ئه‌ڤرۆنيۆز:
هه‌لبژارتيێ ئيتاليا د ياريا خوه دا ئه‌وا ل دره‌نگيا شه‌ڤێ ل سه‌ر ئه‌ردێ خوه ل گه‌ل هه‌لبژارتيێ سويد ئه‌نجامدداى، نه‌شيا بگه‌هيته مونديالا رۆسيا 2018 پشتى يارى ب وه‌كهه‌ڤيێ ب گۆله‌كێ بۆ هه‌ر تيمه‌كێ ب دووماهى هاتى.
د ياريا ئێكێ ئه‌وا ل 10 ڤێ مه‌هێ ل ستوكهولێ هاتيه كرن، سويد ب گۆله‌كێ بێ به‌رامبه‌ر ب سه‌ركه‌فتبوو.
ب ڤى ئه‌نجامێ سويد گه‌هشته مونديالا ته‌پا پێ ل رۆسيا 2018 بۆ جارا ئێكێ ژ سالا 2006، ديسا بۆ جارا ئێكێ د60 سالێن بۆرى دا ئيتاليا نه‌شيا بگه‌هيته مونديالێ.
ئه‌ڤرۆ نيوز:
مه‌سعود بارزانى په‌يامه‌كا هه‌ڤخه‌ميێ بۆ قوربانيێن بيڤه‌له‌رزا شه‌ڤا چوويى دهێنێريت و سه‌ره‌خوشيێ ل كه‌س و كاريێن قوربانيان و خه‌لكێ ده‌ڤه‌رێن زيانڤێكه‌فتى دكه‌ت.
سه‌رۆك بارزانى هيڤيا ساخبوونا بله‌ز بۆ بريندارێن روودانێ خواستيه و دياركريه: هه‌ڤخه‌ميا خوه دگه‌هينينه خه‌لكێ لێقه‌وماوى و زيانڤێكه‌فتى يێ هه‌ردو پارێزگه‌هێن كرماشان و هه‌له‌بجه.
ئەڤرۆ نیۆز،زنار تۆڤی:
ئەڤرۆ دووشەمبی،بەری کو سەرۆک کۆمارێ تورکیا،بچیتە رووسیا، ماوێ زێدەتر ژ دەمژمێرەکێ ل گەل سەرۆک وەزیرێن وەلاتێ خۆ کۆمبوویە، میدیایێن تورکیا بەحس ل هندێ دکەن، کو ئەگەرەکێ ب ھێز هەیە کو سەرۆک وەزیر دەست ژ کار بکێشیت.
ئەڤرۆ دوشەمبی 13/11/2017، رەجەب تەییب ئەردۆگان بەری گەشتا رووسیا دەست پێ بکەت، ماوێ سەعەت و نیڤا ل گەل بینالی یلدرم سەرۆک وەزیرێن تورکیا کۆمبوویە، تاکو نوکە نەهاتیە زانین کو ناڤەرۆکا وێ کۆمبوونێ چ تێدا بوویە.
ئەردۆگانی د ماوێ دو هەیڤاندا چەندین سەرۆک باژێر ل سەر کار لاداینە، ھەروەسا زۆربەیا بەرپرسێن لقێن ئاکپارتیێ ژی دوور خستینە،چەند رۆژێن دیتر دێ سەرۆک پەرلەمانێ تورکیا ژی گوهۆریت و کەسەکێ دیتر دێ هێتە جهێ وی ئەڤەژی ھەر ب فەرمانا ئەردۆگانیە.
چەند میدیایێن تورکیا بەحس ل گوهۆرینا یلدرمی کریە، وەک دیار ئەردۆگانی د وێ کۆمبوونێدا گوتیە یلدرمی دەست ژکار بکێشە،چونکی پێشتر ب ھەمان شێوە ئەحمەد داود ئۆغلو ژی گازیکریە و پاشی دەست ژکارکێشان پێ ئەنجام دایە.
پێ دچیت کو سەرەدانا یلدرمی بۆ ئەمریکا ئەردۆگان زۆر تورە کربیت، چونکی یلدرم بێی ھیچ ئەنجامەک ڤەگەریایه تورکیا و کەفتیە بەر رەخنەیێن گەلەک ژ میدیایێن تورکیا،هەروەسا هەکە یلدرم دەست ژکار بکێشیت، بەکر بۆزداخ پەیڤدارێ نوکە یێ حوکمەتا تورکیا ب ھێزترین کاندیدە بۆ جهگرتنا یلدرمی.
ئەڤرۆ نیۆز،زنار تۆڤی:
رێکخراوا تیرۆریستی یا قاعیدە گەفان ل رێکخراوا تیرۆریستی یا داعش دکەت و چەکدارێن وێ ب ” ژ دین دەرکەفتیێن بەغدادی“ ب ناڤ دکەت.
گرووپێ جوندولئیسلام یێ سەر بە قاعیدەڤە د تۆمارەکا دەنگیدا،کو ل تۆرێن کۆمەڵایەتی بەلاڤەکریە و راگەهاندیە،کو ”ژ دین دەرکەفتیێن بەغدادی“ بەردەوامن ژ دەستدرێژیان بۆ سەر موسلمانان ل نیمچەدوورگەیا سینا ل میسرێ.
جوندولئیسلام داخوازا پەشێمانبوونێ (تۆبە) و جۆدابوونێ ژ داعش و ژ چەکدارێن داعش کریە و هێرشێن هندێ لێکرینە،کو چەکدارێن جوندولئیسلام ”ل سینا دێ هەوە ژناڤ بەن“.
جوندولئیسلام ب ئێک ژ ترسناکترین رێکخراوا تیرۆریستی دهێتە دانان و بەشەکە ژ رێکخراوا تیرۆریستی یا قاعیدە.
ئه‌ڤرۆ نيوز:
جڤاتا وه‌زیرێن هه‌رێمێ راگه‌هاندنه‌ك به‌لاڤكر و ئاماژه ب وێ يه‌كێ كريه كو به‌غدا پێنگاڤێن نه‌دستوورى به‌رامبه‌ر كوردستانێ دهاڤێژيت
هه‌روه‌سا جڤاتا وه‌زیرێن هه‌رێمێ داخواز كريه هه‌موو كێشه ب رێیا دیلۆگێ د گه‌ل به‌غدایێ دا بهێن چاره‌كرن و حكومه‌تا ئیراقێ به‌حس ل پابه‌ندبوون ب ده‌ستوورى دكه‌ت، لێ ب كریار وه‌سان نینه.
هه‌روه‌سا ته‌كه‌زى ل ئێكرێزییا ناڤخوه‌یا هه‌رێما كوردستانێ كر
ئه‌ڤرۆنيۆز:
به‌رى ده‌مه‌كێ كێم هاريكاريێن توركيا بۆ زياندارێن بيڤه‌له‌رزا هه‌رێما كوردستانێ ب رێيا ده‌رگه‌هێ ئيبراهيم خه‌ليل يێ سنۆرى گه‌هشتنه هه‌ريمێ،
حوكمه‌تا توركيا ئه‌ڤرۆ دوشه‌مبى، راگه‌هاندبوو، هژماره‌كا كه‌لوپه‌لێن پێدڤى بۆ زياندارێن بيڤه‌له‌رزا باكوورێ عيراقێ (هه‌رێما كوردستانێ) هنارتينه.
جێگرێ سه‌رۆك وه‌زيرێن توركيا و په‌يڤدارێ حوكمه‌تا توركى، به‌كر بۆزداغ ل سه‌ر به‌رپه‌رێ خوه يێ تويته‌رى به‌لاڤكر، هزار چادر ژ ويلايه‌تا مۆشێ وچار هزار به‌ته‌نى ژ ويلايه‌تا دياربه‌كر يێن هاتينه هنارتن بۆ ده‌رگه‌هێ خابۆر يێ سنۆرى ل گه‌ل عيراقێ.
گۆت ژى، كۆمه‌لا هه‌يڤا سور يا توركى سێ هزار چادر ل گه‌ل كه‌لوپه‌لێن خوارنێ يێ پێدڤى ب شێوه‌كێ بله‌ز بۆ زيانڤه‌ێكه‌فتيێن بيڤه‌له‌رزێ هنارتينه.
ژلايێ خوه‌ڤه ئيسماعيل ياغجى به‌رپرسێ سه‌نته‌رێ هاوارهاتنێ ل كۆمه‌لا هه‌يڤا سۆر يا توركى ل ده‌ڤه‌را باشوورێ رۆژهه‌لاتا توركيا، هنارتنا هاريكاريێن مرۆڤايه‌تى بۆ عيراقێ پشتى بيڤه‌له‌رزا ل نێزيك هه‌له‌بجه داى راگه‌هاند و بۆ ئاژانسا (ئه‌نادۆل) يا توركى گۆت( هاريكارى پێكهاتبوون ژ سێ هزار چادران و10 هزار ته‌ختان و10 هزار به‌ته‌نى ولێنانگه‌هه‌كا گه‌رۆك).
دياركر ژى، كۆمه‌لا هه‌يڤا سۆر يا توركى يا ئاماديه بۆ هنارتنا هاريكاريێن زێده‌تر ل ده‌مێ پێدڤى.
سه‌رۆكێ حوكمه‌تا هه‌ريما كوردستانێ نێچيرڤان بارزانى دكونگرێ خوه يێ رۆژنامه‌ڤانێى دا ئه‌ڤرۆ ئێڤارى، سوپاسيا هه‌لويستێ حوكمه‌تا توركيا كر د پێشكێشكرنا هاريكاريان دا بۆ زياندارێن بيڤه‌له‌رزێ.
ئه‌ڤرۆنيۆز:
هه‌لبژارتيێ ئيتاليا ئه‌ڤ شه‌ڤه دێ ميهڤانداريا هه‌لبژارتيێ سويد ل ياريگه‌ها سان سيرۆ كه‌ت دچارچۆڤێ ياريا ڤه‌بر ژ پاشبه‌ندێ ئورۆپى بۆ گه‌هشتنێ بۆ مونديالا رۆسيا 2018.
دياريا ئێكێ دناڤبه‌را هه‌ردو هه‌لبژارتيان كو به‌رى كو ل 10 ڤێ مه‌هێ ل ستوكهولم هاتبو ئه‌نجامدان، هه‌لبژارتيێ سويد ب گۆله‌كێ بێ به‌رامبه‌ر سه‌ركه‌فتبوو، دڤێ ياريێ دا پێدڤيه ئيتاليا ب جوداهيا دو گۆلان ب سه‌ركه‌يت هه‌تا گه‌هشتنا خوه بۆ مونديالا رۆسيا مسوگه‌ر بكه‌ت.
هه‌كه يارى ب وه‌كهه‌ڤى ب دووماهى بهێت و ب چ ئه‌نجام، هه‌لبژارتيێ سويد دێ ب سه‌ركه‌يت بۆ مونديالێ، وهه‌كه ئيتاليا ب ئه‌نجامێ 1-0 ب سه‌ركه‌ڤيت، دێ هه‌ردو هه‌لبژارتى پنايێ به‌نه خۆله‌كێن زێده‌كرى ژ ياريێ وهه‌كه هه‌ر ئه‌نجام ب وى شێوه‌ى بمينيت، دێ په‌نا هێته برن بۆ لێدانێن سزايێ يێن ئێكلاكه‌ر.
سه‌ركه‌فتنا ئيتاليا ب ئه‌نجامێن دو گۆلان به‌رامبه‌ر گۆله‌كێ و سێ گۆلان به‌رامبه‌ر دو گۆلان وچار گۆلان به‌رامبه‌ر سێ گۆلان، دێ دمفايێ سويد دابيت و سه‌ركه‌ڤيت بۆ مونديالێ ژبه‌ر مفا وه‌رگرتنێ ژ هژمارتنا تۆماركرنا گۆله‌كێ د ياريگه‌ها تيما هه‌ڤرك دا ب دۆ گۆلان. بۆ گه‌هشتنا ئيتاليا ب مونديالا رۆسيا پێدڤيه ب ئێك ژ ڤان ئه‌نجامان ئه‌ڤ شه‌ڤه ب سه‌ركه‌ڤيت 2-0 و 3-0 و 3-1 و هه‌ر ئه‌نجامه‌كێ دى كو جوداهى تێدا دو گۆل بن.
ئيتاليا پشكدارى يا دهه‌موو مونديالێن ته‌پا پێ دا يا كرى تنێ هه‌ردو مونديالێن 1930 و1958 و چار جاران بوويه قاره‌مانا جيهانێ ئه‌وژى ل سالێن 1934، 1938، 1982، 2006 ول مونديالێن 1970 و1994 ل پلا دويێ هاتيه و ل مونديالا 1990 ل پلا سيێ هاتيه.
ئه‌ڤرۆنيۆز، نه‌وزاد:
شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ئه‌ڤرۆ دوشه‌مبى راگه‌هاند، هه‌رێما كوردستانێ دووپاتيێ ل چاره‌كرنا ئاريشان ل گه‌ل به‌غدا ب رێين ئاشتى دكه‌ت وب چو شێوه‌يان ژى قه‌بوول ناكه‌ت مافێن وێ يێن دستوورى بهێنه پيشێلكرن.
ئه‌ڤرۆ مه‌سرور بارزانى شيره‌تكارێ جڤاتا ئاسایشا هه‌رێما كوردستانێ پێشوازى ل رامون كاساس بالیوزێ ئێكه‌تیا ئوروپا ل عیراقێ كر و د كۆمبوونه‌كێ دا به‌حس ل داوى گورانكاریێن هه‌رێم و عیراق و جیهانێ كر.
بالیوزێ ئێكه‌تیا ئورۆپا ل عیراقێ پشته‌ڤانیا ئێكه‌تیا ئورۆپا بۆ چاره‌سه‌ركرنا ئاریشه‌یێن دناڤبه‌را هه‌رێما كوردستانێ و عیراقێ ل سه‌ر بنه‌مایێن د‌ستوورێ عیراقێ و ب رێیا دانوستاندنان دوپاتكر و خواست ژى كو ب زووترین ده‌م ئالوزیێن دناڤبه‌را به‌غدا و هه‌ولێرێ ب داوى بهێن و نه‌مینن.
ژلایێ خوڤه شيره‌تكارێ جڤاتا ئاسایشا هه‌رێما كوردستانێ به‌حس ل په‌یوه‌ندیێن له‌شكرى يێن هه‌رێما كوردستان و عیراقێ كر و گۆت: ( پێدڤیه ئاریشه‌یێن به‌غدا و هه‌ولێرێ ژ بنه‌ره‌ت دا بهێنه چاره‌سه‌ركرن داكو دچارچۆڤێ نه‌دادپه‌روه‌ریا دیرۆكى یا ل به‌رامبه‌ر گه‌لێ دهێنه‌كرن ده‌رباز بین و دووباره نه‌بن ڤه).
مه‌سرور بارزانى دوپات ل چاره‌سه‌ركرنا ئاریشه‌یێن هه‌ردوولایان ب رێێن ئاشتیانه‌كر و گۆت : ( هه‌رێما كوردستانێ قه‌بوول ناكه‌ت مافێن وێ یێن دستوورى بهێنه پێشيلكرن و دخوازین جڤاكێ نیڤده‌وله‌تى زێده‌تر و باشتر بهێنه سه‌ر خه‌ت ، داكو ئالوزیێن دناڤبه‌را هه‌ولێر و به‌غدا به‌ر ب ئالوزتر نه‌چن و بهێنه چاره‌سه‌ركرن).
ئه‌ڤرۆنيۆز:
ل 10 سالێن بۆرى هه‌ر ئێك ژ ئيرانێ وئه‌مريكا 70% بۆ 80% بازرگانيا فسته‌قان قورخكريه، ل 40 سالێن بۆرى دا به‌رهه‌مئێنه‌رێن فسته‌قان ژئه‌گه‌رێ سزايێن ل سه‌ر ئيرانێ ودانانا باج وگۆمركێ گرفتێن زۆر بۆ درستبووينه.
هه‌رچه‌نده فسته‌ق دناڤ ليستێن وان به‌رهه‌ماندا نه‌بوو كو سزايێن ئابوورى يێ ن ئه‌مريكا ڤه‌گريت، به‌لێ سزايێن دراڤى وبانكى كو ل سه‌ر ئيرانێ هاتبوونه سه‌پاندن، گه‌له‌ك گرفت بۆ جوتيار وبازرگانێن فسته‌قان دروست كربوون. به‌لێ پشتى رێككه‌فتنا ئه‌تۆمى دناڤبه‌را ئيرانێ و ئه‌مريكا وچار وه‌لاتێن ئورۆپى وراكرنا سزايان ل سه‌ر ئيرانێ، ره‌وشا بازرگانيا فسته‌قان گوهۆرينێن باش ب سه‌ردا هاتن وب ساناهى فسته‌قێن ئيرانى بۆ هه‌موو بازارێن جيهانێ دهێنه هنارتن.
فسته‌قا ئيرانى كو ب باشترين جۆرێ چه‌ره‌زاتان دهێته هژمارتن، سالا 2016 زێده‌تر ژ 248 ته‌ن ژێ هاتينه به‌رهه‌مئينان وبو 170 وه‌لاتان هاتينه هنارتن وداهاتێن وان ژى نێزيكى 3 مليار دۆلار بوون.
فسته‌قا ئيرانى ديرۆكه‌كا دێرين يا هه‌ى ودزڤريت بۆ به‌رى هزاران سالان، به‌لێ فسته‌قا ئه‌مريكى تۆڤێ وى ئيرانى يه و ل سالێن سيهان ژ چه‌رخێ بۆرى ده‌ست ب چاندنا وێ هاتيه كرن، به‌لێ ل سالا 1979 ژئه‌گه‌رێ كێشا كونسلگه‌ريا ئه‌مريكا ل ته‌هرانێ وتێكچوونا په‌يوه‌نديێن ئه‌مريكا وئيرانێ، چاندنێ فسته‌قێ ل ئه‌مريكا هاته ڤه‌ژاندن وجوتيارێن ويلايه‌تا كاليفۆرنيا چاندنا فسته‌قێ زێده‌تر لێكر.
ل سالا 2014 وژئه‌گه‌رێ شه‌پۆله‌كا گه‌رمێ نيڤا به‌رهه‌مێ فسته‌قێ يێ جوتيارين ئه‌مريكا ژناڤچوو ئه‌و چه‌نده ژى بۆ ئه‌گه‌ر كو ل سالا 2015 به‌رهه‌مێ وان ب شێوه‌كێ به‌رچاڤ بهێته خوار وداهاتێ وان بۆ كێم ببيت وبگه‌هيته 15 مليار دۆلاران .
ژبلى ئه‌مريكا، فسته‌قا ئيرانى ل وه‌لاتێن ئورۆپا ژى يا تووشى هه‌ڤركيا فسته‌قا يونانى وتوركى بووى، له‌وما ئيران نوكه يا ل دووڤ بازارێن دى دگه‌ريت وه‌كو چين ورۆسيا وهندستان ورۆژئاڤايا ناڤه‌راست.
ل دووڤ ئاماره‌كا وه‌زاره‌تا چاندنا ئيرانى، 20% ژ به‌رهه‌مێ فسته‌قێ ل ناڤخوه‌يا ئيرانێ دهێته بكارئينان وئه‌وێ دمينيت دهێته هنارتن بۆ ده‌رڤه‌ى ئيرانێ.
ئه‌ڤرۆنيۆز:
به‌رپه‌رسه‌كێ حوكمه‌تا عيراقێ دياركر بيڤه‌له‌رزا شه‌ڤا بۆرى چو كارتێكرن وزيان ل سكرێ مووسلێ نه‌كريه.
حه‌سه‌ن جه‌نابى وه‌زيرێ ژێده‌رێن ئاڤى ل عيراقێ ل سه‌ر به‌رپه‌رێ خوه يێ فيسبووكى به‌لاڤكر( سكرێ ده‌ربه‌نديخان نێزيكترين ده‌زگه‌ه بوو ژبنگه‌هێ بيڤه‌له‌رزێ وهنده‌ك كه‌ڤر وبه‌ر يێن كه‌فتينه دناڤ سكرى دا وهنده‌ك خانيێن نێزيكى وى يێن هه‌رفين).
گۆت ژى( سكرێ حه‌مرين دكه‌ڤيته بن سكرێ ده‌ربه‌نديخان، به‌لێ ره‌وشا وى سكرى يێ باشه وزيان نه‌گه‌هشتينێ).
ل دۆر سكرێ مووسلێ، وه‌زيرێ ژێده‌رێن ئاڤى ل عيراقێ به‌لاڤكريه كو چو كارتێكرن ل وى سكرى نه‌هاتيه كرن.
نيشاندان