ئەڤرۆ نيوز:
نابیت کەسێ روژیگر ژ سیستەمێ خوە یێ خوارنێ ئەوێ روژانە ب کاردئینا ب دەرکەڤیت، بو نموونە مە ھەموو مروڤان چ بچووک یان مەزن بیت سێ گروپێن خوارنێ یێن ھەین گروپێ ئێکێ کاربوھیدراتن وەکی نان و برنج و دڤێت سێَچارێکا خوارنا مە ژ کاربوھیدراتان بیت و چارێکا دی ژ ھەردو گروپێن دی بیت، گروپێ دوێ ژ فێقی و کەسکاتی پێک دھێت گروپێ سیێ ژ شیر و گوشت و شریناھی و تشتێ قەلاندی پێک دئێت و ھەر ئێکێ ژی تەمەت خوە بھایێ خوە یێ خوارنێ ھەیە.
د. ھەلات صالح مەجید، تایبەتمەندا خوراکیێ، دیارکر کو دڤێت کەسێ روژیگر روژیا خوە ب قەسپەکێ یان ب رتەبەکێ بشکێنیت، چونکە قەسپ یا زەنگینە ب کاربوھیدراتا و لەشێ مروڤێ روژیگر گەلەک پێدڤی ب کاربوھیدراتانە و گۆت: چونکە د روژێ ھەمیێ دا لەش کاربوھیدراتێن خوە دمەزێخیت و ئەو دێ ئێکسەر ھەڤسەنگیێ ئێخیتە لەشێ مروڤێ روژیگر و ھێزا وی زێدەکەت.
تایبەتمەندا خوراکیێ دیارکر ژی کو رۆژیگر دشێت روژیا خوە ب فرەکا ئاڤێ ژی بشکێنیت بەلێ نابیت زێدە ڤەخوت و گۆت: زێدە ڤەخوارنا ئاڤێ دبیتە رێگر ل خوارنێ و جھێ وێ ناھێلیت و دیسا زکێ مروڤی ژی لێ دبیتە ئێش.
دیسان د.ھەلاتێ دیارکر کو ل دەمێ پاشیڤێ پێدڤیە رۆژیگر وان شەکر و کاربوھیدراتا بخوت ئەوێن پتر دمەعیدەی و رووڤیکادا دمینن کو دبێژنێ کاربوھیدراتێن ئاسێ وەکی برنجا زەر و ساڤار و نیسک و فاسولی و نانێ جەھی کو ئەڤە بو ماوێ ھەشت سەعەتا د رووڤیکادا دمینن و گۆتژی: ئەڤ خوارنە د پرن ژ ئەلیافا و زوو ناھێنە حەلاندن ب ڤێ چەندێ مروڤێ روژیگر دێ ھەر تێر مینیت.
ئاماژە دا ب وێ چەندێ کو یا فەرە ل دووڤ سیستەمێ خوە یێ خوارنێ یێ بەری رەمەزانێ بچن و ئەڤە ھەمی بو کێشا لەشچی باشە کو دێ شێن سەنگێ خوە د رەمەزانێدا کونترۆل کەن ب تایبەتی ئەو کەسێن فشارا خوینێ و نەخۆشیا شەکرێ ھەی ھەر ب وی سەنگی بمینن ئەوێ بەری رەمەزانێ.
ھەروەسا د.ھەلاتێ دیارکر کو پێدڤیە رۆژیگر گەلەک ئاڤێ و شەربەتێن سروشتی ڤەخوون و خوە دوور بکەن ژ پێپسی و ڤەخوارنێن کافائین تێدا، چونکە ئەو ڤەخارنێن کافائین تێدا گەلەک دەستئاڤا مروڤی دئینن و لەشی ڤالا دکەن ژ ئاڤێ و ئاسنی ب رێکا دەست ئاڤێ، و گۆت: پێدڤیە خوە ژ وان شرینیا دووربێخن یێن ھاتینە قەلاندن و وان شرینیا بخون یێن ب شیری ھاتینە چێکرن، چونکە شیر یێ زەنگینە ب پروتیناتا.
ل دووماھیێ تایبەتمەندا خوراکیێ دیارکر ھەکە مروڤێ روژیگر برسی بوو پشتی فتارێ بلا برسا خوە ب فێقی و کەسکاتی و شەربەتێن سروشتی بشکێنیت و ماوێ دناڤبەرا فتارێ و پاشیڤێ دا گەلەک ئاڤێ ڤەخوت دا ھشکاتی بو چێنەبیت.
نيشاندان
