ئه‌ڤرۆ نیوز:

چاڤدێرێ سیاسى و ماموستایێ زانكۆیێ، د.عه‌بدولحه‌كیم خسرۆ راگه‌هاند، دو خالێن گرنگ یێن هه‌ین كو بووینه‌ ئه‌گه‌ر عیراق دانوستاندنان ل گه‌ل هه‌رێمێ ره‌ت بكه‌ت، یا ئێكێ نێزیكبوونا هه‌لبژارتنانه‌ و یا دوێ خرابیا ره‌وشا ئابووریا عیراقێ و گۆت” ئه‌گه‌ر به‌غدا به‌رده‌وام دانوستاندنان ل گه‌ل هه‌رێمێ ره‌ت بكه‌ت، دێ بۆچوونا ئه‌مریكا ل دۆر حه‌یده‌ر عه‌بادى یێ سه‌رۆك وه‌زیرێن عیراقێ هێته‌ گوهۆرین”.
د.عه‌بدولحه‌كیم دیاركر ژى ئه‌گه‌ر ئه‌مریكا ب رژدى بهێته‌ سه‌ر خه‌ت و ل گه‌ل فشارێن ئه‌لمانیا و فه‌ره‌نسا ل سه‌ر عیراقێ، وى ده‌مى دێ به‌غدا نه‌چار بیت دانوستاندنان ل گه‌ل هه‌رێمێ ئه‌نجام بده‌ت.

ئه‌ڤرۆ نیوز:
ل دووڤ نڤیسارا وه‌زاره‌تا ره‌وشه‌نبیرى و لاوان یا حوكمه‌تا هه‌رێما كوردستانێ بڕیار بوو 26/12/2017 په‌خشێ كه‌نالێ NRT هاتبا ده‌ستپێكرن، لێ ل گۆره‌ى پێزانینان 26/12/2017 وه‌زیرێ ره‌وشه‌نبیرى و لاوان د نڤیساره‌كا دى دا بڕیار دا داخستنا وى كه‌نالى بۆ ده‌مێ حه‌فتیه‌كا دى بهێته‌ درێژكرن.
ل دووڤ پێزانینێن دواڕۆژ، ئه‌گه‌رێ درێژكرنا بڕیارا داخستنا كه‌نالێ NRT بۆ وێ چه‌ندێ ڤه‌دگه‌ڕیت كو كه‌نالێ NRT جۆره‌ ئامیره‌كێ بۆ په‌خشى ئیناى كو چه‌ند كه‌نالێن دى ب وێ رێیێ بۆ هه‌یڤێن ده‌ستكرد په‌خش بكه‌ن.
دیسا ل دووڤ پێزانینان وى ئامیره‌ى مۆله‌ت ل وه‌زاره‌تێن ره‌وشه‌نبیرى و ناڤخوه‌ نینه‌، له‌و دڤێت NRT د ڤێ حه‌فتیا داخستنا وێ هاتیه‌ درێژكرن، مۆله‌تێ بۆ دانانا وى ئامیره‌ى وه‌ربگریت، دیسا ژ ئه‌گه‌رێ وى ئامیره‌ى چه‌ند كه‌نالێن دى كو په‌خشێ خوه‌ ب رێیا وى ئامیره‌ى كریه‌ رێكار ل هه‌مبه‌ر وان كه‌نالان ژى هێنه‌ وه‌رگرتن.

ئه‌ڤرۆ نیوز:

حه‌یده‌ر عه‌بادى سه‌رۆك وه‌زیرێن عیراقێ د گوتارا خوه‌ یا حه‌فتیانه‌ دا رازیبوونا خوه‌ نیشادا ب ئه‌نجامدانا دانوستاندنێن ل گه‌ل هه‌رێما كوردستانێ و گۆت” من داخواز ژ وه‌زاره‌تێن په‌یوه‌ندیدار یێن عیراقێ كریه‌ ده‌ست ب دانوستاندنان ل گه‌ل حوكمه‌تا هه‌رێما كوردستانێ بكه‌ن و من چ نه‌رازیبوونه‌ك د ڤى بیاڤى دا نینه‌ و بۆ ده‌ستپێكرنا دانوستاندنێن لژنێن ته‌كنیكى و پیشه‌یى ئه‌م یێن رێككه‌فتین هه‌تا كو دانوستاندنێن سیاسى ل دووڤ دا دهێن”.
حه‌یده‌ر عه‌بادى ئاماژه‌ ب وێ یه‌كێ كر كو ئه‌و یێ هویربینیێ بۆ لیستا مووچێن فه‌رمانبه‌رێن هه‌رێمێ دكه‌ن و گۆت” دڤێت هه‌رێم د پرسا نه‌فتێ دا ل گه‌ل به‌غدا یا هاریكار بیت و ئه‌و نه‌فتا هه‌رێم دفرۆشیت، تێرا مووچێ فه‌رمانبه‌رێن هه‌رێمێ دكه‌ت”.