ئه‌ڤرۆ نيوز:

ل ھەرێما کوردستانێ سالانە چەندین کەس ب تۆمەتا بکارئینان و بازرگانیکرنێ ب مادێن بێھۆشکەر دھێنە دەستەسەرکرن و سەرۆکێ رێکخراوا بەرھنگاربوونا مادێن بێھۆشکەر ژی دبێژیت: مادێن بێھۆشکەر ل ئیرانێ تێتە ھەرێما کوردستانێ و باندێن مافیا بازرگانیێ دکەن بۆ وەلاتێن کەنداڤی ڤەدگوھێزن.

ئیبراھیم رەمەزان، سەرۆکێ رێکخراوا بەرەنگاربوونا مادێ بێھۆشکەر بۆ رۆژناما ئەڤرۆ گۆت “ھەرێما کوردستانێ پاقژترین دەڤەرە، ژ بەر ڤێ چەندێ مادێن بێھۆشکەر تێدا ناھێنە بەرھەم ئینان، ھەتا نوکە تنێ ئێک حالەت ھاتیە تۆمارکرن کو باندەکێ زەڤیەکا مادێن بێھۆشکەر چاندبو، بەلێ ژ لایێ ھێزێن ئەمنی ڤە ھاتە ژناڤبرن و تۆمەتبار ژی رادەستی دادگەھێ ھاتنەکرن.

ئاشکرا ژی کر، راستە بزاڤێن بەرھەم ئینان و چاندنا مادێن بێھۆشکەر ھەبوویە، بەلێ سەرنەگرتینە، مخابن مە ئاریشا بکارئینانا مادێن بێھۆشکەر ھەیە ل ھەرێما کوردستانێ سال بۆ سالێ کەسێن مادێن بێھۆشکەر بکار دئینن ھژمارا وان یا د زێدەبوونێ دا، پتریا مادێن بێھۆشکەرژی ل وەلاتێ ئیرانێ تێتە ھەرێما کوردستانێ راستەوخۆ ب رێیا سنوران، ھندەک جاران ژی ل ئیرانێ دھێنە پارێزگەھێن دی یێن عێراقێ و ل دووڤ دا تێتە ڤەگوھاستن بۆ ھەرێما کوردستانێ، ئەز دشێم بێژم ھەرێما کوردستانێ بوویە سەنتەرێ ڤەگوھاستنا مادێن بێھۆشکەر، چونکە ل ئیرانێ دەمێ تێتە ھەرێما کوردستانێ دھێتە ڤەگوھاستن بۆ وەلاتێن ئۆرۆپا و کەنداڤی، ژبەر کو وەلاتێن کەنداڤی ژلایێ مادیڤە باشترن و پارەیەکێ زۆر ددەن بۆ بدەستڤەئینانا مادێن بێھۆشکەر.

سەرۆکێ رێکخراوا بەرەنگاربوونا مادێن بێھۆشکەر گۆت ژی “دەزگەھێن ئاسایشا ھەرێما کوردستانێ ھەموو شیانێن خوە مەزاختینە بۆ دەستەسەرکرنا تۆمەتبارێن مادێن بێھۆشکەر بکاردئینن و بازرگانیێ دکەن، بەلێ مخابن زۆر جارا کەسێن ئێکێ ناھێتە دەستەسەرکرن، چونکو پتریا وان کەسان باندێن مافیانە و ب رێیا کەسێن دیکە دفرۆشن، سوپاس بۆ خودێ ل ھەرێما کوردستانێ دەزگەھێن پەیوەندیدار بەردەوام دووڤچوونێ دکەن.

ئیبراھیم رەمەزان دیار کر “ل ھەرێما کوردستانێ چەندین جۆرێن مادێن بێھۆشکەر ھەنە دھێنە بکارئینان، ژ وانا کریستال و ھێروین وحەشیش و تریاک، دگەل پێشکەفتنا جیھانێ ژی گۆھۆڕین ب سەر شێوازێ مامەلەکرن و بکارئینانا مادێن بێھۆشکەر دا ھاتیە، واتە ھندەک وەکی بەنیشتی دھێتە چێکرن ھندەک ھەیە وەکی دەزیێ قۆماشی تێتە چێکرن ھەتا نەھێتە گرتن ، رێیێن جودا تێنە بکارئینان، تنێ ئێک شاشی ھەیە ل ھەرێما کوردستانێ ئەو ژی تێکەلکرنا تۆمەتبارانە دگەل زیندانیێن دی، ڤێ چەندێ کاریگەری ھەیە و دڤێت حۆکمەت کەسێن ل سەر مادێن بێھۆشکەر دەستەسەر دکەت تێکەلی خەلکێ دی نەکەت، بەرۆڤاژی کاریگەری ھەیە ببنە باند دناڤا زیندانێ دا.

ئه‌ڤرۆ نيوز:

سەرۆکێ لیژنا سۆتەمەنیێ ل جڤاتا پارێزگەھا دھۆکێ راگەھاند کو جڤاتا پارێزگەھا دھۆکێ داخواز ژ حۆکمەتا عیراقێ کریە رۆژانە ملیۆن لیترێن پانزینێ بۆ دھۆکێ بھێنە دابینکرن و گۆت: ل وەرزێ ھاڤینێ رۆژانە پێدڤی ب ملیۆنەک و 700 ھزار لیترێن پانزینێ ھەیە و بۆ وەرزێ زڤستانێ ژی دھۆکێ پێدڤی ب نێزیکی ملیۆنەک و 400 ھزار لیترێن پانزینێ ھەیە و نھا پانزین ب تنێ ل چوار پانزینخانان دھێتە فرۆتن.

عەبدولسەمەد تێلی، سەرۆکێ لیژنا سۆتەمەنیێ ل جڤاتا پارێزگەھا دھۆکێ تایبەت بۆ ئەڤرۆ دیار کر، مە وەکو جڤاتا پارێزگەھا دھۆکێ و ھەردوو جڤاتێن ھەولێر و سلێمانیێ ب فەرمی داخواز ژ حۆکمەتا عیراقێ کریە کو ل سەر ھنارتنا پانزینێ یا بەردەوام بیت و نە ب تنێ ملیۆن لیتر بن، بەلکو بۆ ھەر رۆژەکێ ملیۆن لیتر بۆ دھۆکێ و ھەروەسا ب ھەمان رێژە بۆ پارێزگەھێن دیتر ژی بھێنە دابینکرن.

ئاشکرا ژی کر کو دھۆکێ ل وەرزێ ھاڤینێ رۆژانە پێدڤی ب ملیۆنەک و 700 ھزار لیترێن پانزینێ ھەیە و بۆ وەرزێ زڤستانێ ژی دھۆکێ پێدڤی ب نێزیکی ملیۆنەک و 400 ھزار لیترێن پانزینێ ھەیە و نھا پانزین ب تنێ ل چوار پانزینخانان دھێتە فرۆتن، بەلێ ئەگەر ئەڤ رێژا پێدڤی ھاتە دابینکرن، دێ ل ھژمارەکا زۆر یا پانزینخانان ئەڤ جۆرێ پانزینا حۆکمەتێ ھێتە فرۆتن.

سەرۆکێ لیژنا سۆتەمەنیێ ل جڤاتا پارێزگەھا دھۆکێ دا زانین ژی کو نھا پانزین ب تنێ ل سەر ترۆمبێلێن تەکسی و پاس و مینی پاس دھێتە دابەشکرن، بەلێ ئەگەر پرۆژەیێ وان سەرگرت و رێژا پانزینێ بۆ دھۆکێ و ھەرێمێ ژ حۆکمەتا عیراقێ زێدەتر ھات، بێگومان ل وی دەمی دێ پانزین ل سەر ھەموو ترۆمبێلێن تایبەت ژی ھێتە دابەشکرن بێ جوداھی.

خویاژی کر، ل پارێزگەھا دھۆکێ دێ دەست ب دابەشکرنا پانزینا حکوومی ھاتیە کرن و ل چوار پانزینخانان دێ لیترا پانزینێ ب 640 دیناران ھێتە دابەشکرن ب ناڤێ پانزینا حکوومی و و گۆت: حۆکمەتا عیراقێ ملیۆن لیترێن پانزینێ بۆ ڤێ مەرەمێ وەکو قۆناغا ئێکێ بۆ دھۆکێ تەرخانکرینە و ھەموو ئامادەکاری بۆ دابەشکرنا پانزینێ ل ھەر چوار پانزینخانان ھاتینە کرن.

ئاشکرا ژی کر، بۆ ئێکەم جار پانزین دێ ل ھەر چوار پانزینخانێن (دھۆک سپۆرت و مەتین2) ل دھۆکێ و پانزینخانا (سیپە) ل ئاکرێ و پانزینخانا (پڕا زێرین) ل زاخۆ دەست ب دابەشکرنا پانزینێ ھاتیە کرن ل دەستپێکێ پانزین ب تنێ دێ بۆ تەکسیان و پاس و مینی پاسان بیت).

سەرۆکێ لیژنا سۆتەمەنی و پیشەسازی ل جڤاتا پارێزگەھا دھۆکێ ئاماژە ب وێ یەکێ کر، بۆھایێ ئێک لیترا پانزینێ دێ ب 640 دیناران بیت و جۆرێ وێ ژی پانزینا نۆرمالە.

سەرۆکێ لیژنا سۆتەمەنی و پێشەسازیێ ل جڤاتا پارێزگەھا دھۆکێ راگەھاند ژی، ئەم دێ ب فەرمی داخواز ژ حۆکمەتا ھەرێما کوردستانێ کەین کۆمبوونەکێ سازبکەین و دێ تێدا داخواز کەین بۆھایێ پانزینێ ئەرزان بکەن و حۆکمەت پشتەڤانیا وەلاتیان بکەت ئەرزانکرنا بۆھایێ پانزینێ.

عەبدولسەمەد تێلی دیار کر، ئەم دێ ب رێیا چوار نڤیساران داخواز ژ حۆکمەتا ھەرێما کوردستانێ کەین کو کۆمبۆنەکا چوار قۆلی دناڤبەرا حۆکمەتێ و ھەرسێ لیژنێن سۆتەمەنیێ یێن ھەرسێ جڤاتێن پارێزگەھێن ھەرێمێ بھێتە رێکخستن و وەزارەتا سامانێن سرۆشتی ژی ل گەل دا بیت، بۆ ھندێ بۆچوونا حۆکمەتێ وەربگرین کا ھەتا چو رادە دێ شێن بۆھایێ پانزینێ بۆ 450 دیناران ئەرزانتر لێ بکەن.

ئاماژە دا وێ چەندێ ژی، نھا ل عیراقێ بۆھایێ ھەر لیترەکا پانزینێ ب 450 دینارانە و دێ داخواز ژ حۆکمەتێ کەین کا چو شیان ھەنە بۆھایێ پانزینێ ل ھەرێمێ ئەرزانتر لێ بھێت، یان ژی وەکو عیراقێ لێ بھێت و گۆت: نھا ئەم بەرھەڤیێن کۆمبۆنەکا گرنگ ل ھەولێرێ دکەین و مە چاڤ ل ھندێ یە گرفتا گرانبوونا پانزینێ بھێتە چارەسەرکرن.

سەرۆکێ لیژنا سۆتەمەنی و پێشەسازیێ ل جڤاتا پارێزگەھا دھۆکێ ئاماژە ب وێ یەکێ ژی کر کو ئەرزانکرنا پانزینێ د دەستەلاتا حۆکمەتێ دایە و حۆکمەت دشێت دووبارە نەفتا خام بدەتە پارزینگەھان و ئەو ژی وەکو بەرێ پانزینێ بەرھەم بینن و ب بۆھایەکێ ئەرزانتر بفرۆشن.

مستەفا تەھا، رێڤەبەرێ بەلاڤکرنا سۆتەمەنیان ل پارێزگەھا ھەولێرێ دیار کر کو ل نێزیکترین دەم دێ قوناغا دوویێ ژ ھاتن و بەلاڤکرنا پانزینا حۆکمەتا عیراقێ فیدرال ھێتە راگەھاندن و ئەڤ جارە دێ ترۆمبێلێن تایبەت ژی ڤەگریت و ب بۆھایەکێ ئەزانتر ژ یا بازرگانی.