ئه‌ڤرۆ نیوز ، نه‌وزاد هلۆرى:
ئاشێ ته‌حینا رووبارێ ئامێدیێ ب كه‌ڤنترین ئاشێ ته‌حینێ دهێته‌ هژمارتن ل هه‌موو كوردستانێ كو ڤه‌دگه‌ریێت بوو 200 سالا به‌رى نها و هێشتا ژى یا به‌رده‌وامه‌ ، و د وه‌رزێ كارى دا رۆژانه‌ نێزیكێ 400 كیلویێن ته‌حینێ به‌رهه‌م دئینیت و ل بازارێن كوردستانێ دهێته‌ فروتن ، ل گور ئاخفتنێن خودانێ ئاشى ته‌حیا ئامێدیى َناهێته‌ ساخته‌كرن ژبه‌ركو شوونا ره‌وانه‌یێ بازارى بكه‌ن هه‌ر ل كارگه‌هێ دفروشن.

مێژویا درۆستكردنا ئاشێ ته‌حینا رووبارێ ئامێدیێ
موسته‌فا سه‌ید حه‌سه‌ن ئامێدى خودانێ ئاشى دیاركر كو ئاشى َوان بو 200 سالا به‌رى نها دزڤریت و بو ئه‌ڤرۆ نیوز گۆت : ( ئاشێ ته‌حینا رووبارێ ئامێدیێ ڤه‌دگه‌ریێت بو كه‌سه‌كێ كو دبێژنێ حه‌سه‌نێ مزیكێ و پشتى مرنا وى ژلایێ كه‌سه‌كێ دن بناڤێ سمێ هاتیه‌ پاراستن ، و دیڤدا بوو بابێ من سه‌ید حه‌سه‌ن مایه‌ و پشتى مرنا وى بوو من و برایێ من مایه‌ و هندى ئه‌ز ساخم ئه‌ڤ ئاشه‌ دێ هه‌ر هه‌بیت و كارێ خوه‌ بێ راوه‌ستان كه‌تن و نها به‌رهه‌م ئینانا ته‌حینێ 100% ژ كونجیا خومالى دهێته‌ درۆستكرن )

چه‌وانیا درۆستكردنا ته‌حینێ ل ئاشێ ناڤهاتى
ل گور چه‌وانیا درۆستكردنا ته‌حینێ گۆت : ( ده‌ستپێكێ دێ كونجیا ل بركه‌كا ئاڤێ هێنه‌ شووشتن و دیڤدا دێ د بركه‌كا دن دا سویركه‌ین و پاشى دێ كه‌ینه‌ به‌رمیله‌كا تایبه‌ت دا داكو تیڤلێ وێ لسه‌ر بچیت و ره‌نگێ وێ سپى بیت ، و دیڤدا دێ كه‌ینه‌ ته‌لیسان دا ئاڤا وێ ڤه‌وه‌ریێت و به‌رهه‌ڤ بن بو قه‌لاندنێ و پشتى قه‌لاندنێ دێ هێنه‌ ساركرن و سه‌ره‌دكرن و كه‌نه‌ د كوته‌لا ئاشى دا و ئاڤه‌كا ب هێز ب كوته‌لى َدا كه‌ین داكو په‌روانێن ئاشى بزڤرن و باگوردانى بزڤرینن )

جوداهیا ته‌حینا ئامێدیێ ژ ته‌حینێن دن
ل دور جوداهیا ته‌حینا ئامێدیێ ژ ته‌حینه‌كا دن خودانێ ئاشى گۆت : ( ئاشێ ته‌حینا ئامێدیێ ژ جوره‌كێ به‌رى هاتیه‌ درۆستكرن كو ل كوردستانێ گه‌له‌كێ كێمه‌ كو بتنێ ل ده‌ڤه‌را ئامێدیى َهه‌یه‌ و دیسان قه‌لاندنا كونجیان ژى ب دارایه‌ و سه‌دا سه‌د ژى یا خومالى یه‌ و كارمه‌ندێن وێ گه‌له‌ك د كه‌ڤنن و شاره‌زاو بسپوورن دوارێ ته‌حینێ دا و نها 5 فه‌رمانبه‌ر و ئه‌ز و برایێ خوه‌ كار تێدا دكه‌ین و ژلایى َخه‌لكى ته‌حینا مه‌ ناسیاره‌ و ئه‌و دیده‌ڤانن لسه‌ر تام و خوشیا ته‌حینا رووبارێ ئامێدیێ و ره‌نگێ وێ گه‌له‌ك جودایه‌ ژ ره‌نگێ ته‌حینه‌كا دن )

به‌رهه‌مێ ئاشى
موسته‌فایێ سه‌ید حه‌سه‌ن دیاركر ژى كو هه‌ر ل ده‌ستپێكا درۆستبوونا ئه‌ڤى ئاشى هه‌تا نها به‌رده‌وام ئاش كارێ خوه‌ دكه‌ت و گۆت : ( رۆژانه‌ پترى 400 كیلویێن ته‌حینێ دهێنه‌ به‌رهه‌م ئینان و هه‌موو ژى بو بازارێن نافخویێن كوردستانێ دهێنه‌ هنارتن ب تایبه‌تى ئامێدیێ ، به‌لێ به‌هرا پتریا ئاشا مه‌ هه‌ر ل باره‌گایێ ئاشى بخوه‌ دهێت فروتن و وه‌لاتى راسته‌وخوه‌ ل ڤێره‌ دكرن ژ به‌ركو ته‌حینا مه‌ هاتیه‌ ساخته‌كرن و به‌ر هنده‌كان به‌رزه‌بوویه‌ )

ئاریشا ئاشى
ل ڤان سالێن داویێ ئاڤا سیلاڤێ و رووبارێ ئامێدیێ گه‌له‌ك كێم بوویه‌ و بوویه‌ سه‌ده‌م كو د سالێ دا بتنێ ل وه‌رزێ زڤستانێ بوو ده‌مێ شه‌ش هه‌یڤان ئاش كارێ خوه‌ بكه‌ت و دڤى واریدا ناڤهاتى گۆت : ( ل دوماهیا بوهارێ هه‌تا هاڤین ب دوماهى دهێت واته‌ بوو ده‌مێ شه‌ش هه‌یڤان ئاڤا رووبارێ ئامێدیێ بوو سه‌ر بیستان و ره‌زێن ئامێدیێ دهێته‌ وه‌رگێران و نه‌چاردبین كو ده‌رگه‌هێ ئاشى بگرین هه‌تاكو بیستان ژ ئاڤدانێ دوماهیى بهێن و ئه‌ڤ یه‌ك ژى بوویه‌ سه‌ده‌م كو وه‌لاتى گازندا بكه‌ن ژ به‌ركو خه‌لكى َده‌ڤه‌را ئامێدیێ بتنى َحه‌ش ته‌حینا ئاشێ مه‌ دكه‌ن و فێر نینن ته‌حینه‌كا دن بخوون ، و دیسان ل ڤان سالێن دوماهیێ وه‌لاتى كێم كونجیان دچینن ئه‌ڤ یه‌ك ژى بوویه‌ سه‌ده‌م كو ده‌ستكه‌فتنا وان یا ب زه‌حمه‌ت بیت و دیسان خوێ گرانه‌ و ده‌سكه‌فتنا داران ژى ب زه‌حمه‌ت كه‌فتى یه‌ ئه‌ڤه‌ هه‌موو بووینه‌ سه‌ده‌م كو به‌رهه‌مئینانا ته‌حینێ كێم بیت و ئه‌گه‌ر ئاڤه‌كا باش هه‌بیت ئه‌م دكارین بێ راوه‌ستان هه‌موو ده‌مێ سالێ ته‌حینێ به‌هه‌م بینین )

پاشه‌رۆژا ئاشێ رووبارێ ئامێدیێ
موسته‌فا ئامێدى دیاركر ژى كو كو ژیانا وى و خێزانا وى گرێدایه‌ ب ئه‌ڤى ئاشیڤه‌ و گۆت : ( هه‌تا ئه‌زێ ساخم دێ ئه‌ڤ ئاشه‌ هه‌ریێ به‌رده‌وام بیت و ناخوازم پشتى مرنا من زارویێن من ئاشێ ته‌حینا رووبارێ ئامێدیێ بده‌ن كارى ژ به‌ركو ژیان دگه‌ل ئه‌ڤى ئاشى ژیانه‌ك گرانه‌ و زه‌حمه‌ته‌ ، و ژلایه‌كێ دنڤه‌ نها ل كوردستانێ ته‌حینا ساخته‌ بناڤێ ته‌حینا ئاشێ مه‌ دهێته‌ فروتن داكو ته‌حینا خوه‌ ب فروشتن ژلایێ رێژه‌ى و جوو و بهایى ڤه‌ ، و نها ئه‌م پێدحه‌سیێن كو هنده‌ك كه‌س و جه ڤێ یه‌كى َدكه‌ن و ئه‌گه‌ر به‌رده‌وام بن دێ سكالایێ لسه‌ر توماركه‌ین و وه‌كو چه‌وا به‌رى نها مه‌ سكالا دژى هنده‌كا بلندكریه‌ و مافێ خوه‌ لێوه‌گرتیه‌ و دیسان خه‌لكێ كوردستانێ و ده‌ڤه‌رێ پشتراست دكه‌ین كو ناهێلین ته‌حین بناڤێ ته‌حینا مه‌ بهێته‌ فروتن و نها مه‌ هه‌ماهه‌نگیه‌ك دگه‌ل قایمقامه‌تیا ئامێدیێ بوو ڤێ یه‌كێ هه‌یه‌ و ئه‌و بازارێن ته‌حینا مه‌ دهێته‌ فروتن دیارن و باشترین رێگى كو ته‌حیا نه‌ مه‌ نه‌هێته‌ ساخته‌كرن ئه‌وه‌ كو ئه‌م ته‌حیا خوه‌ ل باره‌گایێ ئاشتى دفروشین )