكارێ جڤاتا ئاسايشا هه‌رێما كوردستانێ، ل كه‌رنه‌ڤالێ بانگه‌شا هه‌لبژارتنان بۆ ليستا 184 يا پارتى ديموكراتى كوردستان ل قه‌زا سۆران گۆتاره‌كێ پێشكێشكر.

مه‌سرور بارزانى، ئه‌ندامێ مه‌كته‌با سياسى يا پارتى دگۆتارا خوه‌دا راگه‌هاند” پێدڤيه‌ ده‌نگى ب وان به‌ربژاران بده‌ن كو هه‌وه‌ باوه‌رى پێ هه‌ى، ئه‌ڤ هه‌لبژارتنه‌ بۆ وێ چه‌ندێ يه‌ كو نوونه‌رێن راسته‌قينه‌ يێن هه‌وه‌ كو به‌رگريكارێن مافێن ره‌وايێن هه‌وه‌نه‌ هه‌لبژێرن، ژبه‌ر ڤێ چه‌ندێ ژى  ديتنا مه‌ مه‌زنترين به‌رگريكارێن مافێن نه‌ته‌وى ونيشتمانى يێن هه‌وه‌، به‌ربژارێن پارتى ديموكراتى كوردستانن”.

مه‌سرور بارزانى دياركر كو ئه‌ڤ هه‌لبژارتنه‌ دچاره‌نڤيسسازن ودێ چاره‌نڤيسێ هه‌وه‌ ل پاشه‌رۆژێ دياركه‌ت، ئه‌ڤ نوونه‌ره‌ دێ چن به‌رگريێ ژ مافێن هه‌وه‌ كه‌ن، ژ زه‌حمه‌ت وخه‌باتا هه‌وه‌ كه‌ن، ئه‌و نوونه‌ر ژى به‌ربژارێن پارتى ديموكراتى كوردستانن”.
رۆهنكر ژى” هوون ب ڤان هه‌لبژارتنان دێ ته‌حه‌ديا وان ده‌نگێن نه‌شاز كه‌ن يێن نه‌ڤێن ئارمانجێن هه‌وه‌ بده‌ستڤه‌بهێن، كو هه‌وه‌ ب خوه‌ ده‌نگ بۆ داى، له‌وما پێدڤيه‌ ده‌نگ ب وان هه‌ڤالان بده‌ن بۆ وێ چه‌ندێ ب هه‌موو لايه‌كى بێژن ئه‌م درژدين ل سه‌ر داخوازيا مافێن خوه‌ ل هه‌ر جهه‌كى بيت”.

گۆت ژى” شوره‌شێن كوردى بۆ پله‌ وپايان نه‌بوون، نه‌ ل به‌غدا ونه‌ ل وه‌لاته‌كێ دى، بۆ وێ چه‌ندێ ئاخ ووه‌لاتێ خوه‌ بپارێزين، پێشمه‌رگه‌ى خوينا خوه‌ رشت، نه‌بو پاره‌ وبۆ ئيمتيازاتان بوو، به‌لكو بۆ ئازاديێ بوو، له‌وما تاوانه‌ كوردستان بهێته‌ بچووككرن بۆ كێشا ئێمتيازات ومووچه‌ى، مه‌ كێشا ئازاديێ يا هه‌ى ول سه‌ر ڤێ چه‌ندێ ژى ئه‌م خودان هزاره‌ها شه‌هيد وئه‌نفالكريانه‌”.

مه‌سرور بارزانى خوياكر” ئه‌م خودان سه‌رۆكه‌كين كو ل هێلا به‌راهيێ يا سه‌نگه‌رێن به‌رگريێ بوو، كو نه‌هێلا كوردستان بهێته‌ داگيركرن، ل مه‌خموور وپردێ وسحێلا وتللوسقوف رێگرى ل داگيركرنا كوردستانێ كر، ئه‌م شانازيێ ب وى رابردووى دكه‌ين كو مه‌ ب سه‌دان وهزاران پيلانێن نه‌حه‌زێن مه‌ ژناڤبرن، خه‌ونا جاش وخوه‌فروشان مه‌ ژناڤبر كو دخواستن ئاخا كوردستانێ بده‌نه‌ ده‌ستێ داگيركه‌ران، له‌وما ئه‌م چو پشكه‌كا خه‌باتا خوه‌ دپه‌شێمان نينين وشانازيێ ب قوربانى وئاواره‌بوونا خوه‌ ژبێناڤێ گه‌لێ خوه‌ دكه‌ين، شانازيێ ب وێ چه‌ندێ دكه‌ين كو چو ده‌مه‌كى ئه‌م ژ به‌رپرسياره‌تيێ نه‌ ره‌ڤينه‌ ودێ هه‌ر ل گه‌ل هه‌وه‌ بين”.

ئاشكراكر ژى” پارتى بۆ وێ چه‌ندێ دروست نه‌بوويه‌ دژايه‌تيا چو لايه‌نه‌كێ كوردستانى بكه‌ت، به‌لكو بۆ دا به‌رگريكريێ ژ مافێن ره‌وايێن خه‌لكێ كوردستانێ بكه‌ت وپاشه‌رۆژه‌كا رۆهن بۆ هه‌وه‌ به‌رهه‌م بينيت، ئه‌وا دشيانێن مه‌دا بوو، مه‌ كر، هه‌كه‌ سه‌حكه‌نێ ئه‌و سه‌قامگيريا ل كوردستانێ هه‌ى، سه‌ره‌راى وان هه‌موو نه‌حه‌زێن هه‌ين، كوردستان يا بوويه‌ نموونا سه‌قامگيريێ، له‌وما سه‌حكه‌نه‌ رابردووى بزاننن كێ كار كريه‌ وسه‌حكه‌نه‌ هه‌ولێرێ ودهۆكێ، ئه‌وێ دبێژن پارتى ده‌ستهه‌لات هه‌بوو، به‌لێ پارتى ب كريار نه‌شيايه‌ ئه‌و ده‌ستهه‌لاتا ل زۆنا هه‌مه‌رنگ هه‌ى، ب سه‌پينيت، ئه‌و ده‌ستهه‌لاتا ئيدارى كو ل زۆنا هه‌مه‌ره‌نگ، نوكه‌ ماف نينه‌ په‌نجا تۆمه‌تێ بۆ پارتى درێژ بكه‌ت، هه‌ر ده‌مێ شيان زۆنا هه‌مه‌ره‌نگ وه‌كو هه‌ولێرێ ودهۆكێ لێ بكه‌ن، وى ده‌مى بلا بهێن وداخواز بكه‌ن وبێژم وه‌رن ده‌نگى بۆ مه‌ بده‌ن”.

مه‌سرور بارزانى دووپاتى ل سه‌ر وێ چه‌ندێ كر”  هه‌موو زولم وسته‌مێن ب سه‌ر ملله‌تێ مه‌ دا هاتين ل بيرا مه‌نه‌، نه‌كو يێن سالا 1975 به‌لكو يێن زووتر ژى، ‌ 16 ئوكتۆبه‌رێ ژى يا ل بيرا مه‌، كا چاوان كوردستان هاته‌ فرۆتن، ل بيرا مه‌يه‌ كا چاوان خيانه‌ت ل كه‌ركووكێ وپێشمه‌رگه‌ى وكوردستانێ هاته‌ كرن، چاوان دا ده‌ستێ داگيركه‌ران، ل بيرا مه‌يه‌ ده‌مێ وان داگيران دكر، چاوان پێشمه‌رگێن قاره‌مان ل پردێ تاكو سحێلا به‌رگرى دكر، له‌وما ب قێرى وهاواران نه‌ ديرۆك دهێته‌ شێواندن ونه‌ خيانه‌ت دهێته‌ ژبيربرن، من پێشتر ژى گۆتبوو كو مه‌ پێشبينى نه‌دكر كه‌ركووك بهێته‌ داگيركرن، راسته‌ ودبێژن سياسه‌ت ب پێشبينيان ناهێته‌ كرن، ئه‌وژى راسته‌، به‌لێ دبێژم مه‌ پێشبينى نه‌دكر نوكه‌ ژى ل كوردستانێ كه‌سه‌ك هه‌بيت خيانه‌تێ بكه‌ت”.