ئەڤرۆ نیوز:
سیروان گەردی چاڤدێرەکێ سیاسی یە بۆ رۆژناما ئەڤرۆ دبێژیت، ڤێ جارێ ژی سەرەدانا سەرۆکێ ھەرێما کوردستانێ مەسعود بارزانی بۆ وەلاتێ تورکیا سەرەدانەکا پروتۆکولی بوویە و بەری نوکە بەرنامە بۆ ڤێ سەرەدانێ ھاتیە دارێژتن و د ڤێ سەرەدانێ ژی دا دێ بەحسێ دوماھی پێشھاتێن شەرێ مۆسل و دووماھیا داعشێ ل ڤی باژێری ھێتە بەحسکرن و ئەڤە خالەکا گرنگە د ناڤبەرا ھەرێما کوردستانێ و وەلاتێ تورکیا دا، ھەروەسا ھەبوونا وان پەیوەندیێن گرنگ یێن ئابووری یێن د ناڤبەرا ھەرێمێ و تورکیا دا دێ ھێنە گوتۆبێژکرن، کو پەیوەندیێن ئابووری یێن درێژ ھاتینە گرێدان د ناڤبەرا ھەردو لایەنان دا، بتایبەتی کو ھەرێما کوردستانێ ھێزا ھنارتنا نەفتێ ب رێیا تورکیا گرێدایە و ئەڤە ژی خالەکا سەرەکی یە بۆ ھەردو وەلاتان.
سیروان گەردی زێدەتر راگەھاند، د ڤێ سەرەدانێ دا سەرۆکێ ھەرێما کوردستانێ دێ چەند دەستکەفت ھەبن، ئێک ژ وان ژی دێ دوبارە دەستپێکرنا قۆناغا ئاشتیێ بیت دناڤبەرا حوکمەتا تورکیا و کوردان دا، ھەروەسا دێ ئێک ژ داخوازیێن سەرۆک بارزانی بۆ حوکمەتا تورکیا ئازاد کرنا ھەڤسەرۆکێ ھەدەپێ و پەرلەمانتارێن وان بیت، لەورا ژلایێ دبلۆماسی ڤە دەستکەفتەکێ مەزنە بۆ کوردان، کو تورکیا بۆ جارا ئێکێ ئالایێ کوردستانێ ل فرۆکخانا ئاتاتۆرکی ل ستەنبۆلێ بلند کریە، ئەڤە ژی دیرۆکەکە بۆ کوردستانێ و بۆ سەرۆک بارزانی ب خوە ژی، لەورا ژ رۆیێ ئابووری و جڤاکی و پروتۆکولی ڤە،ھەرێما کوردستانێ قۆناغەکا بلند دەربازکریە.
چاڤدێرێ سیاسی گۆت: دناڤ سیاسەتێ دا تشتێ مەحال نینە و ھەروەسا دناڤ سیاسەتێ دا سیاسەت ھەیە، ھەروەسا ھەکە تورکیا ل گەل سەربخوەیا ھەرێما کوردستانێ ژی نەبیت رێگریێ ژی لێ ناکەت، لەورا تورکیا ژێدەرەکێ گرنگە بۆ ھەرێما کوردستانێ، د ھەمان دەمدا ھەرێما کوردستانێ ژی ژێدەرەکێ گرنگە بۆ وەلاتێ تورکیا، بۆ گرێدانا وێ ب عێراقێ ڤە،ھەروەسا نوکە چاڤێ ھەموو جیھانێ ل سەر ھەرێما کوردستانێ یە،دیسا ئەڤ پەیوەندیێن د ناڤبەرا ھەرێمێ و تورکیا دا پەیوەندیەکا دولایەنی یە و بەرژەوەندیێن ھەردو لایەنا ل گەل ئێکن،لەورا تورکیا ب واقع دانپێدان ب ھەرێما کوردستانێ کریە و دێ پالپشتیا وێ ژی کەت، لەورا د ھەموو وان سەرەدانێن سەرۆک بارزانی ئەنجامداین ل جیھانێ تورکیا ژ ھەموو یان زێدەتر گرنگی دایە سەرۆک بارزانی، د وان پروتۆکولێن د ناڤبەرا ھەردو لایان ھاتینە ئەنجامدان، لێ نابیت ھەرێما کوردستانێ پشت بەستنێ ل سەر چو وەلاتان بکەت.
دیسا دڤێت کورد سیاسەتێ بکەن و پەیوەندیێن دبلۆماسی ب ھێز بکەن، پێدڤیە ئەو پەیوەندیێن ھەرێم ل گەل تورکیا گرێددەت، دڤێت ل سەر بنەمایەکێ روون و ئاشکرا بن و د بەرژەوەندیا ھەرێما کوردستانێ دابن و د درێژ بن، ھەروەسا پێدڤیە ل سەر ئاستێ نێڤدەولەتی ژی کار بۆ بھێتە کرن و دڤێت کۆپیەک ژ وان پروتۆکولێن دھێتە ئەنجامدان د ناڤبەرا ھەردو لایان دا بگەھیتە نەتەوێن ئێکگرتی، ژبەرکو ھەکە ئاریشەک بھێتە روودان دوان پروتوکۆلان دا، نەتەوێن ئێکگرتی دێ راستەوخۆ مایتێکرنێ تێدا بکەت بۆ چارەسەریێ،ل دووڤ یاسایێن نێڤدەولەتی.
ناڤھاتی ئەو ژی دیارکر:د سەرەدانێن بەری نوکە دا سەرۆکێ ھەرێما کوردستانێ بابەتێ سەربخوەیێ ل گەل تورکیا بەحسکریە،لێ ڤێ جارێ سەرۆک بارزانی ب ھیچ رەنگەکی ئەڤی بابەتی ل گەل تورکیا بەحس ناکەت و دوبارە ناکەتە ڤە،چونکی نوکە ھندەک بابەتێن گرنگتر ھەنە،ژ وان ژی شەرێ داعش و ئایندەیێ داعشێ پشتی شەرێ مۆسلێ، چونکی ئایندەیێ مۆسلێ بۆ ھەرێما کوردستانێ زۆر یێ گرنگە، چونکی گەلەک کورد لێ ھەنە و دەڤەرێن کوردانە و ھەروەسا دکەڤیتە سەر رووبارێ دیجلەی ژی، نوکە ئەڤان بابەتا گەلەک گرنگیا خوە ھەیە، دڤێت ئەم ئەڤان پرسان ئێکلا بکەین، ژنوو خوە بۆ دەولەتبوونێ بەرھەڤ بکەین، ھەروەسا دڤێت ئەم کورد ژی ھند بارێ سەرۆکێ ھەرێما گران نەکەین و نە بێژین دێ سەرۆک بارزانی ل نەورۆزێ دەولەتێ راگەھینیت، ئەڤە گەلەک بارێ سەرۆکێ ھەرێمێ گرانتر لێ دکەت، چونکی دەولەتا کوردستانێ دێ ل دەمێ خوە دا دروست بیت.
چاڤدێرەکێ سیاسی: دڤێت پەیوەندیێن ھەرێمێ ل گەل تورکیا د بەرژەوەندیا کوردستانێ دابن
نيشاندان
