ئه‌ڤرۆنيوز:
ئه‌ندامه‌كێ مه‌كته‌با سياسى يا پارتى ديموكراتى كوردستان راگه‌هاند، پارتى ب كريار بۆ گه‌لێ كوردستانێ وعيراقێ ووه‌لاتێن هه‌رێمى وهه‌موو جيهانێ يا سه‌لماندى كو تنێ ئه‌و لايه‌نێ سياسى يه ل ناڤ هه‌رێما كوردستانێ كو كارى بۆ سه‌ربخوه‌يا كوردستانێ دكه‌ت.
كه‌مال كه‌ركووكێ، ئه‌ندامێ مه‌كته‌با سياسى يا پارتى، ئه‌ڤرۆ چارشه‌مبى 2/5/2018 دكه‌رنه‌ڤاله‌كێ ليستا پارتى يا هژمار 184 ل باژێرێ به‌رده‌ره‌ش گۆت” دێ پشكداريێ دڤان هه‌لبژارتنان دا كه‌ين، چونكى چاره‌نڤيسێ سياسى ل عيراقێ وه‌رچه‌رخانه‌كا گه‌له‌ك گرنگ ومه‌ترسيدار يا ل پێش، بۆ وێ چه‌ندێ خودان هزرا ديموكراسى سه‌ركه‌فتنێ بده‌ستڤه بينيت ونه‌هێلين عيراق به‌ر ب ديكتاتوريه‌تێ بچيت.
كه‌ركووكێ رۆهنكر ژى” پارتى ب كريار يا سه‌لماندى بۆ گه‌لێ كوردستانێ وعيراقێ ولاتين هه‌رێمى وهه‌موو جيهانى كو ئه‌و لايه‌نێ سياسى يێ ئێكانه‌يه ل ناڤ كوردستانێ كارى بۆ سه‌ربخوه‌يا كوردستانێ دكه‌ت”.
خوياكر ژى كو پارتى سه‌ركردايه‌تيه‌كا ب هيز ورابردويه‌كێ پاقژ يێ هه‌ى وده‌ستكه‌فت بۆ كوردستانێ يێن ئيناين .
ئه‌ڤرۆنيوز:
سه‌رۆك وه‌زيرێن هه‌رێما كوردستانێ، دديداره‌كێ دا ل گه‌ل وه‌زيرێ پيشه‌سازى وكانزايێن عيراقێ، پێنگاڤێن ئاساييكرن وبه‌ر ب پێشڤه‌چوونا په‌يوه‌نديێن دناڤبه‌را هه‌ولێرێ وبه‌غدا بلند نرخاند كو بووينه ئه‌گه‌رێ چاره‌كرنا هنده‌ك كێشان.
نێچيرڤان بارزانى، سه‌رۆك وه‌زيرێن هه‌رێما كوردستانێ، ئه‌ڤرۆ چارشه‌مبى 2/5/2018 پێشوازى ل محه‌مه‌د شه‌ياع ئه‌لسودانى وه‌زيرێ پيشه‌سازى وكانزايێن عيراقێ وشانده‌كێ دگه‌لدا كر.
وه‌زيرێ عيراقى خوه‌شحاليا ب سه‌ره‌دانا هه‌رێمێ وپشكداريكرنێ دكۆنفرانسێ پێشڤه‌چوونا په‌يوه‌نديێ ئابوورى دناڤبه‌را هه‌رێما كوردستانێ وئيرانێ كو ل هه‌ولێرێ ب رێڤه دچيت، ده‌ربرى.
محه‌مه‌د شه‌ياع پێنگاڤێن ئاساييكرن وبه‌ر ب پێشڤه‌چوونا په‌يوه‌نديێن دناڤبه‌را هه‌ولێرێ وبه‌غدا بلند نرخاند كو بووينه ئه‌گه‌رێ چاره‌كرنا پشكه‌ك ژ كێشان، به‌رده‌واميا ديالۆكا هه‌ولێرێ وبه‌غداژى بۆ چاره‌كرنا هه‌موو وان كێشێن ماين ب پێدڤى زانى.
لايێ خوه‌ڤه نێچيرڤان بارزانى سوپاسيا وێ سه‌ره‌دانێ وپشكداريا وه‌زيرێ پيشه‌سازيا عيراقێ دكۆنفرانسى دا كر كو بۆبه‌ره‌وه‌ندى وڤه‌ژاندنا ئابوورێ هه‌رێما كوردستانێ وعيراقێ گرنگيا خوه يا هه‌ى وسوپاسيا هه‌موو وان كه‌س ولايه‌نان كر كو هاريكار بوون بۆ ئاساييكرنا په‌يوه‌نديێن هه‌ولێرێ وبه‌غدا وچاره‌كرنا پشكه‌ك ژ كێشان وهيڤى خواست دانوستاندنێن هه‌ولێرێ وبه‌غدا بۆ چاره‌كرنا هه‌موو كێشان به‌رفره‌هتر ببن.
سه‌رۆك وه‌زيرێن هه‌رێما كوردستانێ هيڤى خواست ژى كو په‌يوه‌ندى وهه‌ڤكارى وهاريكاريێن دناڤبه‌را داموده‌زگه‌هێن هه‌ردو حوكمه‌تێن هه‌رێمێ وعيراقا فيدرال به‌رفره‌هتر ببن.
ئه‌ڤرۆنيوز:
ئه‌ندامه‌كێ كۆمسيۆنا بلند يا هه‌لبژارتنان ل عيراقێ ئاشكرا دكه‌ت، چو ناڤێن دياركرى يێن ئه‌ندامێن داعشێ ل ده‌ف وان نين تاكو كارتێن بايۆمه‌ترى يێن ده‌نگدانێ نه‌ده‌نێ.
مالپه‌رێ سپۆتنيك يێ رووسى راپۆرته‌كا كورت ل سه‌ر كارتا بايۆمه‌تريا وان كه‌سان دروستكريه ئه‌وێن ب سه‌ر داعشێ ڤه بوون ونوكه ژلايێ دادگه‌هێ ڤه دداخوازكرى نه.
حازم ردينى، ئه‌ندامێ كۆمسيۆنا بلند يا هه‌لبژارتنان ل عيراقێ، ئه‌ڤرۆ چارشه‌مبى 2/5/2018 ب مالپه‌رێ ناڤبرى گۆت” كۆمسيۆنێ چو ناڤ ل ده‌ف نينن تاكو بزانين چ كه‌سه‌ك ئه‌ندامێ داعشێ بوو تا ژ مافێ ده‌نگدانێ دوور بێخيت”.
ده‌مێ رێكخراوا تيرۆرستى يا داعشێ ل چه‌ند ده‌ڤه‌رێن عيراقێ ده‌ستهه‌لاتا خوه سه‌پاندى، گه‌له‌ك وه‌لاتيێن عيراقى لايه‌نگرێن وێ رێكخراوێ بوون، نوكه ژى پتريا وان ژلايێ دادگه‌هێ ڤه دداخوازكرى نه.
ل دۆر وێ چه‌ندێ ئايا ئه‌و تيرۆرسته دشێن پشكداريێ دهه‌لبژارتنان دا بكه‌ن، وى ئه‌ندامێ كۆمسيۆنێ سه‌ره‌راى دووپاتكرنا وى كو ليستێن ب وان جۆرێن ناڤان ل ده‌ف وان نينه گۆت” چه‌كدارێن داعشێ نه‌شێن پشكداريێ دهه‌لبژارتنان دا بكه‌ن، له‌وما كارتێن ده‌نگدانێ ژى وه‌رناگرن”.
سه‌ربه‌ست مسته‌فا سه‌رۆكێ به‌رێ يێ كۆمسیۆنا بلند يا هه‌ڵبژاردنان ل عيراقێ دبێژيت “ئه‌و ده‌ڤه‌رين پێشتر دبن ده‌ستهه‌لاتا داعشێ دابوون، مه كار لێ نه‌كريه”.
گۆت ژى” ده‌زگه‌هێن ئه‌منى دشێن ناڤێن وان تيرۆرستان بده‌نه ده‌زگه‌هێن ئه‌منى بۆ وێ چه‌ندێ ب پرۆگرامه‌كێ تايبه‌ت كارتێن ده‌نگدانێ يێن وان جۆره كه‌سان بهێنه هه‌لوه‌شاندن”.
گه‌له‌ك ژ وه‌لاتيێن عيراقێ نيگه‌رانيا خوه دياردكه‌ن كو هنده‌ك لايه‌نێن سياسى يێن عيراقى ب شێوازه‌كێ تايبه‌ت كارتێن ده‌نگدانێ يێن ئه‌ندامێن داعشێ دبه‌ن وبۆ مه‌ره‌مێن خوه بكاردئينن.
ئەڤرۆ نیوز ، زنار تۆڤی :
په‌یڤدارێ حوکمه‌تا هه‌رێما كوردستانێ ره‌تكر و دا دیار کرن، كو حوکمه‌تا هه‌رێمێ و توركیا چ رێككه‌فتنه‌ك نەکرینە بۆ هاتنا سوپایێ توركیا بۆ ناڤ ئاخا هه‌رێما کوردستانێ.
سه‌فین دزه‌یی په‌یڤدارێ حوکمه‌تا هه‌رێما كوردستانێ ئەو ژی گوتیە: هاتنا سوپایێ توركیا بۆ ناڤ ئاخا هه‌رێمێ ڤه‌دگه‌ریته ڤە بۆ رێككه‌فتنه‌كا سالێن هه‌شتیان،کو دناڤبه‌را توركیا و رژێما وی ده‌می یا عێراقێ دا هاتیە ئەنجامدان و حوکمه‌تا هه‌رێمێ چو رێككه‌فتنه‌ك بۆ هاتنا هێزێن تورکیا بۆ ناڤ هه‌رێمێ نەکرینه.
هەروەسا گۆت ژی: هه‌بوونا هێزێن په‌كه‌كێ وه‌كریه كو هه‌موو ده‌مان ده‌ستدرێژی ل سه‌ر ئاخا هه‌رێما کوردستانێ بهێته كرن،دیسا حوکمه‌تا هه‌رێمێ ژی ب چو ره‌نگان قه‌بوول ناكه‌ت كو ئاخا كوردستانێ ببیته مه‌یدانا شه‌رێ چو ئالیان.
پەیڤدارێ حوکمەتا هەرێما کوردستانێ سه‌فین دزه‌یی ئەو ژی ئاشکرا کر:کو نابیت په‌كه‌كه چ به‌هانه‌یان بده‌ته ده‌ست توركیا كو ئاخا هه‌رێمێ ده‌رباز بكه‌ت و خه‌لكی ئاواره و ده‌ربه‌ده‌ر بكه‌تە ڤە.
ئەڤرۆ نیوز ، زنار تۆڤی :
وه‌زاره‌تا دارایی و ئابووری یا حوکمه‌تا هه‌رێما كوردستانێ ئه‌ڤرۆ راگه‌هاند،کو به‌لاڤكرنا مووچه‌یێ هەیڤا شواتێ دێ 5 ڤێ هەیڤێ یان به‌ری وی ژڤانی ده‌ست پێكه‌ت.
ل گۆر زانیاریێن ئه‌ڤرۆ نیوز ،کو به‌لاڤكرنا مووچه‌یێ هەیڤا شواتێ هێشتا بریارا دوماهیێ پێ ده‌رنه‌كه‌فتیه، لێ ژبه‌ركو به‌لاڤكرنا مووچه‌یێ هەیڤا بۆری ل 5 هەیڤێ ده‌ستپێكربوو، له‌وما یێ ڤێ هەیڤێ ژی دێ ل 5 یان ژی به‌ری وی ژڤانی ده‌ست پێكه‌ت.
هەروەسا وەزارەتا دارایی و ئابووری دیارکریە،کو دێ به‌لاڤكرنا مووچەی ل گۆره‌ی خشته‌یێ هەیڤا بوری بیت و دێ ژ وه‌زارتێن په‌روه‌ده و ساخله‌میێ ده‌ستپێكه‌ت.
هه‌روه‌سا ل دووڤ دا دێ وه‌زاره‌تا دارایی و ئابووری مووچه‌ی وه‌رگریت و پاش دێ یێ وه‌زاره‌تێن دی ده‌ست پێكه‌ن.
ئەڤرۆ نیوز ، زنار تۆڤی :
نێچیرڤان بارزانی، سەرۆكێ حوکمەتا هەرێما کوردستانێ راگه‌هاندیە کو هەرێما کوردستانێ و ئیرانێ پەیوەندیێن هەڤبەش هەنە و ئەم دێ دەڤەرەکا بازارێ ئازاد دروستكەین و د نوکە دا 359 كۆمپانیێن ئیرانی ل هەرێمێ کار دکەن.
نێچیرڤان بارزانی سەرۆكێ حوکمەتا هەرێمێ ئەڤرۆ چارشه‌مبی 2 گولانا 2018 ل چارەمین كۆنفرانسێ ئابووری یێ ل ژێر ناڤێ (پەرەپێدانا پەیوەندیێن ئابووری یێن دناڤبەرا هەرێما کوردستانا-عێراقێ و كۆمارا ئیسلامی یا ئیرانێ) گوتیە دێ گرنگیەکا زۆر ب پەیوەندیێن بازرگانی یێن هەرێمێ و ئیرانێ دەین و دێ هەموو بزاڤێن خوە ئێخینە کار بۆ باشتركرنا پەیوەندیێن دناڤبەرا کوردستانێ و ئیرانێ و دا.
هەروەسا سەرۆکێ حوکمەتا هەرێمێ گوت ژی:نوکە 359 كۆمپانێن ئیرانی تایێن خوە ل هەرێمێ هەنە و هەروەسا شەش ملیار دۆلار ئاڵوگۆرا بازرگانی دناڤبەرا هەرێمێ و ئێرانێ دا هەیە.
ئەو ژی دیارکر: 135 كارگەهێن ئیرانێ ل هەرێما کوردستانێ هەنە و سێ مەرزێن سەرەكی هەنە،ئەڤە و ل گەل پێنج مەرزێن لاوەكی ژی هەنە،دێ بزاڤێ کەین ئەو هەر پێنجێن دی ژی ببنە دەرگەهێن فەرمی.
نێچیرڤانی گوت ژی،دێ دەڤەرەکا بازارێ ئازاد ل پەروێزخان ڤەكەین دناڤبەرا ئیرانێ و هەرێما کورستانێ و دێ هەموو بزاڤان کەین بۆ باشتركرنا پەیوەندیێن مە ل گەل ئیرانێ،هەروەسا ئیرانێ د شەرێ داعش هاریكاریا مە کریە و جهێ رێزێ یە،دیسا ژ مێژە مە پەیوەندیێن باش ل گەل كۆمارا ئیسلامیا ئیرانێ هەنە و دێ بەردەوامیێ ژی پێدەین.
سەبارەت پەیوەندیێن دناڤبەرا هەولێرێ و بەغدا سەرۆكێ حوکمەتا هەرێمێ دیارکر پەیوەندیێن مە ل گەل بەغدا بەرەف پێشڤەچووینە،هەروەسا رێكخستنا پەیوەندیان د وارێ بازرگانی ل سەر بنەمایێ دستوری دناڤبەرا هەولێر و بەغدا دا كاریگەریەکا زۆر هەیە و د نوکە دا یا بەرەف باشتر دچیت.
ئەڤرۆ نیوز، نەوزاد ھلۆری:
گرۆپەک کو پێھاتبوون ژ کچ و کورێن ئێزدی و مەسیحی و موسلمان لسەر گورا بارزانی نەمر ل گوندێ بارزان رێبازا بارزانی نەمر دبەرھەمەکێ ھونەری دا بەحس کر، وەکو پشتەڤانی بو سەر ئێخستنا لیستا پارتی دیموکراتی کوردستان.
دڤی واریدا رێزان بارزانی پشکدارا ئەوی گروپی بو ئەڤرۆ نیوز گۆتک (ب مەرەما سەرئێخستنا لیستا 184 یا پارتی دیموکراتی کوردستان بو ھەلبژاردنێن جڤاتا نونەرێن عیراقێ گروپەکێ 10 کەسی کو پێھاتبوون ژ کچ و کورێن مەسیحی و موسلمان و ئێزدی ، رابوون ب ئەنجامدانا کارەکێ ھونەری کو دەربرین ل رێبازا بارزانی نەمر دکر دوارێ پێکڤە ژیانا ئولی و نەتەوەی ل کوردستانێ ب گشتی و دەڤەرا بارزان ب تایبەتی).
زێدەتر گۆت: (ئەڤ کارە بەرھەمێ کوردستان تیڤی بوویە و لسەر گورا بارزانی نەمر ل گوندێ بارزان ھاتیە چێکرن و ماوەیێ وێ نێزیکێ دو خولەکایە).
ئه‌ڤرۆ نيوز:
نێچيرڤان بارزانى، سه‌رۆك وه‌زيرێن هه‌رێما كوردستانێ د كۆنفرانسه‌كێ په‌ره‌پێدانا په‌يوه‌نديێن ئابوورى يێن ناڤبه‌را هه‌رێما كوردستان و ئيرانێ گۆتاره‌ك پێشكێش كر و تێدا راگه‌هاند: دێ ده‌ڤه‌ره‌كا بازرگانى ل په‌راوێزخان ل گه‌ل ئيرانێ دروست كه‌ين.
ئاماژه ب وێ چه‌ندێ ژى كر كو دێ بزاڤێ كه‌ن هنده‌ك ژ وان پێنج سنورێن لاوه‌كى يێن هه‌رێما كوردستانێ و ئيرانێ بكه‌نه سنورێن نێڤده‌وله‌تى.
ئەڤرۆ نيوز، ھەژار مەعروف:
چاڤەرێ دھێتەکرن ئەڤ شەڤە یاریا دوێ یا قوناغا پێش دووماھیا قارەمانیا چامپیونیز لیگا ئورۆپا دناڤبەرا رۆما و لیڤەرپول بھێتەکرن کو د یاریا ئێکێ دا یانا لیڤەرپول شیابوو سەرکەفتنەکا مەزن ل سەر نوونەرا پایتەختێ ئیتالیا یانا روما توماربکەت ب پێنج گولان بەرامبەر دو گولان و چاڤدرێرێن وەرزشی ل ئورۆپا وەسا دبینن لیڤەرپول نیڤا رێکا خوە بریە و یاریزانێن یورگن کلوپ وێ چەندێ قەبول ناکەن ئەوا رۆما ب سەرێ بەرشەلۆنا ئینای ل گەل لیڤەرپول دوبارە بکەن و بشێن ریمونتادەکا دی ل چامپیونیز لیگ توماربکەن.
رۆژنامەیێن ئیتالی وەسا دبینن رۆما ھەتا نوکە دەلیڤەیا دەربازبوونێ ھەیە و وەسا ژی خویادکەن ئەوا بشێت بەرشەلۆنا دوربێخیت ژی قارەمانیێ بوو وێ یا ب زەحمەت نابیت بشێن یانەکا وەکو لیڤەرپول ژی خوسارەت بکەن ب جوداھیا سێ گولان ھەردیسان یانا روما پشتەڤانەکێ ب ھێز ھەیە و ماوێ حەفتیەکێ ریکلام و پشتەڤانیەکا مەزن ژلایێ جەماوەرێ وێ ل یانێ دھێتەکرن تایبەت پشتی وێ سەرکەفتنا ل سەر کیفوفیرونا ب چار گولان بەرامبەر گولەکێ کو ئەو سەرکەفتنا ئەوێ دێ بیتە پالدەرەکێ مەزن بوو ئەنجامەکێ باشتر ل گەل لیڤەرپول توماربکەن .
ھەردیسان بەرەڤانێ لیڤەرپول ژی دێ بیتە رێیەکا باشتر بوو ھێرشبەرێن رۆما بشێن ھەر زیکا گڤاشتنا ل سەر بەرەڤانێ لیڤەرپول بکەت سەرەرای وێ چەندێ چەندین یاریزانێن بەرنیاس ل وێ یانێ ھەنە ل ھێلا بەرەڤانیێ لێ ل دووماھی یاریێن وێ ل خولا ئینگلتەرا و قارەمانیا چامپیونیز لیگ ھژمارەکا گولێن نە چاڤەرێکری ل سەر ھاتینە تومارکرن تایبەت یاریا بەرامبەر رۆما ل کێمتر ژ پێنج خولکان روما پشتی گڤاشتن ل سەر لیڤەرپول کری ب سانەھی شیا دو گولان بکەت لەورا ئەو راپورتێن رۆژنامەڤانی ل روما وەسا دبینن دێ رەوشا لیڤەرپول یا چەوا بیت ھەمە روما وەکو سیناریویێ یاریا بەرشەلۆنا ٩٠ دقیقا گڤاشتنێ ل سەر بکەت کو ل یاریا بوری ب ٥ خولکان دا دو گول سەر ھاتنە تومارکرن !.
ژ لایەکێ دیڤە راھێنەرێ رۆما دی فرانشیسکو گوتنەکا دی ھەبوو دیارکر یاریا لیڤەرپول دێ یا چیاواز بیت ژ بەرشەلۆنا ژبەرکو یانا ئینگلیزی شێوازەکێ گەلەک چیاواز ژ بەرشەلۆنا ھەیە ژلایێ کرنا یاری و شێوازێ ھونەری ڤە لەورا ل سەر ئەوان پێدڤی یە ماندیبوونەکا مەزنتر ببەن دو جاران ھندی یا بەرشەلۆنا ھەتا بشێن سەرکەفتنێ و پلێتا دەربازبوونێ مسوگەر بکەن.
راھێنەرێ روما ئاماژە ب وێ چەندێ ژی کر ئەو دبیننن ژی ھەتا ڤێ قوناغێ ئەو گەھشتین نە کارەکێ ب سانەھی بوو ئەو جەماوەرێ خوە پشت راستکەن یا ل سەر ئەوان دڤێ یاریێ دا زێدەتر پێشکێش بکەن و ئەو ب ئومێدن دێ سیناریویا یاریا بەرشەلۆنا دوبارە کەن ب ھەبوونا پشتەڤانێن یانێ و ل سەر ئەوان پێدڤی یە ئەو دەستپێکێ گولان توماربکەن و رێکێ نەدەن گول سەر بھێتە تومارکرن .
ژ لایەکێ دویڤە راھێنەرێ لیڤەرپول یورگن کلوب گوتنەکا چیاواز ژ ھەڤرکێن خوە ھەبوو دیارکر ئەو نە بەرشەلۆنا نە کو ب سانەھی خوە رادەستی تیما بەرامبەر بکەن رێز بوو ھەر تیمەکێ ھەنە لێ ئەوان بەرھەڤیێن باش بوو ڤێ یاریێ کرینە و ھزر ل ھەر ئەنجامەکێ نە چاڤەرێکری کریە لێ تومارکرنا سێ گولان ریمونتادەکێ ل سەر لیڤەرپول د قوناغاەکا ھەستیار دا دێ گەلەک یا ب زەحمەت بیت ژبەرکو ئەوان ل ھێلا پێشیی ئەو شیان ھەنە بشێن گولان توماربکەن راستە ل یاریا بوری دا ئەو شیان ماوێ کێمتر پێنج خولەکان دو گولان توماربکەن لێ ئەڤ چەندە نابیتە رێیەکا ب سانەھی ئەو بشێن ب سانەھی گولان ل سەر ئەوان توماربکەن و ئەو دبینت ئەوان ھەتا رادەیەکێ مەزن رێیا دەربازبوونا خوە مسوگەر کریە .
ھەردو یانان د مێژویا خوە دا د قارەمانیا چامپیونیز لیگ چار جاران بتنێ ھەمبەری ئێک یاری کریە ئەوژی یا ئێکێ ل سالا ١٩٨٤ ل یاریا دووماھیا قارەمانیێ بوو کو یانا لیڤەرپول شیا سەرکەفتنێ ل سەر یانا رۆما ل یاریگەھا ئولومپیک ل رۆما ل سەر روما توماربکەت ب لێدانێن پەنەلتیا و ب ناسناڤێ چامپیونیز لیگ بھێتە خەلاتکرن و یانا روما ژ ناسناڤێ ئێکێ بێ باربکەت و ل قارەمانیا ٢٠٠١-٢٠٠٢ دو جاران ھەردو یانە ھەمبەری ئێک بوون د قوناغا کومان دا ئەنجامدا روما ل یاریا ئێکێ وەکھەڤبوو بێ گول ل یاریا دوێ لیڤەرپول شیا سەرکەفتنێ توماربکەت ب دو گولان بێ بەرامبەر و دووماھی یاری یا وەرزێ ئەڤ سالە بوو کو ل یاریا حەفتیا بوری روما خوسارەت بوو ل گەل لیڤەرپول ب پێنج گولان بەرامبەر دو گولان و دڤێ یاریێ دا پێدڤێ یە ب جوداھیا سێ گولان روما سەرکەفتنێ ل سەر لیڤەرپول توماربکەت ھەتا ب گەھیتە دووماھیا قارەمانیێ .
نيشاندان