ئه‌ڤرۆنيوز:
پشتى دادگه‌ها له‌شكرى يا عيراقى بريارا سزادانا به‌رپرسه‌كێ بلند يێ له‌شكرى ب گوله‌بارانكرنێ ده‌ركرى ل سه‌ر كه‌يسا كه‌فتنا باژێرێ مووسلێ دده‌ستێ داعشێ دا وماف ژى دايه وه‌زاره‌تا به‌رگريێ سكالايا قانوونى ل سه‌ر هێزا پێشمه‌رگه‌ى تۆمار بكه‌ت سه‌باره‌ت وان چه‌كێن له‌شكرێ عيراقێ كو پشتى كۆنترۆلكرنا مووسلێ ژئاليێ داعشێ ڤه، كه‌فتينه ده‌ستى پێشمه‌رگه‌ى، فه‌رمانده‌يا پۆليسێن فيدرالى دنڤيساره‌كا فه‌رمى دا داخواز ژ وه‌زاره‌تا ناڤخوه يا عيراقى دكه‌ت ئه‌و بريار بهێنه كاراكرن.
ب گۆره‌ى نڤيساره‌كا فه‌رمى يا پشكا رێڤه‌به‌ريا فه‌رمانگه‌ها قانوونى ل فه‌رمانده‌يا پۆليسێن فيدرالى يا عيراقى ب هژمار 8119 كو ل رۆژا 18/4/2018 كو ب ئيمزا فه‌ريق روكن (رائيد شاكر جه‌وده‌ت) فه‌رماندێ هێزێن پۆليسێن فيدرالى هاتيه ده‌ركرن وهاتيه ئاراسته‌كرن بۆ وه‌زاره‌تا ناڤخوه‌يا عيراقێ، تێدا ل دووڤ نڤيسارا فه‌رمى يا فه‌رمانگه‌ها شيره‌تكارێ قانوونيێ وه‌زاره‌تا به‌رگريا عيراقێ يا هژمار 1/50/67 ل 1/4/2018 داخوازا كاراكرنا بريارا دادگه‌ها له‌شكرى يا ئێكێ يا عيراقى يا هژمار) 7/ / 4 (1434 ل 16/5/2018 يا تايبه‌ت ب سزادانا فه‌ريق رۆكن (مه‌هدى غه‌راوى) فه‌رماندێ به‌رێ يێ ئۆپه‌راسيۆنێن له‌شكرى ل پاريزگه‌ها نه‌ينه‌وا ب گوله‌بارانكرنێ ژبه‌ر خه‌مساريێ دكه‌فتنا باژێرێ مووسلێ دا وكونترۆلكرنا وێ ژئاليێ داعشێ ڤه.
ل دووڤ وێ بريارێ، داخواز هاتيه كرن كو غه‌راوى ل هه‌ر جهه‌كى بهيته ديتن ئێكسه‌ر بهێته ده‌سته‌سه‌ركرن وهه‌موو مولك ودراڤێ وى يێ ڤه‌گۆهاستى ونه ڤه‌گوهاستى بهێته ده‌سته‌سه‌ركرن.
هه‌ر دوێ بريارا دادگه‌ها له‌شكرى يا ئێكێ يا عيراقى، ماف دايه وه‌زاره‌تا به‌رگريا عيراقێ كو ل دادگه‌هێن مه‌ده‌نى سكالايا قانوونى دژى هێزێن پێشمه‌رگه‌ى تۆمار بكه‌ت بۆ قه‌ره‌بووكرنا وان چه‌ك وپێدڤيێن له‌شكرى كو مولكێ فه‌رمانده‌يا ئۆپه‌راسيۆنێن نه‌ينه‌وا بوون وكه‌فتينه ده‌ستێ هێزێن پێشمه‌رگه‌ى.
نيشاندان