ئەڤرۆ نیوز ، زنار تۆڤی :
رێڤه‌به‌رێ گشتی یێ راگه‌هاندن و چاپ و بەلاڤکرنێ ل وه‌زاره‌تا رەوشەنبیری و لاوان ل حوکمه‌تا هه‌رێما كوردستانێ راگه‌هاند ، کو خه‌لك یێ ئازاده د ب كارئینانا ئامیرێ په‌خشا كه‌نالێن نافخوەیی و دبێژیت ، چو گرێبه‌ست دناڤبەرا وه‌زاره‌تا رۆشنبیرى و كۆمپانیانیێن په‌خشێ وان كه‌نالان دا نینە.
ئه‌ڤرۆ سێشه‌مبی 5 خزیرانا 2018 ، محه‌مه‌د گه‌ردی، رێڤه‌به‌رێ گشتی یێ راگه‌هاندنا چاپ و بەلاڤکرنێ ل وه‌زاره‌تا رەوشەنبیری و لاوان كۆنگره‌کێ رۆژنامه‌ڤانی ئه‌نجامدا ل هه‌ولێرێ و گوت ل سالێن بوریدا كار ل سه‌ر هندێ هاتیە كرن کو كه‌نالێن نافخوەیی ل سه‌ر ئێک سیسته‌م كار بكه‌ن و چه‌ند كۆمپانیان ده‌ستپێشخه‌ری كر و ده‌ست ب كاركرنێ كر.
هەروەسا گوت ژی ب ئەگەرێ نه‌بوونا هیچ قانوونەکێ ل عێراقێ و هه‌رێما كوردستانێ بۆ ڤی سیسته‌می ،لەوما مە رێنمایی ده‌ركرن و د وێ رێنماییێ دا بەحسێ هیچ گرێبه‌ستەکێ نەهاتیە كرن دناڤبەرا مه و وان كۆمپانیانیێن په‌خش دكهن.
ئاماژه دا هندێ د نوکە دا كۆمپانیەک ب گۆژمەکێ پاره‌ی وی په‌خشی دکەت و كۆمپانیەکا دیتر بێ به‌رامبه‌ر ، لەوما خه‌لك یێ ئازاده د كرین و ب كارئینانا هه‌ر ئێک ژ وان.
سه‌باره‌ت ب بهایێ ئامیرێن وان كه‌نالان ژی محه‌مه‌د گه‌ردى گوتیە ، ل سالا بوری بهایێ وی یێ زۆر بوو ، لێ مە داخواز کریە بهێتە كێمكرن و وان ژی کێمکریە.
ئەڤرۆ نیوز ، زنار تۆڤی :
ژنه‌كا سعوودی ناڤێ خوه د دیرۆكا سعوودیێ دا تۆمار كر و بۆ ئێكه‌م ژن كو ده‌ستووریا هاژۆتنا ترۆمبێلێ ل وی وه‌لاتی بده‌ست خوەڤە بینیت.
پشتی ده‌ستهه‌لاتا سعوودیێ رێ ل هه‌مبه‌ری ژنان ڤه‌كری كو ده‌ستووریا هاژۆتنا ترۆمبێلێ دەربێخن، 10 ژنێن كو ده‌ستووریا هاژۆتنا نێڤده‌وله‌تی هه‌بوو ده‌ستووریا خوه ل گه‌ل ده‌ستووریا نیشتمانی یا سعودیێ گوهۆری و ڤیدیۆیا ئێكه‌م ژنا ده‌ستووری وه‌رگرتی ل میدیایێن عه‌ره‌بی و جیهانی به‌لاڤ بوو.
لدووڤ رێڤه‌به‌ریا هاتنووچووونا ریازا پایته‌خت ، ئه‌و پێشبینی دكهن کو د حه‌فتیێن بهێت دا نێزیكی 2 هزار ده‌ستوورێن هاژۆتنێ بدەنە ژنان.
ل ئیلۆنا سالا بوری شاهێ سعوودیێ مه‌رسۆمه‌ك به‌لاڤ كر و تێدا رێ هه‌مبه‌ری ژنان ڤه‌كر كو ترۆمبێلێ بهاژۆن، لێ چو ژنان ده‌ستووریا ناڤخوە نه‌بوون ، لێ رێكارێن دانا ده‌ستووریێ ژنوو هاتنه دیاركرن ، ل گۆری بریارا شاهانه ل 24 ڤێ مه‌هێ ب فه‌رمی دێ ژڤانێ ده‌ستپێكرنا هاژۆتنا ترومبێلێ ژ لایێ ژنان ڤه چیته د بیاڤێ بجهئینانێ دا.
ئەڤرۆ نیوز ، زنار تۆڤی :
ئه‌ندامەکێ جڤاتا پارێزگەها مووسل داخوازێ ژ هێزێن ئە‌مریكا دکەت کو سنۆرێ عێراقێ بپارێزن و هۆشداریێ ددەت ژ هندێ کو سیناریۆیا كه‌فتنا مووسلێ دووباره ببیته‌ڤە.
بنه‌یان جه‌ربا ئه‌ندامێ جڤاتا پارێزگەها مووسل د لێدوانەکا رۆژنامه‌ڤانى دا هۆشدارى دا ژ مه‌ترسیا دووباره‌بوونا سیناریۆیا كه‌فتنا مووسلێ و داخواز ژ هێزێن ئه‌مریكا دکەت کو سنۆرێن عێراقێ و سووریێ بپارێزن.
هەروەسا گوتیە، ل هاڤینا 2014 مە گەلەک جاران داخواز دکر کو هێزێن ئه‌مریكا سنووری بپارێزن، به‌لێ كه‌سێ گوهێ خوە نەدا مه ، لەوما سێیه‌كا عێراقێ كه‌فته ده‌ستێ چه‌كدارێن داعشێ.
د لێدوانا خوە دا جه‌ربا داخواز دکەت کو نابیت خەلەتیا بوری دووباره ببیت و دڤێت هێزێن ئەمریکی سنۆران بپارێزن و دبێژیت ،ئه‌و د رزگاركرنا مووسلێ پشکدار بووینە ، شیانێن مەزن هه‌نه بۆ پاراستنا سنۆری.
دیسا گوتیە ، باشترە هێزێن ئه‌مریكا ل ده‌وروبه‌رێن مووسلێ بهێنە بەلاڤەکرن ، دڤێت هەماهه‌نگى ل گه‌ل هێزێن ئه‌مریكی بهێتە دروست کرن ، نه‌كو گرژى ، بۆ هندێ داکو بشیێن مووسلێ بپارێزین.
سەرەرای هندێ ئەڤە پترە ژ 10 هەیڤان رزگاركرنا مووسلێ ژ لایێ حوکمه‌تا عێراقێ ڤه هاتیە راگه‌هاندن ، بەلێ هەتا نوکە ژی ل باشورێ وی باژێری جموجۆلا تیرۆرستان هه‌یه.
ئەڤرۆ نیوز ، زنار تۆڤی :
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ مالپەرێ ئەڤرۆ نیوز دا خویاکرن: کو هەر ژ رۆژا ئێکێ یا رەمەزانا ئەڤ سالە 22 روودانێن هاتنوچوونێ ل پارێزگەها دهۆکێ رووداینە.
ناڤهاتی زێدەتر دا دیارکرن : ل دەستپێکا رەمەزانا ئەڤ سالە هەتاکو رۆژا ئەڤرۆ 19 رەمەزانا پیرۆز 22 روودانێن هاتنوچوونێ ل پارێزگەها دهۆکێ رووداینە و هەروەسا د وان روودانان دا 9 کەسان گیانێ خوە ژ دەستدایە و دیسا 23 کەسێن دیتر د وان روودانان دا بریندار بووینە.
ئه‌ڤرۆ نيوز، نيوار محه‌مه‌د سه‌ليم:
ئه‌ندامه‌كێ په‌رله‌مانێ كوردستانێ راگه‌هاند كو په‌رله‌مانێ كوردستانێ نه‌شێت رۆژا چارشه‌مبى ل سه‌ر پرۆژێ چاكسازيێ ب روونيت و په‌سه‌ند كه‌ت.
ئه‌ندامه‌كا په‌رله‌مانێ كوردستانێ ل سه‌ر فراكسيۆنا پارتى ديموكراتى كوردستان بۆ ئه‌ڤرۆ نيوز گۆت: “ژ به‌ر كو ل سه‌ر دارشتنا دووماهيێ ل سه‌ر رىستڤه‌كرنا قانوونا چاكسازيێ ژ لايێ لژێن دارايى و قانوونى ڤه نه‌هاته كرن و ژ به‌ر هندێ ژى رۆژا چارشه‌مبى په‌رله‌مان نه‌شێت گه‌نگه‌شێ ل سه‌ر وى پرۆژه‌ى بكه‌ت و په‌سه‌ند بكه‌ت.
زێده‌تر گۆت: “ئه‌ڤه وێ چه‌ندێ ناگه‌هينيت كو په‌رله‌مانێ كوردستانێ ل رۆژا چارشه‌مبى نه‌شێت كۆم ببيت، به‌لێ نه‌شێت دانوستاندنێ ل سه‌ر پرۆژێ خانه‌نشينێ بكه‌ت و په‌سه‌ند بكه‌ت”.
ب گۆره‌ى پێزانينێن ئه‌ڤێ په‌رله‌مانتارێ بۆ ئه‌ڤرۆ نيوز ئاشكه‌را كرين هنده‌ك ژ په‌رله‌مانتارێن ئێكه‌تيێ ئيمزايێن خوه ل سه‌ر په‌سه‌ندكرنا راستڤه‌كرنا ڤان ماددێن دا هێنه راستڤه‌كرن ڤه‌كێشايه و ب ڤێ چه‌ندێ ژى نه‌شيان دارشتنا دووماهيێ يا وان ماددان بكه‌ن.
نه‌ڤه‌شارت ژى كو په‌رله‌مانتارێن به‌رى وان ژى قه‌بوول ناكه‌ت پرۆژه سه‌ربگريت و گۆت: “ئه‌و يێن دبێژن هه‌كه هوون ده‌ستكاريێ د خانه‌نشينيا مه دا بكه‌ن كو شه‌ش مليۆن دينارن، دێ ل دادگه‌ها ناڤه‌ندى سكالايێ ل سه‌ر هه‌وه تۆمار كه‌ين و دخوازن ئه‌ڤ بڕياره ژ خولێن بهێت يێن په‌رله‌مانى ده‌ست پێ بكه‌ت”.
هه‌ر د درێژاهيا گۆتنێن خوه دا، ئاماژه ب وێ چه‌ندێ كر كو ئێكه‌تى نشتيمانى كوردستان و بزاڤا گۆڕان رێگرن ل هه‌مبه‌ر ڤى پرۆژه‌ى، ژ به‌ر هندێ ژى ب زه‌حمه‌ت دبينيت كو ئه‌ڤ پرۆژه بهێته په‌سه‌ند كرن.
ئه‌ڤرۆ نيوز:
هانى مولقى سه‌رۆك وه‌زيرێن ئوردن، پشتى چه‌ندين خونيشادان ل وه‌لاتى وى هاتينه كرن و ل ژێر فشارا جه‌ماوه‌رى دا، ده‌ست ژ كار كێشا، د ماوى بوورى دا، حوكمه‌تا ئوردن چه‌ندين بريارده‌رخستبوون كو ب ره‌نگه‌كێ باج و سوته‌مه‌نى ل سه‌ر خه‌لكى گران كربوون، ب ڤى يه‌كێ نه‌رازيبوونه‌ك زور يا جه‌ماوه‌رى دروست بوو و بۆ ئه‌گه‌رێ خونيشادانێن سه‌رانسه‌رى ل ئوردن هه‌تا گه‌هشتيه ده‌ست ژ كاركێشانا سه‌رۆك وه‌زيرێن ئوردن.
سه‌ره‌راى ده‌ست ژ كاركێشانا سه‌رۆك وه‌زيرێن ئوردن، لێ خونيشادانێن ئه‌ڤرۆ ژى د به‌رده‌وام بوون.
ئه‌ڤرۆنيوز:
دكۆمبوونا جڤاتا پارێزگه‌ها هه‌ولێرێ يا ئه‌ڤرۆ دوشه‌مبى 4/6/2018 كو ل سه‌ر هه‌ردو بابه‌تێن گرانبوونا بهايێ پانزينێ وكه‌نالێن ته‌له‌ڤزيونى يێن ناڤخوه‌يى بوو، دراپۆرتا لژنا ره‌وشه‌نبيرى يا جڤاتێ هاتيه كو كۆمپانيا يونايتد ميكس ميديا مۆله‌تا فه‌رمى ژ حوكمه‌تا هه‌رێما كوردستانێ نينه وپێدڤيه وه‌لاتى بايكۆتا كرينا وى ئاميرێ به‌خشا كه‌نالێن ناڤخوه‌يى دكه‌ت بكه‌ن.
ل دووڤ راپۆرتا وێ لژنێ، پێدڤيه به‌خشێ كه‌نالين ناڤخوه‌يى بهێته ئاساييكرن وكۆد نه‌هێته دانان ل سه‌ر چ كه‌ناله‌كى كو نوكه هاتينه راگرتن.
سه‌رۆكێ لژنا ره‌وشه‌نبيرى ل جڤاتا پارێزگه‌ها هه‌ولێرێ، ل دووڤ مالپه‌رێ كوردستان تى ڤى، راگه‌هاند” هژماره‌كا كۆمپانيێن دى يێن هاتينه پێش ودي به‌خشێ كه‌نالان كه‌ن ئه‌ڤ چه‌نده ژى بۆ وێ ئێكێ يه وه‌لاتى بێ به‌هر نه‌بن ژ به‌خسا كه‌نالێن ناڤخوه‌يى وگۆت ژى” داواكارێ گشتى يێ هاتيه ئاگه‌هداركرن ول دادگه‌هێ ژى دێ سكالا ل سه‌ر كۆمپانيا ناڤبرى يا هاتيه تۆماركرن”.
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ دچارچۆڤێ پێشوازيكرنێ ل جێگرێ به‌رپرسێ هێزێن هه‌ڤپه‌يمانيا نێڤده‌وله‌تى ل عيراقێ وسووريێ راگه‌هاند، پێدڤيه هه‌ر چ زوويه ره‌وشا ده‌ڤه‌رێن كوردستانى ل دووڤ نه‌خشه رێيا مادێ 140 بهێته چاره‌سه‌ركرن وره‌وشا داگيركارى ل وان ده‌ڤه‌ران بهێته ب دووماهى ئينان.
مه‌سرور بارزانى، شيره‌تكارێ جڤاتا ئاسايشا هه‌رێما كوردستانێ ئه‌ڤرۆ دوشه‌مبى 4/6/208 پێشوازى ل جه‌نه‌رال( وولته‌ر پايت) جێگرێ به‌رپرسێ هێزێن هه‌ڤپه‌يمانيا نێڤده‌وله‌تى ل عيراقێ وسووريێ وشاندێ دگه‌لدا كر.
دديداره‌كێ دا دووماهى پێشهاتێن ئه‌منى وسياسى ل عيراقێ ولڤينێن ڤێ دووماهيێ يێن تيرۆرستێن داعشێ ل ده‌ڤه‌رێ رزگاركرى ب گشتى وده‌وروبه‌رێن كه‌ركووكێ ب تايبه‌تى هاته به‌حسكرن ودانوستاندن ل دۆر قۆناغا داهاتى يا روو ب رووبوونا تيرۆرستان هاته كرن.
مه‌سرور بارزانى ئاماژه ب ره‌وشا به‌رێ يا پارێزگه‌ها كه‌ركووكێ دا وراگه‌هاند، ئه‌و ده‌مێ كه‌ركووك وده‌وروبه‌رێن وێ دبن كونترۆلا پێشمه‌رگه‌ى دا، گه‌له‌ك يا ئاران وپاراستى بوو، دووپاتى ل وێ چه‌ندێ ژى كر كو” پێدڤيه هه‌ر چ زوويه، ل دووڤ نه‌خشه‌رێيا مادێ 140 يێ دستوورى، ره‌وشا وان ده‌ڤه‌ران بهێته چاره‌سه‌ركرن وداگيركارى ب دووماهى بهێت”. هه‌ڤده‌م ئاماژه ب گرنگيا دروستكرنا باوه‌ريێ دناڤبه‌را هێزێن پێشمه‌رگه‌ى وهێزێن عيراقى دا كر.
هه‌ر دوێ ديدارێ دا، مه‌سرور بارزانى دووپاتى ل سه‌ر پێگيريا هه‌رێما كوردستانێ دبه‌رده‌واميدانێ ب شه‌رێ تيرۆرستان كر.
ژلايێ خوه‌ڤه، جه‌نه‌رال وولته‌ر پۆخته‌يه‌ك ل دۆر پلانا هێزێن هه‌ڤپه‌يمانان بۆ مه‌شق وراهێنانێ ب هێزێن پێشمه‌رگه‌ى به‌رچاڤكر وهه‌ردو لا رێككه‌فتن ل سه‌ر به‌رده‌واميدانێ ب دانوستاندنێن شيره‌تكاريانه ل دۆر پرسێن گرنگ كو جهێ بايه‌خا هه‌ڤپشكن.
ئەڤرۆنيوز، سالار دۆسكی:
ده‌مێ پتر ژ 11 سالانە خزمەتا مالباتێن شەهیدان و پێشمەرگەی و خێزانێن دەست كورت و هەژار دكەت بۆ هەیڤا رەمەزانێ ژی بەرنامەكێ بەرفرهه يێ هه‌ى.
هێرش رەشید، بەرپرسێ رێكخراوا مەند بۆ یەكسانیێ بۆ رۆژناما ئەڤرۆ گۆت: سالانە ل هەموو هەلكەفتان ل گەل خەلكێ خوە ینە و هاریكاریا پێشكێشی خەلكێ هەژار و دەست كورت و خێزانێن پێشمەرگەی وشەهیدان دكەین، بۆ جەژنا رەمەزانێ ژی رێكخراوا مەند بەرنامەكێ بەر فرهه هەیە ل گەل چەندین كۆمپانی و مرۆڤێن خێرخواز بۆ هاریكاریا زارۆيان و خێزانێن كێم دەرامەت,
هێرش رەشید گۆت كو رێكخراوا مەند ل گەل رێكخراوا كوردس و zsvp رابووینە ب بەلاڤەكرنا ئازووقه‌ى ل سەر خێزانان، زێدەباری كومپانیا فاسلینك یا خودانێ وێ(كاوە عەبدالله جنید)، رابوویە ب كرینا جلكان بۆ زارۆيان، دیسا ئەندامێ هەلبژارتی یێ پەرلەمانێ عیراقێ،(عمر رێكانی) رابوویە ب كرینا جلكان بۆ زارۆيان، ل گەل دانانا چەندین خوارنێن فتارێ ل ڤێ هەیڤا پیرۆز بۆ پێشمەرگێ كوردستانێ، هەر ب هەمان هەلكەفت كۆمپانیا mrf یا خودانێ وێ (حەجی چولی) رابووینە ب بەلاڤەكرنا كوژمەكێ پارەی ل سەر وەلاتیێن هەژار زێده‌بارى به‌لاڤكرنا جلكان، ئەڤە بەرنامەكێ بەردەوامە هەتا دووماهیا ڤێ هەیڤێ.
دياركر، داخواز ژ رێكخراوێن جڤاكێ مەدەنی دكەین هاریكاریا خەلكێ دهۆكێ بكەن، دەولەمەند ژی رۆلێ خوە بگێرن و هاریكاریا هەژار و دەست كورتان بكەن.
بەرپرسێ رێكخراوا مەند گۆت ژی: ئارمانجا مە ئەوە زارۆيێن مە بێ بەهر نەبن ژ جەژنا رەمەزانێ و ئەڤ بەرنامە ل سەرانسەری پارێزگەها دهۆكێ ب هەموو قەزا ڤە هاتیە بجهئینان.
نيشاندان