ئەڤرۆ نيوز:
جەعفەر ئیمێنکی ئەندامێ مەکتەبا سیاسی یا پارتی دیموکراتی کوردستان راگەھاند، پارتی دێ دەنگێن خوە پارێزیت و د ڤان ھەلبژارتنان دا دێ دەنگێن پارتی زێدە بن وھندی ھەموو حزبێن دی دێ کورسیێن پەرلەمانێ عیراقێ ب دەستڤە ئینیت، چونکی خەلکێ کوردستانێ ھێزبوونا پارتی ب ھێزبوونا خوە دزانن و دێ باوەریێ ب حزبا خوە دەن.
ئەڤرۆ نیوز ، زنار تۆڤی:
ل سپێدەهیا ئه‌ڤرۆ ئێکشەمبیێ ل تاخێ هه‌ڤالان یێ باژێرێ هه‌ولێرێ گه‌نجەکێ ب چه‌قۆیێ دایك و بابێن خوە كوشتینه.
جیرانەکێ وێ مالێ وه‌كو شاهدحالەکێ دایه دیارکرن کو ئه‌و خێزانه چه‌ند رۆژەک بوون ژ ئوروپا ڤەگه‌ریابوون و ئەو خانوویا ب بكرێ گرتبوو.
هەروەسا گوتیە ئەو خێزان ب تنێ سێ كه‌س بوون، دایك و باب و ئەو كورە،وان دایک وبابان ب تنێ ئەو کور هەبوو،ئەڤ سێ رۆژ بوون ڤەگه‌ریاین و دەنگێ شەرەدەڤێ ژ وێ مالێ دچوو،وەکو دیار وان كێشه‌یەک هه‌بوو.
گوت ژی ڤێ سپێدێ وی كوری ب چه‌قۆ یێ دایك و بابێن خوە كوشتینە،پشتی خەلکێ وی تاخی بزاڤ کرین کو وی کوری بگرن،ئەو کور چوویە سه‌ر خانیەکێ دوو قاتی و پشتی هنگێ پۆلیس هاتینە و ئەو کور هاتیە خوارێ وخوە دایە دەستێ پۆلیسان.
د نوکە دا پۆلیس مژۆلی ڤەکۆلینێ نە ل سەر ڤێ روودانێ، پۆلیسان ژی دایە دیارکرن کو ئەو كور ل نه‌خۆشخانێ یە.
ئەڤرۆ نیوز ، زنار تۆڤی :
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا دیارکرن:کو د روودانەکا هاتنوچوونێ دا کەسەک برینداربوویه.
ناڤهاتی ئەو چەند ژی دا خویاکرن:ل شەڤا بوری و ل دەمژمێر 10:50 خولەک ل ناڤ سەنتەرێ قەزا زاخۆ ترۆمبێلەکا تایبەت جێب پرادو ب رەنگێ سپی ل ژێر کونترۆلا شوفێری دەرکەفتیە و چوویە د خوارنگەها چاربرا ڤە و د ئەنجامێ ڤێ روودانێ دا کەسەك بریندار بوویە ، هه‌روه‌سا زیانێن به‌رچاڤ ژی ب وێ ترۆمبێلێ و خوارنگەهێ كه‌فتینە.
ئه‌ڤرۆ نیوز:
ره‌جه‌ب ته‌یب ئه‌ردۆغان، سه‌رۆكێ توركیا ئه‌ڤرۆ بانگه‌شا خوه بۆ هه‌لبژارتنێن گشتی و سه‌رۆكاتیێ ل توركیا ب ئاماده‌بوونا جه‌ماوه‌ره‌كی مه‌زن ل ئزميرێ ده‌ست پێ كر كو ئێك ژ جه‌ماوه‌رێ وي هونه‌رمه‌ند ئیبراهیم تاتلیسێس بوو.
ئه‌ردۆغانی تاتلیسێس گازی كره سه‌ر سته‌یجی و داخوازا سترانا (Dilo Dilo yaylalar) ژێ كر، وی ژی ده‌ست پێ كر و تێدا ناڤی عه‌فرینی ئینا وه‌ك پشته‌ڤانی بۆ داگیركرنا وێ ژ ئاليێ توركيا ڤه، ڤێ جارێ ناڤێ منبج ژی ئینا جه‌ماوه‌ری ژی ڤه‌گێرا.
ناڤهاتی به‌ری چه‌نده‌كێ ژی ل سه‌ر سنۆرێ عه‌فرینێ ئه‌و ستران گۆت، وێ یه‌كێ ژی كورد دلگران و تۆره كرن ژ تاتلیسێس و دلێ گه‌له‌ك ژ داخبارێن وی یێن كورد ژ كه‌ساتییا وی ساربوو.
ئه‌ڤرۆ نيوز:
نێچیرڤان بارزانى سه‌رۆك وه‌زیرێن هه‌رێمێ، پێشوازیاى ئه‌لسته‌ر بورت وه‌زیرێ ده‌وله‌تا بریتانیا بۆ كاروبارێن رۆژهه‌لاتا ناڤبه‌راست و شانده‌كێ دبلوماسى كر، شاندێ بریتانیا پێنگاڤێن حوكمه‌تا هه‌رێما كوردستانێ بۆ ئاسایكرنا په‌یوه‌ندیێن ل گه‌ل به‌غدا و دروستبوونا باوه‌ریێ بلند نرخاند و هیڤى خواست دانوستاندنێن رژدتر بۆ چاره‌كرنا كێشان هه‌بیت و ب پێدڤى زانى پشتى هه‌لبژارتنان هه‌موو لایه‌ن ب تایبه‌ت لایه‌نێ كوردى رۆلێ خوه ددروستكرنا حوكمه‌ته‌كا بنكه‌فراوان دا هه‌بیت.
نێچیرڤان بارزانى سوپاسیا شاندێ بۆ راهێنان و هه‌ڤكاریا وان یا سه‌ربازى بۆ پێشمه‌رگه‌ى و به‌ر ب پێشڤه‌برنا ئابوورێ كوردستانێ نیشادا.
ئه‌ڤرۆنيوز:
دگه‌را 36 دا يا خۆلا ئينگليزى بۆ يانێن پلا ناياب، ئه‌ڤرۆ شه‌مبيێ يانا لێڤه‌رپۆل خودانا رێزا سيێ درێزبه‌ندا خۆلێ دا، يانا ستوك ستى خودانا رێزا 19 وبه‌رى دووماهيێ مێهڤانكر.
يانا لێڤه‌رپۆل چه‌ندين ده‌ليڤێن تۆماركرنا گۆله‌كێ ژده‌ستدان ب تايبه‌تى ل خۆله‌كا (5) ده‌مێ ياريكه‌رێ مسرى محه‌مه‌د سه‌لاح روو ب روويێ گولپارێزێ ستۆك ستى بووى ونه‌شيا تۆرا وێ يانا ب هه‌ژينيت.
ل خۆله‌كا 41 دا يانا لێڤه‌رپۆل گوله‌ك تۆماركر به‌لێ دادڤانێ ياريێ فيركا خوه لێدا وئوفسايد هژمارت وئه‌و گوله هه‌لوه‌شاند.
ل خۆله‌كا 81 ته‌پا ب ده‌ستێ ياريكه‌ره‌كێ هێلا به‌ره‌ڤانيێ يا يانا ستوك ستى كه‌فت دناڤ ده‌ڤه‌را په‌نه‌لتيێ دا، به‌لێ دادڤانى نه هژمارت به‌نه‌لتێ وفه‌رمانا به‌رده‌واميا ياريێ دا، ل خۆله‌كه‌كێ پشتێ وێ ئانكو ل خۆله‌كا 88 يانا لێڤه‌رپۆل ژ دوراندنه‌كا مسوگه‌ر قورتال بوو ده‌مێ ته‌پى گه هشتيه هێرشبه‌ره‌كێ ستوك ستى ونه‌شياى تۆرا لێڤه‌رپۆل ب هه‌ژينيت وته‌په ب ئاسنێ گولێ كه‌فت وچو ده‌رڤه‌ى ياريگه‌هێ ويارى ب وه‌كهه‌ڤيێ ب ئه‌نجامێ بێ گول بۆ هه‌ردو يانان ب دووماهى هات.
ب ڤى ئه‌نجامى لێڤه‌رپۆل خالێن خوه گه‌هاندنه 72 خالان ول رێزا سيێ دهێت وستوك ستى خالين خوه گه‌هاندنه 30 خالان ول رێزا 19 وبه‌رى دووماهيێ دهێت.
هه‌ر ل هه‌فتيا بۆرى يانا لێڤه‌رپۆل نه‌شيابوو سه‌ركه‌فتنێ ل سه‌ر يانا ويست بروميتش ئه‌لبيون خودانا رێزا 20 ودووماهيێ دخۆلا ئێنگليزى تۆمار بكه‌ت كو بێ گۆل وه‌كهه‌ڤ ببوون.
ئه‌ڤرۆنيوز:
حه‌يده‌ر عه‌بادى سه‌رۆكێ ليستا ئه‌لنه‌سر وتيما وى يا هه‌لبژارتنان، ل باژێرێن عيراقێ دگه‌ريێت ومولكێ گشتى بكاردئينيت بۆ بانگه‌شا هه‌لبژارتنێ وئه‌ڤ چه‌نده بوويه دلته‌نگيا چه‌ندين پێكهاتێن عيراقێ.
عه‌بادى دهه‌وا بانگه‌شا هه‌لبژارتنان دا ده‌ستهه‌لاتا خوه وه‌كو سه‌رۆك وه‌زيريان بكاردئينيت وئامرازێن ڤه‌گوهاستنا ده‌وله‌تا عيراقێ ژفرۆكه وئامرازێن دى بكاردئينيت.
ژێده‌ره‌كێ ئه‌منى ل كه‌ركووكێ راگه‌هاند” ئه‌ڤرۆ شه‌مبى 28/4/2018 حه‌يده‌ر عه‌بادى سه‌رۆكێ ليستا نه‌سر گه‌هشته كه‌ركووكێ وهێزێن دژه تيرۆر وپۆليسێن فيدرالى هاتن به‌لاڤكرن وپێرابوونێن ئه‌منى يێن توند ل كه‌ركووكێ هاتن وه‌رگرتن.
عه‌بادى دسه‌ره‌دانێن خوه يێن ڤێ دووماهيێ دا بۆ سلێمانيێ وهه‌ولێرێ وكه‌ركووكێ وتكريتێ، كو وه‌كو سه‌رۆكێ ليسته‌كا هه‌لبژارتنان سه‌ره‌دانا وان باژێران كربوو نه‌كو سه‌رۆك وه‌زيرێن عيراقێ، به‌لێ دهاتن وچوونێن خوه‌دا بۆ وان باژێران فرۆكه‌كێ له‌شكرى بكاردئينا.
مه‌به‌ستا سه‌ره‌دانا عه‌بادى بۆ كه‌ركووكێ، بانگه‌شه‌كرن بوو بۆ ليستا خوه، دده‌مه‌كى دا په‌رله‌مانێ عيراقێ ل هه‌يڤا چريا ئێكێ سالا 2013، قانوونا هه‌لبژارتنێن عيراقێ ده‌ركربوو وتێدا دبرگا هژمار 27 دبێژيت ” نابيت كارمه‌ندێن ده‌زگه‌هێن ده‌وله‌تێ وده‌ستهه‌لاتێن ناڤخوه‌يى، ده‌ستهه‌لاتا پۆستێن خوه يان ژێده‌رێن دارايى يێن ده‌وله‌تى يان ئامراز وئاميرێن ده‌وله‌تى دمفايێ خوه يان هه‌ر به‌ربژاره‌كێ دى بهێنه بكارئينان”.
ئه‌ڤرۆنيوز:
برياره ل ڤێ حه‌فتيێ وه‌زيرێ بازرگانيێ ئيرانێ و150 كۆمپانيێن بازرگانى يێن ئيرانى بگه‌هنه باژێرێ هه‌ولێرێ ب مه‌ره‌ما پشكداريێ دكۆنگرێ ئێكه‌تيا ژۆرێن بازرگانى وپيشه‌سازى يێن هه‌رێما كوردستانێ.
كاروان سورچى، په‌يڤدارێ ئێكه‌تيا ژۆرێن بارزگانى وپيشه‌سازى ل هه‌رێما كوردستان ئه‌ڤرۆ شه‌مبى 28/4/2018 راگه‌هاند” ل رۆژا چارشه‌مبى 2/5/2018 وه‌زيرێ بازرگانيێ ئيرانێ و150 كۆمپانيێن ئيرانى دێ پشكداريێ دكۆنگرێ ئێكه‌تيا ژۆرێن بازرگانى وپيشه‌سازى يێن هه‌رێما كوردستانێ دا كه‌ن”.
ناڤبرى دداخۆيانيه‌كا رۆژنامه‌ڤانى دا گۆت ژى” دوى كۆنگره‌ى دا، نێچيرڤان بارزانى سه‌رۆك وه‌زيرێن هه‌رێما كوردستانێ وئه‌ميندارێ گشتى جڤاتا وه‌زيرێن عيراقێ ژى دێ پشكدار بن”.
سورچى ئاشكراكر ژى” پشكداريا وێ هژمارا كۆمپانيێن ئيرانى دێ كاريگه‌ريه‌كا باش هه‌بيت ل سه‌ر پێشڤه‌چوونا ئالوگوريا بازرگانى دناڤبه‌را هه‌رێما كوردستانێ وكۆمارا ئيسلامى يا ئيرانێ دپاشه‌رۆێ دا ودێ ژ وى ئاستێ نوكه هه‌ى بلندتر بيت”.
دناڤبه‌را هه‌رێما كوردستانێ وكۆمارا ئيسلامى يا ئيرانى دا، چار ده‌رگه‌هێن بازرگانى يێن سنورى يێن فه‌رمى وپێنج ده‌رگه‌هێن نه‌فه‌رمى يێن هه‌ين وسالانه نێزيكى دو هه‌تا سێ مليار دۆلار ئالۆگوريا بازرگانى ئه‌نجام دده‌ن.
ئه‌ڤرۆنيوز:
كۆمسيۆنا بلند يا هه‌لبژارتنان ل عيراقێ ل دۆر هه‌لبژارتنێن په‌رله‌مانێ عيراقێ كو به‌رياره ل 12/5/2018 بهێنه ئه‌نجامدان، برياره‌كا نوو ده‌ركر.
سه‌عيد كاكه‌يى، ئه‌ندامێ جڤاتا كۆمسيارێن كۆمسيۆنا بلند يا هه‌لبژارتنان ل عيراقێ راگه‌هاند” كۆمسيۆنێ برياردايه برنا موبايلێ بۆ بنگه‌هێن ده‌نگدانێ بهێته قه‌ده‌غه‌كرن ودێ پێرابوونێن قانوونى يێن توند به‌رامبه‌ر سه‌رپێچكاران هێنه وه‌رگرتن”.
كاكه‌يى دداخۆيانيه‌كا رۆژنامه‌ڤانى دا ئه‌ڤرۆ شه‌مبيێ 28/4/2018 گۆت ژى” نابيت چو موبايله‌كا زيره‌ك وئه‌و موبايلێن وێنان دگرن بچنه دناڤ بنگه‌هێن وناڤه‌ندێن ده‌نگدانێ دا، ئه‌ڤ برياره ژى ده‌نگده‌ران وكارمه‌ندێن كۆمسيۆنێ ڤه‌دگريت”.
ئاشكراكر ژى” بريارا قه‌ده‌غه‌كرنا موبايلێ هێزێن ئه‌منى ژه ڤه‌دگريت وهه‌ر كه‌سه‌كێ به‌روڤاژى ڤێ چه‌ندێ بكه‌ت، دێ تووشى پێرابوونێن قانوونى بيت”.
ئه‌ڤرۆنيوز:
ئه‌ندامه‌كێ مه‌كته‌با سیاسى يا پارتی دیموكراتی كوردستان راگه‌هاند، پارتی دێ ده‌نگێن خوه پارێزيت ودڤان هه‌لبژارتنان دا دێ ده‌نگێن پارتى زێده بن وهندى هه‌موو حزبێن دى دێ كورسيێن په‌رله‌مانێ عيراقێ ب ده‌ستڤه‌ئينيت، چونكى خه‌لكێ كوردستانێ هێزبوونا پارتى ب هێزبوونا خوه دزانن ودێ باوه‌ريێ ب حزبا خوه ده‌ن.
جه‌عفه‌ر ئيمێنكی، ئه‌ندامێ مه‌كته‌با سیاسی يا پارتی دیموكراتی كوردستان گۆت”ئه‌م وه‌كو پارتى دپشت راستين كو دێ ده‌نگێن خوه پارێزين وده‌نگێن مه بۆ چو قه‌واره وليسته‌كا دى ناچيت ودڤان هه‌لبژارتنان دا دێ ده‌نگێن خوه زێده‌كه‌ين ژى، چونكى پارتى ژهه‌موو حزبێن دى زێده‌تر ده‌ليڤه يا هه‌ى بۆ زێده‌كرنا ده‌نگێن خوه”.
ئيمينكى گۆت ژى”پێشتر حزبێن هه‌ڤركێن مه كار ل سه‌ر وێ چه‌ندێ دكر كو ده‌نگێن پارتى بۆ خوه ببه‌ن، هه‌رچه‌نده ده‌نگه‌كێ كێم ژى بربيت، به‌لێ نه‌شيان به‌رده‌وام بن، بزاڤ ژى كرن پارتى بچووك بكه‌ن، به‌لێ مه ديت نه تنێ نه‌شيان رێ ل گه‌شه‌كرنا پارتى بگرن، به‌لكو نوكه دناڤخوه‌يا خوه تێكچووينه وشه‌رێ خوه دكه‌ن وئه‌م يێ ژبيركرين، نوكه ژى مه دڤێت تيرۆرا هزرى ل وى سنوري ب دووماهى بينين، چونكى نابيت ئه‌و تيرۆرا هزرى به‌رده‌وام بيت وشايستێ پايته‌ختا ره‌وشه‌نبيرى يا كوردستانێ نينه”.
وى ئه‌ندامێ مه‌كته‌با سياسى يا پارتى زێده‌تر بۆ مالپه‌رێ فه‌رميێ پارتى ديموكراتى كوردستان گۆت”پارتى دڤان هه‌لبژارتنان دا، دێ وه‌كو حزبا ئێكێ مينيت وتنێ كورسيێن پارتى دێ هندى هه‌موو كورسيێن حزبێن دى يێن كوردستانێ بيت، ل رۆژا 12/5 دێ بينن چاوان خه‌لكێ كوردستانێ ده‌نگى ب پارتيا خوه ده‌ن، دهه‌لبژارتنێن به‌رێ دا هه‌روه‌سا بوو كو پارتى ب تنێ ل گه‌ل كۆتايان كو نێزيكن ژ پارتامه، 32 كورسى بوون وهه‌موو حزبێن دى شيان 30 كورسيێن په‌رله‌مانێ عيراقێ بده‌ستڤه بينن”.
ل دۆر وێ چه‌ندێ كا ده‌نگێن پارتى دڤان هه‌لبژارتنێن عيراقێ دا دێ چاوان بن، جه‌عفه‌ر ئيمێنكى گۆت” ل سلێمانيێ ده‌ليڤا كاركرنا پارتامه دناڤ جه‌ماوه‌رى دا گه‌له‌ك ي به‌رفرهه‌يه، به‌لێ ب دو شێوازان ده‌نگێ مه ل وى سنورى فه‌وتاوه، يێ ئێكێ ئه‌و تيرۆرا هزرى ل سه‌ر لايه‌نگرێن مه هه‌ى، يا دويێ ژى شاشيا ته‌كنيكى يه، له‌وما دێ چاڤدێرێن گه‌له‌ك باش ل سه‌ر سندووقێن ده‌نگدانێ دانين ودێ كاركه‌ين بۆ نه‌هێلانا وێ تيرۆرا هزرى ل سه‌ر لايه‌نگرێن مه هه‌ى و ئاشتكرنا خه‌لكێ ژمه عاجز كو ل گه‌له‌ك جهان مه ئه‌و گرفت يا هه‌ى ودێ كار كه‌ين بۆ چاره‌كرنا وان گرفتان”.
نيشاندان