ئه‌ڤرۆ نيوز:
سەرۆکێ فڕاکسیۆنا پارتی ل پەرلەمانی عیراقێ ئاماژە بوێ چەندێ دکەت، ب چو شێوەیەکی پارتی رازینابیت دەنگێن تایبەت و ئاوارە و دەرڤە بھێنە رەتکرن، و دیارکر، ھەکە بڕیارا دووماھیێ دەرکەفت لدۆر رەتکرنا دەنگێن پێشمەرگەی دێ پارتی ھەلوێستەکێ دژوار ھەبیت و ناھێلیت ئەڤچەندە ب ساناھی دەربازبیت.
دکتۆر عەرەفات کەرەم، سەرۆکێ فڕاکسیۆنا پارتی ل پەرلەمانێ عیراقێ بۆ رۆژناما ئەڤرۆ گۆت” کۆمسیۆنا بلندا ھەلبژارتنان تانە ل بڕیارێن پەرلەمانی دایە ل دادگەھێ لدۆر راستڤەکرنا قانوونا ھەلبژارتنان دادگەھا فیدڕالی ژی دێ بڕیارێ لدۆر ئەنجامێن ھەلبژارتنان دەت، چونکو دادگەە دشێت ھەموو ئەنجامێن ھەلبژارتنێن پەرلەمانێ عیراقێ رەت بکەت، و ل گەل ھەلبژارتنێن پارێزگەھێن عیراقێ جارەکا دی ھەلبژارتنێن پەرلەمانی بھێنە ئەنجامدان، ژبەر کو دادگەھا فیدڕال بلندترین دەستھەلاتا دادوەریە ل عیراقێ بۆ ئێکلاکرنا ھەموو پرسەکێ، ھەلوێستێ مە وەک پارتی دیموکراتی دیموکراتی کوردستان لدۆر پرسا ھەلبژارتنان ئەڤە، ھەکە بھێت و دەنگدانا دەرڤە و یا پێشمەرگە و ئاوارەیان ھاتە رەتکرن، وی دەمی دێ مە ھەلوێستەکێ توند ھەبیت و ب چوشێوەیەکی قەبوول ناکەین، نوکە ئەم چاڤەڕێی دووماھی بڕیارین ل سەر ئەنجامێن ھەلبژارتنان، ژبەر کو بڕیار نە ددەستێ کۆمسیۆنێ دایە نە دەستێ پەرلەمانی دایە دادگەھا فیدڕال دێ بڕیارا دووماھیێ دەت، بێگومان بەیانناما مەکتەبا سیاسیا پارتی ژی یا رۆھن بۆ ل دۆر ئەڤی بابەتی و پارتی یا بێدەنگ نابیت.
ل دۆر ڤێ چەندێ کو ھەکە دەنگدانا پێشمەرگە و ئاوارەیان ھاتە رەتکرن پارتی دێ بایکۆتا پڕۆسا سیاسی ل عیراقێ کەت سەرۆکێ فڕاکسیۆنا پارتی دیارکر” نەشێم نوکە چو بێژم لدۆر ھەلوێستێ رۆژێن داھاتی یێ پارتی، بەلێ خویایە نوکە ھەموو لایەن دڕازین ئەنجامێن ھەلبژارتنان ب دەستی بھێنە ھژمارتن، بڕیارێن پەرلەمانی بۆ راستڤەکرنا قانوونا ھەلبژارتنان ھند بەرۆڤاژی دستووریە و ناھێتە ھژمارتن، بەلێ دادگەھا فیدڕال دێ پێداچوونێ ب تانەیێن کۆمسیۆنێ و پەرلەمانی و لایەنێن سیاسی بکەت و ڤێجا بڕیارێ دەت، ل گەل رازیبوونا لایەنێ، سیاسی بۆ ڤاڤارتنا دەنگان ب دەستی، بەلێ ب چو شێوەیەکی ناھێتە قەبوول کرن دەنگدان بھێنە رەتکرن، چونکو نە دستوور و نەقانوون رێکێ نادەن ھەتا دادگەە ژی رازینابیت.
دکتۆر عەرەفات کەرەم گۆت” دووماھیا ڤێ ھەیڤێ دێ پەرلەمانێ نوکەیێ عیراقێ چیتە مالا خوە و حوکمەت ژی دێ ژ کار کەڤیت، چونکو دێ ڤالاھیا قانوونی چێبیت ل عیراقێ، ل گورەی دستووری تەمەنێ پەرلەمانی ناھێتە درێژکرن بتنێ بمەرجەکی نەبیت پەرلەمانێ بلەز پڕۆژە قانوونەکێ بەرھەڤ بکەت و ئەف بڕگا دستووری بھێتە راستڤەکرن یا پەیوەندی ب تەمەنێ پەرلەمانی ڤە ھەی، یانژی لایەنێن سیاسی ھەموو پێکڤە بچنە دادگەھێ و داخوازێ بکەن دادگە بڕیارێ بدەت بۆ قورتالکرنا عیراقێ ژ ئەڤێ مەترسیا مەزن.
نيشاندان
