ئه‌ڤرۆنيوز:

نڤيسينگه‌ها سه‌رۆك وه‌زيرێن عيراقێ دووماهى پێشهاتێن دانوستاندنێ دناڤبه‌را به‌غدا وهه‌ولێرێ رادگه‌هينيت وباده‌كا هه‌ردو فرۆكخانێن هه‌ولێرێ وسلێمانيێ ب تمامى هاتينه‌ ئێكلاكرن وباده‌كا مووچێ فه‌رمانبه‌رێن هه‌رێمێ ژى قۆناغه‌كا باش يا برى.

سه‌عد حه‌ديسى، په‌يڤدارێ نڤيسينگه‌ها راگه‌هاندنێ يا سه‌رۆك وه‌زيرێن عيراقێ گۆت ” نوكه‌ لژنێن بسپۆر ل دۆر باده‌كێن دناڤبه‌را به‌غدا وهه‌رێمێ دا كار دكه‌ن ودانوستاندنان ژى پێشڤه‌چوونه‌كا باش بخوه‌ڤه‌ ديتيه‌”.

حه‌ديسى گۆت ژى” باده‌كا فرۆكخانێن هه‌ولێرێ وسلێمانيێ ب تمامى يێن هاتينه‌ ئێكلاكرن وپرسا مووچێن فه‌رمانبه‌رێن هه‌رێمێ ژى قۆناغه‌كا باش بريه‌”.

ل دۆر پرسا پاشخستنا باده‌كا ده‌رگه‌هێن سنورى، ل گه‌ل بوارێ په‌ترۆلێ ل وان كێلگێن ل سنورێ هه‌رێما كوردستانێ، وه‌كو دده‌زگه‌هين راگه‌هاندنێ دا هاتيه‌ به‌لاڤكرن، حه‌ديسى گۆت” من چو پێزانين ل سه‌ر رێككه‌فتنا به‌غدا وهه‌ولێرێ ل دۆر پاشخستنا وان باده‌كان بۆ پشتى هه‌لبژارتنان نينن”.

سه‌رۆك وه‌زيرێن عيراقێ، حه‌يده‌ر عه‌بادى، ل دووماهى داخۆيانيا خوه‌دا سوز دابوو فرۆكخانێن هه‌رێما كوردستانێ به‌رى نه‌وروزێ بهێنه‌ ڤه‌كرن بۆ گه‌شتێن نێڤده‌وله‌تى ومووچێن پشكه‌ك ژ فه‌رمانبه‌رێن هه‌رێمێ ژى بهێته‌ خه‌رجكرن.

ئه‌ڤرۆ نيوز:

كۆمسيۆنا بلندا سه‌ربه‌خۆيا هه‌لبژارتنان ل عيراقێ راگه‌هاند كو بۆ عيراقيێن ژ ده‌رڤه‌ى وه‌لاتى ل 19 وه‌لاتان بنگه‌هێن ده‌نگدانێ هاتينه‌ ڤه‌كرن دا كو بشێن ده‌نگێن خوه‌ ب ده‌ن.

حازم ردێنى ئه‌ندامێ جڤاتا كۆمسيه‌ران د كۆنگره‌كێ رۆژنامه‌ڤانى دا راگه‌هاند كو ب مه‌ره‌ما ده‌نگدانا وه‌لاتيان ژ ده‌رڤه‌ى وه‌لاتى جڤاتا كۆمسيه‌ران بڕيار دا هنده‌ك بنگه‌هێن ده‌نگدانێ بۆ ده‌نگدانا وه‌لاتيێن ژ ده‌رڤه‌ى وه‌لاتى ڤه‌كه‌ت و بۆ ڤێ مه‌ره‌مێ ژى 19 وه‌لات هه‌لبژارتينه‌.

دا زانين ژى كو دێ ل هه‌ر ئێك ژ وه‌لاتێن ئه‌مريكا، توركيا، ئيران، سويد، بريتانيا، ئوستراليا، كه‌نه‌دا، ئوردن، ئه‌لمانيا، هۆله‌ندا، دانيمارك، مسر، ئيمارات، فنله‌ندا، نه‌رويج، نيوزله‌ندا، لوبنان، به‌لجيكا و نه‌مسا.