بریاره‌ ل 23.01.2017 ل ئه‌ستانه‌ پایته‌ختێ كازاخستانێ كۆنفراسه‌ك ل نابه‌ینا هێزێن چه‌كدار یێن ئوپۆزسیۆنا سورى و حوكمه‌تا به‌شار ئه‌سه‌دى دا بهێته‌ ئه‌نجامدان بۆ ڤه‌دیتنا چاره‌ رێیه‌كێ كو دووماهیكه‌كێ بۆ كێشا سووریێ بینن و ئه‌ڤ كوشتو كوشتاره‌ ب داوى بهێت، یا سه‌یر ئه‌وه‌ بۆ ڤێ كۆنفراسێ ئوپۆزسیۆنا سیاسى یا نه‌چه‌كدار و هه‌روه‌سا په‌یده‌ ژى نه‌هاتیه‌ ڤه‌خاندن. نه‌ ڤه‌خاندنا ئوپۆزسیۆنا سیاسى كارێ مه‌ پێڤه‌ نینه‌ لێ نه‌ڤه‌خواندنا په‌یه‌دێ بۆ مه‌ جهێ پسیار و گومانێ یه‌ كو نهێنیه‌كا ڤه‌شارتى ل پشت ڤێ چه‌ندێ هه‌یه‌ كو ئێكسه‌ر په‌یوه‌ندى ب كێشا كوردى ل سووریێ و ده‌ڤه‌را رۆژهه‌لاتا ناڤین ب گشتى هه‌یه‌.
ئاماده‌كارێن ڤێ كۆنفراسێ(رۆسیا و توركیا) دبێژن: ئه‌ڤ كۆنفراسه‌ بزاڤه‌كه‌ بۆ بێده‌نگكرنا چه‌كیه‌ و پاشى دێ به‌حسێ باده‌كێن دن ل دووڤدا ئێته‌كرن! ئه‌رێ گه‌لۆ ما په‌یه‌ده‌ نه‌خودان هێزه‌كا چه‌كداره‌ و فه‌رمان و سه‌فه‌ربه‌رلك ل سه‌ر داعش و گرۆپێن ب تیرۆرست دهێنه‌ هه‌ژمارتن، نه‌راكریه‌ و هه‌تا ڕاده‌كى باش گورزێن گران لێ خستینه‌ و رۆژانه‌ ئه‌ردى ژ له‌پێن وان ده‌ردخینن!! ی‌و ڤێ نه‌ڤه‌خاندنێ په‌یه‌دێ خوه‌ ماتكریه‌ و كپێن ژ خوه‌ نه‌ئینایه‌، ئه‌گه‌رێن ڤێ بێده‌نگیا وێ گه‌لۆ چنه‌؟! ئه‌ڤ بێ هه‌لویستیه‌ وێ گومانێ بهێز دئێخیت ئه‌وا د ناڤ هێزێن كوردى دا دبه‌لاڤ كو په‌یه‌ده‌ پشكه‌كه‌ ژ رژێما ئه‌سه‌دى! ژبلى په‌یدابوونێ وێ یا سه‌یر و بله‌ز ل سه‌ر ئاستێ كوردستانێ وه‌ك هێزه‌ك بالاده‌ست و نه‌ روو بروو بوونا وێ ل گه‌ل رژێمێ و دبه‌رامبه‌ردا ل گه‌ل هێزێن كوردى نه‌كۆك و دگه‌ل حوكمه‌تا هه‌رێمێ ژى په‌یوه‌ندى و ره‌وش دیاره‌!!
كێشا سووریێ ژ كێشه‌كا ناڤخوه‌یى بوویه‌ كێشه‌كا ناڤده‌وله‌تى و كێنجا خوه‌ ل سه‌ر ئاسییشا ناڤده‌وله‌تى هشتیه‌ ژ زێده‌بوونا كریارێن تیرۆرستى هه‌تا بگه‌هته‌ كێشا ئاواره‌یان، لێ ژبه‌ر تێكهه‌لێشى و هه‌ڤبریا به‌رژه‌وه‌ندێن زلهێزێن جیهانێ و یێن ده‌ڤه‌رێ (تاگیرێن تائیفى و ئتنى) كێشا سووریێ ڤه‌كێشا و ژ لایه‌ن نه‌شیان ئه‌جندا خوه‌ بسه‌پینن و پێكڤه‌ كووس بوونه‌. ژبه‌ر ڤێ چه‌ندێ روسیا و توركیا پشتى ناكۆكیێن دژوار و گه‌له‌ك جاران نێزیكى روو بروو بوونا له‌شكرى دبوون ل سه‌ر ئاخا سووریێ(ئێخستنا فرۆكا جه‌نگى یا رۆسیا)، گه‌هشتنه‌ وێ باوه‌رێ فه‌ره‌ پێكڤه‌ كار بكه‌ن بۆ بێده‌نگكرنا چه‌كان، هه‌لبه‌ت هه‌ر ئێك ل گۆڕه‌ى به‌رژه‌وندێن خوه‌!
كێنجا توركیا و هه‌ڤالبه‌ندێن وێ (سعودیا، ئیمارات و قه‌ته‌ر) ل سه‌ر ته‌ڤایا گرۆپێن چه‌كدار و ئوپۆزسیۆنا سووریا دیاره‌ و هه‌روه‌سا كێنجا رۆسیا ل سه‌ر ئه‌سه‌دى دیاره‌ به‌لكو مانا ئه‌سه‌دى هه‌یا ئه‌ڤرۆ ب سه‌ده‌مێ پشته‌ڤانیا رۆسیایه‌، ژبه‌ر كێنجا ڤان هه‌ردوو هێزان پێشبینى دهێته‌كرن كو ئه‌ستانه‌ ببیته‌ قۆناغا دانوستاندێن رژد و ئه‌نجامێن ئه‌رێنى ژێ په‌یدا ببن.
د به‌رامبه‌ردا دێ چ هێته‌ شكه‌فا رۆژئاڤایێ كوردستانێ، سه‌ره‌ڕاى ڤێ قۆربانیا هه‌تا ئه‌ڤرۆ هاتیه‌دان و دژواریا شه‌رێ تیرۆرێ كو د به‌رژه‌وندا رژێما سوورى و رۆسیا و توركیایه‌ لێ دیسا رۆسیا چ هه‌لویست بۆ پشكداركرنا په‌یه‌دێ د كۆنفراسێ ئه‌ستانه‌ دا نیشان نه‌دا، ئه‌ڤه‌ژى وێ گومانێ پشتراست دكه‌ت كو تڤه‌نگا په‌یه‌دێ د به‌رژه‌وه‌ندیا رژێما سووری دایه‌ و تڤه‌نگه‌كا ب كرێ بوویه‌ و زلهێزێن جیهانێ ب ئۆینه‌كا تێكهه‌لكێش راچاندیه‌ و ب ساناهى كولاڤ كرنه‌ سه‌رێ په‌یه‌دێ.
وه‌ك دیار كۆنفراسێ ئه‌ستانه‌ بیێ پشكداریا كوردان دێ هێته‌ ئه‌نجامدان و هه‌ر بریاره‌كا ژێ بده‌ركه‌ڤیت دێ كێنجه‌كا نه‌رێنى ل سه‌ر ره‌وشا رۆژئاڤایێ كوردستانێ هێلێت ب ره‌نگه‌ك كاره‌ساتى. ئه‌ڤ كۆنفراسه‌ بیرا مرۆڤى ل رێككه‌فتنا جه‌زائیرێ 06.03.1975ێ دئینیت ده‌ما شاهێ ئیرانێ ل گه‌ل سه‌ددامى رێككه‌فتن كرى و بۆ مه‌ كوردان بۆ سه‌ده‌ما كاره‌ساتێن جه‌گبڕ، د وێ رێككه‌فتنێ دا ژى كورد نه‌ دئاماده‌ بوون وه‌سان دیاره‌ ل ئه‌ستانه‌ هه‌مان سیناریۆ دێ دووباره‌ بیت.

هه‌می د وه‌ستیاینه‌ هه‌ر كه‌سێ تو ببینی چ ل جادێ بیت یان ل ماله‌كێ یان هه‌تا ل سه‌ر مالپه‌رێن جڤاكی چ سوحبه‌ت د ده‌ڤی دا نینه‌ ژ بلی هندێ كو گازندا بكه‌ت و دێ ڤێرا چیت، حزب هۆسا و حوكمه‌ت هۆسا و فلانه‌ به‌رپرس هۆسا و بێڤانه‌ بازرگان هۆسا و جیرانێ من نان نینه‌ بخۆت و یێ دی د سه‌رسه‌رێ خوه‌ را دهاڤێژیت و نا راوه‌ستیت ژ گله‌ و گازندا هه‌تا كو دگه‌هیته‌ هندێ ل دووماهیێ دبێژیت (هه‌می سویچێن منن!!) و تشتێ سه‌یر ئه‌وه‌ نابێژیت كا بۆچی سویچێن وینه‌؟ چونكی ب خرابی به‌ حسێ هه‌میان دكر، لێ به‌حسێ خوه‌ و خرابیێن خوه‌ نه‌كرن و ته‌نێ گۆت هه‌می سویچێن وینه‌؟ باشه‌ بۆچی سویچێن وینه‌؟ ئه‌و ب خوه‌ نه‌ هند پسیاره‌كا بیۆلۆجی و سایكۆلجی و فه‌لسه‌فلۆجی و فیسبۆكلۆجی و كوردولۆجی یه‌، چونكی جامێری راست گۆت..ئاریشێن مه‌ هه‌می ژ وی ده‌ستپێ دكه‌ن وه‌كو وه‌لاتی.. زۆر جاران من یا خواندی و گولێبووی كو دڤێن حوكمه‌ت و حزبێن كوردستانێ مرۆڤ ئاڤا كربان به‌ری هندێ ئاڤاهیان ئاڤا بكه‌ن؟ لێ باشه‌ ئه‌ز هێشتا تێناگه‌هم بۆچی دڤێن ته‌نێ حزب و حوكمه‌ت مرۆڤان ئاڤا بكه‌ن؟ پا كارێ دایك و بابا و مال چیه‌؟ ئه‌م نابێژین قوتابخانان، چونكی ئه‌و ژی سه‌ر ب حزب و حوكمه‌تان ڤه‌نه‌، به‌لێ كا دێ وه‌رن دا ئه‌م ژی وه‌ كو وه‌لاتی پیچه‌كێ حه‌ق و حسابان ل گه‌ خوه‌ بكه‌ین، ما دیاره‌ حزب و حوكمه‌تێن مه‌ ب تنێ دخرابن؟ باشه‌ بۆچی كه‌س دانپێدانێ ب هندێ ناكه‌ت كو ئه‌م وه‌كو ده‌یك و باب و خویشك و برا وده‌وروبه‌رێن زارۆریان ژ وان حزب و حوكمه‌تان خرابترین؟ ئه‌ڤه‌ ئێك ژ كێماسیێن مه‌ یێن هه‌ره‌ مه‌زنن د ژیانێ دا، ئه‌م دانپێدانێ چ جاران ب هندێ ناكه‌ین كو ئه‌م نزانین زارۆیێن خوه‌ ب خودان بكه‌ین، ئه‌م سه‌ر ب چ لایه‌نێ سیاسی ڤه‌نه‌، دێ ئالایێ وی لاینی كه‌ینه‌ د ده‌ستێ زارۆیێ خوه‌ یێ نه‌فام دا و چرررق وێنه‌كی ل گه‌ ل گرین و د فیسبۆك و تۆیته‌ر و ئه‌نستگرام و سناب شاتی دا به‌لاڤ كه‌ین و بێژینه‌ خه‌لكی ئه‌ڤه‌ ژی كور یان كجا منه‌ یا ل سه‌ر هه‌مان رێكا من دچیت (كورێ بابێ خوه‌یه‌..كچا بابێ خوه‌یه‌) و پشتی ده‌مه‌كێ دێ ئه‌م ب خوه‌ ژ بیر كه‌ین كو مه‌ئه‌ و جۆره‌ وێنه‌ یێن به‌لاڤكرین و دێ زڤرین گازندا ژ حزب و حوكمه‌تێ كه‌ین و مووچه‌ نینه‌ وكه‌هره‌ب نینه‌ و گاز نینه‌ و قوره‌ده‌ر نینه‌؟ دێ باشه‌ قوربان ما تو هنده‌ گله‌ و گازندا ژ كێ دكه‌ی؟ ما كی ژ ته‌ دره‌وینتر هه‌یه‌ به‌ختێ خودێ؟ نێ تو تشته‌كی ل دیوانا دبێژی و تشته‌كێ دی د ژیانا خوه‌ دا دكه‌ی!! باشه‌ نوكه‌ وه‌كی دبێژن خه‌له‌لا ڤی ملله‌تی ژ كیێ یه‌؟ كا دێ وه‌رن دا پێكڤه‌ لێبگه‌رین و چاره‌سه‌ریێ بۆ ببینین، خه‌له‌ل ژ حزب و حوكمه‌تێ یه‌ یان ژ وه‌لاتی یه‌؟ هه‌كه‌ هه‌وه‌ راستی بڤێن ب دیتنا من ب خوه‌ ژ وه‌لاتی یه‌، به‌لێ تشتێ سه‌یر ئه‌وه‌ حزب و حكومه‌ت نه‌وێرن یان نه‌شێن ڤێ راستیێ بێژن، ب خاترا هه‌وه‌ گه‌لی ملله‌تێ وه‌ستیای ژ دره‌و.. دشێم سویند بخۆم خوه‌ ئێك ژ وه‌نه‌ وه‌ستیایه‌.. ئه‌و یێ وه‌ستیای یێ ژ هه‌وه‌ باوه‌ر بكه‌ت.

هه‌تا دوله‌ت باجا وه‌رنه‌گریت, هه‌تا وه‌لاتى باجا نه‌ده‌ت, هه‌تا سازێن تایبه‌ت ب باج و خه‌راجێ ڤه‌ (شه‌فاف) و زه‌لال نه‌بن ئه‌م بهایێ وه‌لاتیبوونێ نزانین, هه‌تا عه‌داله‌ته‌كا به‌رفرهه‌ ل سه‌ر بنه‌مایێن وه‌لاتیبوونێ دروست نه‌بیت, هه‌تا بانكێن كوردستانێ ب رۆلێ خوه‌ نه‌رابن, هه‌تا ل ڤى وه‌لاتى كار ب (فیشه‌ و بسۆلان) نه‌هێت كرن, هه‌تا ب عه‌داله‌ت و شه‌فا فانه‌ باج و خه‌راخ بێ واسته‌ و خاترانێ نه‌هێنه‌ وه‌رگرتن, ئه‌م چو وه‌خته‌كێ ژ قه‌یرانێ قورتال نابین, وه‌لاتێن خه‌لكێ هند سازى ئاڤا كرینه‌ كو چو وه‌لاتى و سه‌رمایه‌دار و سیاسى و كه‌سانێن گشتى نه‌شێن ژ باج دانێ بره‌ڤن, مه‌زنترین تاوان ئه‌وه‌ ل وه‌لاتێن خوه‌ رێكخستى دا كه‌سه‌ك ژ باجێ بره‌ڤیت, حوكمه‌تا كوردستانێ پشتى قه‌یرانێ گڤاشتى تازه‌ بیرا هندێ دكه‌ت هنده‌ك باج و خه‌راجا وه‌ربگریت “بیێ كو ئالیه‌ت و شه‌فافیه‌تا وێ پشتراست كه‌ت, تازه‌ حوكمه‌تا كوردستانێ گه‌هشتیه‌ وێ باوه‌ریێ كو سیسته‌ما ڤى وه‌لاتى بێ ناسنامه‌یه‌، نه‌ ئه‌م ئابووره‌كا ئیسلامینه‌ نه‌ سه‌رمایه‌دارینه‌ (رأسمالى) نه‌, نه‌سۆسیالین, كه‌س نزانیت ئه‌م ل كیژ قوتابخانا ئابوورى یان سیاسى دچین, ل هه‌مى وه‌لاتێن دونیایێ حوكمه‌ت (بابێ) خه‌لكى نینه‌ هه‌ر تشتى بێ به‌رامبه‌ر بده‌ت, حوكمه‌تا كوردستانێ ب هزاره‌ها مووچه‌یان بێ به‌رامبه‌ر (كه‌ده‌كێ یان به‌رهه‌مه‌كێ) دده‌ت؟! ب ده‌هان خزمه‌تگوزارى هه‌نه‌ پێدڤیه‌ وه‌لاتى باجا خوه‌ بده‌ت, لێ باج دان ب تنێ به‌س نینه‌, حوكمه‌ت نه‌چاره‌ هه‌مى وه‌لاتیێن خوه‌ (بیمه‌كا) ساخله‌مى و جڤاكى بۆ دابین بكه‌ت, قانوونا كارى ده‌ركه‌ڤیت و مووچه‌ ل گۆر قه‌بارێ سیكێ بێنه‌ دارشتن، هینگێ ب تنێ ره‌نگه‌ ژ باج و خه‌راجا حكومى میزانیا خوه‌ به‌ر پربین كه‌تن, به‌حسێ دانا پارێن (گلێشى) هه‌یه‌, ئه‌ڤه‌ بریاره‌كا دره‌نگه‌ لێ یا باشه‌ و ره‌نگه‌ وه‌لاتى ب بارگرانیه‌ك بزانیت، لێ هینگێ دى ب دل فره‌هی ڤه‌ ده‌ت وه‌ختا بزانیت ئه‌نجامێ وێ پشكداریا وى دكه‌هیته‌ كیڤه‌، چه‌ند كلێش دئێت راكرن ب چه‌ندێ؟ ل سه‌ر وه‌لاتیان رادوه‌ستێت, حوكمه‌تێ چ به‌رنامه‌ بۆ كێمكرنا گلێشى هه‌نه‌؟, یان سۆدوه‌رگرتنێ ژ به‌رمایكێن (شیشه‌ و لاستیك و فافۆن و…هتد) ئه‌ڤ وه‌لاته‌ پێدڤى ب قانوونێن زه‌لال و عادل هه‌یه‌, بهایێ گلیشى دڤێت ب عه‌داله‌ت بێته‌ وه‌رگرتن, وه‌ك پرسا كاره‌بێ نه‌بیت ب ده‌هان رێكان دزى ژێ بێته‌ كرن, دانا پارا بۆ حوكمه‌تێ ل وه‌لاتێ مه‌ هه‌رده‌م جهێ گومانێ یه‌, حوكمه‌ت پێدڤى ب هه‌وه‌كا (په‌یوه‌ندیێن گشتى) یه‌ هه‌تا باوه‌ریێ بۆ وه‌لاتى په‌یدا كه‌ت كو ب دانا باجێ پشكدارى پركرنا خه‌زینا وه‌لاتى دبیت و پاره‌ دبن مووچه‌ و خزمه‌ت, ئه‌و پاره‌ ل گۆر هنده‌ك رێنمایێن تایبه‌ت ناهێنه‌ (ته‌خشان و په‌خشان) كرن….. و السلام.