ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 30ى نيسانا 2017ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1255 |
| 1 يۆرۆيێ ئه‌ورۆپى | 1355 |
| 1 ليرێ توركى | 345 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز:
ده‌ما چاكيته‌كى دكه‌ينه به‌ر خوه، پتريا جاران قولپا بنى دهێلينه ڤه‌كرى، به‌لێ ته هزرا وێ چه‌ندێ كريه كا بۆچى ئه‌ڤه بوويه مودێله‌ك و هه‌موو يا بنى دهێلنه ڤه‌كرى؟ ل ڤێره دێ سه‌رهاتيا بابه‌تى به‌رچاڤ كه‌ين، ئانكو نه ژ نشكه‌كێ ڤه هاتيه و سه‌رهاتيا خوه يا هه‌يى.
دبێژن ده‌ما شاهـ ئدواردێ حه‌فتێ ل ده‌سپێكا سالێن 1970ێ يان هاتيه سه‌ر ده‌سته‌لاتێ گه‌له‌ك يێ قه‌له‌و بوو و ده‌ما چاكيت دكرنه به‌ر خوه، كێشه تێدا هه‌بوون ژ به‌ر كێشا وى يا زێده.
شاهـ ئدوارد ژى ل سه‌ر هندێ راهات كو ده‌ما چاكيتا دكه‌ته به‌ر خوه قولپا خوه يا دووماهيێ نه‌گريت و ئه‌ڤه ب درێژاهيا ده‌مى وه‌كو نه‌ريته‌كى لێهات و ل جيهانێ هه‌موويێ نوكه بوويه نه‌ريت.
ئه‌ڤرۆ نيوز:
ئه‌ندامه‌كێ جڤاتا نشتيمانى يا گۆڕان دانپێدانێ ب وێ چه‌ندێ دكه‌ت كو چاكسازى ب وان لايه‌نێن سياسى ناهێته كرن يێن چو د ده‌ستى دا نه‌ين و ب وان پارتيان دهێته كرن يێن ده‌سته‌لات د ده‌ستى دا.
نزار مه‌حمود باژێرڤانێ بزاڤا گۆڕان ل هه‌له‌بچه‌يا شه‌هيد د داخۆيانيه‌كێ دا بۆ “مالپه‌رێ خه‌لك” ئاشكه‌را كر كو ل هه‌موو دونيايێ ئه‌و لايه‌نێ د حوكمه‌تێ دا نه‌يى گه‌له‌ك پرۆژه يێن هه‌ين، به‌لێ نه‌شێت چو تشته‌كى بكه‌ت، ب تنێ ئه‌و دشێن چاكسازيێ بكه‌ن يێن د ناڤا حوكمه‌تێ دا و هه‌موو جۆمگێن ده‌سته‌لاتێ د ناڤ ده‌ستێن وان دا.
ئه‌ڤه د ده‌مه‌كى دايه كو به‌رده‌وام بزاڤا گۆڕان بانگه‌شه‌يا وێ چه‌ندێ دكه‌ت كو ئه‌و دشێن چاكسازيان بكه‌ن، به‌لێ وه‌كو ديار هه‌تا نوكه ژى چو تشتێ وه‌سان نه‌كريه ل گه‌ل بانگه‌شه‌يا وان يا هه‌لبژارتنان ب گۆنجيت.
ئه‌ڤرۆ نيوز:
حوكمه‌تا هه‌رێما كوردستانێ بڕيار دا سوبه‌هى بكه‌ته بهێنڤه‌دانا فه‌رمى ب هه‌لكه‌فتا جه‌ژنا كرێكاران.
سه‌فين دزه‌يى ئاخفتنكه‌رێ ب ناڤێ حوكمه‌تا هه‌رێما كوردستانێ بۆ مالپه‌رێ فه‌رميێ حوكمه‌تا هه‌رێما كوردستانێ راگه‌هاند: “وه‌لاتيێن هه‌رێما كوردستان و كارمه‌ند و فه‌رمانبه‌ران ئاگه‌هدار دكه‌ين كو سوبه‌هى رۆژا دوشه‌مبى 1ى گۆلانا 2017ێ ل هه‌موو داموده‌زگه‌هێن حوكمه‌تێ بهێنڤه‌دانا فه‌رمى يه”.
گۆتژى: “پيرۆزيه‌كا گه‌رم ل كرێكارێن كوردستان و جيهانێ دكه‌ين و هيڤى خوازين جهێ سه‌ركه‌فتن و ب ده‌ستڤه‌ئينانا مافێن ره‌وا بۆ چينا كرێكاران ل هه‌رێما كوردستانێ دخوازين”.
ئەڤرۆ نيوز:
ل دووڤ ھندەک ڤەکولینان دیاردبیت ئەو کەسێن پشتی دەمژمێر شەشێ ئێڤاری خوارنێ دخوون ب رێژا 20% ژ کەسێن دی قەلەوترن، و ھندەک ژی دبێژن ئەڤ رێژە دگەھیتە 48% ھەکە خوارن چوو پشتی دەمژمێر 12ێ شەڤێ، ژلایێ زیان یان کارتێکرنێن وێ یێن ساخلەمیێ ژبلی قەلەویێ دبیتە ئەگەرێ زێدەبوونا ترشیاتیێ ل سەر مەعیدەی و دناڤ رووڤیکان دا دمینیت و ھەرس نابیت و ئەوژی دبنە ئەگەرێ وەرمینێ و نەئارامیا لەشی، ھەروەسا لەش ب گشتی بێزاردبیت و ئەوی کەسی شیان نابن ب دروستی ب کارێن خوە یێن رۆژێ راببیت. لەورا شیرەتا مە ئەوە کو پشتی خوارنێ ب کێماتی دڤێت مرۆڤ سێ دەمژمێران ھشیار بمینیت پاشی بنڤیت و ھندەک بزاڤێن سڤک بکەت بۆ ھەرسکرنا خوارنێ داکو چ ئاریشە ژێ پەیدانەبن.
ب رەنگەکێ گشتی ھندەک رێک یێت ھەین کو مرۆڤ دشێت خوە ژ خوارنێ ب شەڤێ ب پارێزیت ژوانژی پێدڤیە مرۆڤ دەمێن نڤستنا خوە رێک بێخیت: ھندی دونیا تاری ببیت مرۆڤ پتر مفای ژ ھورمونەکی وەردگریت کو دبێژنێ ( سیتروتونین) و ھەکە مرۆڤ نەنڤست نەشێت مفای ژێ ببینیت و دێ برسی بیت، لەورا باشترە ھەمی دەما خەوا مرۆڤی بەری دوازدەی شەڤێ بیت کو مخابن پتریا مە چ پێگیریێ پێ ناکەن. ژبەرکو ئەڤ ھورمونە ل تاریێ زێدەدبیت، لەورا یا باشترە گلوپێن رووناھیێ ل دەمێ نڤستنێ بھێنە ڤەمراندن.
ئەو کەسێن ب سێ دەمژمێرا کێمتر بەری نڤستنێ خوارنێ دخوون، کارتێکرن ل شیانێن لەشێ وان دھێتە کرن و سپێدەھیان زوو ژ خەو رانابن و کەسێن تەمبەل و نەچالاکن دکاری دا.
پێدڤیە مرۆڤ بزاڤێن خوە یێن شەڤێ ب گوھۆریت، ھەکە مرۆڤ ژوان کەسان بیت یێن کو ب شەڤێ ھەمیێ ل بەر تێلەفزیونێ دبورینیت و خوارنێ دخوت، باشترە مرۆڤ ل شوونا خوارنێ خو ب خواندنا پرتووک و گوڤاران ڤە مژوول بکەت داکو ھزر ل خوارنێ نەکەت.
ھەکە مرۆڤ نەچاربوو ب شەڤێ خوارنێ بخووت: پێدڤیە خوارنەکا سڤک بیت و ل جھەکێ بەرتەنک بیت نەکو ل سەر مێزا خوارنێ و سفرە بھێتە دانان، چونکو ھندی بەرفرەھتر بیت دێ پتر خوارن ھێتە خوارن.
ب شەڤێ ھەرسکرنا خوارنێ یا ب زەحمەتە، لەورا یا پێدڤیە خوارن بھێتە دابەشکرن ب درێژیا رۆژێ و سپێدی تێشت خوارن یا گرنگە و پاشی ل نیڤرۆ خوارنەکا سڤکتر بھێتە خوارن و بەری رۆژئاڤابوونێ ژی دروستە مروڤ خوارنەکا باش بخوت، یان یا تەمام بیت و ھەمی ژێدەرێن خوارنێ دناڤدا ھەبن، ب ڤێ رێکێ دێ بیتە ئەگەر مرۆڤ ب شەڤێ خوارنێ نەخوت،
ھندەک جارا ژی دەمێ مرۆڤ تێھنی دبیت، نیشانێن برسیبوونێ ژی دیاردبن، ل وی دەمی دڤێت مرۆڤ جوداھیێ دناڤبەرا برسیبوونێ و تێھنی بوونێ بزانیت و ب ڤەخوارنا گلاسەکێ ئاڤێ مرۆڤ دێ ڤێ چەندێ زانیت و ھەمی دەما دێ باشتر بیت دێ مرۆڤی ھەست ب برسیبوونێ کر خو چارێکەکێ بگریت پاشی خوارنێ بخوت ژبەرکو ئەڤەژی دبیتە رێکەک کو مرۆڤ گەلەک خوارنێ نەخوت.
ئەڤرۆ نیوز:
تایبەتمەندێ نەخۆشێن زارۆیاان و رێڤەبەرێ نەخۆشخانا ھێڤی یا زارۆیان ل دھۆکێ دیارکر شیرێ قودیکا دبیتە ئەگەرێ ژدەستدانا رێژەکا مەزن یا زارۆیێن ل ژێر پێنج سالیێ، پتریا دایکا ئەو رەوشەنبیریا ساخلەمیێ نینە ب شیردانا سروشتی زارۆیێ خوە خۆدان بکەن ھەتا ژیێ زارۆیێ وان دبیتە دوو سال پێدڤیە ژن شیرێ سینگێ خوە بداتە زارۆیێ.
د. نزار بکر، تایبەتمەندی نەخۆشێن زارۆیان و رێڤەبەرێ نەخۆشخانا ھێڤی یا زارۆیان دیارکر شیرێ قودیکا گەلەک مەترسیا ل سەر پاشەرۆژا زارۆیان ھەکە نوکە کارتیکرنا وێ دیارنەبیت ل پاشەرۆژی دێ کارتیکرنا خراب شیرێ قودیکا ل سەر جڤاکێ مە دیاربیت و پێدڤیە ھەموو ھەولدان بھێنە کرن بۆ نەھێلانا زێدەبوونا شیرێ قودیکا و دایک بھێنە ھشیارکرن ب ھیچ شیوەیەکێ شیرێ قودیکا بکارنەئینن بۆ خۆارنا زارۆیان.
ناڤبری ئەوژی گۆت:” دەمێ زارۆ دھێتە سەردونیای پێدڤیە دایک شیرێ خوە بتنێ بدەتە زارۆیێ خوە ھەتا ژیێ زارۆیێ وێ بن شەش ھەیڤ وپاشی خوارنێ بدەنە زارۆیێ خوە دگەل شیری دایکی ھەتا ژیێ زارۆیێ دبنە دو سال.
د. نزار دیارکر پشتی نەمانا شەرێ تیرۆرستێن داعشێ پێدڤیە شەری شیرێ قودیکا بھێتە کرن، چونکو راستی ژی شیرێ قودیکا مەترسیەکا زۆر مەزن ل سەر پاشەرۆژا جڤاکێ مە ھەیە مخابن گەلەک ژ دایکا ھوسا ھزر دکەن شیرێ قودیکا یێ باشە بۆ زارۆی، ژبەرکو زارۆ زوو پێ تێر دبیت و زوو برسی نابیت، ئەڤە ژی چونکو شیرێ قودیکا دمینت دناڤ رووڤیکێن زاروکی دا ئەو مانا شیرێ دناڤ رووڤیکێن زاروکی دا گەلەک مەترسیێ ل سەر گەشەکرنا زارۆی پەیدادکەت، شیرێ دایکی باشترین خۆارنە بۆ زارویان ھەر ژ ئێک رۆژی ھەتا شەش ھەیڤی وپشتی شەش ھەیڤسێ دگەل شیردانا سروشتی گەلەک باشترە دایک خۆارنێن تەمامکەر بدەتە زارویێ خوە ھەتا ژیێ وی دبنە دو سال باشترە دایک یا بەردەوام بیت ل سەر شیردانا سروشتی.
تایبەتمەندێ نەخۆشێن زارۆیان ئاشکرا کر کوشیرێ دایکَی زارۆی ژ زکچوونێ وھەودانا سەھا دپارێزت و ئەو نەخۆشی دبنە ئەگەرێن مرنا سەرەکی یا زاروکانە تایبەتی ژی دەمێ دایک شیرێ قودیکا بکاردئینت گیانی زاروکی دکەڤیتە مەترسیەکا مەزن دا ل پاشەرۆژی ئەو مەترسی دێ دیاربیت بتنێ شیردانا سروشتی ساخلەمیا زارۆیێ پێشڤە دبەت و دایک ژی دھێتە پاراستن ژ نەخۆشیا بتایبەتی ژی نەخۆشیا پەنچەشێرا ھێلدانا ومەمکی.
ئاماژە دا وێ چەندێ کو ھەر زاروکەکێ شیرێ دایکێ نەخۆت ل پاشەرۆژی ئەو زاروک تووشی نەخۆشیا شەکرێ و بێھنتەنگیێ و قەلەویێ دبیت، ژبەرکو شیرێ دایکێ بتنێ خۆارنا نموونە وتەمامکەرە بو وەرارا لەشی ومێشکێ زاروکان ئەو شیرێ قودیکا ئەڤ چەندە تێدا نینە و ھەموو ئێش و نەخۆشی نە بو زاروکی و کارتێکرنێ ل وەرارا وی دکەت.
د. نزار بکر زێدەتر گۆت زور یا گرنگە ھەموو دایک ل شەش ھەیڤێن ئێکێ ب تنێ شیرێ خوە بدانە زارۆیێن خوە بتایبەتی ژێ شیرێ ئێکێ یێ پشتی زارۆبوونێ ئەو شیرێ کەرەستەکێ نیسەکە و وەکو ڤاکسینەکێ بۆ پاراستنا زارۆی ژ نەخۆشیان.
ل دووماھیێ ئاشکرا کر خوە دوورکرن ژ مامک و بوتلێن دەستکرد زور یا گرنگە، چونکو ئەو نەخۆشیا ڤەدگوھێزن، گەلەک باشە شیرێ دەستکرد نەھێتە دان ب ھیچ شیوەیەکی بۆ زاروکان و ریکلاما شیرێ قودیکا ژی نەھێتە کرن و دایک بھێنە ھاندان شیرێ خوە بدەنە زاروکێ بتایبەتی ژی ل شەش ھەیڤێن ئێکێ ژ بوونا زارۆی.
ئه‌ڤرۆ نيوز:
رێڤەبەریا گشتی یا رەوشەنبیری و ھونەری ل دھۆکێ ب ھەماھەنگی دگەل کۆمەلا زانا بۆ چاڤدێریا زانستی دێ فیستیڤالا دویێ یا فراندنا فرۆکێن کاغەزی ل رۆژا 11ى گۆلانا2017ێ ل دەمژمێر 3:00 ئێڤاری ل سەرێ چیایێ زاوا ل دھۆکێ گێڕیت.
حەسەن عارف، بەرپرسێ پشکا چالاکیان ل رێڤەبەریا گشتی یا رەوشەنبیری و ھونەری ل دھۆکێ بۆ رۆژناما ئەڤرۆ ئاشکرا کر کو مەرەم ژ گێڕانا فیستیڤالا فراندنا فرۆکێن کاغەزی ئەوە کو شیانێن وان وەلاتیێن حەز ل سەر فراندنا فرۆکێن کاغەزی ھەین بەرچاڤ ببن و سەرەرایی ڤێ چەندێ ئەڤ فیستیڤالە دێ رێ یێ ل بەر وان کەسان خوەش کەت یێن کو داھێنانێ دکەن و گۆت: “رەنگە نوکە گەلەک گەنج ھەبن د ڤی بواری دا داھێنەر بن، بەلێ ھەتا نوکە چو دەلیڤە بوو پەیدانەببن داھێنانا خوە بەرچاڤ بکەت ژ بەر ڤێ چەندێ ئەڤ فیستیڤالە دێ بۆ وان گەنجان بیتە دەرگەھەک کو داھێنانا خوە بەرچاڤ بکەن”.
ناڤھاتی ئاماژە دا وێ چەندێ کو فیستیڤالا ئێکێ یا فراندنا فرۆکێن کاغەزی ل رۆژا 28ى گۆلانا 2016ێ ھاتبوو ئەنجامدان و ھژمارەکا مەزنا وەلاتیان تێدا پشکدارببوون و ئەو چەندە بوو وان بۆ پالدەرەک کو بەردەوامیێ بدەنە ڤێ فیستیڤالێ و گۆت: “ئەم پێشبینیێ دکەین کو ئەڤ سالە دێ پشکداریا وەلاتیان د فیستیڤالێ دا باشتر بیت”.
بەرپرسێ پشکا چالاکیان ل رێڤەبەریا گشتی یا رەوشەنبیری و ھونەری ل دھۆکێ دیار کر کو ھەر رەگەزەکێ د ھەر ژیەکی دا بیت مافێ پشکداریێ ب فرۆکەکا کاغەزی ھەیە، بەلێ ئەو کەسێ بڤێت بچیتە د بەریکانا ب دەستڤەئینانا خەلاتان دا پێدڤیە فرۆکا وی کارێ دەستی بیت و گۆت: “پێنج سەرکەفتیێن ئێکێ دێ ھێنە خەلاتکرن، بەلێ مە چەندین مەرج بۆ ب دەستڤەئینانا خەلاتان ھەنە ژ وان مەرجان قەبارێ مەزنێ فرۆکێ و بلنداھیا فرۆکێ و باشترین دیزاین، ھەر کەسێ ئەڤ مەرجە ژ ل دەف ھەبن دێ زێدەتر دەلیڤە بۆ ب دەستڤە ئینانا خەلاتی ھەبیت”.
ھەژی گۆتنێ یە کو ھەر وەلاتیەکێ حەزا پشکداریێ د فیستیڤالێ دا ھەبیت دشێت بۆ تۆمارکرنا ناڤێ خوە پەیوەندیێ ب ھژمارا 07504586382 یان 07504838839 بکەت ھەروەسا دشێت ب رێیا ویبسایتێ www.zafsc.org ناڤێ خوە تۆمار بکەت و دووماھی رۆژ بۆ تۆمارکرنا ناڤان 9ى گۆلانا 2017ێ یە.
ئەڤرۆ نيوز:
فەرماندێ لەشکریێ شنگالێ د ھەڤدیتنەکا تایبەت دا ل گەل ئاژانسا ئەنادۆل دبێژیت، بەھرا پتریا چەکدارێن ناڤا رێزێن پەکەکێ ب دووڤ دەلیڤەکێ دگەرن، داکو خوە قورتال بکەن، سەرەرای وێ چەندێ کو پەکەکێ سەرەدەریا خوە ل ھەمبەری وان چەکداران توندتر کریە، بەلێ گوھداریا وانا ناکەن و خوە رادەستی پێشمەرگەی دکەن.
ل گۆڕ پێزانینێن فەرماندە قاسم شەشۆی، ھەتا نوکە 800 چەکدارێن پەکەکێ خوە رادەستی پێشمەرگەی کرینە، بەھرا پتریا وانا کوردێن ئێزدی نە و ھندەک کەسێن دیار ل گەل ھەنە، یێن دیتر ژوان کوردا پێکدھێن یێن پەکەکێ ل سووریا و تورکیا کرینە چەکدارێن خوە، ھەتا نوکە 500 چەکدارێن ئێزدی رێزێن پەکەکێ بجە ھێلاینە و خولێن مەشق و راھێنانا لەشکرێ ل سکرێ مووسلێ ژ ئالیێ وەزارەتا پێشمەرگەی ڤە بۆ ھاتینە ڤەکرن، و ددەمەکێ نێزیک دا ئەرکێ خوەیێ پێشمەرگایەتی ل دەڤەرا شنگالێ دێ بینن.
ناڤبری ھەروەسا ل دووماھیێ ئاماژەدا ھندێ، ب بەردەوامی چەکدارێن پەکەکێ رێزێن وانا بجە دھێلن، و پرانیا وان چەکداران ل دووڤ دەلیڤەکێ دگەرن خوە ژ زۆرداریا پەکەکێ قورتال بکەن، وخوە بگەھیننە ھێزێن پێشمەرگەی.
قاسم شەشۆ ھەروەسا پێشبینی کر، کو دپاشەرۆژێ دا ژمارەکا ئێکجارا مەزن یا چەکدارێن پەکەکێ خوە رادەستی ھێزێن پێشمەرگەی بکەن، و خوەیاکر بتنێ 10% چەکدارێن ئێزدی دناڤا رێزێن پەکەکێ دا ماینە.
فەرماندێ لەشکری یێ شنگالێ ھەروەسا داخواز ژ چەکدارێن ئێزدی کر، یێن دناڤا رێزێن پەکەکێ دا ماین ڤەگەرن ناڤا رێزێن پێشمەرگەی، چونکە پەکەکە ژ بلی کێشا و داگیرکرن و دیکتاتوری و تۆپبارانکرنێ و ژناڤبرنێ چو دی بۆ شنگالێ نینە و ناکەت.
ئەڤرۆ نیوز:
پشتی پشتبەستا ب دو کەیسێن جودا جودا، دادگەھێ ئەندامێ جڤاتا نوونەرێن عیراقێ ھوشیار عەبدوللا ئاگەھدار کریە، کو ل ھەمبەری دادگەھێ ئامادەبیت بۆ ئێکلاکرنا وان ھەردو سکالایێن ل سەر ھاتینە تۆمارکرن، بەلێ ئەو ئەندامێ پەرلەمانی ھەتا نوکە ئامادەیی دادگەھێ نەبوویە، ددەمەکی دا ئێک ژوان کەیسان ھەر ژبەر ئەندام پەرلەمانیا وی یە.
مالپەرێ خواکورک چەند بەلگە دەستکەفتینە کو ئێک ژوان نڤیسارەکا فەرمیا دادگەھا ( کەفتنا سلێمانی/چوار) بۆ جڤاتا نوونەرێن عیراقێ ھاتیە ئاراستەکرن، ب ناڤونیشانێ ئاگەھدارکرن، نڤیسار ژمارە ( ١٩٢٢/ ج/ ٢٠١٢) ل رێککەفتی ٢٩ ئادارا سالا ٢٠١٥، دووپاتی ل سەر ناڤەرۆکا نڤیسارا مە و راگەھاندنا ئەناجامی دکەین، بەری رێککەفتی ٨ کانووا دویێ یا سلا ٢٠١٧، ب ئیمزایا دادوەر (جەمال سەدرەدین) ل دادگەھا (کەفتنا سلێمانیێ /چوار، ھاتیە کرن.
ھەروەسا د نڤیسارەکا دیتر دا کو ب ھەمان شێوەێ ئاگەھادارکرنێ ھاتیە، بۆ جڤاتا نوونەرێن عیراقێ رەوانەکرن، ب رێیا نڤیسینگەھا سلێمانیێ یا جڤاتا نوونەرێن عیراقێ، ب ژمارە ( ١٩٢٢/ج/ ٢٠١٢) رێککەفتی حەفتێ کانوونا ئێکێ یا سالا ٢٠١٤، تێدا ھاتیە داخوازکاری پێدڤیێن سکالایا ژمارە (١٩٢٢/ج/٢٠١٢) پێدڤی ب ئاگەھدارکرنێ یە، ھوشیار عەبدولل فەتاح، ب ناڤونیشانێ تۆمەتبار ل سکالایا سەری ھاتیە تۆمارکرن.
ل گۆڕ حوکمێ ماددێ نوو یێ قانوونا رۆژنامەڤانیا ژمارە ٣٥ یا سالا ٢٠٠٧ ێ یا ھەرێما کوردستانێ ل سەر بنەمایێ سکالایا (عەبدولەتیف محەمەد جەمال) پێدڤیە ل رێککەفتی دویێ ئادارێ سالا ٢٠١٥ ل ھەمبەری دادگەھێ ئامادەبی.
زێدەباری ئاماژەکرنا سکالایا روودانەکێ کو ل ١٩ تیرمەھا سالا ٢٠١١ ھاتیە روودان، ئانکو بەری ئەندامبوونا وی دناڤا جڤاتا نوونەرێن عیراقێ دا، لەورا دوارێ پارێزبەندیا پەرلەمانی دا مفادار نابیت، ل گۆڕ ماددێ ٦٢ یێ دستورێ کۆمارا عیراقێ، ئەڤ نیڤسارە ژی ژ ئالیێ دادوەر (جەمال سەدرەدین عەلی) ھاتیە ئیمزا کرن.
ھەروەسا ل گۆڕ پێزانینێن بدەست خواکورک کەفتین، ل دۆر ئاگەھدار کرنا ھەردو کەیسان ل جڤاتا نوونەرێن عیراقێ، کو ئاراممحەمەد جێگرێ دویێ سەرۆک پەرلەمانێ عیراقێ کو ئەندامێ بزاڤا گۆڕانێ یە رێگریێ بەرامبەری ئامادەبوونا ھوشیار عەبدوللای ل دادگەھێ دکەت.
نيشاندان
