ئەڤرۆ، باسم قاسم شنگالی

ئەڤرۆ شەمبيێ 10/2/2018ێ گۆرەکێ بکۆم ل ناڤ سەنتەرێ باژێرێ شنگالێ هاتە دیتن.

چالاکڤانێ مەدەنی جەلال حەسەن ژ شنگالێ بۆ ئەڤرۆ گۆت” ئەڤرۆ سپێدێ ل دەمێ پاقژکرنا بەرمایکێن شەرێ داعشێ ل  ناڤ سەنتەرێ باژێرێ شنگالێ ل نێزیکی رێڤەبەریا پۆلیسێن شنگالێ، گۆره‌كێ بكۆم هاتە دیتن و روفاتێن شەش کەسان دناڤ ئەوێ گۆرێ دانه‌”.

بتر گۆت” ئه‌و رۆفاتێن هاتينه‌ ديتن يێن وه‌لاتيێن ئێزدى نه‌ كو ل سه‌ر ده‌ستێ تيرۆرستێن داعشێ هاتينه‌ كوشتن پشتى ل 3/8/2014 شنگال داگيركرى”.

ئەڤرۆنیۆز، سالار دۆسكی:

شاندەكێ‌ پەرلەمانێ‌ كوردستانێ‌ كو ژ پێنچ فراكسۆنێن پەرلەمانی پێك دهێت، ژڤانە ئەڤرۆ  شه‌مبيێ10/2/2018 سەره‌دانا باژێرێ‌ عفرینێ‌ بكەت وبۆ ده‌مێ سێ‌ رۆژان ل وی باژێرێ‌ بمینيت.

سەهراب ميكائیل، ئەندامێ په‌رله‌مانێ كوردستانێ ژ‌ فراكسیۆنا ئێكگرتوو ئیسلامی كوردستان وئەندامێ‌ شاندێ‌ ناڤبری بۆ ئەڤرۆ نیۆز گۆت” شاندێ په‌رله‌مانى ئەڤرۆ دەمژمێر 3 ئێڤاری دێ‌ ل پێشابيرێ بن و پێك دهيت ژ ئەندامێن فراكسیۆنێن(پارتی، ئێكەتی، گۆران، ئێكگرتوو، حزبا شيوعی) و دێ‌ ‌ سێ‌ رۆژان ل عفرینێ‌ مینيت”.

سەهرابی ئەو ژی گۆت” فراكسیۆنێن پەرلەمانێ‌ كوردستانێ‌ ل گەل سەرۆكاتیا پەرلەمانێ‌ ‌ رێكەفتن كو شاندەكێ‌ پەرلەمانێ‌ سەره‌دانا عەفرینێ‌ بكەت و دێ‌ راپورتەكێ‌ بۆ سەرۆكاتیا پەرلەمانێ‌ كوردستانێ‌ بلند كەین”.

دياركر” مەرەم ژ چونا مە گەهاندنا هاریكاریێن وەزارەتا ساخلەمیا كوردستانێ‌ نە وەكو دەرمانان بگەهینين خەلكێ‌ عفرینێ‌ و پشتەڤانیە بۆ بەرخودانا خەلكێ‌ وێ وەك پراكتیك”.

هێشتا گۆت” چوونا مە هه‌كه‌ چ نەبیت، پشتەڤانیەكا مەعنەوی یە و دەنگێ‌ خوە دگەهینە جیهانێ‌ و هەموو ئالیان و وەلاتێن زلهێز كو خوە ل عفرینێ‌ بكەنە خودان و ئەڤێ‌ زورداریێ‌ ل سەر ڤی خەلكی ب راوستین، ئەم ئاگەهدارنین كو شاندەكێ‌ دی یێ‌ بیانی سەره‌دانا ڤی باژێری كربیت”.

ل دۆر ئه‌ندامێن شاندى، گۆت” شاند ژ پێنچ ئەندامێن پەرلەمانێ‌ كوردستانێ‌ پێك دهيت ئه‌وژى(عەلی هالۆ، سهراب مكائیل، شیركو ئەمین، عەباس فەتاح، ئەبو كاروان) كو نوونه‌رين پێنج فراكسيۆنێن په‌رله‌مانى نه‌، و چ رێكخراو و رۆژنامەڤان ل گەل نينن.