ئه‌ڤرۆ نیوز، هلۆرى:
هونه‌رمه‌ندا نوو هاتیه د وارێ ستران و موزیكێ دا “دینا حه‌مۆ” یێ نووترین كلیپا خوه ب ناڤێ “شاهێ وه‌لات” به‌لاڤكر كو ئاوازا وێ ژ لایێ هه‌لكه‌وت زاهێر هاتیه‌دانان. كلیپا شاهێ وه‌لات كلیپه‌كا ئه‌ڤیندارى و رومانسه و ب شێوه و ستایله‌كێ سه‌رده‌م هاتیه چێكرن و تێكستا وێ ژ لایێ ده‌رباز یونس هاتیه درۆستكرن و محه‌مه‌د جه‌میل ژى كارێ ده‌رهێنانێ بو كریه.
ئه‌ڤرۆ نيوز، نيوار محه‌مه‌د سه‌ليم:
سه‌رۆك وه‌زيرێ به‌رێ يێ فره‌نسا مانوێل ڤالس ده‌ستێوه‌ردانێن ئيرانى ل عيراقێ ل سه‌ركيستێ كوردان وه‌سف كرن، كو هه‌ڤپه‌يمانێن ب هێز يێن فره‌نسانه و بێ ده‌نگى ل به‌رامبه‌ر ڤێ چه‌ندێ “تاوانه”.
د هه‌ڤپه‌يڤينه‌كێ دا كو شه‌فه‌ق نيوز به‌لاڤكريه بێ ئاماژه‌كرن بۆ ژێده‌رى سه‌رۆك وه‌زيرێ به‌رێ يێ فره‌نسا دبێژيت: “نه‌شێين رێ بده‌ين كورد بهێنه شكاندن، دشيانێن وان دايه باوه‌ريێ ب مه بينن، من هاژێ هه‌يه كو هێرش يێن ل سه‌ر وان هه‌ين و كورد يێن تووشى مه‌ترسيان بووين، به‌لێ دڤێت ئه‌و بزانن چاوان بيت رێ ناده‌ين كورد بشكێن”.
زێده‌تر دبێژيت: “ناما كوردان يا فره‌نسيانه، له‌ورا دڤێت ب هه‌موو ره‌نگان ئورۆپا پشته‌ڤانيا كوردان بكه‌ت، ژ به‌ر كو هێرشكرن ل سه‌ر كوردستانێ ئانكو هێرشكرن ل سه‌ر ئورۆپا، هه‌كه پێشمه‌رگه نه‌با سه‌ركه‌فتن ل سه‌ر داعش نه‌دهات”.
ڤالس ئاشكه‌را ژى كر كو بێده‌نگيا جڤاكا نێڤده‌وله‌تى ل دۆر ئه‌وا كورد نوكه تووش بوويێ جهێ مخابنى و دلگرانيێ يه، ژ لايێ ديده‌ڤانى بۆ رۆل و شيانێن وێره‌ك يێن سه‌رسام بوون ب كوردان و شه‌رڤانێن وان ڤه، ئه‌ڤ بێده‌نگيا نوكه هه‌ڤدژى به‌رژوه‌نديێن مه يێن ستراتيژى يه.
سه‌رۆك وه‌زيرێ به‌رێ يێ فره‌نسا گۆتژى: “هه‌كه مه چ هه‌لويست نه‌بن و رێ بده‌ين كو كوورد ل عيراقێ بشكێن يان رێ ب پێشڤه‌چوونێن ئيرانێ ل عيراقێ ل سه‌ر كيستێ نه‌ريتێن خوه يێن بلند و هه‌ڤالێن خوه يێن كورد بده‌ين، ئه‌ڤه تاوانه، ژ به‌ر هندێ ژى دڤێت ڤێ بێده‌نگيێ بشكێنين و داخواز ژ جڤاكا نێڤده‌وله‌تى بكه‌ين كو هه‌لويست هه‌بن، كار ل سه‌ر ب ئارمانج گه‌هاندنا داخوازيێن ره‌وا يێن ملله‌تێ كورد بكه‌ين”.
ئاشكه‌را ژى كر كو ئيرانێ دڤێت د رێيا ب كارئينانا ميليشياتێن شيعه دا، ژمارا خوه ل هه‌رێم و عيراق و سوريا و لوبنان زێده بكه‌ت، “ئارمانجا مه ژى ئورۆپا ژناڤبرنا داعش و تيرۆرێ يه، به‌لێ نابيت ل دۆر ئيرانێ هوسا ب ساناهى بهێينه خاپاندن، هه‌كه مه ده‌ستێوه‌ردان كر و رێ ب ڤێ هێرشا دوژمنكارى بۆ سه‌ر كوردان نه‌دا و ب له‌ز رێ ل هه‌مبه‌ر گرت، ئه‌ڤه ئانكو ئاراسته‌كرنا نامه‌كێ بۆ ئيرانێ ب ناڤه‌رۆكا ره‌تكرنا ده‌ستێوه‌ردانا وێ ل سه‌ر وێ هه‌رێمێ”.
ئه‌ڤرۆ نیوز:
وه‌زیرا كۆچ و كۆچبه‌ران یا دانیماركێ سه‌ره‌دانا ناڤه‌نده‌كا كۆچبه‌ران كر لێ كوته‌ك ب ره‌ڤا خوه را گه‌هشت.
ئینگه‌ر ستۆیبه‌رگێ سه‌ره‌دانا ناڤه‌نده‌كێ كر كو چل كۆچبه‌رێن مافێ په‌نابه‌رییا وان هاتییه ره‌ت كرن و ل به‌ندا ده‌رسنۆركرنێ نه دحه‌وینیت، لێ كۆچبه‌رێن تۆره بزاڤ كر به‌رهنگاری وه‌زیرێ ببن، زێره‌ڤان و پۆلیسێن دانیماركی هه‌ر زوو به‌ری هێرشی وێ بهێته كرن ده‌ستوه‌ردان كر و وه‌زیر ژ ناڤه‌ندێ ده‌رخست.
تشتێ كۆچبه‌ر هان داین كو ب وی ره‌نگی سه‌ره‌ده‌ریێ بكه‌ن ئه‌و بوو كو وه‌زیرێ بریار دا ژ وان چل كۆچبه‌ران بتنێ د گه‌ل خێزانه‌كا كورد كۆم ببیت و ل دووڤ دا ده‌نگۆ به‌لاڤ بوو كو دێ مافێ په‌نابه‌ریێ ب وی خێزانا كورد هێته دان.
كۆچبه‌ران نه‌رازیبوونا خوه ژ ده‌ركه‌فتنا ستۆیبه‌رگێ بێ دیتنا وان ده‌ربری و د گه‌ل پۆلیسان په‌ڤچوون چێبوون.
ئه‌ڤرۆ نيوز:
ژماره‌كا ميديايێن عيراقى به‌لگه‌نامه‌كا سه‌رۆكاتيا ئه‌ركانێن سۆپايێ عيراقێ به‌لاڤكريه كو بڕيارا سێداره‌دانێ بۆ مه‌هدى غه‌راوى فه‌رماندێ به‌رێ يێ ئۆپه‌راسيۆنێن نه‌ينه‌وا تێدا به‌لاڤكريه.
غه‌راوى ب هندێ هاتيه تۆمه‌تباركرن كو ل سالا 2014ێ فه‌رمانده‌يا ئۆپه‌راسيۆنێن نه‌ينه‌وا كريه و يێ تۆمه‌تباره ب راده‌ستكرنا وێ پاريزگه‌هێ ب چه‌كدارێن داعش، د ده‌مه‌كى دا كو نورى مالكى ل وى ده‌مى سه‌رۆك وه‌زيرێن عيراقێ بوو، چو لێپرسين ل سه‌ر وى بابه‌تى ل گه‌ل نه‌هاتيه كرن و فه‌رماندێ هێزێن چه‌كدار بوو ل وى سه‌رده‌مى.
ئەڤرۆ نیوز، ھلوری:
بەرەیێ تورکمانان ل کەرکووک دخوازن کو پوستێ پارێزگارێ کەرکووک ب وان بھێتەدان، بۆ ڤێ مەرەمێ ژی پرۆژەیەک بۆ ب رێڤەبرنا کارگێریا پارێزگەھا کەرکووک بەرھەڤکریە. پەرلەمانتارەکێ تورکمانان ژی دیارکر کو پرۆژەی چانسەکێ زۆر ھەیە ژ لایێ بەغدا و ئەنقەرە بھێتە پەسەنکرن.
دڤی واری دا “جاسم محەمەد” پەرلەمانتارێ تورکمان ل بارا ھورکاریێن پرۆژێ برێڤەبرنا پارێزگەھا کەرکووک ژ روویێ کارگێری ڤە دیارکر کو پرۆژەیێ ئیدارەدانا کەرکووک ژ لایێ تورکمانان ب ناڤێ پرۆژەیێ تورکمانان و گۆت: ( پرۆژەیێ تورکمانان چەنسه‌كێ زۆر ھەیە کو ژ لایێ بەغدا و ئەنقەرە بھێتە پەسەندکرن و د چەند رۆژێن داھاتی دا دێ ئێخینە بەردەستێ ئیرانێ و ئەمریکا و بەریتانیا ژی).
زێدەتر گۆت: (شاندەکێ تورکمانان پێشتر سەرەدانا تورکیا کریە و ل گەل ھەر ئێک ژ رەجەب تەیب ئەردوگان سەرۆک کومارێ تورکیا و بینالی یەلدرم سەروک وەزیرانێن تورکیا دانوستاندن ل سەر پرۆژەی کریە، داخواز ھاتیەکرن کو فەرماندەیەکێ سەربازی بۆ کەرکووکێ بھێتە دامەزراندن و لیوا عەلی فازل عیمران ببیتە فەرماندەیێ سەربازیێ کەرکووکێ ژ بەر کو ئەو نھا ئێکە ژ فەرماندەیێن ئوپەراسیوونێ، ھەر دیسان سێ جێگر ژی کو ژ کورد و عەرەب و تورکمانان پێکدھێن بۆ بھێنە دانان دا کو ھەڤکاریا وی بکەن بۆ ئارام راگرتن و ئیدارەدانا باژێرێ کەرکووکێ).
ناڤبری د درێژاھیا ئاخفتنێن خوه دا دیارکر ژی کو د پرۆژەی دا پێشنیاز ھاتیەکرن کو جڤاتا پارێزگەھا کەرکووک بھێتە ھەلوەشاندن دا کو چو ئاریشە نەھێنە روودان و ھە تاکو ھەلبژارتن ب سەرپەرشتیا نەتەوەیێن ئێگرتی بھێنەکرن، تورکمانان داخوازکریە کو پوشتێ پارێزگارێ کەرکووکێ ژی بۆ وان بیت و دەستھەلات ژی ل سەر بنەمایێ ٣٢% بو عەرەب و ٣٢% بو تورکمان و ٣٢% بو کوردان و ٤% بۆ پێکھاتەیێن مەسیحی بھێنەدان).
ئەڤرۆ نیوز، نەوزاد ھلۆری:
ل سەر جاددە و ھەند جھێن گشتی ل سەنتەرێ قەزا سوران جورە خوارنەک بناڤێ ” عەسەلیات ” دھێتە فروتن ، و رێڤەبەریا ساخلەمیا سوران ژی ھوشداریێ ژ خوارنا وێ ددەت ، و دھەمان دەم دا دیارکر ژی کو یێ بفروشیت دێ ھێتە سزادان.
مینا تەھا بەرپرسا راگەھاندنێ ل ساخلەمیا سوران دیارکر کو جورە خوارنەک بناڤێ عەسەلیات ل ھەند جھێن قەزا سوران دھێتە فروتن و کارتێکرن ل ساخلەمیا وەلاتیان دکەت و گۆت: ( ئەڤ خوارنە پێکدھێت ژ ماددەیێن شکولاتێن ترش و شیرین کو خوارنەکا دەستکردە و ل مالان دھێتە درۆستکرن و لسەر عەرەبانە و ھەند بازارێن سوران دھێتە فرۆتن و یا بەربەلاڤە ھەتا خوە ل قوتابخانان ژی دھێتە فروتن).
زێدەتر گۆت: ( ب گورەی ئەوان پشکنینێن کو ژلایێ رێڤەبەریا ساخلەمیا سوران لسەر ئەڤێ جورێ خوارنێ ھاتیەکرن، ب چو رەنگان ب کێری خوارنێ ناھێن و خوارنەکا ساخلەم نینە، د ھەمان دەم دا دبیتە سەدەما کێم خوینی، زکچوون، رەشان و کێم خوارن ب تایبەتی بۆ زارويان، ژ بەر ڤێ چه‌ندێ ئەم ب باش نابینین کو بھێتە خوارن و داخوازێ ل ھەموو دایبابان دکەین کو ھوشیارێ زارويێن خوە بن و ھەر کەسێ بخۆت دێ مەترسیێ ل سەر سالخەمیا خوە دروست کەت).
ھەر چەند ل دەمێن بوری ژ لایێ نوونەراتیا ساخلەمیا سوران و لژنا ئابووری یا سوران دەست ب سەر کومەکا خوارنا ناڤری گرتیە و ژ ناڤبریە، بەلێ ب کارئینانا وێ خوارێ یا بەردەوامە و دڤی واری دا ناڤبری گۆت: (دووڤچوونێن لژنا ئابووری و نونەراتیا ساخلەمیا سوران دێ د بەردەوام بن و ھەر کەسەکێ ئەڤێ جورێ خوارنێ بفروشیت دێ پێرابوونێن قانوونی بەرامبەر وان ھێنە وەرگرتن ژ بەر کو ئەڤ خوارنە، خوارنەکا نە دروستە و کارتێکرنێ ل ساخلەمیا گشتی یا وەلاتیان دکەت).
ئه‌ڤرۆ نيوز:
سه‌عدى ئه‌حمه‌د پيره، ئاخفتنكه‌رێ ب ناڤێ ئێكه‌تى نشتيمانى كوردستان راگه‌هاند كو ئه‌ڤرۆ جڤاتا سه‌ركرداتيا ئێكه‌تيێ ل سلێمانيێ دێ كۆم بيت و پرسێن په‌يوه‌ندى ب هه‌رێما كوردستانێ ل گه‌ل به‌غدا و پرسا گرێدانا كۆنگره‌ى و ئاشكه‌راكرنا ئه‌نجامێن ده‌سپێكى يێن ڤه‌كۆلينێن ل سه‌ر روودانێن كه‌ركووك و دياركرنا ژڤانێ كۆنگره‌ى كۆم بيت.
ئه‌ڤرۆ نيوز:
پشتى به‌رى چه‌ند رۆژان ئایفۆن X كه‌تيه بازارى، ب گرانترين ئايفون دهێته هژمارتن كو بهايێ وێ يا 256 گێگابایت ب هزار و 150 دولار ل بازارێن ئه‌مريكا دهێته فروتن، هه‌روه‌سا يا ٦٤ گێگابایت ب 999 دولاران دهێته فروتن.
ئه‌ڤ يافونه دوگما وێ يا پێشيێ هاتيه راكرن و شاشێ وێ ب تمامى يا ساده‌يه، هه‌روه‌سا خودان تايبه‌تمه‌نديا خواندنا دێمێ يه “FaceID”، شه‌حنا بێ وايره، و كامێرا وێ يا پێشيێ 12 ميگاپێكسله.
ئه‌ڤرۆ نیوز ، نه‌وزاد هلۆرى:
گه‌نجه‌كێ ناحیا شێلادزێ كه‌ناله‌كێ لوكالى ب كوالێتیا HD ب ناڤێ ” DEVER HD ” درۆستكر ، نها وه‌كو تێست رۆژانه 10 ده‌مژمێران په‌خش هه‌یه و بتنێ ل سنوورێ ده‌ڤه‌را بارزان و ده‌ڤه‌را ئامێدیێ دكێشیت.
ماهر شه‌عبان چێى رێڤه‌به‌ر و دامه‌زرێنه‌ر و داهێنانكارێ كه‌نالێ لوكالیێ ده‌ڤه‌ر HD ل شێلادزێ بو ئه‌ڤرۆ نیوز گۆت: ( هه‌ر ژ زاروكى من حه‌زا كارێ راگه‌هاندنێ هه‌بوویه ، پشتى كو ئه‌ز مه‌زن بووى من خواست كو ل كه‌ناله‌كێ راگه‌هاندنێ كار بكه‌م به‌لێ ده‌رفه‌ت چێنه‌بو ، ژبه‌رڤێ من هزركر كو دڤێت ئه‌ز كه‌ناله‌كێ لوكالى درۆست بكه‌م ، ده‌ستپێكى من دوكانه‌كا تایبه‌ت ب چێكرنه‌ڤا تێله‌ڤزیوون و سه‌ته‌لایت و ئامیرێن ئه‌لیكترونى ڤه‌كر و ب رێی اوێ دوكانى َمن شاره‌زایه‌كا باش په‌یداكر كوب كارم كه‌ناله‌كێ درۆست بكه‌م و ب رێڤه ببه‌م بێى كو ئاریشه‌یه‌ك بهێته پێش).
زێده‌تر گۆت: (نها كه‌نالێ ده‌ڤه‌ر د شه‌ڤ و رۆژان دا وه‌كو تیست 10 ده‌مژمێران په‌خش هه‌یه و ل ده‌ڤه‌را بارزان و ده‌ڤه‌را ئامێدیێ په‌خشێ وێ دهێته كێشان ، و كێشانا وێ ژى ب رێیا نالیسات و ب دانانا LMB ، هه‌تاكو ئه‌ز شیایم داهێنانێ بكه‌م و بگه‌همه ئه‌نجامه‌كێ باش من ده‌فته‌ره‌ك و 30 وه‌ره‌قه لێ مه‌زاخیتنه)
رێڤه‌به‌رێ كه‌نالێ ده‌ڤه‌رHD دیاركر ژى كو ئه‌و ب هه‌ڤكاریا ستافه‌كێ خوبه‌خش كار لسه‌ر په‌خشێ كه‌نالى دكه‌ن و گۆت ژى: ( كه‌نالێ ده‌ڤه‌ر HD كه‌ناله‌كێ جڤاكى و خێزانى یه و گرنگیێ ب پرسێن جڤاكى دده‌ت وه‌كو دراما و كلیپ و به‌رنامێن زاروكان و داهێنان و بابه‌تێن فه‌رهه‌نگى و نه‌ته‌وه‌یى به‌لاڤ دكه‌ین ، دیسان هه‌موو ئه‌وان چالاكیان ژى به‌لاڤ دكه‌ین ئه‌ڤێن كو ل سنوورێ هه‌ردوو ده‌ڤه‌رێن بارزان و ئامێدیێ دهێنه ئه‌نجامدان ب تایبه‌تى چالاكیێن نه‌ته‌وه‌یى)
ل هه‌ردوو ده‌ڤه‌رێن بارزان و ئامێدیێ نێزیكێ 150 هزار بینه‌ر هه‌نه ، و ڤه‌كرنا كه‌نالێ ده‌ڤه‌ر HD ل كومه‌لگه‌ها سیریێ یا سه‌ر ب ناحیا شێلادزى َدبیته سێیه‌م كه‌نالێ لوكالى ل سنوورێ قه‌زا ئامێدیێ كو ژ داهێنانێن گه‌نجێن ده‌ڤه‌رێ نه.
نيشاندان