ئه‌ڤرۆ نيوز:
ل دووڤ راپۆرتا كه‌شناسيا هه‌رێمێ، تاوه‌كو رۆژا 28 ڤێ هه‌يڤێ ل دهۆكێ 388 ملم بارانێ بارينه و پار سال وه‌كو ئه‌ڤرۆ 397 ملم بارينه، ئانكو پار سال 9 ملم پتر باريبوون، هه‌ولێرێ 28 ملم پتر ژ سالا بوورى بارينه و سلێمانيێ 203 ملم پتر ژ پار سال بارينه، هه‌له‌بجه ژى 22 ملم پتر ژ پار سال بارينه.
ئەڤرۆ نیوز، نەوزاد ھلۆری:
ئاوازدانەرێ ناسیارێ کورد (ھەلکەفت زاھێر) د نووترین کار دا ل گەل ھونەرمەندا کچ (دینا) بو مەھا رەمەزانێ بەرھەمەکێ نوو درۆست دکەن
ناڤبری لسەر پێگەھێ خوەیێ تورا جڤاکی یا فێسبووکێ چەند وێنێن ھونەرمەند دینایێ بەلاڤکریە و دایە دیارکرن کو بەرھەمەکێ نوو ب رێڤەیەب و ھەیڤا رەمەزانا پیرۆز.
بەلاڤکرنا ئەڤی وێنەی د دەمەکێ دایە کو ھونەرمەندا کچ دینا ب چوو شێوەیان ب رەنگ و ستایلێ حیجابی دەرنەکەفتیە و ڤێ یەکێ رەنگڤەدانێن مەزن ل تورێن جڤاکی پەیداکریە.
بەرھەمێ نوویێ ھونەرمەندا ناڤبری ل وەلاتێ لوبنان ھاتیە چێکرن کو ژ دەرھێنانا فادی حەدادە.
ئه‌ڤرۆ نیوز:
خانما ئێكێ یا فره‌نسا بریژیت ماكرۆن كز به‌ری چه‌ند رۆژان د گه‌ل هه‌ڤژینێ خوه سه‌ره‌دانه‌كا سێ رۆژی بۆ كۆچكا سپی كربوو چه‌ند زانیاریێن خانما ئێكێ یا ئه‌مریكا مێلانیا ترامپ ئاشكرا كرن.
بریژیت ماكرۆنێ خویا كر كو مێلانیا هه‌ڤژینا ترامپی وه‌كی زیندانییانه و ژبه‌ر ئه‌ندامێن ئاساییشا نهێنی “نه‌شێت پێ خوه بهاڤێژیته ژ ده‌رڤه.”
بریژیت بۆ رۆژنامه‌كا فره‌نسی دبێژیت: ئازادییا مێلانیایێ گه‌له‌ك ژ یا من سنۆردارتره، ئه‌و نه‌شێت چ بكه‌ت، ئاساییش گه‌له‌كا خرابه، هه‌تا ئه‌و نه‌شێت په‌نجه‌ره‌كێ ژی ڤه‌كه‌ت ئێكسه‌ر دێ ئه‌ندامێن ئاساییشێ ب تێله‌فۆنێ ژێ خوازن په‌نجه‌را خوه بگریت، لێ ئه‌ز ب دلێ خۆ دشێم ل پاریس بگه‌رم. ”
“وێ كه‌ساتییه‌كا بهێز هه‌یه لێ بزاڤان دكه‌ت بڤه‌شێریت، كه‌ساتیا وێ وه‌سا یا گرتی نینه وه‌كی دیار بیت، گه‌له‌ك یا سوحبه‌ت خوه‌شه و مه گه‌له‌ك پێكڤه كره كه‌نی.”
د سه‌ره‌دانا ماكرۆنی و هه‌ڤژینا وی دا ل كوچكا سپی ترامپی ده‌ستێ خوه هاڤێته ده‌ستێ مێلانیا هه‌ڤژینا خوه دا بگریت لێ وێ ده‌ستێ خوه نه‌داڤێ وی دیمه‌نی ژی گه‌له‌ك ل تۆرێن جڤاكی ده‌نگڤه‌دا.
ئەڤرۆ نیوز، لەزگین جوقی:
بەربژارەکێ پارتی دیموکراتی کوردستان ل پارێزگەھا نەینەوا دیارکر کو ئەڤرۆ 29ى نيسانا 2018ێ ب فەرمی دەست ب ھەوا بانگەشێ بۆ بەربژارێن پارتی ل پارێزگەھا نەینەوا ھاتە کرن.
سلێمان فانۆ، بەربژێرێ ژمارە 34 یێ لیستا 184 یا پارتی دیموکراتی کوردستان ل قەزا شنگال دیارکر کو خەلکێ شنگال و دەڤەرێن دێ یێن دەشتا نەینەوا پێشوازیەکا گەرم ل لیستا پارتی دیموکراتی کوردستان دکەن چو ئالیەکێ دی ب پێگوھۆڕێن پارتی نابینن چونکو ب تنێ پارتی دشێت پرەنسیپێ پێکڤە ژیانێ ل دەشتا نەینەوا زێدەتر بچەسپینیت دێ پتریا دەنگان بۆ لیستا پارتی بن ھەر وەکو ئەڤرۆکە د ھەوا بانگەشی دا ھژمارەکا زۆر یا خەلکێ بەرھەڤ ببوون و سۆزێن خوە ل گەل لیستا 184 نوو کرن چونکو ئەڤ لیستە دێ خزمەتا خەلکێ شنگال و دەشتا نەینەوا کەت.
ئاماژە دا وێ چەندێ ژی کو ئەو کێشە و ئاریشێن نوکە ل شنگال ھەین نە کێشە و ئاریشێن حزبەک و لایەنەکێ نە، بەلکو کێشە و ئاریشێن ھەموو خەلکێ قەزا شنگالێ نە پێدڤیە خەلکێ شنگال د ھشیار بن خوە تێکەلی وان پلانێن دوژمنان نەکەن ل ڤان ھەلبژارتنان خەلک شنگال بڕیارا خوە بدەن چونکو ئەڤ ھەلبژارتنە بۆ شنگال زۆر د گرنگن، دێ زۆر کێشە و ئاریشێن شنگال چارەسەر کەن، پێدڤیە خەلکێ شنگال ب شێوەیەکێ بەرپرسیارانە دەنگ بدەن و ل سەر بنەمایێ سوزداریێ دەنگی نەدەن.
ئەو ژی دیارکر کو گرنگە خەلکێ شنگال ل سەر ھژمارەکا خالان دەنگ ب کاندیدان بدەن ژ وانا ژی کەسێن ژ ھەژی رەوانەی پەرلەمانێ عیراقێ بکەن بۆ ب دەست ڤە ئینانا مافێن خەلکێ شنگال چونکو ئەڤە ژ سالا 2014ێ وەرە ھەتا نوکە حوکمەتا عیراقی و پەرلەمانێ عیراقێ ژی چو پێنگاڤێن باش بۆ خوشکرنا ژیارا خەلکێ شنگال نەھاڤێتینە ڤان ھەلبژارتنان ئەم گەشبینین دێ پێنگاڤێن باش بۆ ئاڤەدانیا شنگال ھێنە ھاڤێتن، دھێتە چاڤەرێکرن پارتی دەستپێشخەریەکا مەزن ل شنگال ئەنجام بدەت ب تایبەتی ژی پشتی دەرکەفتنا ئەنجامێن ھەلبژارتنێن پەرلەمانێ عیراقی چاڤەرێ دھێتە کرن پارتی دەستپێشخەریێ بکەت و گرەنتیا دەستەبەرکرنا مافێن نەتەوەیی یێن ئەم خەباتی بۆ دکەین بھێتە کرن.
ب گێرانا سميناره‌كێ ژ لايێ هشيار زێبارى ئه‌ندامێ سه‌ركرداتيا پارتى ديموكراتى كوردستان هه‌وا هه‌لبژارتنان ل پارێزگه‌ها نه‌ينه‌وا ژ لايێ پارتى ديموكراتى كوردستان ڤه ده‌سپێكر و د سمينارا خوه دا راگه‌هاند كو هه‌ر چه‌نده هه‌وا خوه دره‌نگ ده‌سپێكر، “به‌لێ دێ گه‌له‌ك يا ب هێز و مفادار بيت”.
ئه‌ڤرۆ نيوز، نەوزاد ھلۆری:
تونێلا زاخۆ ب مەزنترین تونێل ل عیراقێ دھێتە ھژمارتن کو ئەو ژی ب درێژاھیا حەفت ھزار و 200 مەترێن ھاتنووچۆنێ نە و 90% کارێن وێ تەمام بوینە و ل دەمەکێ نێزیک دێ ھێتە ڤەکرن ، و قایمقامێ قەزا زاخۆ ژی دیارکر کو ڤەکرنا تونێلا زاخۆ گرنگیەکا تایبەت ژ روویێ ئابووری و خزمەتگوزاری بو خەلکێ دەڤەرێ ھەیە.
بوتان موحسن قایمقامێ قەزا زاخۆ دیارکر کو ب ڤەکرنا تونێلا زاخۆ زێدەباری کو دێ رێیا دناڤبەرا زاخۆ و دھۆک کورت بیت دھەمان دەم دا دێ روودانێن ھاتنووچونێ ژی کێم بن و گۆت: (تونێلا زاخۆ ب ئێک ژ تونێلێن گرنگ و مەزن دھێتە ھژمارتن ل ھەموو عیراقێ و دنھادا 90% کاروبارێن وێ تەوام بوینە و ڤەکرنا وێ مفایەکێ باش ژ روویێ ئابووری و خزمەتگوزاری ھەیە و ھاتنووچونا گەشتیار و وەلاتیان دێ کورت کەت و بیتە سەدەم کو روودانێن ھاتنووچۆنێ ژی کێم ببن).
زێدەتر گۆت: (نھا تونێل چویە دقوناغا دوماھیێ دا و دناڤ تونێلێ دا ھەموو کاروبار ب باشی ب رێڤەدچن و ل دەرڤە ژی تنێ ھێلێن تەسەیان ماینە ، و ھەردەما کو تونێل دوماھی ھات ستافەکێ تایبەت دێ ژلایێ کومپانیا جێبەجێکار ھێتە دیارکرن کو بو ماوێ سالەکێ ل گەل لایەنێن شولەژێ لسەر تونێلێ کار بکەن داکو چوو کێشە درۆست نەبن و کاروبار ب رێڤەبچن ، و نھا ئەم چاڤەرێ دوماھی ھاتنا وێ دکەین و ھەردەما دوماھی ھات ئێکسەر دێ ھێتە ڤەکرن).
قایمقامێ قەزا زاخۆ د درێژاھیا ئاخفتنێن خودا دیارکر ژی کو درێژاھیا تونێلا زاخۆ سێ ھزار و 600 مەترە و ھاتنا وێ ژی ب ھەمان درێژی و بڤێ یەکێ ھەردوو ساید دبیتە حەفت ھزار و 600 مەتر و زێدەتر بو ھەولێر گۆت: (ب ڤەکرنا تونێلا زاخۆ، رێیا گەلێ زاخۆ نامینیت کو ئەڤ یەک ژی د بەرژەوەندیا خەلکێ دەڤەرێ و شوفێرا دایە).
دھێتە زانین کو کومپانیا لیماک ئێکە ژ کومپانیێن تورکی کو سەرپەرشتیا درۆستکرنا تونێلا زاخۆ دکەت، و ل مەھا نیسان یا سالا 2013 دەست ب درۆستکرنا تونێلێ کریە و لروژا 12/6/2013 بەرێ بناغێ تونێلێ ژلایێ رێزدار نێچیرڤان بارزانی سەروکێ حوکمەتا ھەرێما کوردستانێ ھاتیە دانان و کوژمێ 158 ملیار دینار ژی بو ھاتیە تەرخانکرن و دبیتە مەزنترین تونێل لسەر ئاستێ عیراقێ.
پارێزەرەکێ دادگەھا دھۆکێ راگەھاند کو ژنەک سەرا نامەکا ڤایبەری ب تومەتا خیانەتا ھەڤژینیێ ھاتە گونەھبار کرن، پشتی کو ھەڤژینێ وێ سکالا ل سەر تومار کری ئەڤ ژنە و ل گەل ئەو کەسێ نامە بۆ ھنارتی ھاتنە زیندان کرن، ئاریشە رۆژ بۆ رۆژێ مەزنتر لێ دھات و د گۆتن دێ ڤێ ژنێ کوژین !، ل دەربارێ ڤێ روودانێ پارێزەرەکدبێژیت: دڤێت قانوونا خیانەتا ھەڤژینیێ بھێتە راستڤە کرن ئانکو ب کریار بھێتە دیتن، چونکی ئاخفتن و ڤایبەر و نامە نابنە خیانەت وەکو قانوون.
پارێزەر ھەڤال ئەحمەد عەلی ل دادگەھا دھۆکێ بۆ ئەڤرۆ دیار کر کو، ژنەکێ قەستا دکانەکا جلکێت ئافرەتان کر ل بازاری پرسیارا دشداشەکی دکر و گۆت: ئەو کەسێ لبەر دکانێ کار دکر خودانێ دوکانێ نەبوو گۆتە وێ ژنێ ئەز بھایێ دشداشەی نزانم ژمارا تێلەفونا خوە بدەف من ھەکە خودانێ دکانێ ھات دێ بێژمە تە.
پارێزەری گۆتژی: ب شەڤێ نامەک ل سەر ڤایبەری بۆ وێ ژنێ فرێکر و گۆتێ چاوانی جانێ، ئەوێ ژی نەزانی کیە بەرسڤا وی دا و رەنگە سوحبەت ب دلێ وێ بوویە، ھەڤژینێ وێ ژی موبایلا وێ ژ دەستی ئینادەر و نامە دیت و گەلەک توندوتیژی ل گەل بکار ئینا.
پارێزەری ئەو چەندە ژی دیار کر کو، ھەڤژینێ وێ قەستا رێڤەبەریا توندوتیژیێ کر و داوا لێ کر دادوەری ل دووڤ قانوونا خیانەتا ھەڤژینیێ یا ژمارە 377 بریارا دەستەسەر کرنا وێ دەر کر و ھاتە زیندان کرن.
پارێزەری ئاشکرا کر ژی کو، وێ ژنێ زارۆیەکێ سێ ھەیڤی ھەبۆ و ھندی ھاتنە زەلامی داگێران ژ داوا خوە نەدکر و دادوەری ئازاد نەدکر و ژن بۆ ماوێ 13 رۆژان ما د زیندانێ ڤە و گۆت: پشتی مە داخازی ژ سەروکێ دادگەھێ کری ژنوو ھاتە بەردان، پاشی ئاریشە رۆژ بۆ رۆژێ مەزنتر لێ دھات و د گۆتن دێ ڤێ ژنێ کوژین! نێزیکی ھەشت ھەیڤان ئەڤ کێشە ما ل توندوتیژیێ، پاشی مە و ل گەل ھندەک کەسێن مەزن شیاین ھەڤژینێ وێ رازی کەین کو لێ ببوریت و ب زڤرینیت.
پارێزەری زێدەتر گۆت: ھەر ل سەر ڤێ کێشێ خودانێ دکانێ ژی ھاتبوو دەستەسەر کرن لەوما کۆژمەکێ پارەی ژێ ھاتە وەرگرتن و ئەڤ کێشە بەرامبەری کێشێن دیتر کێم ل دادگەھێ دھێنە تومار کرن سالێ دو یان سێ نە.
پارێزەر ھەڤال ئەحمەد دیار کر ژی کو، دڤێت قانوونا خیانەتا ھەڤژینی بھێتە راستڤەکرن ئانکو ب کریار بھێتە دیتن چونکی ئاخفتن و ڤایبەر و نامە نابنە خیانەت وەکو قانوون و گۆت: ھەروەسا دڤێت خیانەتا ھەڤژینیێ ژ قانوونا سزایان بھێتە دەرکرن و ب تنێ د قانوونا بارێ کەسایەتی دا ھەبیت، ژبەرکو ژێدەرێن قانوونی و شەریعەت دبێژیت دڤێت چار دیدەڤان ھەبن نەک ب نامەکێ تاوانەکا وەسا یا مەزن ل سەر بھێتە سەلماندن.
ئه‌ڤرۆ نیوز:
كۆریا باكۆر بریاردا ده‌مێ خوه بگوهریت دا د گه‌ل ده‌مێ كۆریا باشۆر دا بگۆنجیت.
پشتی كیم جۆنگ ئون سه‌رۆكێ كۆریا باكۆر د گه‌ل مۆن جه‌ی ئین سه‌رۆكێ كۆریا باشۆر دا كۆم بووی، بریار دا ده‌مێ كۆریا باكۆر نیڤ ده‌مژمێرێ ببه‌ته پێش ب مه‌ره‌ما وێ یه‌كێ كو د گه‌ل ده‌مێ كۆریا باشۆر دا ببیته ئێك.
ل سالا 2015ێ د بریاره‌كا ژنشكه‌كێ ڤه كۆریا باكۆر زۆنا ده‌مێ خوه نیڤ ده‌مژێرێ بره پشتی ده‌مێ كۆریا باشۆر و ب وی ره‌نگی ژبلی ئاخێ ده‌م ژی ل نیڤگراڤا كۆری هاته جوداكرن.
په‌یڤداره‌كێ كۆریا باشۆر دیار كر كو كیم جۆنگ ئۆنی ل ده‌مێ ده‌مژێرێن ل سه‌ر دیوارێ سه‌ر سنۆرێ هه‌ردو وه‌لاتان دیتی گۆت: ئه‌ز یێ دلگرانم ڤی تشتی ببینم و ژبه‌ركو مه گوهرین كرییه ئه‌م دێ ده‌ستپێشخه‌ریا ڤه‌گه‌ریانێ بۆ ده‌مێ به‌رێ كه‌ین و هوون دشێن ڤێ یه‌كێ ب ئاشكرایی رابگه‌هینن.
ئەڤرۆ نیوز، نەوزاد ھلۆری:
دچارچوڤێ دانوستاندنەکێ ل گەل پشکا کوردی یا دەنگێ ئەمریکا ، محەمەد حاجی مەحمود دیارکر کو ئەوی پێ باش نەبوویە بڤی رەنگێ نھا کورد پشکداریێ د ھەلبژاردنێن پەرلەمانێ عیراقێ دا بکەن و دەنگێن کوردان کێم بکەن و فرە لیستی ژی دێ زیانێ بو دەنگێن کوردان ئینیت و دبێژیت: (ھندەک ژ وان حزبێن کو پشکدارن، بەری نھا پشتەڤانیا عیراقێ دکر داکو ھێرشێ بکەت سەر کوردستانێ و پارەیان نەفرێکەن).
محمەد حاجی مەحموود سکرتێرێ حیزبا سۆسیالیست دیموکراتا کوردستانێ د دیدارا خوە دا روناھی ئێخستە سەر چەند پرسیارەکێن تایبەت ب کوردستان و ھەلبژاردنێن پەرلەمانێ عیراقێ و دپشکەکا ئاخفتنێن خو ژی دا ل بارا ریفراندوما سەربخوەی یا کوردستانێ دبێژیت: (مە ریفراندوم کر ھەتاکو بزانین ملەتێ مە چ دڤێت؟ ئەو بوو کو زێدەتر 92% دەنگ ب بەلێ بو ھاتەدان، مە گوت بڤی رەنگی دێ دانوستاندنێ لسەر خواستێن خەلکێ کوردستانێ کەین ، بەلێ وەسا دیارە وان و ئەمریکا و وەلاتێن دەڤەرێ و ئەوێن کو بەحس ل دیموکراسیێ دکەن ھەتا خوە رازی نەبوون بێژن ھەوە چ دڤێت و گەلێ مە ژ ھەموو رویەکێ ڤە ژ مەکر).
ل بارا ھەلبژاردنێن ئەڤێ خولا پەرلەمانێ عیراقێ و شێوازێ پشکداریکرنا کوردان د ھەلبژاردنان ، ناڤبری گۆت: (من پێ باش نەبوویە کو کورد پشکداریێ د ھەلبژاردنان دا بکەت ، ئەگەر شێوازێ ھەلبژاردنان ئێک بازنەی بیت ، ژبەرکو ل ڤی دەمی کورد دێ رێژا کورسیێن خوە رەنگە بگەھینیت ھەشتێ کورسی و زێدەتر ژی ، ھەر چەندە نھا ئەگەر کورد سەد و شێست کورسی ژی ھەبن ھەر نکاریت بەرامبەر 329 کورسیێن دن چوو بریارەکێ ل بەغدا بدەت).
ل بارا ھێرشێن حوکمەتا عیراقێ پشتی ریفراندۆمێ، ناڤبری ب روونی بەحس ل وێ یەکێ کر کو سزادا خەلکی و ھێرشان بو سەر کوردستانێ چوو پەیوەندی ب ریفراندۆمێ ڤە نینە و گۆت ژی: (ریفراندۆم ھاتباکرن یان ژی نە ئەو دا ھەر ھێرشا کەرکوکێ و دوزخورماتوو کەن ، و ھەروەسا من دپێناڤ گەلێ کوردستانێ دا مرن ھەلبژاردیە نەک دادگەھکرن و دپێناڤ ریفراندۆمێ دا بەرھەڤم دەھان جاران بھێمە دادگەھکرن ، و ئەگەر نھا ریفراندۆم بھێتەکرن ڤە دێ جارەکا دن ژی دەنگی بو دەم ژبەرکو ئەز ڤێ یەکێ ب مافێ رەوایێ خەلکێ کوردستانێ دبینم و ھەر گەلەکێ دەولەت نەبیت خوە نەبیت باشترە).
نيشاندان