ئه‌ڤرۆنيوز، سالار دۆسكى
رێڤه‌به‌ريا به‌رگريا شارستانى ل دهۆكێ راگه‌هاند، ئه‌نجامێ ئاگربه‌ربوونا ئه‌ڤرۆ يا موه‌ليدێن كاره‌بێ ل تاخێ سه‌رهلدان ل نيزيك مزگه‌فتا سه‌لاحه‌دين كه‌سه‌كى گيانێ خوه ژ ده‌ستدا.
بێوار عه‌بدولعه‌زيز، به‌رپرسێ راگه‌هاندنا به‌رگريا شارستانى ل دهۆكێ بۆ ئه‌ڤرۆنيوز گۆت” 4 پۆليسێن ئاگر ڤه‌مراندنێ ژى يێن برينداربووين و 3 ترومبێل ژى يێن هاتينه سوتن”.
ئه‌ڤرۆنيوز:
وه‌زيرێ ده‌رڤه يێ ئه‌مريكا راگه‌هاند، پێدڤيه ئيران هێزێن خوه ژ سووريێ وعيراقێ ڤه‌كێشيت ودياركر كو ئه‌مريكا هيزێن خوه ژ عيراقێ ناڤه‌كێشيت تاكو پشت راست نه‌بيت كو داعش نازڤريت.
ريكس تێلرسۆن، وه‌زيرێ ده‌رڤه يێ ئه‌مريكا دكۆنگره‌كێ رۆژنامه‌ڤانيدا ل كوێتێ، گۆت” بۆچوونا ئه‌مريكا وه‌كو يا جڤاكێ نێڤده‌وله‌تى يه وپێدڤيه كاريگه‌ريا ئيرانێ ل سووريێ وعيراقێ نه‌مينيت”.
گۆتژى” بۆچوونا مه ژ ئه‌گه‌رێ وێ چه‌ندێ يه كو هه‌بوونا ئيرانێ ل وان ده‌ڤه‌ران چو ئاراميه‌ك بۆ وه‌لاتيان نه‌ئينايه”.
دووپاتكر ژى” دووباره داخوازێ ژئيرانێ دكه‌ين وان ده‌ڤه‌ران بجه بهێليت”.
ديسا گۆت” هه‌تاكو پشت راست نه‌بين كو داعش نازڤريته‌ڤه، ئه‌م هێزێن خوه ژ عيراقێ ناڤه‌كێشين”.
ئه‌ڤرۆنيوز، سالار دۆسكى
به‌رپرسێ راگه‌هاندنا رێڤه‌به‌ريا به‌رگريا باژێرڤانى ل دهۆكێ، بێوار عه‌بدولعه‌زيز، بۆ ئه‌ڤرۆنيوز دياركر كو نوكه ئاگر يێ به‌ربوويه موه‌ليدێن كاره‌بێ ل تاخێ سه‌رهلدان
بێوار گۆت ژى” موه‌ليدێن هاتينه سوتن دكه‌ڤنه نێزيك مزگه‌فتا سه‌لاحه‌دين وتيمێن ئاگر ڤه‌مراندنێ يێن رێڤه‌به‌ريا به‌رگريا شارستانى يێن بزاڤا كونترۆلكرنا ئاگرى دكه‌ن”.
ئه‌ڤرۆنيوز:
پۆليسێ ئيسرائيلێ داخواز ژ داواكارێ گشتيێ ئيسرائيلى كريه تۆمه‌تا گه‌نده‌ليێ ئاراسته‌ى سه‌رۆك وه‌زيران بنيامين ناتانياهۆى بكه‌ت.
ل دووڤ ده‌زگه‌هێن راگه‌هاندنێ ل ئيسرائيلێ، بنيامين ناتانياهۆ، سه‌رۆك وه‌زيرێن ئيسرائيلێ يێن روو ب روويێ دو كه‌يسێن گه‌نده‌ليێ بووى ، كه‌يسا ئێكێ په‌يوه‌ندى ب وه‌رگرتنا دياريێن ب بها ژ جۆرێ زێر وگه‌وهه‌ران وڤه‌خوارنێن كحولى وجگارێن ب بها ب گۆژمێ ب سه‌دان هزار دۆلاران.
كه‌يسێ دويێ كو ناتانياهۆ پێ دهێته تۆمه‌تباركرن، په‌يوه‌ندى ب گرێبه‌ستێن گومان ل سه‌ر دناڤبه‌را ناتانياهۆى وخودانێ رۆژناما (يه‌ديعۆت ئه‌حرونۆت) يا هه‌ى كو رۆژناما ناڤبرى ده‌نگوباسێن ئه‌رێنى ل دۆر سه‌رۆك وه‌زيران به‌لاڤ بكه‌ت.
پۆليسێ ئيسرائيلێ ب فه‌رمى داخواز ژ داواكارێ گشتى وشيره‌تكارێ دادوه‌ريێ حوكمه‌تا ئيسرائيلێ كريه كو تۆمه‌تا گه‌نده‌ليێ ئاراسته‌ى بنيامين ناتانياهۆى بكه‌ن.
ئه‌ڤرۆنيوز:
وه‌زيرێ ده‌رڤه يێ توركيا، مه‌ولود جاويش ئوگلۆ، ئه‌ڤرۆ چارشه‌مبى 14/2/2018 راگه‌هاند، ده‌ستپێكرنا ئۆپه‌راسيۆنه‌كا له‌شكرى دژى چه‌كدارێن په‌كه‌كێ ل هه‌رێما كوردستانێ وعيراقێ كاره‌كێ گرنگه.
ئوگلۆى دكۆنگره‌كێ رۆژنامه‌ڤانێدا د چارچۆڤێ پشكداريا وى دكۆنگرێ ئاڤه‌دانكرنا عيراقێ ل كوێتێ، گۆت” پێدڤيه عيراق ژ رێكخستيێن تيرۆرستى بهێته پاقژكرن وژوان ژى په‌كه‌كه”.
گۆت ژى” ئه‌نجامدانا ئۆپه‌راسيۆنه‌كا له‌شكرى دژى چه‌كدارێن په‌كه‌كێ ل چيايێ قنديلى يا بوويه كاره‌كێ فه‌ر”.
دياركر ژى” چه‌كدارێن په‌كه‌كێ هه‌بوون ل پارێزگه‌هێن دهۆكێ وسلێمانيێ وئه‌ربيلێ يا هه‌ى وهه‌تا يێن ل كه‌ركووكێ وشنگالێ ژى”.
ئه‌ڤرۆنيوز:
ل سەنتەرێ ژین یێ نەخوه‌شیێن خوینێ چاڤدێریەکا تایبەت بۆ نەخوه‌شێن پەنجەشێرا خوینێ و تالاسیمیايێ دھێتە کرن، ل دھۆکێ 218 زارۆیان پەنجەشێر يا هه‌ى و ھندەکان بۆ دەمێ پتری سێ سالان پێدڤی ب چارەسەریێ دبیت و دۆرێن 118 نەخوه‌شان ژی پشتی ھاتینە چارەکرن، نوکە رەوشا وان یا ساخلەمیێ یا باشە و ل بن چاڤدێریا نوشدارانە.
عەبدولرەحمان عەبدوللا موحسن، نوشدارێ تایبەتمەندێ نەخوه‌شیێن خوینێ و بەرپرسێ سەنتەرێ ژین یێ نەخوه‌شیێن خوینی بۆ نوش نيوز دیارکر کو سەنتەرێ ژین ل سالا 2011ێ ھاتیە دامەزراندن و ل دەستپێکێ ب تنێ نەخوه‌شێن تالاسیمیايێ دھاتنێ و پاشى ھاتیە گوھۆرین و نەخوه‌شیێن تالاسیمیا و مەنجەلی و نەخوه‌شێن خوینێ وەکو لوکیمیا و پەنجەشێرا گرێکێن لەمفاوی و پەنجەشێرا گولچیسکان و یا ھەستی و مێشکی ھەموو بۆ وەرگرتنا چارەسەریا کیمیاوی دھێنە ڤێرێ.
عەبدولرەحمانى دیارکر ژی کو زارۆیێن پێدڤی ب نشتەرگەریێ دبن جارا ئێکێ دھێنە نشتەرگەری کرن و پاشی قەستا وان دکەن و گۆت” بەھرا پتر یێن خوینێ پێدڤی ب نشتەرگەریان نابن و ھەکە کچ بیت بۆ دەمێ دو سال و نیڤان و ھەکە کور بیت بۆ دەمێ سێ سال و نیڤان ئەم چارەسەریا کیمیاوی ددەینێ، ل دۆر نەخوه‌شیێن له‌مفاوى ژی بۆ دەمێ شەش مەھان وەردگرن و ھندەك ژی پێدڤی ب کەویکرنێ دبن کو مە ل ڤێرێ نینە و ئەم دھنێرینە ھەولێرێ یان مووسلێ و یێن پەنجەشێرا گولچیسکان ژی ئەم پشتی نشتەرگەریێ وەردگرین و چارەسەریا وان بۆ دەمێ شەش ھەیڤان ڤەدکێشیت، ھەروەسا ئەوێن بەربوونا خوینێ وەکو ھیمۆفیلیا بین ئەم تومارێن وان دروست دکەین”.
رێڤەبەرێ سەنتەرێ ژین دیارکر ژی کو ئەو ھەموو نەخوه‌شێن پەنجەشێرا زارۆیان وەردگرن وەکو پەنجەشێرا خوینێ و گرێیێن لەمفاوی و یا گولچیسکان و پەنجەشێرا ھەستیا و مێشکی ژی دھێنە ڤێرێ و گۆت” ئەم نەشێین بێژین ب دروستی مە چەند نەخوه‌ش ھەنە، چونکى رەنگە ھندەک ژوان بچنە ھەولێرێ یان مووسلێ یان ژدەرڤەی وەلاتی بۆ چارەسەریێ، بەلێ ئەوێن ل دھۆکێ مە تۆمارکرین دگەھنە 218 نەخوه‌شان و ھندەك ژوان ئەڤە دو سالە ل گەل مە و ھندەك ژوان دەرمانێن خوە تمام کرینە ل دۆرێن 118 نەخوه‌شان چارەسەربووینە و ب تنێ بۆ دووڤچوونێ دھێنە لایێ مە و یێن دیتر ژی دبەردەوامن ل سەر چارەسەریێ”.
دیارکر ژى كو گەلەك خەلك وەسا ھزر دکەن کو دبيت هژمارا نه‌خوه‌شێن پەنجەشێرێ یا مشەبووی، بەلێ چو راستی بۆ ڤێ چەندێ نینە و ئەڤ گۆتنە ژ وێ چەندێ دھێت کو نەخوه‌شێن پەنجەشێرێ ل دھۆکێ ھەموو ل جھەکی کۆم بووینە و رەنگە بەری نوکە چوبن جھەکێ دیتر و ددیارنەبن، مە چو ڤەکۆلین ژی نینن دا ئەم بزانین کا کێم یان زێدەبوویە و مە چو داتا ژی بەری نوکە نەبوون.
دەربارەی ئەگەرێن نەخوه‌شیێ ژی دیارکر کو ھەتا نوکە ئەگەرێ ب دروستی نەھاتیە زانین، بەلێ ھندەك فاکتەرێن مەترسیێ ھەنە و دبنە ئه‌گه‌رێ پتر بەربەلاڤبوونا نەخوه‌شیێ، ژوان ژی کەسێن مەنگولی پتر تووشی نەخوه‌شیێ دبن وئەو کەسێن بەرگریا لەشێ وان تێك دچیت پتر تووشی پەنجەشێرێ دبن، ھندەك ژی دبێژن كو جۆره ڤایرۆس یێن ھەین کو پەیوەندی ب لوکیمیایێ ڤە ھەیە، ھندەك ژی دبێژن تیشکا چارەسەریێ دبیتە ئەگەرێ ڤێ نەخوه‌شیێ و دەمێ بۆ نەخوه‌شیەکا دی دھێتە ب کارئینان و ھندەك ژی دبێژن بومبێن ناڤۆکی بووینە ئەگەر و ل بەرێ ژی دگۆتن بورجێن کارەبێ دبنە ئەگەر، لێ ھەتا نوکە چو راستی بۆ دیارنەبوویە.
خوياكر ژى کو پتریا نەخوه‌شێن ل دھۆکێ ھەین ھەتا 15 سالیێ نە و دەربارەی لوکیمیايێ، دو سالیێ ھەتا شەش سالیێدانە، ل بەرێ دگۆتن پەنجەشێرێ چارەسەری نینە، بەلێ چو راستی بۆ ڤان گۆتننا نینە و نەخوه‌ش دۆرێن 70% چارەسەردبن و راستە ده‌مێ چارەسەریێ یێ درێژە، بەلێ مفا ژێ دھێتە دیتن و ب تنێ پێدڤی ب دووڤچوونێ دبن.
ئه‌ڤرۆ نيوز:
میرێ کويتێ ڕاگەهاند، وەلاتێ وی دو ملیار دۆلار بۆ پرۆسا ئاڤه‌دانكرناعێراقێ تەرخان كريه كو ملياره‌كێ دێ وه‌كو قه‌ر ده‌ته عيراقێ.
شێخ سوباح ئەحمەد سوباح میرێ کوەیتێ ئەڤرۆ د کۆنگرەیێ ئاڤەدانکرنا عێراقێد ا کو ل وی ولاتی برێڤەدچیت ڕاگەهاند، کۆنگرەیێ ئاڤەدانکرنا عێراقێ رۆلەکێ كارتێكه‌ر دێ هه‌بيت و دێ پاشەرۆژەکا ئارام بۆ دەڤەرێ دابین كه‌ت و گۆت: ئه‌م دێ ملياره‌كێ وه‌كو ده‌ين ده‌ينه عيراقێ و ملياره‌كێ ژى وه‌كو وه‌به‌رهێنان دێ د ئاڤه‌دانكرنا عيراقێ دا مه‌زێخين.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو دێ پێله‌كا دى يا باران بارينێ ب سه‌ر هه‌رێما كوردستانێ دا هێت.
پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك ب ده‌ست ئه‌ڤرۆ نيوز كه‌فتيه، تێدا ئاشكه‌را كريه كو ل ئێڤاريا رۆژا ئه‌ينى 16ى شۆباتا 2018ێ ژ ئه‌گه‌رێ هاتنا فشارێن نزمێن ده‌ريا سور كو دێ كارتێكرنێ ل سه‌ر باشوورێ هه‌رێمێ و ئيدارا گه‌رميان و ناڤه‌راستا عيراقێ كه‌ن، باران بارين دێ ب ره‌نگه‌كێ به‌رچاڤ ل وان ده‌ڤه‌ران باريت و پاشان ژى دێ به‌رێ خوه وه‌رگێريته ده‌ڤه‌رێن دى يێن كوردستانێ.
ئاشكه‌را ژى كريه كو رۆژا شه‌مبى 17ى شۆباتا 2018ێ و ئێكشه‌مبى و دوشه‌مبيێ كارتێكرنا ڤێ فشارێ دێ ل سه‌ر هه‌رێمێ يا به‌رده‌وام بيت و دبيت رۆژا ئێكشه‌مبى پترترين رێژا باران بارينێ ل ده‌ڤه‌رێن چيايى يێن پارێزگه‌هێن دهۆك و هه‌ولێر بباريت و ل هنده‌ك ده‌ڤه‌ران ژ ئه‌گه‌رێ بلندبوونا ئاستێ ئاڤێ د ماوێ كارتێكرنا ڤێ شه‌پۆلێ دا پێشبينيا به‌فر بارينێ ژى ل ده‌ڤه‌رێن چيايى يێن وى سنورى دهێته كرن.
ئاماژه ب وێ چه‌ندێ ژى كريه كو ل گه‌ل ڤێ چه‌ندێ پلێن گه‌رمێ دێ نزم بن و با دێ زێده بيت و ل هنده‌ك ده‌مان دێ چيته د سه‌ر 30كم د ده‌مژمێره‌كێ دا و دبێژيت: “ل هنده‌ك ده‌مان بريسى ژى دێ هه‌بن”.
د درێژاهيا راپۆرتێ دا هاتيه: “رۆژا دوشه‌مبى 19ى شۆباتا 2018ێ ل ده‌مێن شه‌ڤێ كارتێكرنا ڤێ شه‌پۆلێ ل سه‌ر هه‌رێمێ دێ لاواز بيت و رۆژا سێشه‌مبى 20ى شۆباتا 2018ێ دێ ب دووماهى هێت و دبێژيت: “د هه‌مان ده‌م دا ل ماوێ هاتنا ڤێ شه‌پۆلێ ل هنده‌ك ده‌ڤه‌را رێژا باران بارينێ دێ ژ 100 ملم بۆريت”.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو ل 24 ده‌مژمێرێن بۆرى ل ويستگه‌هێن جودا يێن هه‌رێما كوردستانێ رێژێن جودا يێن باران بارينێ هاتينه تۆماركرن و ل دووڤ ڤى خشتێ ل خوارێ دياركرى:
رێڤه‌به‌ريا سه‌قاناسى و بيڤه‌له‌رزا دهۆك ژى ئامار ب ڤى ره‌نگى به‌لاڤ كريه:
دهوك ( 12.2 ) ملم ، زاخو ( 6.2) ملم ، ئاكرێ ( 22.2 ) ملم ، زاويته ( 20 ) ملم ، مانگێش ( 10.2 ) ملم ، سێمێل ( 21 ) ملم، باتێل (10) ملم ، ئامێديێ ( 15.4) ملم ، سه‌رسنك ( 23.5 ) ملم ، بامرنێ ( 12.2 ) ملم ، ديره‌لوك ( 17 ) ملم ، كانى ماسێ ( 14.6 ) ملم ، چمانكێ (22 ) ملم ، باتيفا ( 7 ) ملم ، ده‌ركار ( 4.3 ) ملم ، باعه‌درێ ( 21 ) ملم ، به‌رده‌ره‌ش ( 23.5 ) ملم ، دينارته ( 56.7 ) ملم ، گه‌رده‌سين ( 22.6 ) ملم ، قه‌سروك ( 61.5 ) ملم ، شێخان ( 24 ) ملم ، بجێل ( 48.7 ) ملم
نيشاندان