ئه‌ڤرۆنيوز:
سه‌رۆكێ فراكسيۆنا پارتى ديموكراتى كوردستان راگه‌هاند، چو به‌هانه‌ك بۆ پاشخستنا هه‌لبژارتنێن په‌رله‌مانێ كوردستانێ نينن وپارتى ب هه‌موو شێوه‌كى دژى پاشختسنێ يه، دياركر ژى هنده‌ك ژ كێشێن نوكه ل هه‌رێما كوردستانێ هه‌ين، دێ ب رێيا هه‌لبژارتنان هێنه چاره‌سه‌ركرن.
ئومێد خۆشناو، سەرۆكی فراكسیۆنا پارتی دیموكراتی كوردستان، گۆت” ئه‌م وه‌كو فراكسيۆنا پارتى ب چو جۆره‌كى ل گه‌ل پاشخستنا هه‌لبژارتنێن په‌رله‌مانێ كوردستانێ نينين وهيڤيخوازين چو لايه‌نه‌ك هزر دوێ چه‌ندێ دا نه‌كه‌ت هه‌لبژارتن بهێنه پاشخستن، چونكى پاشستنا وان دمفايێ چو كه‌سه‌كى دا نينه”.
خوشناو زێده‌تر بۆ كوردستان 24 گۆت” پرۆسا ديموكراسى وڤێ خۆلا په‌رله‌مانى وكابينا نوكه يا حوكمه‌تێ كو هنده‌ك لايه‌نا خوه ژێ ڤه‌كێشاى، پێدڤى ب وێ چه‌ندێ هه‌يه هه‌لبژارتن بهێنه ئه‌نجامدان، ب ديتنا مه هنده‌ك ژ وان كێشێن هه‌ين، دێ ب هه‌لبژارتنان هێنه چاره‌كرن”.
برياره هه‌لبژارتنێن په‌رله‌مانێ كوردستانێ ل 30/9/2018 بهێنه ئه‌نجامدان.
ئەڤرۆنیۆز، سالار دۆسكی:
رێڤەبەرێ پەیوەندی و راگەهاندنێ ل رێڤەبەریا گشتی یا پەروەردێ ل پارێزگەها دهۆكێ ئامارێن خواندنا ب لەز و نەخوێندەواریێ ئاشكراكرن و دیاركر كو هژمارا قوتابیان و بنگەهێن خواندنێ سال بۆ سالێ ل پارێزگەها دهۆكێ بەر ب كێمبوونێ ڤە دچیت.
ئەحمەد عەبدوللا زبێر، رێڤەبەرێ پەیوەندی و راگەهاندنێ ل رێڤەبەریا گشتی یا پەروەردێ ل پارێزگەها دهۆكێ بۆ ئەڤرۆ نیۆز گۆت: ل دووڤ ئامارێن رێڤەبەریا گشتی یا پەروەردێ بۆ سالا خواندنێ 2016-2017 یا خواندنا بلەز 15 قوتابخانە هاتبوونە ڤەكرن 1078 كور و 331 كچ بووینە، سەرجەم 1049 قوتابی بووینە، سالا خواندنێ 2017 -2018 ل سنورێ پەروەردا گشتی ل پارێزگەها 10 قوتابخانە بووینە و 573 كور بووینە، 178 كچ بووینە، سەرجەم 751 قوتابی بووینە و ئەڤە وێ چەندێ دیاردكەت كو خواندنا ب لەز بەر ب كێمبوونێ ڤە دچیت.
ل دۆر ئامارێن نەهێلانا نەخواندەواریێ گۆت” سالا خواندنێ 2016 – 2017 كو 28 بنگەه وەك قوتابخانە هەبووینە و 251 فێرخوازێن كور و 201 فێرخوازێن كچ بووینە و سەرجەم 452 فێرخواز بووینە، سالا خواندنێ 2017 – 2018 ل پارێزگەها دهۆكێ 12 بنگەه وەك قوتابخانە هەبووینە 164 فێرخواز كور بووینە و 54 فێرخواز كچ بووینە و كویێ گشتی 218 بووینە، ئەڤە ژی وێ چەندێ ئاشكرادكەت كو نە خوێندەواری ل پارێزگەهێ گەلەك كێم بوویە”.
رێنمایێن نەهێلانا نەخوێندەواریێ ژی ئاشكراكرن كو قوتابی دهێتە وەرگرتن دناڤبەرا ژیێ نەه سالی هەتا 45 سالی و سێ ئاستا قوتابی دخوینن، خواندنا بلەز پێنچ ئاستان بخوە ڤەدگریت و كور دناڤبەرا نەه سالی هەتا 20 سالی و كچ دناڤبەرا 9 سالی هەتا 24 سالی.
ئەڤرۆ نیوز، نەوزاد ھلۆری:
رێڤەبەریا ھاتنوچۆنا دەڤەرا سوران د کونفرانسەکێ رۆژنامەڤانی دا ئامارا روودانێن شەش ھەیڤێن بوری یێن دەڤەرا سوران (سوران، رەواندوز، چومان و مێرگەسوور) راگەیاند، ب گورەی ئامارا وان ھەتا نھا 50 کەسان گیانێ خوە ژ دەستدایە.
د ئامارا رێڤەبەریا ھاتنوچۆنا دەڤەرا سوران دا ھاتیە کو ئەڤ سالە ل رێکەفتی 1/1/2018 ھەتا ئەڤرۆ 13 روودانێن ھاتنوچۆنێ یێن خویناوی رووداینە و د ئەنجام دا 70 کەس برینداربووینە و 50 کەسان ژی گیانێ خوە ژ دەستدایە ، و 622 مولەتێن گشتی ب شوفێران ھاتینەدان کو ژ وانان حەفت مولەت بو ژنان بوون،و دیسان 680 مولەتێن تایبەت ژی ب شوفێران ھاتینەدان کو ژ وانان 138 ژن بوون ، و 45 مولەتێن نیڤەدەلەتی ژی بو شوفێران ھاتینەدان ، و ھەموو ئەو مولەتێن بو شوفێران ھاتینەدان دبینە ھزار و 318 مولەتێن گشتی و تایبەت و نیڤدەولەتی).
رێڤەبەریا ھاتنۆچۆنا سوران د درێژاھیا ئامارخوە دا دایە دیارکرن کو ھزار و 434 مولەتێن گشتی و 558 مولەتێن تایبەت ژلایێ ناڤە ھاتینە نوکرن و گۆت ژی: (24 مولەت گشتی و 40 مولەتێن تایبەت ھاتینە بەرزەکرن، 16 مولەتێن گشتی و 56 مولەتێن تایبەت ژی تێکچوینە، و دیسان 16 خولێن خواندنێ و چوار خولێن نەخواندەواریێ بو وەلاتی و شوفێران ھاتینە ڤەکرن تایبەت ل سەر ھاتنووچۆنێ و 779 کەسێن خواندەوار و 601 کەسێن نەخوێندەوار پشکداری دوان خولان دا کریە).
ب گورەی ئامارا رێڤەبەریا ناڤبری 754 سەرپێچی ھاتینە تومارکرن، ب کوژمێ 26 ھزار و 969 ب رێیا کامیرێ و ب 247 ھزار ب رێیا ئێس ئێم ئێس ترومبێل ھاتینە سزادان).
ئەڤرۆ نیوز، نەوزاد ھلۆری:
پشتی کو دوھی تەقینەک ل کەرکوکێ درۆستبوی و تێدا زێدەتر ژ 20 کەس ھاتینە کوشتن و بریندارکرن پارێزگارێ کەرکوکێ دایە دیارکرن کو ئەو تەقین ، تەقینەکا سیاسی بو نەک تیرورستی.
راکان سەعید جبوری پارێزگارێ کەرکووکێ ب وەکالەت دیارکر کو تەقینا ل کەرکوکێ درۆست بوی ئارمانج کوگەھەکا سندوقێن دەنگدانێ بویە و گۆت: (د تەقینا کەرکوکێ دا پالدەرەکێ سیاسی ھەبوویە نەک پالدەرەکێ ترورستی)
تەقینا کەرکووکێ د دەمەکێ دایە کو کار ب دەستێن دەڤەرێ ددەن دیارکرن کو رەوشا کەرکوکێ ئارامە و چوو کارتێکرنێن مەترسی لسەر ژیانا وەلاتیان نینە، بەلێ رەوشا کەرکوک پشتی روودانێن 16ێ ئوکتوبەرێ رۆژ بو رۆژێ بەر ب ئالوزتر دبیت.
ئەڤرۆ نيوز:
سەرۆکێ باژێرڤانیا قەزا زاخۆ بۆ رۆژناما ئەڤرۆ دیار کر کو ل دووڤ ماستەر پلانێ دڤێت ھزار و 431 زێدەگاڤیێن ل سەر ئەردێ حوکمەتێ ل سنوورێ قەزا زاخۆ ھاتینەکرن بھێنە راکرن و گۆت: “ژ بەر زێدەگاڤیان من گەلەک ئاریشە دگەل بەرپرسان ھەنە و دڤێت ھەر سەرۆک باژێرڤانیەکی ھند دەستھەلات ھەبیت راستەوخوە ژ کارێ باژێری یێ بەرپرس بیت، چونکی ھەکە د سەر وی را کار بھێنە ئەنجامدان بلا خوە ب ھەژمێریت فەرمانبەر نە سەرۆکێ باژێرڤانیێ دگەل رێزێن من بۆ ھەموو فەرمانبەران”.
ئەندازیارێ مافپەروەر بژار مونیب، سەرۆکێ باژێرڤانیا قەزا زاخۆ ئاشکرا کر کو پارێزگەرێ دھۆکێ ژ ھەیڤا 11 یا سالا 2014ێ ئەو ب نڤیسارەکا فەرمی ئاگەھدارکرینە کو نابیت چو پارچێن ئەردی یێن ب گرێبەست و گرێبەستێن مێاتەحە و پیشەسازی و پارچێن ئەردی یێن ئاکنجیبوونێ بێ رازەمەندیا وی بھێنە تەرخانکرن، ئانکو نوکە سەرۆکێ باژێرڤانیێ دەستھەلات نینە چو ژڤان جێبەجێبکەت و گۆت: “خەلەتیا مە د سیستەمێ ئیداری دا ئەوە ئەم نە خودانێن بڕیارێ نە، ب دیتنا من سەرۆکێ باژێرڤانیێ ل ھەر جھەکی دڤێت بەرپرسێ راستەخوە بیت د رێڤەبرنێ دا و ھند دەستھەلات ھەبیت راستەوخوە ژ کارێ باژێری یێ بەرپرس بیت و بلا دووڤچوون ل سەر کارێ وی ھەبیت، چونکی ھەکە سەرۆکێ باژێرڤانیێ ھەموو دەستھەلات نەبن و د سەر وی را کار بھێنە ئەنجامدان بلا خوە ب ھەژمێریت فەرمانبەر نە سەرۆکێ باژێرڤانیێ دگەل رێزێن من بۆ ھەموو فەرمانبەران”.
ناڤھاتی ئاماژە دا وێ چەندێ کو ل دووڤ ماستەر پلانێ ھزار و 431 زێدەگاڤیێن ل سەر ئەردێ حوکمەتێ ل سنوورێ قەزا زاخۆ ھاتینەکرن و دڤێت بھێنە راکرن، ل دووڤ قانوونا زێدەگاڤیان یا ھژمارە پێنج ھەر کەسێ زێدەگاڤیەک ل سەر ئەردێ حوکمەتێ کربیت دڤێت ھەمبەر پارچەکا ئەردی کو ژ 200 مەتران زێدەتر نەبیت بھێتە قەرەبووکرن، بەلێ ھندەک ژ وان خانیێن زێدەگاڤی بەری ماستەر پلانێ یێن ھاتینە چێکرن و گۆت: “دو کۆمپانی یێن کەرتێ تایبەت ب کارێ پاقژکرنا سنوورێ قەزا زاخۆ رادبن کو گرێبەستا وان بۆ سێ سالانە و ھەیڤانە 380 ملیۆن دیناران ژ حوکمەتێ وەردگرن، لێ د ئەڤ سالە دا ڤان ھەر دو کۆمپانیان ب دروستی کارێ خوە ئەنجام نەدایە و نێزیکی 12 جاران ھاتینە سزادان”.
سەرۆکێ باژێرڤانیا قەزا زاخۆ خویا کر کو چار ھزار و 479 فەرمانبەران ژ سالا 2011 وەرە رازەمەندیا ھەی کو پارچێن ئەردی ل سنوورێ قەزا زاخۆ وەرگرن، لێ باژێرڤانیا زاخۆ ئەرد تێرا ڤێ ھژمارێ نینە، ئەڤە د دەمەکی دایە کو ل ھەیاما بۆری پارچێن ئەردی د قووناغا ئێکێ دا ل 115 خێزانێن شەھیدێن شەرێ دژی تیرۆرستێن داعش ھاتنە بەلاڤکرن و گۆت: “165 زیندانیێن سیاسی ژی رازەمەندی یا ھەی کو پارچێن ئەردی وەرگرن، لێ ئەو ئەردێ باژێرڤانیێ ھەی تێرا ڤێ ھژمارێ ناکەت کو ل سەر بھێتە بەلاڤکرن”.
ل دووماھیێ ناڤھاتی دیار کر کو سەرەرایی ھەبوونا قەیرانێ د سێ سالێن بۆری دا چەندین پرۆژە ل قەزا زاخۆ ھاتینە ئەنجامدان کو بتنێ د سالا بۆری دا 98 پرۆژە و ب درێژاھیا 25 کلیۆمەتران جادە ھاتینە چێکرن و بۆ ئەڤ سالە ژی د پلانا وان دایە ھەتا 170 پڕۆژان بھێنە چێکرن و گۆت: “ئەو پرۆژێن ئەز شانازیێ پێ دبەم ئێک ژ وان پارکا شەھیدانە ئەوا دکەڤیتە د ناڤ سەنتەرێ قەزا زاخۆ، ھەروەسا پارکا گەنجانە کو ب شێوەکێ وەرزشی ھاتیە چێکرن وگەلەک پڕۆژێن دی ھەنە، ل ڤێرێ من دڤێت سۆپاسیا ھەموو خەلکێ زاخۆ بکەم کو ل دەمێ ئەنجامدانا پرۆژان گەلەک دگەل مە د ھاریکارن ب تایبەت ئەوێن ئەرد و خانیێن وان دکەڤنە بەر پرۆژێن خزمەتگۆزاری”.
نوش نيوز:
چ جاران بەرمایکێن مژوولانکێن خۆ ب تلان ژێڤەنەکە، ژبەرکو ئەو دبیتە ئەگەرێ وەریانا مژوولانکێن ھوور و رەنگە ددووڤدا وەرارێ ژی نەکەن.
* چ جاران ب دژواری سەروچاڤێن خۆ نەشوو، بەلکو ب ھێدیانە بشوو و ب خاولیەکا نەرم و ب شێوەیەکێ سەرخۆ ھشک بکە، نەکو دێ دێمێ تە پووچ بیت.
* چ جاران میکیاژی نەدانە بەری ھشککرنا پرچێ خۆ، ژ بەرکو ھەوایێ گەرم شیان ھەنە پێکھاتێ ھندەک کەرستێن جوانکاریێ ب گوھۆریت و رەنگێ وان ل سەر دێمی تاری بکەت و پاشی ژ ئەگەرێ خوھدانێ شوونوارێن وان بمینن.
* خۆ ژ میکیاژی کەڤن دوور بکە، باشترە بزانی ھەر جورەکێ میکیاژی کەنگی تە کریە و پشتی بوورینا شەش ھەیڤان ل سەر کرینا وی باشترە ب کارنەئینی و ھندەک ژوان ب تایبەت ئەوێن بۆ مژوولانکان دھێنە ب کارئینان دبنە ئەگەرێ ھەستداریا چاڤان، ھندەک کریم ھەنە بۆ دەمێ دو سالان ژی دمینن، ھەروەسان پێنوسێن ھشک ژی، بەلێ میکیاژێ ئاڤی پشتی بوورینا 9 ھەیڤان ھشک دبن و ھەر ل وی دەمی سوراڤا لێڤان بۆ دەمێ چەند سالان ژی دمینیت، ژبەرکو ژ شەمایێ ھاتیە دروستکرن، کریمێن ئەساسی و پودرە بۆ دەمێ دو سالان دروست دمینن، باشترە ل دەمێ ھشک دبن خۆ ژێ قورتال بکەی.
* ھەموو دەمان میکیاژی دووری تیرێژا رۆژێ ب پارێزە داکو رەنگێ خۆ ژدەست نەدەت.
* ھەردەم ئیسفەنج و فرچە و پامپیێ بۆ دانانا میکیاژی دھێنە دانان باش بشوو.
* ھەردەمێ تە ھەست کر بێھنەکا نەخۆش یا ژ میکیاژێ تە دھێت، ئێکسەر پاڤێژە.
* دەربارەی بوویاغا نینووکان: رەنگێن کو د تەیسن گەلەک ڤەدکێشن، ژبلی رەنگێ سۆر، کو پتر ژ سالەکێ ڤەناکێشیت، ھەکە تە بڤێت بوویاغا نینوکان ڤەلەک بمینیت، دناڤ سەلاجێ دا ب ھەلگرە.
ئەڤرۆ نيوز:
وەزارەتا خواندنا بلند و ڤەکۆلینێن زانستی ل ھەرێما کوردستانێ راگەھاند، د چارچوڤێ وێ پلانا ستراتیژی دا؛ ئەوا وەزارەتێ دەستپێکری بۆ گوھۆڕینان د پرۆگرامێن خواندنێ دا ل پشکێن زانستی، پێنگاڤێن پراکتیکی یێن گوھۆڕینان ل پشکێن کومەلناسیێ و کارێ جڤاکی ل زانکۆیێن ھەرێما کوردستانێ یا دەستپێکری.
وەزارەتا خواندنا بلند د مالپەرێ خوە یێ فەرمی دا بەلاڤکریە کو دکتۆر یوسف گۆران، وەزیرێ خواندنا بلند و ڤەکۆلینێن زانستی د چارچوڤێ سەرپەرشتیکرنا لژنا پێداچوونا بابەتێن خواندنێ ل ھەردو پشکێن کومەلناسیێ و کارێ جڤاکی دا کریە و مەرەم ژێ ئەوە کو ل گەل کەتوارێ نوکە یێ جڤاکێ کوردی بگونجن و ئەو ئاریشێن د ناڤ جڤاکێ کوردی دا سەرھلداین چارە بکەن، پێدڤی ب ھشیاریا جڤاکی ھەیە، ژ وی رووی ڤە دڤێت بسپۆر و شارەزاێن بیاڤێ کومەلناسیێ و کارێ جڤاکی رۆلێ پێشەنگ و کارا ھەبیت، بۆ وێ چەندێ ژی دڤێت پێداچوونەکا تمام د پرۆگرامێن خواندنێ دا ل پشکێن کومەلناسیێ و کارێ جڤاکی دا بھێتە کرن.
دیسا دکتۆر ماھر عەبدولواحد، سەرۆکێ لژنا پێداچوونێ د وان بابەتێن کۆمبوونێ دا گۆت: “چەند پێشنیاز ھاتنە بەحسکرن کو ئەو ژی ئێکسختنا پرۆگرامێ خواندنێ ل قووناغا ئێکێ ل ھەردو پشکێن کومەلناسیێ و کارێ جڤاکی بۆ سالا خواندنێ 2018 -2019، د ھەمان دەم دا پێشنیار ھاتیە کرن بابەتێ کومپیۆتەری ل ھەردو پشکان بھێتە لادان و بابەتێ پەیوەندیدار ل جھێ وی بھێتە دانان، ھەروەسا پێشنیار ھاتە کرن بابەتێ کوردولۆجی ب بابەتێ جڤاکێ کوردستانی بھێتە گوھۆڕین”.
ئەڤرۆ نیوز ، زنار تۆڤی:
کۆمسیۆنا بلند یا سه‌ربه‌خۆیا ھەلبژاردن و راپرسیێ ل کوردستانێ راد‌گه‌هینیت، کو ل دەستپێکا حەفتیا بهێت دێ كۆمسیۆن بنگەهێن تۆمارا دەنگدەران ڤەکەت و دێ لیستا ناڤێ کاندیدان ژی وەرگریت.
شۆرەش حەسەن رێڤەبەرێ گشتى یێ پەیوەندیان و راگەهاندنێ ل کۆمسیۆنا بلند یا سه‌ربه‌خۆیا ھەلبژاردن و راپرسیێ ل هه‌رێمێ گوت ، لدووڤ خشتێ كارێ كۆمسیۆنێ دبوو ل دەستپێکا ڤێ هەیڤێ بنگەهێن تۆمارا ده‌نگده‌ران بۆ وەلاتیان هاتبانە ڤەکرن و ل 3 ته‌موزێ ژی ده‌ست ب وه‌رگرتنا ناڤێن كاندیدان هاتبا کرن، بەێ ب ئەگەرێ بهێنڤەدانێن حوکمەتێ پشکەک ژ خشتێ کارێن کۆمسیۆنێ پشکەفت و گوهۆرین ب سەردا ھاتینە.
شۆرەشی دیارکر ژی ، ل دەستپێکا حەفتیا بهێت دێ بنگەهێن تۆمارا دەنگدەران هێنە ڤەکرن بۆ هندێ کو هەڤوەلاتی د ماوێ 30 رۆژان سەحا ناڤێن خوە بکەن، ھەڤدەم دێ تیروپشكێ بۆ هژمارا قەوارە و ھەڤپەیمانیان ئەنجامدەن و دێ لیستا ناڤێ کاندید و قەواران ژی وەرگرن ب مەبەستا هندێ کو هووربینی د ناڤاندا بهێته کرن.
نوکە تۆمارا ده‌نگده‌ران پشت ب داتا و زانیاریێن وه‌زاره‌تا بازرگانیا هه‌رێمێ به‌ستیه و بۆ ڤێ ژی نووترین داتا هەتا 31 كانوونا ئێکێ یا سالا بوری ژ ڤێ وه‌زاره‌تێ هاتە وه‌رگرتن.
دیسا گوتیه ژی،ئه‌و دێ تۆمارا ده‌نگدانێ ده‌نە په‌رله‌مانی و ئالیێن سیاسی یێن هه‌رێما كوردستانێ بۆ هندێ کوو بۆچوونێن خوە دەرباره‌ى واج تۆماران بده‌نه كۆمسیۆنێ و زێدەتر ده‌وله‌مه‌ند بكه‌ن پاشی دێ ل هه‌لبژاردنێن 30 ئیلۆنێدا كارى پێكه‌ن.
وەسا بریاره کو هه‌لبژاردنێن په‌رله‌مانێ كوردستانێ ل 30 ئیلۆنا 2018 دا بهێنە ئه‌نجامدان.
ئه‌ڤرۆ نيوز:
رۆژ بۆ رۆژێ رەوشا عیراقێ یا بەر ب ئالۆزیێن زێدەتر دچیت ، ھەتا نوکە لایەنێن سیاسی بۆ ئێکلاکرنا ئەنجامێن ھەلبژارتنان و پێکئینانا حوکمەتا نوو نەگەھشتینە چو ئەنجامان، شارەزا ژی دبێژن،ھەکە ئاریشێن عیراقێ نەھێنە چارەکرن ،پێشبینیا شەڕەکێ ناڤخوەیی دھێتەکرن.
دکتۆر دلێر شاوێس، مامۆستایێ زانکۆیێ بۆ رۆژناما ئەڤرۆ گۆت: مخابن چو ئاماژە بۆڤێ چەندێ نینە ئاریشە بھێنە چارەسەرکرن، و ھەموو پێشبینیەک یا دھێتەکرن نە ئارامیەک دەڤەرێ ڤەگریت بتایبەتی عیراقێ، ئەڤە ڤەدگەڕیت بۆ نەبوونا دیموکراتی و نە باوەریا لایەنێن سیاسیێن عیراقێ و پێگیربوون ب دستوورێ عیراقێ، کو ئێکە ژ ئاریشەیێن مەزن تووشی خەلکێ عیراقێ بوی ھەر ئەگەرەکێ روویدەت دێ کاریگەریێن خوە ل سەر رەوشا دەڤەرێ ھەبن، چونکو دەڤەر بخوە یا ئالۆزیاندا دەربازدبیت و ھەلویستێ جودایێ لایەنێن عیراقی لدۆر ئەنجامێن ھەلبژارتنێن پەرلەمانێ عیراقێ پتر رەوش ئالۆزکریە نە ئارامیا زێدەتر ژی دێ بەرھەم ئینیت، ل گەل تەمامبوونا تەمەنێ پەرلەمانێ عیراقێ دێ حوکمەت ژی ب دووماھی ھێت ، و حوکمەتا نوکە تنێ دێ حوکمەتا ھەوار ھاتن و کار برێکرنێ بیت.
دکتۆر دلێر شاوێس ھەروەسا دیارکر، نابیت کورد بتنێ رۆلێ تەماشەکرنێ بۆ رەوشا نوکەیا عیراق تێدا دەرباز دبیت ببینن،ژبەرکو کورد پشکەکە ژ عیراقێ و فاکتەرەکێ گرنگن ل روویدانێن عیراقێ و دەڤەرێ ژی، بەلێ یا گرنگ ئەڤە کورد بزانن دێ چاوا سەرەدەریێ دگەل ڤێ رەوشێ کەن، ئەگەر بێت ھەر ھێزەکا ھەرێما کوردستانێ بۆخۆ بچیتە بەغدا ئەڤە ئەم چو بدەستڤە نائینین و یا ھەتا نوکە بدەستڤەژی ھاتی دێ ژدەستدەین، بەرۆڤاژی کورد ئێکگرتی بن، ئەڤە دێ سەنگا خوە ھەبیت و بەرھەمێ وێژی دێ دیاربیت.
ژ لایێ خۆڤە ژی دکتۆر شێرزاد زەکەریا شارەزا ل کاروبارێن عیراقێ بۆ رۆژ ناما ئەڤرۆ دیارکر، بەری نوکە ژی دھاتە پێشبینی کرن ھەکە ھەلبژارتن ل عیراقێ برێڤەبچن دێ شەڕەکێ نافخۆ روویدەت، سووتنا پشکەک ژ سندۆقێن دەنگدانێ ژی نیشانا نەباوەریێ یە ب پڕۆسا دیموکراتی و ل عیراقێ چو ھێزەکێ باوەری ب رادەستکرنا دەستھەلاتێ نینە گورەی ئەنجامێن ھەلبژارتنان، مخابن ھندەک لایەنێن مەزھەبی عیراق وێرانکر، روویدانێن ڤێ دووماھیێ شاھدن بۆڤێ چەندێ چو دەولەتەک بناڤێ عیراق نەمایە، لەوڕا ئەز وەسا دبینم ھەکە لایەنەکێ نێڤدەولەتی و دەرەکی دەستێ خوە نە ئینیت بۆ چارەسەرکرنا ئاریشەیێن نوکە ل عیراقێ ھەی، گومان تێدا نینە دێ رەوش پەقیت و ل دەستێ ھەموویان دەرکەڤیت،ل ئەگەرێ چارەسەرنەکرنا ئاریشەیان پێشبینیا شەڕێ ناڤخوەیی ل عیراقێ دھێتەکرن، ھەتا دەستھەلاتدارێن عیراقێ ژی ئاماژە بڤێ مەترسیێ کریە، نە سەدر دەلیڤێ ددەت مالکی ڤەگەڕیت دەستھەلاتێ و نە نەمالکی رێکێ ددەت سەدر بھێتە سەر دەستھەلاتێ ھەردوولاژی خوەدی ھێزا سەربازینە.
نيشاندان