ئەڤرۆ ، زنار تۆڤی :
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا دیارکرن:د روودانەکا هاتنوچوونێ دا دو کەس برینداربووینە.
ناڤهاتی ئەو یەک ژی دا خویاکرن:ئەڤرۆ دوشەمبی 2.4.2018 ل کۆمەلگەها شاریا ل سێمێلێ ل دەمژمێر 10:20 سپێدێ روودانەك پـەيدا بوویە دناڤبەرا دو ترومبێلان دا کو ئێک ژ وان جۆرێ تۆیۆتا کامری بوویه و ترۆمبێلا دیتر ژجورێ هوندا ئەلنترا بوویە و د ئەنجامێ وێ روودانێ دا دو کە س بريندار بوون.
ئه‌ڤرۆ نيوز، عه‌زيز هه‌ورامى:
دلشاد عومه‌ر، رێڤه‌به‌رێ گشتى يێ په‌روه‌ردا پارێزگه‌ها سلێمانيێ د كۆنگره‌كێ رۆژنامه‌ڤانى دا راگه‌هاند كو پێدڤيه ده‌رگه‌هێ قوتابخانان ب روويێ قوتابيان دا بهێنه ڤه‌كرن.
د ڤى كۆنگرێ رۆژنامه‌ڤانى يێ رێڤه‌به‌رێن په‌روه‌ردێن قه‌زايان ژى تێدا د پشكدار بوون، ئاشكه‌را ژى كر كو حوكمه‌تا هه‌رێما كوردستانێ پشكه‌ك ژ داخوازيێن مامۆستايان بجهئيناينه و گۆت: “پرۆسا خواندنێ ل سلێمانيێ د مه‌ترسيێ دايه، ژ به‌ر هندێ ژى دڤێت ب زووترين ده‌م ده‌رگه‌هێن قوتابخانان ب روويێ قوتابيان دا بهێنه ڤه‌كرن”.
دلشاد عومه‌ر دا زانين كو پێدڤيه مامۆستا ژى ب ئه‌ركێ سه‌ر ملێن خوه رابن و بچنه قوتابخانان و ئه‌ركێ خوه يێ پيرۆز ب جهـ بينن و پارتيێن سياسى ژى ب ئه‌ركێ خوه رابن و ره‌وشا په‌روه‌ردێ ل پارێزگه‌هێ ئاسايى بكه‌ن.
رێڤه‌به‌رێ گشتى يێ په‌روه‌ردا پارێزگه‌ها سلێمانيێ گۆت: “ئه‌م دێ دووماهيێ ب بايكوتا خواندنێ ئينين و دڤێت پرۆسا خواندنێ ل سلێمانيێ ب زووترين ده‌م ده‌ست پێ بكه‌ته‌ڤه، د زووترين ده‌م دا دێ ليستا مووچان ژى ئاماده كه‌ين و ره‌وانه‌ى وه‌زاره‌تا دارايى كه‌ين و هه‌يڤانه دێ مووچه ب سيسته‌مێ نوو هێته دان”.
زێده‌تر گۆت: “حوكمه‌تا هه‌رێما كوردستانێ پشكه‌ك ژ داخوازيێن مامۆستايان بجهئيناينه، ژ به‌ر هندێ ژى سوبه‌هى 3ى نيسانێ دێ دووماهيێ ب بايكوتێ ئينين و خواندن دێ ل ناڤه‌ندێن خواندنێ ده‌سپێكه‌ت”.
ئەڤرۆ نیوز ، زنار تۆڤی :
پشتی بریارا جڤاتا وەزیرێن هەرێما کوردستانێ ب دەستکاریکرنا رێژا پاشکەفتێ مووچێ فەرمانبەران، وەزارەتا دارایی و ئابووری خشتەکێ نوو ێی مووچەی لدووڤ سیستەمێ پاشکەفت ب سەر گەنجینێن هەرێما کوردستانێدا دابەش کرینە.
لدووڤ خشتێ نوو مووچێ فەرمانبەران ب شێوەکێ پلەبەندی ب رێژا ١٠٪ بۆ ٣٠٪ دێ پاشکەفت لێ هێتە کرن.
هەروەسا د کۆبوونا دوهی 1 نیسانێ ٢٠١٨ دا، پشتی کو وەزیرێ دارایی و ئابووری داخوازا ئامادەکرنا لیستێن دابەشکرنا مووچێ وەزارەتێن پەروەردە و ساخلەمیێ لدووڤ سیستەمێ نوو کریە و داخواز ژ گەنجینان کریه،کو پشتی گەهشتنا لیستا مووچێن وان هەر دو وەزارەتان دێ دابەش کەن،رێڤەبەریا گەنجینان داخواز کریە کو مووچێ وەزارەتێن دارایی و ئابووری ژی بهێته خەرج کرن و هەروەسا وەزیرێ دارایی راگەهاندیە کو مووچێ وێ وەزارەتێ ژی ل گەل پەروەردە و ساخلەمیێ بهێتە دابەش کرن.
پێشتر رێکەوت حەمە رەشید، وەزیرێ ساخلەمیێ ئاشکرا کربوو،کو د چەند رۆژان دا لیستا مووچێن فەرمانبەرێن وێ وەزارەتێ ب خشتێ نوو یێ پاشکەفتی ئامادە دکەن و پارە ژی ئامادەیە بۆ هندێ کو مووچێ وان بهێته دابەش کرن،لەورا دهێته چاڤەرێ کرن کو د ڤێ حەفتیێ دا مووچێ وەزارەتێن ساخلەمیێ و پەروەردێ و دارایی بهێنە دابەش کرن.
هەروەسا رێباز حەملانی وەزیری دارایی د پرێس کۆنفرانسەکێدا راگەهاندیە،کو تێرا مووچێ هەموو وەزارەتان وان پارە ل بەر دەست هەیە بۆ دابەشکرنا مووچێ هەموو وەزارەتان،دیسا ئەو چاڤەرێی گەهشتنا پارێ عێراقی و ٢٥ ملیار دینارێن ئەمریکا دکەن.
ئه‌ڤرۆ نيوز:
رێيا هه‌ولێر – مه‌خمور كو ب رێيا بازارگه يا به‌رنياسه، ب فه‌رمى هاته ڤه‌كرن و هاتنوچوون ل سه‌ر هه‌ردو ئاسان ده‌سپێكريه.
رزگار محه‌مه‌د، قايمقامێ مه‌خمور بۆ رووداو گۆت: “هه‌يڤه‌كێ به‌رى نوكه حوكمه‌تا هه‌رێما كوردستانێ بڕيار دابوو وێ رێ ڤه‌كه‌ت، به‌لێ وى ده‌مى حوكمه‌تا عيراقێ ڤه‌نه‌كر، ئه‌ڤرۆ رۆژا دوشه‌مبى 2ى نيسانا 2018ێ ب فه‌رمى هاته ڤه‌كرن”.
ل 16ى ئوكتوبه‌را 2017ێ ده‌مێ حه‌شدا شه‌عبى و سۆپايێ عيراقێ هێرش كريه سه‌ر كه‌ركووك و ده‌ڤه‌رێن كوردستانى يێن ده‌رڤه ئيدارا هه‌رێما كوردستانێ، رێيا هه‌ولێر كه‌ركووك و هه‌ولێر – مه‌خمور و هه‌موو ئه‌و رێيێن دى يێن هه‌رێما كوردستانێ بۆ بن ده‌سته‌لاتا حوكمه‌تا عيراقێ هاتنه داخستن، هه‌تا نوكه ژى رێيا هه‌ولێر – كه‌ركووك ژ لايێ حوكمه‌تا عيراقێ ڤه نه‌هاتيه ڤه‌كرن.
ئه‌ڤرۆ نيوز:
رێڤەبەرێ پەیوەندی و راگەھاندنێ ل وەزارەتا ئەوقاف و کاروبارێن ئاینی ل حوکمەتا ھەرێما کوردستانێ ئاشکراکر کو دڤێت وەزارەتێن ئەوقاف و وەزارەتا نافخو و کومسیونا بلند یا سەربەخۆیا ھەلبژارتنان ل عیراقێ کومبوونەکێ ئەنجام بدەن و چەندین رێنما بۆ پرۆسێسا بانگەشەیا ھەلبژارتنێن عیراقێ دەربکەن.
مەریوان نەقشەبەندی رێڤەبەرێ پەیوەندی و راگەھاندنێ ل وەزارەتا ئەوقاف و کارۆبارێن ئاینی بۆ رۆژناما ئەڤرۆ گۆت: بۆ ھەلبژارتنێن داھاتی یێن پەرلەمانێ عیراقێ ل ھەرێما کوردستانێ پتر ژ 10 گوتاربێژان خوە بەر بەربژێرکرینە ژ لیستێن جودا کو حەفتیانە ئەڤ کەسە گۆتارێن ئاینی ل سەر مینەران دخوینن.
نەقشەبەندی ئەو ژی گۆت: ل ھەلبژارتێن بوری من چەند پێشنیار ل سەر دوورکرنا گوتاربێژێن کاندید بۆ وەزیرێ ئەوقافێ بلند کربوون و بسوپاسی ڤە رازیبوون ل سەر ھەموویان دا کەفتنە بیاڤێ بجھئینانێ دا، ئارمانجا مە ئەوە کو مینبەرا مزگەفتێ نەھێتە بکارئینان بۆ بانگەشا ھەلبژارتنان.
مەریوانی ئەو ژی گۆت: ھەتا نوکە ھێچ رێنمایەک نەھاتیەدەکرن ژلایێ وەزارەتێن ئەوقاف و کارۆبارێن ئاینی و وەزارەتا نافخوە و کومسیونا بلند یا سەربەخۆیا ھەلبژارتنان و دڤیابا ھەتا نوکە رێنما ھاتبانەدەرکرن.
مەریوانی ئەو گۆت: پێشنیاردکەم ئەو گۆتاربێژێن خوە بەربژێرکرین بۆ ھەلبژارتنێن پەرلەمانێ عیراقێ، داخازا دەستیردانێ بکەن و گوتارێن ئاینی ل ھەوا بانگەشا ھەلبژارتنان نەبێژن و پتر بخوە کار بکەن و ھەکە دەستیردان وەرنەگرت ژی و بەردەوام بوون پێدڤی یە ب چ شێوازان بەحسێ ھەلبژارتنان نەکەن.
ھێشتا گۆت: پێدڤی یە پوستەر ل دیوارێن مزگەڤتان نەھێنە ھەلاویستن و پرۆپاکندە ل مزگەڤتان نەھێتەکرن چونکە ئەڤە جھەکێ حوکمەتێ یە و ھەر مزگەفتەکێ نڤێسیە وەزارەتا ئەوقاف.
ئه‌ڤرۆ نيوز، له‌زگين جۆقى:
رێڤەبەرا سەنتەرێ ساخلەمیا دەروونی ل پارێزگەھا دھۆکێ دیارکر کو ئوتیزم تێکچوونەکا رەفتاریە نیشانێن وێ دیار دکەن د ھەر سێ سالێن ده‌سپێكێ يێن ژيێ مرۆڤى دا و کارتێکرنا نەرێنی ل سەر زوورترین لایێن پێرابونێن کەسایەتی دکەت.
د. نازک عه‌بدولرحیم، رێڤەبەرا سەنتەرێ ساخلەمیا دەروونی ل پارێزگەھا دھۆکێ بۆ ئه‌ڤرۆ نيوز دیارکر کو نوکە ل دھۆکێ پتر ژ 600 کەسان ھەلگرێن نەخۆشیا ئوتیزمێ نە و سال ل دووڤ سالێ نەخۆشیا ئوتیزمێ یا بەر ب زێدەبوونێ دچیت ل پارێزگەھا دھۆکێ ھندەک دەرمانێن دەست نیشانکری ھەنە ژبوو سڤکرنا ئاریشێن ھەڤپێچ ل گەل نەخۆشیا ئوتیزمێ وەکو لڤینا زێدە و گێژبوون و بێھووشبوون و گۆت: “ھەتا نوکە چو ئەگەرێن دروست یێن ئوتیزمێ نەھاتینە دەست نیشانکرن”.
ئاماژه دا وێ چه‌ندێ ژى كو ئوتیزم پتر ل دەڤ کوران پەيدا دبیت ژ کچان، ئانکو پتریا نەخۆشێن ئوتیزمێ ل دھۆکێ رەگەزێ نێرن و گۆت: “داخوازێ دکەین دایک و بابێن وان پتر ھەڤکار بن و بەردەوام بۆ چارەسەری زارۆيێن خۆ يێن نەخۆش بینە سەنتەرێ ساخلەمیا دەروونی ل دھۆکێ”.
ژنەکێ ب ناڤی دایکا ھێڤداری بۆ ئه‌ڤرۆ نيوز دیارکر کو ل سەنتەرێ ساخلەمیا دەروونى ل دھۆکێ 100% زارۆکێ وێ مفا ژ چارەسەریا خۆ وەرگرتيه و گۆتت: “سۆپاس ب خودێ نوکە رەوشا نەخۆشێ من گەلەک باشتره ژ بەرێ، چەند سالان ئەو رەفتارێن بەری نوکە دکرن نھا پتریا وان رەفتاران ھێلاینە سەنتەرى مفایەکێ زۆر باش گەھانديە کورێ من.
د. پەرچان ھاشم، تایبەتمەندێ نەخۆشیێن دەروونی بۆ ئه‌ڤرۆ نیوز گۆت: “ل پارێزگەھا دھۆکێ سالا 2004ێ ئێکەم حالەتێ نەخۆشیا ئوتیزمێ ھاتە دەست نیشانکرن ھەتا نوکە رێژه زێدەبوویە و پتر ژی د ناڤ رەگەزی نێر دایە، نوکە ل دھۆکێ سەنتەرەکێ تایبەت ھاتیە ڤەکرن بۆ چارەسەریا ڤان نەخۆشان”.
ئه‌ڤرۆ نيوز:
سەرۆکێ لیستا برایەتی ل جڤاتا پارێزگەھا کەرکووکێ ئاشکراکر، جڤاتا پارێزگەھێ چو زانیاری لدۆر ڤەگەڕاندنا ھێزێن پێشمەرگەی بۆ کەرکووکێ نینن، و بەرپرسەکێ وەزارەتا پێشمەرگە دیارکر، ھەڤپەیمانێن نێڤدەولەتی یێ بزاڤان دکەن پێشمەرگە بۆ کەرکووکێ ڤەگەڕیت و ل گەل ھێزێن عێراقی پێکڤە بادەکا ئەمناھیێ بستویێ خۆڤە بگرن و کۆنتڕۆلا دەڤەرێ بکەن.
لیوا قارەمان شێخ کەمال، جێگرێ سوپا سالارێ وەزارەتا پێشمەرگەی بۆ رۆژناما ئەڤرۆ گۆت” پشتی روویدانێن ١٦ی ئۆکتۆبەرێ و داگیرکرنا کەرکووکێ ژلایێ ھێزێن عێراقی ڤە، نوکە ھەڤپەیمانێن نێڤدەولەتی یێ بزاڤان دکەن بۆڤێ چەندێ ھێزێن پێشمەرگەی ڤەگەڕن بۆ کەرکووکێ و پێکڤە ل گەل ھێزێن عێراقی بادەکا ئەمنی رێڤەببەن و ئەڤ ئالۆزیا پەیدابوی ژلایێ پەیدابوونا چەکدارێن داعش و تێکچوونا رەوشا ئەمنیا کەرکووکێ بھێتە کۆنتڕۆلکرن، بەلێ ھێشتا ب فەرمی ئەم نەھاتینە ئاگەھدارکرن و ھەردەمێ وەزارەتا پێشمەرگەی بھێتە ئاگەھدارکرن دێ وەزارەت بڕیارێ لدۆر ڤەگەڕاندنا ھێزێن پێشمەرگەی بدەت، چونکە دەستپێکێ پلان ئەوە ژۆرەکا ئۆپەڕاسیۆنا ھەڤپشک بھێتە پێکئینان، بەلێ بێی ڤەگەڕاندنا پێشمەرگەی وەزارەت چو ئەفسەران ناھنێریت بۆ ئەڤێ ژۆرا ئۆپەڕاسیۆنان، مادەم بەغدا ھێزێن خوە ھەنە ل کەرکووکێ دڤێت پێشمەرگە ژی پشکداریێ بکەت.
سەرۆکی لیستی برایەتی لە ئەنجوومەنی پارێزگای کەرکووک پێی وایە گەڕانەوەی ھێزەکانی پێشمەرگە بۆ کەرکووک و ناوچە کوردستانیە داگیرکراوەکان ھەنگاوێکی باشە دەشڵێ،بەھۆی نەبوونی پێشمەرگەوە داعش ئێستا دزە دەکاتە نێو کەرکووک.
محەمەد کەمال، سەرۆکێ لیستا برایەتی ل ئەنجوومەنێ پارێزگەھا کەرکووکێ بۆ رۆژناما ئەڤرۆ دیارکر” جڤاتا پارێزگەھا کەرکووکێ ئاگەھداری بزاڤێن ڤەگەڕاندنا ھێزا پێشمەرگەی نینە بۆ کەرکووکێ و دەڤەرێن کوردستانی یێن ھاتینە داگیرکرن، تنێ مە ل دەزگەھێن راگەھاندنێ ئەف زانیاری وەرگرتینە، بەلێ ھەر پێنگاڤەکا وەسا بھێتە ھاڤێتن ئەم ب ئەرێنی دبینین، ژبەرکو گورەی دستوورێ عێراقێ بەغدا چەند دەستھەلات ل دەڤەرێن ئاریشە لسەر ھەبن ھەرێما کوردستانێ ژی ھەمان ماف ھەیە دەستھەلات ھەبیت ھەتا پاشە رۆژا ئەڤان دەڤەران تێتە ئێکلاکرن، چونکە گورەی دستووری ھەتا مادێ ١٤٠ تێتە بجە ئینان و ئاریشەیا ئەڤان دەڤەران دھێتە ئێکلاکرن دڤێت ژلایێ بەغدا و ھەرێما کوردستانێ ب ھەڤبەشی بھێنە ئیدارەدان و رێڤەبرن.
محەمەد کەمال گۆتژی” ئەم ڤەگەڕاندنا ھێزا پێشمەرگەی بۆ کەرکووکێ ب کارەکێ پێدڤی دزانین، چونکە پشتی خوە ڤەکێشانا پێشمەرگەی رەوشا ئەمنی ل دەڤەرا کەرکووکێ بتەمامی تێکچوویە و رۆژانە دزی و رەڤاندن و کوشتنا وەلاتیان یا بەردەوامە، ئەڤە ژبلی دەرکەفتنا تیرۆرستێن داعش ل دەوروبەرێ کەرکووکێ و پەیداکرا گەفان لسەر باژێڕێ کەرکووکێ، بەلێ دەمێ پێشمەرگە ل کەرکووکێ رەوش یا تەنابو داعش چو مەترسی نەبوون لسەر کەرکووکێ، مخابن ھێزێن سوپا و حەشدا شەعبی شیاندا نینە رەوشا کەرکووکێ بپارێزن و پێدڤی ب ڤەگەڕاندنا پێشمەرگەی ھەیە، ھەرچەندە ئەز بخوە دڤێ باوەرێ دا نیمە بەغدا رازیبیت جارەکادی پێشمەرگە ڤەگەڕیت کەرکووکێ و ھەموو دەڤەرێن کوردستانی، تنێ ب مەرجەکی ئەوژی فشارێن نێڤدەولەتی ھەبن لسەر بەغدا ڤێجا دێ رازیبیت بۆ ڤەگەڕیانا پێشمەرگەی.
ئەڤرۆ نيوز:
سەرپەرشتیارێ ھێزا پێشمەرگەی ل میحوەرێ گوێر ـ مەخموور راگەھاند، ئەڤرۆ رێیا د ناڤبەرا ھەولێر ـ مەخموور دا دێ ھێتە ڤەکرن و ڤەکرنا ڤێ رێ د بەرژەوەندیا وەلاتیانە دایە.
سیروان بارزانی بۆ رووداو ئاشکرا ژی کر کو بۆ ڤەکرنا ڤێ رێ دانوستاندن ل گەل ھێزێن عیراقی ھاتیە کرن و رازیبوونا ل سەر ڤەکرنا وێ نیشادایە.
پشتی روودانێن 16 ئۆکتۆبەرا 2017 رێیا د ناڤبەرا ھەولێر ـ سنوورێ ل بن کۆنترۆلا حوکمەتا عیراقێ ھاتبوونە داخستن.
ئەڤرۆ نیوز ، زنار تۆڤی :
خانما سترانبێژا باكورێ كوردستانێ جانێ حه‌یران، ل سه‌ر ئه‌ركێ خوە فلمەکێ سینه‌مایی ب ناڤێ جێنوسایدا 74 یا شنگالێ به‌رهه‌م ئینایە و ل ڤان نێزیكان دێ ل سینه‌مایێن كوردستانێ و ده‌رڤە نیشان دەت.
جانێ حه‌یران دبێژیت،ل سالا 2015 ئەز مژۆلی به‌رهه‌مئینانا ڤی فلمێ سینه‌مایی بووم و من هه‌موو كارێن ڤی فلمی ته‌مام كرینە، به‌لێ هەتا نوکە ل چو سینه‌ما و كه‌نالان نەهاتیە نیشاندان، هه‌روه‌سا گوتیە ئه‌ڤ فلمه بەحسێ داگیركرنا شنگالێ و كۆبانێ و كرین و فرۆشتنا ژنێن كوردێن ئێزدی دکەت ژلایێ داعشێ ڤە.
جانێ گوتیە ژی من رۆلێ سەرەکی دڤی فلمی دا گێرایە،ئەز رۆلێ کچەکا کورد دبینم،کو کەفتیە دەستێ داعشێ، ئه‌و ژی پشتی کو ئەز شوو ب كه‌سەكێ د‌كه‌م و من دکەنە بووك و ئاهه‌نگێ بۆ من ساز دكه‌ن،دناڤا وێ ئاهه‌نگێدا داعش هێرشێ دکەت و من دگرن من بۆ ئه‌میره‌کێ داعش دبەنە مووسل،پاشی ئەو ئه‌میرێ داعش گەلەک بزاڤان دکەت،کو ده‌ستدرێژیا سكسی بكەتە سه‌ر من، به‌لێ ئەز خوە ب دەسڤە بەرنادەم،هەتاکو ب حه‌بەکێ من بێ هۆش د‌كه‌ت،دەمێ ل سپێدێ ژ خەو رادبم دبینم کو ئەو ئه‌میر ب رووتی ل سه‌ر سینگمێ من نڤستیە و ل ژێر خوین ب من ڤەیه و من په‌ردا كچینیێ ژ ده‌ست دایه.
گوتیە ژی، ئه‌ڤە ئێکەم ژنا كورده پشکداریێ د فیلمەکێ هوسا دا بکەت و د فلمیدا رووس بكه‌ن و ده‌ستدرێژیا سكسی بكەنە سه‌ر،هەروەسا د داهاتیدا هەکە ئەز پشکداریێ د هه‌ر فیلمەکێ دا بكه‌م و بۆ مه‌به‌ستەکا هوسا ده‌رهێنه‌ر داخوازێ ژ من بکەت،یا ئامادەمە وی کاری دووباره بكه‌مه‌ڤه.
جانێ دیارکر ژی ئه‌م فلمه هزرا من ب خوە بوویە و ل سه‌ر ئه‌ركێ خوە من پتری 200 هزار دۆلارا تێدا خه‌رج كرینه، هه‌روه‌سا زێدەتر ژ پێنج هزار كه‌سان پشکداری دڤی فلمی دا كریه و کارێ وێنەکرنێ ژ لایێ ده‌رهێنه‌رێ باكورێ كوردستانێ عومه‌ر عه‌لی ل نێزیك شنگال و مه‌خموور و كۆبانێ و قامیشلۆ و ل نێزیك مووسل و به‌رتله هاتینە گرتن.
دیسا جانێ گوتیە،هەکە من سەرکەفتن د ڤی فلمیدا ئینا، د دەمەکێ نێزیكدا دێ فلمەکێ سینه‌مایی ل سه‌ر داگیركرنا عه‌فرین به‌رهه‌م ئینم.
خانما سترانبێژ جانێ حه‌یران ل سالا 1979 ل باژێرێ ئامه‌دێ ژ دایکبوویە و نوکە ل وەلاتێ رووسیا دژیت.
نيشاندان