ئەڤرۆ نيوز:
د بیرھاتنا وەغەرکرنا ھەر دو ھونەرمەندان (تەحسین تاھا و عەبدولا زێرین) کو ھەر دو دئێک رۆژ دا وەغەرکرینە کو دکەڤیتە 28/5 ھەر دو خەلکێ ئێک دەڤەر بووینە کو قەزا ئامێدیی، وەک رێزگرتن ھەمبەر ھونەر و خزمەتا ئەڤان ھونەرمەندان مە دووڤچوونا ھونەری ئەنجامدایە.
ھەلبەستڤان مەحفۆز مایی کو چەندین ستران داینە ھونەرمەند عەبدوللا زێرین، بۆ ئەڤرۆ گۆت: ل سالا 1978 بۆ 1979 من ب رێیا ھەلبەستێ ئەو نیاسی، وی دەمی گوند راکربوون و خەلکێ مە دەربەدەر ب بوون، پەیڤێن مە پتر ب ھەلبەستێ مە دەرکرن، گەلەک ژ ھەلبەستێن من داینە زێرین ل دووڤ خواستا وی بووینە، ب تایبەت پشتی سالا 1979 بارزانیێ نەمر وەغەرکری، پتر مە ب ھەلبەسەتێ برینێن خوە دەردکرن بۆ خەلکی تشتەکێ خوش بوو، ل سالا 1979 پشتی وەغەکرنا بارزانیێ نەمر ھەلبەستێن مە ھەموو رەمزی بوون و خەلکێ مە یێ بریندار بوو و ھەر تشتەکێ مە گۆتبا خەلکی دزانی مە بەحسێ چ دکر، ھەمان سال ھەلبژارتنێن جڤاتا نوونەرێن عیراقێ بوون، ل دھۆکێ بنگەھێ ھەلبژارتنان وێ سالێ بلند گوو ھەبوون ل سەر بانێن بنگەھێن ھەلبژارتنان و خەلکی گوھداری دکرن، وێ سالێ بەرھەمەکێ عەبدوللا زێرین دەرکەڤت و پێنچ ھەلبەستێن من وی بەرھەمی دا بوون، سێ ھەلبەست سیاسی بوون، دو ھەلبەست وەک تێکست وی ژ من خواست بوون کو دیالوکەکێ دورست بکەم دناڤبەرا کچ و کوڕی دا بیت و ئەو ئاوازێن شڤان و گولستانێ دانا بوونە سەر و خەلکی گەلەک حەزژێ کر و خەلکێ بریندار بوو و خەلکی زانی بەحسێ چ دکەت، ژوان ھەلبەستێن سیاسی (ئەڤ دلێ من پر برینە رۆژا تۆ چوویی تەکر کاڤل و پشتی تە مە خودان نینە) خەلکی زانی بەحسێ سەرکردێ نەتەوا کورد مەلا مستەفا بارزانی یە، ھەلبەستەکا دی ( بێریا گوندێ مە پەزێ تەیێ مەخلێ زی راکە مەشکا شیری مە ژڤانە ل ڤێ ھەلێ) دو ھەلبەستێن ئەڤینی ژی تێدا بوون (نازدار چاڤێن تە دەریانە) و (ئەزێ ل جانەکێ دگەرم خوین شرینە) ئەڤە بەرھەمێ ئێکێ بوو وەک کاسێت بەلاڤەکر و دشێم بێژم ب ئەڤێ کاسێتێ پتر ھونەرمەندێ خودێ ژێ رازی عەبدوللا زێرین ھاتە نیاسین دناڤ خەلکی دا، و ئەوی حەز دکر گولبھار سترانا نازدار چاڤێن تە دەریانە ل گەل بێژیت، ھەتا حەفت ھەلبەستێن من کرینە ستران، لێ پشتی تێکچوونا کاودانان و بووینە پێشمەرگە ماوەکی ژ ئێک دوور کەفتین.
مایی گۆت: ژ حەز و ڤیانێن ھونەرمەند عەبدوللا زێرین شیا ستودیۆیەکا تۆمارکرنا سترانان ل دھۆکێ دروست بکەت، وی دەمی ژی ھەرێ نەخۆش بوو و ئاریشا دلی ھەبوو، گەلەک حەز د دلی دابوون و حەزێن وی ژ شیانێن وی مەزنتر بوون و حەزدکر ھونەر ل دەڤەرا بەھدینان پێش بکەڤیت، حەزدکر دھۆکێ ئوکێسترا ھەبیت ژبلی تیپا دھۆک یا مۆزیکێ لێ دبینم ھاریکاریا وی نەھاتەکرن و ھەم مۆزیکژەن بوو و ئاواز ژی دانان و سترانبێژ بوو ژی.
مەحفۆز مایی، بەحسێ ھەڤالنیا خوە ل گەل ھونەرمەند تەحسین تاھای کر، و گۆت: ل سالا 1980 ل رادیۆیا کوردی من پرۆگرامەک ھەبوو، جارەکێ ھونەرمەند تەحسین تاھای دیتم و گۆت من ستودیۆیا گرتی بۆ تۆمارکرنا دو سترانان من سترانەک ھەیە و سترانا دی بتنێ من ئاواز ھەیە و من پەیڤ نین ئەڤجا ھەکە تە ھەلبەستەک ھەبیت دێ دانمە سەر ڤێ ئاوازێ و کەمە ستران، ھونەرمەند تەحسین تاھای ئاواز وەک میلۆدی بۆ من گۆت و من زانی چ برگا ھەلبەستێ دێ کەڤیتە سەر و گونجیت، ھەر ھەمان دەم چوومە ژۆرا خودێ ژێ رازی سەگڤان عەبدولحەکیم و دیالوکەک ل گەل دارا کەڤوکێ وەک تێکست من نڤیسی، وی دەمی لژنا ھەلبەستان (سەگڤان عەبدوالحەکیم و جەمال بەرواری) بوون ئەوا رازی بوون، ھەلبەست چو دەف رێڤەبەری ئەو ھەڤالێ ھونەرمەند تەحسین تاھای بوو، کەیفا ھونەرمەند تەحسینی گەلەک بڤێ ھەلبەستێ ھات، وی دەمی مرۆڤەک ل رادیۆیێ ھەبوو چو دەڤ رێڤەبەرێ رادیۆیێ و تێکست دیت و گۆتێ ھەلبەستێن مەحفۆزی ھەموو بەحسێ کوردینیێ نە و ئەڤە ھەلبەستە گەلەک یا بھێزە و دێ دەنگ ڤەدەت، تەحسین عاجز بوو و گۆتە رێڤەبەرێ رادیۆیێ تۆ ھەلبەستێ ل بەغدا من قەدەغە دکەی لێ دێ ل دھۆکێ بێژم دووڤ دا دەرفەت نەکەفتێ و تێکست ل دەف نەما و ئەم ژێک دورکەفتین.
ھەروەسا گۆت: جارەکێ ل مالا رۆژنامەڤان جەمال بەرواری مێھڤان بووین، ئەز و تەحسین و گولبھار و سەعید گاباری بووین و پشتی خوارنا شیفێ سترانگۆتن، دووڤ دا سەعید گاباری سازژەنی، سترانەکا گولبھارێ ژ پەیڤێن من بوون ژ گولبھارێ خواست و گولبھارێ ئاریشەک ھەبوو نەشیا سترانێن خوە ژ بەر بکەت، گولبھارێ گۆتە گاباری ھەلبەستا مەحفۆزی یە ھەما بلا ئەو بێژیت و ژنوو سەعید زانی ھەلبەستا منە ھاتە سەرێ من و چەند پەیڤ من گۆتن بیرا گولبھارێ ھات و ھەر دو سترانبێژان تەحسین تاھا و سەعید گاباری گەلەک کرنە گری. و ھونەرمەند تەحسین تاھای پایسکا گوھۆرینا سترانێ یە ل دەڤەرا بەھدینان، ھەکە کۆچک و دیوان و محەمەد عارف و عیسا بەرواری و کلاسیک تەحسین تاھا ستران ژڤێ قوناغێ دەربازکر و سترانا کوردی ل دەڤەرێ نوژەنکر.
ل دووماھیێ ھەلبەستڤان مەحفۆز مایی بەحسێ بیرھاتنەکا خوە ل گەل ھونەرمەند تەحسین تاھای کر، و گۆت: وی دەمی سەدام حسێنی ترۆمبێل وەک دیاری دانە ھونەرمەندان جارەکێ ل بەغدا چووم یێ ل بەر دەرگەھێ ترۆمبێلەک وەرگرت بوو و ژ گلیزی شیشت وی دەمی ھندی ھزرا کوردنیی مە ھەبوو مە ھزر کر ھەر کەسەکێ ترۆمبێلێ ژ سەدام وەربگریت تاوانە، من گۆتێ بابێ ڤەھێلی نوزانم بێژمە تە پیرۆزبیت دلێ من دا ناچیت بێژم، ئینا گۆت نەبێژە من پیرۆز بیت، تشتەکێ نەباش گۆت کو مرۆڤی ھەبیت و مرۆڤ ژ خودێ بخازیت ژ مرۆڤی ڤەبیت.
رۆژنامەڤان جەمال بەرواری، د بیرەوەریا ھونەرمەند تەحسین تاھای دا بۆ رۆژناما ئەڤرۆ گۆت: من ناڤێ تەحسین ل سالێن شیستان گوە لێ ببوو ھێشتا قوتابی بوو ل پەیمانگەھا ھونەرێن جوان ل بەغدا، ل سالێن حەفتیان من تەحسین ل ئێزگا کوردی ل بەغدا دیت و بووینە ھەڤالێن ئێک کوردەکێ پاقژ بوو چەندین دیدارێن ھونەری و گەریان مە ل گەل ئێک ھەبوون.
و چو سترانێن تەحسینی ئەوێن ل ئێزگێ کوردی ھاتیە تۆمارکرین نە ھاتبوونە قەدەغەکرن، ژبلی سترانا (دستار) پشتی بەیانا 11ی ئادارێ بۆ دەمێ چار سالان رۆژانە ب دەھان جار مە بەلاڤ دکر، و ڤێ سترانێ تەحسین گەھاندە گوپیتکێ، و دووماھی رۆژا من تەحسین تاھا دیتی ل ھاڤینگەھا سیلاڤێ بوو ل سالا 1991 دەمێ دیتیم گەلەک کەیف خۆش بوو، چونکو دەمەک بوو مە ھەڤدۆ نەدیت بوو ژ من خواست ئەو سترانێن ئێزگەی مە بۆ تۆمارکرین بۆ فرێکەم و مخابن نە گەھشتم ئومێداوی بجھئبینم.
نيشاندان
